Colossians 1:1-29
1 Shí Paul, Diyin God bíniikʼehgo Jesus Christ yá yilʼaadii nishłíinii, áádóó nihitsilí Timothy,
2 Kalásiidi* Christ bee nihikʼisóó badaʼahódlíii, éí Diyin God bidiyı̨́ı̨́ʼ danilíinii bichʼįʼ naaltsoos íilnééh:
Diyin God nihiTaaʼ áádóó nihiBóhólníihii Jesus Christ bibee ajoobaʼ índa bibee achʼįʼ hózhǫ́ náhásdlı̨́įʼii yee nihikʼijidlíi doo.
Paul éí Kalásiidi daʼoodlání danilíinii yá sodilzin
3 NihiBóhólníihii Jesus Christ biTaaʼ, Diyin God, bichʼįʼ ahééh niidzingo tʼáá áłahjįʼ nihá sodiilzin.
4 Háálá Christ Jesus deinohdlą́ągo áádóó Diyin God bidiyı̨́ı̨́ʼ tʼáá ałtso ayóóʼádeínóhʼníigo baa hosidiitsʼą́ą́ʼ.
5 Háálá yáʼąąshdi Diyin God yee nihikʼidajidlíi dooleełii nihá hashtʼeʼnííníláii bíká nihił chodahooʼı̨́, éí tʼáá átséedi saad tʼáá aaníinii, haneʼ yáʼátʼéehii, bee baa dahosidootsʼą́ą́ʼ.
6 Diyin God bibee ajoobaʼ baa dahosidootsʼą́ą́ʼ índa tʼáá aaníí baa ákodanoozı̨́ı̨́ʼ bijı̨́ı̨́dóó haneʼ yáʼátʼéehii bee nihikʼidahodzisdliʼ. Áko kʼad nihokááʼ dineʼé ałdóʼ bitahgóó nidadidlaad áádóó bitsʼą́ą́dóó aneestʼąʼ nihwiileeh.
7 Díí Épafras, ayóóʼííníiʼníigo bił neiilʼaʼii, bitsʼą́ą́dóó bídahoołʼą́ą́ʼ. Éí baʼahódlíigo nihá Christ yá naalʼaʼí nilı̨́.
8 Épafras éí Níłchʼi Diyinii bee ayóóʼádaʼíínóhʼníigo yee nihił náhoolneʼ.
9 Éí tʼóó nihaa hosidiitsʼą́ą́ʼ yę́ędóó wóshdę́ę́ʼ tʼáadoo áhodiilzéhí nihá sodiilzin. Diyin God íinízinii hazhóʼó nihił béédahodoozįįł biniyé, bee hódzáanii áádóó Níłchʼi Diyinii kʼehgo akʼidiʼyiitįįh nihaididooʼáłígíí nihá baa náʼiikąąh.
10 Bóhólníihii bą́ą́h daʼnohłı̨́įgo tʼáá ałtsojįʼ bił dahonohshǫ́ǫgo dayínóhkáah dooígíí, áádóó naanish yáʼádaatʼéehii tʼáá ałtso bee nihitsʼą́ą́dóó aneestʼąʼ nidahwiileeh dooígíí, índa Diyin God béédahonohsingo bee náás danóohséeh dooleełígíí nihá bíká sodiilzin.
11 Diyin God yee ayóó átʼéego ayóó ábóodziilii bee danihidziil ánihiilaago tʼáá ałtsojįʼ hadaʼíínółní áádóó nízaadgóó dziilí bee hadaʼíínółníigo nihił dahózhǫ́ǫ doo biniyé sodiilzin.
12 ATaaʼ nilíinii bichʼįʼ ahééh danohsingo bidiyı̨́ı̨́ʼ adinídíín yiiʼ deíkáahii bííʼ dooleełii bił ałtsʼą́ą́ʼ daʼniilkʼiiz dooígíí bą́ą́h daʼniidlı̨́įgo ánihiilaa.
13 Chahałheeł bee bóhólníihii* bitsʼą́ą́dę́ę́ʼ háánihooʼnilgo, biYeʼ ayóóʼáyóʼníinii bee bóhólníihgo bił hazʼą́ąjįʼ anihííʼeezh.
14 Jesus bidił yee náánihiisniiʼgo nihibąąhági átʼéii nihá yóóʼiidííʼą́.
Háí Jesus átʼı̨́, áádóó haʼátʼíí binaanish
15 Jesus éí Diyin God doo yitʼíinii bináłtʼéii jílı̨́. Tʼáá ałtsoní ádaalyaii bítséedi hojílǫ́.
16 Háálá yádiłhił biyiʼdi áádóó nahasdzáán bikáaʼgi dahólóonii tʼáá ałtso, daatʼíinii índa doo daatʼíinii hó hwee Diyin God ádayiilaa, azhą́ naatʼáanii ayóó ádaatʼéii, éí doodaiiʼ bídahólníihii, éí doodaiiʼ naatʼáanii danilíinii, éí doodaiiʼ óhólnííh bee dahólóonii doo daatʼíinii tʼáá ałtso hó hwee Diyin God ádayiilaa. Tʼáá ałtsoní hwee ádaalyaa índa há ádabiʼdiilyaa.
17 Tʼáá ałtsoní bítséedi hojílǫ́, índa hó hwee tʼáá ałtsoní ahee daniłdzil.
18 Atsiitsʼiin éí atsʼíís yił ałhee hinánígi átʼéego Jesus éí daʼoodlání tʼáá łaʼ bizhiʼee bee bóhólnííh; hó bee hodeeyáii jílı̨́, áádóó tsʼídá tʼáá ałtsojįʼ aląąjįʼ dzizı̨́į doo biniyé aninéédę́ę́ʼ átsé hinááh nídzísdlı̨́įʼii jílı̨́.
19 Háálá aTaaʼ yee átʼéii tʼáá ałtso Jesus hwiiʼ hólónígíí éí aTaaʼ bił hóshǫ́.
20 Áko tsin ałnáoszid bąąhjįʼ dadziztsą́ą́dą́ą́ʼ hadił deeznaʼii bee Diyin God kʼé néistʼįįdgo nahasdzáán bikáaʼgi dahólóonii áádóó yádiłhił biyiʼdi dahólóonii tʼáá ałtso hwee Diyin God bichʼįʼ hózhǫ́ náhásdlı̨́ı̨́ʼ.
21 Áádóó nihí tʼah nahą́ądą́ą́ʼ doo yáʼátʼééh ádaahnííłgóó łah Diyin God bitsʼą́ądi naałdeeh nítʼééʼ, índa anaʼí kʼehgo haa nitsídaahkees nítʼééʼ, nidi kʼad nihił kʼé nídzístʼįįd.
22 Jesus bitsʼíís daaztsánígíí bee nihił kʼé nídzístʼįįd. Éí bąą dadinohyingo áádóó nihaʼátʼeʼ ádaadingo índa tʼáadoo bee nihikʼídahótʼahígóó Diyin God bidááhdę́ę́ʼ ninihizhdooʼish.
23 Tʼááłáhígi átʼéego danołdzilgo naʼnitin woodláanii bee nisoozı̨́įgo, áádóó haneʼ yáʼátʼéehii biyiʼdóó dasidootsʼą́ąʼii bee ił chohooʼíinii doo bitsʼánáhóhkááhgóó tʼéiyá ákódanohtʼée doo. Yá biyaagi nihokááʼ dineʼé tʼáadoo łaʼ doodaií díí haneʼ yáʼátʼéehii bee bił dahóóneʼ. Shí Paul díí baa hashneʼ doogo shiʼdoolʼaad.
Paul daʼoodlání yá naalʼaʼ
24 Nihá tiʼhooshníhígíí baa shił hózhǫ́. Háálá daʼoodlání tʼáá łaʼ bizhiʼee Christ bitsʼíís átʼéego tʼáá bí yá tiʼhoozniiʼ. Kʼad éí shí ałdóʼ bił ałtsʼą́ą́ʼ aniskʼiizgo daʼoodlání bá tiʼhooshnííh.
25 Éí lą́ą, Diyin God yinahazʼáanii bikʼehgo bizaad ánínígíí tʼáadoo łaʼ doodaí baa hodeeshnihgo nihá shaa yiszįįd.
26 Éí hoolzhishdę́ę́ʼ índa oochííłdę́ę́ʼ naʼnitin doo bééhózin da yę́ę átʼé, kʼad índa Diyin God bidiyı̨́ı̨́ʼ bichʼįʼ yitʼíní áyiilaa.
27 Éí Diyin God íiniizı̨́įʼgo dooládóʼ ayóó ánóolninii doo bééhózin da yę́ę ííshją́ą́ áyiilaa, doo Jew dineʼé danilíinii nidi tʼáá ałtso bá átʼé; éí Christ nihiiʼ hólǫ́ǫgo Diyin God yee ayóó átʼéii bił ałtsʼą́ą́ʼ daʼnołkʼiiz dooígíí bíká nihił chodahooʼíinii átʼé.
28 Áko Christ baa nahwiilneʼgo diné tʼááłáʼí nítínígo bidaʼiyiilníihgo bee hódzáanii tʼáá ałtso bee naniitin. Diné tʼááłáʼí nítínígo Christ yee nininísáanii danilı̨́įgo Diyin God bidááhdę́ę́ʼ nidahidiitʼish biniyé naniitin.
29 Jó, díí biniyé naashnish, Christ ayóó átʼéego shiyiʼdi naalnishgo bąą tʼáá íináwołí bee naasdzil.
Footnotes
^ Éfesas kin haalʼáádóó haʼaʼaahjígo tseebídiin daatsʼí tsin sitą́ądi Kalásii kin haalʼáá nítʼééʼ. Áadi Épafras nahasneʼgo oodlání áłah nádleehgo hahoolzhiizh.
^ Níłchʼi bidaʼiiníziinii binanitʼaʼí níigo ání.
