Colossians 2:1-23
2 Nihí áádóó Leiyodisíyagi kéédahatʼíinii índa tʼah doo dashiiłtséhígíí tʼáá ałtso bá tʼáá íináwołí bee naasdzilgo nihił béédahózin dooleeł nisin.
2 Ayóóʼádaʼahijóʼníigo łáʼí dajílı̨́įgo hajéí bee chánah dajílı̨́į doo, áádóó tʼáadoo anáhóótʼiʼí akʼidiʼyiitįįh bee hakʼihozhdoodliił, índa Diyin God [aTaaʼ] binahatʼaʼ doo bééhózin da yę́ę, éí Christ ááhyiłníigo baa ákodazdínóozįįł nisin.
3 Éí bee hódzáanii áádóó ił ééhózin daʼílíinii tʼáá ałtso hwee hólǫ́.
4 Diné łaʼda tʼáadoo naʼadloʼ saad yee yóóʼadanihiniiʼáhí doo biniyé kónihidishní.
5 Háálá azhą́ doo nihił honishłǫ́ǫ da nidi, tʼáá áłahjįʼ nihaa nitséskeesgo hashtʼehodítʼéego baa naahkaígíí, áádóó Christ baa dadzíínóhłíhígíí haleebee nisoozı̨́įgo shił bééhózingo baa shił hózhǫ́.
Christ dajoodlánígíí iiná yáʼátʼéehii bee jookah doo
6 Éí bąą Christ Jesus nihiBóhólníihii nihee dahazlı̨́ʼígi átʼéego baa dadzíínóhłíigo bee dayínóhkááh,
7 tʼáá nidanihidiʼneestą́ą́ʼ yę́ęgi átʼéego Christ biiʼ nihihétłʼóól danéeséehgo bikááʼdóó daʼohtłʼingo niheʼoodląʼ bee nihidahoníłdzil doo. Índa tʼáá íiyisí ahééh danohsin leʼ.
8 Łaʼda nihokááʼ dineʼé bił ééhózinígíí bikʼehgo akʼiʼdiitįįhii índa tʼáadoo nánídlínígóó anótʼááh nilíinii yee danihółnééh lágo. Jó, nihokááʼ dineʼé biʼéʼélʼįʼ yikʼehgo ádaatʼé, índa nihokááʼ dineʼé binahaghaʼ ałtah áátʼeełii yikʼehgo ádaatʼé, éí doo Christ yikʼehgóó ádaatʼée da.
9 Háálá Christ diné dzizlı̨́įʼgo Diyin God yee átʼéii tʼáá átʼé hwiiʼ hólǫ́,
10 áko hoł łáʼí nohłı̨́įgo ałtso hadanołtʼé ádanihiʼdiilyaa. Éí naatʼáanii danilíinii índa bídahólnííh danilíinii doo daatʼíinii nidi tʼáá ałtso bee hóhólnííh.
11 Hoł łáʼí nohłı̨́įgo nihąąh nídahineeshgizhígíí éí doo yílá bee nihąąh nídahineeshgizhii átʼée da, nidi tsʼísee kʼehgo bąąhági ádanohtʼéhígíí nahjįʼ kóyiilaago Christ bee nihąąh nídahineeshgizhii átʼé.
12 Háálá danihiʼdoolzı̨́ʼígíí bee hoł yóóʼádanihiʼdiilyaa; tʼáá éí ałdóʼ binahjįʼ dadziztsą́ą́dę́ę́ʼ Diyin God nááhodiisáii áyoolíiłii deinohdlą́ągo baa dadzíínóhłíhígíí binahjįʼ hoł náádanihidiʼyiiljééʼ.
13 Nihí ádił nidaʼayołzíhígíí bąą, áádóó nihaʼátʼeʼ doo nahjįʼ eelgizhígíí biniinaa dasinoonáá nítʼééʼ, nidi doo ákǫ́ǫ́ ádaahdzaa yę́ę tʼáá ałtso Diyin God nihá yóóʼiidííʼą́, áádóó Christ bił hinááh ánídanihiidlaa.
14 Jó, bikʼeh hoogáałii bikʼehgo nihikʼijįʼ naaltsoos siłtsoozígíí tsin ałnáoszid bąąhjįʼ Christ bił oʼoolkaalígíí bee Diyin God éí naaltsoos yikʼi níʼdeezoh.
15 Naatʼáanii danilíinii áádóó bídahólníihii doo daatʼíinii tʼáá ałtso Christ hakʼeh deesdlı̨́įʼgo ííshją́ą́ áyiilaa.
16 Éí bąą daadáanii áádóó doodlı̨́įłii, índa ádaʼazįįd áádóó dah néitı̨́įhgo nahadláii índa hááʼáyı̨́ı̨́h jı̨́ dólzinii* bidaʼołʼı̨́ nihiłníigo diné łaʼ yee nihaa náotʼı̨́ı̨́ʼ lágo.
17 Éidíyeeʼ tʼáá aaníinii baa hodoolzhishígíí bichahaʼoh tʼéiyá átʼé, nidi Christ tʼáá aaníinii nilı̨́.
18 Łaʼda ádaa hojoolbáʼí íʼdólzinii áádóó diyingo nidaalʼaʼí yichʼįʼ nahałáii tʼááká bikééʼ dah dadoohkááh yíilaʼ, háálá ákódaahtʼı̨́įgo Diyin God nihaidooléełii yitsʼánihidínóoʼah. Azhą́ tʼáadoo yooʼíní da nidi, Shił áhátʼı̨́, níigo éí tʼáá tsʼísee kʼehgo nitsíkeesgo tʼáadoo biniyéhígóó ádaa haʼniih.
19 Christ éí daʼoodlání tʼáá łaʼ bizhiʼee yá Atsiitsʼiin nilíinii doo hózhǫ́ ádíidééltʼiʼ da. Nidi atsʼíís ahadaditʼą́ą́góó atsʼid yee daʼahótąʼígi átʼéego nihí tʼáá łaʼ bizhiʼee Christ bitsʼíís daniidlı̨́įgo bídadíníitʼiʼ. Áko Diyin God nihiʼiisą́ągo niilzééł.
Christ bee iiná ániidíii
20 Nihokáaʼgi bee dahwéegháahii bitsʼąą Christ bił dasinoonáago bitsʼą́ą́dóó nihéédoochidgo, haʼátʼéegoshąʼ tʼahdii nihokááʼ dineʼé doo daʼoodlání kʼehgo dahinohnáago, díí bikʼeh hoogáałii bikʼeh dahonołʼı̨́:
21 díí doo bizhdeelchíid da, díí doo jiilįh da, éí doo nízhdiilée da?
22 Díí nihokááʼ dineʼé bibikʼeh óʼooʼníiłii índa binaʼnitin bikʼehgo ádaatʼé. Díí chodaoʼı̨́įgo ádaadįįł.
23 Díí bee nahazʼáanii tʼáá hó íiznízingo áádóó aʼohgo ájítʼé ízhʼdílʼı̨́įgo índa hatsʼíís bichʼįʼ nahojiiłnáago bee nahojiłáhígíí tʼóó tʼáá aaníí bee hojíyą́ nahojílin, nidi hatsʼíís yidánoolníinii doo niʼkwííléeh dago biniinaa doo ílı̨́į da.
Footnotes
^ Kalásii dineʼé éí Jew dineʼé binahaghaʼ áádóó doo Diyin God kʼehgo ádaatʼéii binahaghaʼ éí daʼoosdląądii ádeiłníigo, Tʼáá ałchʼishjígo nihił nidahohłá, daaní.
