Daniel 1:1-21
1 Júdah kéyahgi aláahgo naatʼáanii Jiihóíyakim nazhnitʼáago tááʼ náhááh góneʼ, Bábilandóó aláahgo naatʼáanii Nébukadnézzar nínáago Jerúsalem kin haalʼáii yináshzhiizh.
2 Áko Bóhólníihii éí Júdah dineʼé aláahgo binanitʼaʼí Jiihóíyakim wolyéii Nébukadnézzar yílákʼeidííʼą́, áádóó Diyin God bikin biiʼ sohodizindę́ę́ʼ łeetsʼaaʼ chodaoʼı̨́ı̨́ nítʼééʼ yę́ę łaʼ chʼíiníjaaʼ. Áko Sháínar kéyahgi bidiyin bidiʼníinii bikin bił hazʼą́ą́góó yiníjaaʼgo yódí bá hazʼą́ą́ góneʼ yah ayííjaaʼ.
3 Áádóó Áshpenaz joolyéii naalteʼ binanitʼaʼí jílı̨́įgo éí aláahgo naatʼáanii áhodííniid, Ízrel dineʼé bitahdóó tsíłkéí łaʼ áádóó aláahgo naatʼáanii bikʼéí łaʼ índa aląąjįʼ naazíinii baʼáłchíní łaʼ nídeididooʼish.
4 Ashiiké ániid nidaakaii doo tídílyaii, dabííyisii, tʼáá íiyisí hóyą́ągo daʼiichįįhii, átʼé hwiindzin bee dahólóonii, ídahoołʼaahgo akʼidadiʼyiitįįhii índa aláahgo naatʼáanii bighan hazʼą́ągi naʼalʼaʼ yídaneelʼáanii éí naalʼaʼí Áshpenaz joolyéii Kaldíya dineʼé bizaad bee akʼeʼalchíigo áádóó yee yádaałtiʼ doo biniyé yíneiniłtin doo.
5 Tʼáá ákwíí jı̨́ aláahgo naatʼáanii bichʼiyąʼ nídajidı̨́įhgo índa wáin néídlı̨́hígíí nídajidlı̨́įhgo haidiníʼą́, áko tʼáá ídahojiiłʼaahgo tááʼ nídoohah áádóó bikʼijįʼ nidajilʼaʼ doo biniyé aláahgo naatʼáanii bidááhdę́ę́ʼ nihizhdookahgo bá nidajilʼaʼ doo.
6 Júdah dineʼé bitahdóó ashiiké ániid nidaakaii nídiiʼnilígíí éí Daniel, Hananáíyah, Mísheiyel áádóó Azaráíyah daolyé.
7 Naalteʼ binanitʼaʼí éí daházhiʼ dooígíí yee dahóózhiʼ. Daniel éí Bélteshazar yee hóózhiʼ, Hananáíyah éí Shéídrak yee hóózhiʼ, Mísheiyel éí Mííshak yee hóózhiʼ índa Azaráíyah éí Abédniigo yee hóózhiʼ.
8 Nidi Daniel éí aláahgo naatʼáanii bichʼiyąʼ índa biwáin yidlánígíí tsʼídá doo bee ádizhdoolchxǫǫłgóó bee ádiih tsídzookééz.* Éí bąą tsʼídá doo bee ázhdidoolchxǫǫłgóó naaʼnil binanitʼaʼí bíjííkeed.
9 Áko Diyin God éí naaʼnil binanitʼaʼí Daniel yichʼooʼnéego índa yaa aʼááh nízingo áyiilaa.
10 Áko naaʼnil binanitʼaʼí éí Daniel áyidííniid, Aláahgo naatʼáanii shinanitʼaʼí nilíinii naʼałtsoʼ doogo áádóó niʼiiłdlą́ą doogo niidiníʼánígíí binásdzid, háálá ashiiké ániid nidaakaii biláahgo tʼóó naa hojoobáʼí yíleełgo niidoołtsééł, áko niniinaa aláahgo naatʼáanii bikʼehgo shitsiitsʼiin kʼídookał.
11 Ákohgo naaʼnil yaa áhályáanii jílı̨́įgo éí Daniel, Hananáíyah, Mísheiyel índa Azaráíyah baa áhojilyą́ą doo biniyé naaʼnil binanitʼaʼí nihoníłtíinii Daniel áhodííniid,
12 Hániʼdii naniseʼ bił daʼadáanii tʼéí deiidą́ągo índa tó tʼéí deiidlą́ągo neeznáá yiską́ąjįʼ ná nidaalʼaʼí niidlíinii haa daniitʼée doo nił bééhodoozįįł.
13 Áko nihí índa ashiiké ániid nidaakaii aláahgo naatʼáanii bichʼiyąʼ deiyáanii bił hanihidíísiłgo haa daniitʼéego nił bééhodoozįįł áádóó nił bééhoozinii bikʼehgo ná nidaalʼaʼí niidlíinii ánihíłʼı̨́į doo.
14 Ákódaaníigo hoł tʼáá ííkoh áádóó hoł bééhodoozįįł biniyé neeznáá yiską́ąjįʼ ákójiilaa.
15 Neeznáá yiską́ąjįʼ ashiiké ániid nidaakaii tʼáá ałtso aláahgo naatʼáanii bichʼiyąʼ deiyą́ągo nidaneelkʼaaígíí biláahgo yáʼádajítʼéehgo bił bééhoozin.
16 Ákohgo haa áhályáanii éí chʼiyáán áádóó wáin há nahjįʼ kóyiilaa, áko naniseʼ bił daʼadáanii dajiyą́ą doogo haidiníʼą́.
17 Díí ashiiké ániid nidaakaii dı̨́ltʼéhígíí éí ił ééhózin áádóó iichįįhgo óhooʼaah índa bee hódzáanii tʼáá ałtso Diyin God beidiníʼą́, áko Daniel éí ił áhátʼı̨́ índa naʼiigeeł tʼáá ałtso bikʼizhdiyiitįįh.
18 Ákohgo tʼáá ałtso aláahgo naatʼáanii tsʼídá yah ahoʼdiʼdootʼishgo yee hoołʼaʼii baa hoolzhiizhgo aláahgo naatʼáanii Nébukadnézzar bidááhdę́ę́ʼ naaʼnil binanitʼaʼí nihoníʼeezh.
19 Áádóó aláahgo naatʼáanii bił ałchʼįʼ hadadziisdzííʼ, áko Daniel, Hananáíyah, Mísheiyel áádóó Azaráíyah éí aláahgo naatʼáanii bidááhdę́ę́ʼ nidzizı̨́įgo ániid nidaakaii bitahdóó tsʼídá tʼáadoo hógi ádaatʼéhí da lá. Éí bąą nidajilʼaʼ doo biniyé aláahgo naatʼáanii bidááhdóó dadziizįʼgo bá dazdeesʼaʼ.
20 Áko hódzą́ áádóó akʼidiʼyiitįįh tʼáá ałtso aláahgo naatʼáanii hazhóʼó yínahódíłkidgo álílee kʼehgo ídaʼoołʼįįłii índa déestʼı̨́ı̨́ʼ ádeiłʼíinii aláahgo bee hóhólníihgo bił hazʼą́ą́dę́ę́ʼ nidahaaskaígíí tʼáá ałtso biláahgo neeznáadi ahą́ą́h nániiláago yáʼátʼéehgo akʼidazhdiitánígíí bił bééhoozin.
21 Áko Sáíras aláahgo naatʼáanii náádoodleełii átsé baa yíhááh biná Daniel nijilʼaʼ nítʼééʼ.
Footnotes
^ Mózes bibee hazʼáanii éí chʼiyáán łaʼ doo bidiʼdéhígíí doo yidą́ą́góó yee hasʼą́.
