Daniel 3:1-30
3 Aláahgo naatʼáanii Nébukadnézzar éí Bábilan nahósʼaʼgi honíteel Dúra hoolyéegi óola eʼelyaago áyiilaa; náhástʼédiin ké silá áníłnééz índa náhástʼéí ké silá áníldíilgo áyiilaa.
2 Ákohgo aláahgo naatʼáanii Nébukadnézzar éí aláahgo bídahólníihii, aląąjįʼ naazíinii, naatʼáanii danilíinii, ándahwiiʼaahii, yódí yaa ádahalyáanii, kótʼéego daaníinii, yah adaʼiiníiłii índa Bábilan kéyahdóó bídahólníihii nináneelʼą́ąjįʼ tsʼídá tʼáá ałtso nidahidookahgo eʼelyaii áyiilaago yiyiisįʼígíí doolzįhgi yaa áłah dooleeł biniyé bichʼįʼ haneʼ ájiilaa.
3 Ákohgo aláahgo bídahólníihii, aląąjįʼ naazíinii, naatʼáanii danilíinii, ándahwiiʼaahii, yódí yaa ádahalyáanii, kótʼéego daaníinii, yah adaʼiiníiłii índa bídahólníihii nináneelʼą́ąjįʼ tsʼídá tʼáá ałtso nidahaaskaigo aláahgo naatʼáanii Nébukadnézzar eʼelyaii áyiilaago yiyiisįʼígíí doolzįh biniyé hooʼaʼígíí yidááhdę́ę́ʼ deizįʼ.
4 Baa nidaʼdooldahii yaa chʼídahwiiʼaahii yéego ádadííniid, Nihí diné danohłíinii, ałʼąą dineʼé danohłíinii áádóó nihizaad ałʼąą átʼéego bee yádaałtiʼii, díí bee nihá haʼoodzííʼ:
5 Béésh dilní bee íʼdílzoołí áádóó tsin bee íʼdílzoołí áádóó tsin tłʼóół naakitsʼáadah bąąh daneelzheeʼgo bee nidaʼaʼnéii áádóó tsin tłʼóół bąąh daaltązhígíí áádóó tsin tłʼóół neeznáá bąąh daneelzheeʼgo bee nidaʼaʼnéii áádóó azis biiʼ náʼálzołii bee nidaʼaʼnéii índa sįįł ałʼąą íitsʼaʼgo bee hááhodidlaʼii tʼáá ałtso dasidootsʼą́ąʼgo nitsidadidoohgohgo aláahgo naatʼáanii Nébukadnézzar éí óola eʼelyaii yiyiisįʼígíí bichʼįʼ nidahodoohłaał.
6 Áko tʼáá háiida eʼelyaii doo bichʼįʼ nitsizhdinígoʼígíí índa doo bichʼįʼ nahojisáhígíí éí déédíljah góneʼ kǫʼ bitʼááh dahalchxííʼ góneʼ ahodiʼyooltłʼił.
7 Éí bąą diné tʼáá ałtso éí béésh dilní bee íʼdílzoołí, tsin bee íʼdílzoołí, tsin tłʼóół naakitsʼáadah bąąh daneelzheeʼgo bee nidaʼaʼnéii, tsin tłʼóół bąąh daaltązhígíí, tsin tłʼóół neeznáá bąąh daneelzheeʼgo bee nidaʼaʼnéii índa sįįł ałʼąą íitsʼaʼii tʼáá ałtso bee hahodíídláadgo deidiiztsʼą́ąʼgo diné tʼáá ałtso, ałʼąą dineʼé índa bizaad ałʼąą átʼéego yee yádaałtiʼii tʼáá ałtso yaa ádaadzaago óola eʼelyaii aláahgo naatʼáanii Nébukadnézzar yiyiisįʼígíí yichʼįʼ nidahasá.
8 Éí bąą tʼáá ákwii hoolzhishgo Kaldíya dineʼé łaʼ daaskaigo Jew dineʼé yikʼídahazʼah.
9 Áko aláahgo naatʼáanii Nébukadnézzar ádeidííniid, Aláahgo naatʼáanii nílíinii, hoolʼáágóó hinínáa leʼ.
10 Aláahgo naatʼáanii nílíinii, bee hazʼáanii íinilaii bikʼehgo béésh dilní bee íʼdílzoołí, tsin bee íʼdílzoołí, tsin tłʼóół naakitsʼáadah bąąh daneelzheeʼgo bee nidaʼaʼnéii, tsin tłʼóół bąąh daaltązhígíí, tsin tłʼóół neeznáá bąąh daneelzheeʼgo bee nidaʼaʼnéii, azis biiʼ náʼálzołii bee nidaʼaʼnéii índa sįįł ałʼąą íitsʼaʼgo tʼáá ałtso bee hááhodidlaʼgo éí diné tʼáá ałtso deidiitsʼı̨́įhgo nitsidadidoogohgo óola eʼelyaii yichʼįʼ nidahodoołaał.
11 Áko tʼáá háiida eʼelyaii tʼáadoo bichʼįʼ nitsizhdinígoʼígíí índa doo bichʼįʼ nahojisáhígíí éí déédíljah góneʼ kǫʼ bitʼááh dahalchxíiʼjįʼ ahodiʼyooltłʼił, diníi niʼ.
12 Bábilan nahósʼaʼgi diné yindantʼáa doo biniyé Jew dineʼé éí Shéídrak áádóó Mííshak índa Abédniigo níínínil; aláahgo naatʼáanii nílíinii, bee háínídzíʼígíí díí diné doo dayíistsʼą́ąʼ da, nidiyin danilíinii doo yá nidaalʼaʼ da índa óola eʼelyaii biinisįʼii doo yichʼįʼ nidahałáa da.
13 Ákohgo Nébukadnézzar tʼáá íiyisí bił hazhchxihgo éí Shéídrak áádóó Mííshak índa Abédniigo nídootʼishgo yee haadzííʼ áádóó éí diné nídeizhʼeezhgo aláahgo naatʼáanii bidááhdóó nideizhʼeezh.
14 Nébukadnézzar áhodííniid, Shéídrak, Mííshak áádóó Abédniigo, tʼáásh aaníí shidiyin danilíinii doo bá nidaałʼaʼ da índa óola eʼelyaii biisįʼii doo bichʼįʼ nidahohłáa da?
15 Kʼad béésh dilní bee íʼdílzoołí, tsin bee íʼdílzoołí, tsin tłʼóół naakitsʼáadah bąąh daneelzheeʼgo bee nidaʼaʼnéii, tsin tłʼóół bąąh daaltązhígíí, tsin tłʼóół neeznáá bąąh daneelzheeʼgo bee nidaʼaʼnéii, azis biiʼ náʼálzołii bee nidaʼaʼnéii índa sįįł ałʼąą íitsʼaʼgo tʼáá ałtso bee hááhodidlaʼii dasidootsʼą́ąʼgo yaa ádadoohʼnííł biniyé hashtʼeʼadadoołyaago eʼelyaii biisįʼii bichʼįʼ nidahodoohłaałgo éí yáʼátʼéeh doo, nidi doo bichʼįʼ nidahosoosáágóó tʼáá áko déédíljah góneʼ kǫʼ bitʼááh dahalchxííʼ góneʼ anihidiʼyooltłʼił, áko háí diyin shı̨́įshąʼ shílákʼeedóó yisdánihidoonił?
16 Shéídrak áádóó Mííshak índa Abédniigo éí aláahgo naatʼáanii ádeidííniid, Nébukadnézzar yinílyéii, ákóhodooníłígíí biniinaa tʼáadoo adandooʼneʼgi da.
17 Déédíljah góneʼ kǫʼ bitʼááh dahalchxííʼ góneʼ adanihisoołtłʼíidgo nihiDiyin God bá nideiilʼaʼígíí kǫʼ bitsʼą́ąjįʼ yisdánihidooniłgo yíneelʼą́. Áko aláahgo naatʼáanii nílíinii, ni nidi nílákʼeedóó yisdánihidooniłgo yíneelʼą́.
18 Azhą́ doo yisdánihíínil da nidi, aláahgo naatʼáanii nílíinii, nidiyin danilíinii doo bá nidadiilʼaał da áádóó óola eʼelyaii biinisįʼii doo bichʼįʼ nidahodiidlaałgóó nił bééhodoozįįł.
19 Ákohgo Nébukadnézzar tʼáá íiyisí báhóóchįįdgo Shéídrak áádóó Mííshak índa Abédniigo yichʼįʼ doo ákódzaa da. Éí bąą déédíljah góyaa tsostsʼidi ahą́ą́h nániilá bíighahgo hodínóolchxih, níigo yee haadzííʼ.
20 Áko bisiláo bitahdę́ę́ʼ diné ayóó ádabóodziilii éí Shéídrak áádóó Mííshak índa Abédniigo yidaʼdootłʼóołgo déédíljah góneʼ kǫʼ bitʼááh dahalchxííʼ góneʼ adeidiyoołtłʼił biniyé yichʼįʼ haadzííʼ.
21 Ákohgo díí diné dahaʼéénééz áádóó ayaajįʼ ééʼ áádóó dahachʼahda índa náánáłaʼ dahaʼééʼ tʼáá biiʼ nijizhjéeʼgo hwee daʼaztłʼǫ́ǫgo déédíljah góneʼ kǫʼ bitʼááh dahalchxííʼ góneʼ ahoʼdiistłʼííd.
22 Aláahgo naatʼáanii tsxı̨́įłgo níigo yee haadzíiʼgo áádóó déédíljah góneʼ kǫʼ tʼáá íiyisí bitʼááh dahalchxíiʼgo biniinaa Shéídrak, Mííshak índa Abédniigo déédíljah góyaa adahwiistłʼíidii kǫʼ bííghą́ą́ʼ.
23 Áko díí diné táltʼéego éí Shéídrak, Mííshak índa Abédniigo hwee daʼastłʼǫ́ǫgo déédíljah góneʼ kǫʼ bitʼááh dahalchxíiʼii biyiʼ góneʼ ahoʼdiistłʼííd.
24 Ákohgo aláahgo naatʼáanii Nébukadnézzar tʼóó bił ahóóyóigo tsxı̨́įłgo náhidiitahgo kótʼéego dabiłníinii áyidííniid, Daʼ diné táltʼéegoósh doo kǫʼ biyiʼ góneʼ adahaaltłʼíid da? Nítʼééʼ aláahgo naatʼáanii ádeidííniid, Aooʼ, aláahgo naatʼáanii nílíinii, tʼáá aaníí ákódzaa.
25 Áko ánááhodooʼniid, Shoo, diné dı̨́ltʼéego doo bidaʼastłʼǫ́ǫ́góó kǫʼ ałníiʼgi doo ádaatʼéhígóó tádíkááh. Shoo, dı̨́ı̨́ʼ góneʼígíí éí diyin danilíinii biyeʼ nahalin.
26 Ákohgo Nébukadnézzar éí déédíljah bichʼéʼétiinjįʼ niníyáago ádííniid, Shéídrak, Mííshak áádóó Abédniigo, Diyin God Aláahgo Ayóóʼátʼéii binaalʼaʼí danohłíinii, hágo wóshdę́ę́ʼ, chʼínóhkááh. Áádóó Shéídrak, Mííshak índa Abédniigo kǫʼ biyiʼdę́ę́ʼ chʼékai.
27 Áko aláahgo bídahólníihii, aląąjįʼ naazíinii, naatʼáanii danilíinii índa aláahgo naatʼáanii kótʼéego dabiłníinii áłah silı̨́įʼgo éí kǫʼígíí diné dabitsʼíís tʼáadoo iidííłkʼą́ąʼ daígíí, dabitsiiʼ doo daadeez daígíí, dabiʼééʼ doo dadiniitsoi daígíí índa łid doo dahalchin daígíí dayiiłtsą́.
28 Áko Nébukadnézzar ádííniid, Shéídrak, Mííshak áádóó Abédniigo biDiyin God baa haʼniih leʼ, háálá bidiyingo naalʼaʼí yiníłʼaʼgo binaalʼaʼí baa dadzólíii yisdáyíínil, áko aláahgo naatʼáanii yee haadzíiʼii łahgo ánáyiidlaa, áádóó diyin tʼáá bóhólníhígíí bá naʼalʼaʼgo bichʼįʼ nahadláhígíí biláahgo díí diné táltʼéego bitsʼíís atídoolnííł biniyé tʼáá bí biDiyin God yichʼįʼ nidahałáhígíí yaa ádadeestʼą́.
29 Éí bąągo bee hazʼáanii łaʼ áshłééh: Diné danilíinii, ałʼąą dineʼé danilíinii índa bizaad ałʼąą átʼéego yee yádaałtiʼii éí Shéídrak áádóó Mííshak índa Abédniigo biDiyin God bidazhdiilkaalgo bikʼijįʼ yádajiłtiʼii nidahodiiʼnish doo índa dahaghan kintsʼiil tʼéí ádeidoolííł, háálá kótʼéego Diyin God yisdáʼiinííł dooleełii doo łaʼ nááhódlǫ́ǫ da.
30 Ákohgo aláahgo naatʼáanii éí Shéídrak áádóó Mííshak índa Abédniigo Bábilan nahósʼaʼgi náás yideeznil.
