Daniel 6:1-28
6 Daráíyas éí bee óhólnííh bił hazʼáanii tʼáá átʼéé nítʼééʼ naatʼáanii danilíinii neeznádiindóó baʼaan naadiin ánéelą́ąʼgo bídahólníih doo biniyé bił hóshǫ́ǫgo niinínil.
2 Aláahgo naatʼáanii bee bóhólníihgo bił hazʼáanii biyiʼdóó doo bitsʼą́ą́ʼ yóóʼadooʼdił da biniyé tsʼídá alą́ąjįʼ diné bídahólníhígíí tááʼ niinínil; Daniel éí ajítahgo alą́ąjįʼ hóhólnííh.
3 Nítʼééʼ diné bídahólníhígíí áádóó nááʼákóneʼ naatʼáanii danilíinii bitahdóó díí Daniel tsʼídá aláahgo bee hojiniihii hwiiʼ hólónígíí bąą tʼáadoo bahatʼaadígo bee hwééhoʼdooszįįd, áko aláahgo naatʼáanii éí bee bóhólníihgo bił hazʼáanii tʼáá átʼéé nítʼééʼ bee hóhólníih doogo nihodeeshtééł, niizı̨́ı̨́ʼ.
4 Ákohgo alą́ąjįʼ bóhólníhígíí áádóó nááʼákóneʼ naatʼáanii danilíinii bee óhólníihgo bił hazʼáanii bídéétʼiʼgo Daniel bikʼi hodootʼááł danízin, nidi tʼáadoo yee hakʼídahóʼahí da índa doo aaníinii tsʼídá biiʼ ádin, háálá tsʼídá tʼáá aaníígóó baʼahódlíii nilı̨́, tʼáadoo asiih da índa bee bikʼí hodootʼahii tsʼídá tʼáadoo bił yiiltsą́ą da.
5 Ákohgo diné ádaʼahidooʼniid, Daniel bee bikʼi hodootʼáałii tsʼídá ádin, tʼáá hazhóʼó biDiyin God bibee hazʼáanii tʼéí bee tʼáá bikʼi dahodidiitʼáałgi átʼé.
6 Ákohgo díí bídahólníhígíí índa nááʼákóneʼ naatʼáanii danilíinii éí aláahgo naatʼáanii yaa áłah silı̨́įʼgo ádeidííniid, Daráíyas aláahgo naatʼáanii nílíinii, hoolʼáágóó hinínáa leʼ.
7 Bee óhólníihgo bił hazʼą́ągi alą́ąjįʼ bídahólníhígíí, nááʼákóneʼ bídahólníhígíí, naatʼáanii danilíinii áádóó kótʼéego daaníinii índa aląąjįʼ naazíinii ahíikaigo aláahgo naatʼáanii éí bikʼehgo hoogáałii bidziilgo yee nihodooʼáałii yee hadoodzihgo bee lą́ daʼsiidlı̨́ı̨́ʼ: aláahgo naatʼáanii nílíinii, kodóó tádiin yiską́ąjįʼ diné tʼáá háiida doo nichʼįʼ sozdilzingóó, nidi náánáłaʼ diyin bichʼįʼ sozdilzingo éí náshdóítsoh bitsiijįʼ daditłʼooígíí shijééʼ góyaa ahodiʼyoolghą́ą́ł.
8 Áko kʼad aláahgo naatʼáanii nílíinii, bidziilgo handziihgo bee akʼeʼashchínígíí bikááʼ nízhiʼ ánílééh; éí Míídiya dineʼé índa Pérzha dineʼé bibee hazʼáanii bikʼehgo tsʼídá doo łahgo áńdoolníił da.
9 Éí bąą aláahgo naatʼáanii Daráíyas bee hazʼáanii bikááʼ bízhiʼ áyiilaa.
10 Nítʼééʼ Daniel éí bee akʼeʼashchı̨́įgo ályaaígíí hoł bééhoozingo haghan góneʼ yah aníjoodzáago tʼáá nahdę́ę́ʼ áńjiitʼįįhígi átʼéego Jerúsalem bichʼįʼgo tsésǫʼ ąą átʼéego nitséézhdígohgo táadi sonízdílzįįhgo ináʼátʼáahgo Diyin God bichʼįʼ ahééh názhniidzįįh.
11 Ákohgo díí diné danilíinii éí ahíikaigo Daniel yaa niheekai áádóó biDiyin God yichʼįʼ sodilzingo náʼookąąhgo dayiiłtsą́.
12 Ákohgo aláahgo naatʼáanii yaa yíkaigo ádeidííniid, Aláahgo naatʼáanii nílíinii, bee hazʼáanii hadinilaii doósh nízhiʼ bikááʼ íinilaa da? Shą́ą́ʼ kodóó tádiin yiską́ąjįʼ diné tʼáá háiida doo nichʼįʼ sozdilzingóó, nidi náánáłaʼ diyin bichʼįʼ sozdilzingo éí náshdóítsoh bitsiijįʼ daditłʼooígíí shijééʼ góyaa ahodiʼyoolghą́ą́ł, doósh diníigo bee háínídzíiʼ da? Aláahgo naatʼáanii ánáádooʼniid, Aooʼ, éí tʼáá aaníí; Míídiya dineʼé índa Pérzha dineʼé bibee hazʼáanii bikʼehgo tsʼídá doo łahgo áńdoolníił da.
13 Ákohgo aláahgo naatʼáanii yił dahoolneʼgo ádadííniid, Judíya kéyahdóó yisnáanii Daniel éí bee nihwííníʼáanii bikááʼ nízhiʼ íinilaii doo yikʼeh hółʼı̨́į da, nidi táadi sonídílzįįhgo anáʼátʼááh.
14 Ákohgo aláahgo naatʼáanii kótʼéego bił hóóneʼgo tʼáá íiyisí nitseeltłah, áko haʼátʼéegoda Daniel yisdádeeshtééł jinízingo shá bíighah chʼééh baa nitsíjíkeesgo haaʼísh doo nijíłkeedgóó iʼííʼą́.
15 Ákohgo díí diné éí aláahgo naatʼáanii yaa áłah silı̨́įʼgo ádeidííniid, Aláahgo naatʼáanii nílíinii, Míídiya dineʼé índa Pérzha dineʼé bibee hazʼáanii bikʼehgo bee haʼoodzíiʼii, doodaiiʼ bee nihwiistʼáanii éí aláahgo naatʼáanii haidiilaii tsʼídá doo łahgo áńdoolnííłgóó nił bééhózin leʼ.
16 Ákohgo aláahgo naatʼáanii haadzíiʼgo éí Daniel nídeizlóozgo náshdóítsoh bitsiijįʼ daditłʼooígíí shijééʼ góyaa adayiisxan. Áko aláahgo naatʼáanii éí Daniel áyidííniid, NiDiyin God tʼáá áłahjįʼ bá nanilʼaʼígíí yisdánółtééł.
17 Áko náshdóítsoh bitsiijįʼ daditłʼooígíí shijééʼ góyaa ahoodzą́ągi tsé yidádeideezʼą́ągo Daniel doo łahgo ánáábidiʼdoolníił da biniyé aláahgo naatʼáanii tʼáá bí biyoostsah áádóó biyaadóó naatʼáanii danilíinii dabiyoostsah yee yikʼi niyiizʼą́.
18 Ákohgo aláahgo naatʼáanii bighangóó anáádzáago doo ayą́ą da áádóó dilní ałʼąą ádaatʼéego yee nidaanéhígíí doo bee bá naʼasneʼ da índa bił bitsʼáníkı̨́.
19 Ákohgo aláahgo naatʼáanii tʼóó hoosʼįįdą́ą́ʼ nídiiʼnaʼgo náshdóítsoh bitsiijįʼ daditłʼooígíí shijééʼgóó haneetehee yílwod.
20 Áko náshdóítsoh bitsiijįʼ daditłʼooígíí shijéʼígíí bitʼáahjįʼ nizhníyáago Daniel bichʼįʼ yéego chayiʼ hazhdoolghaazhgo ájíní, Daniel, Diyin God Hináanii yá naalʼaʼí nílíinii, niDiyin God tʼáá áłahjįʼ bá nanilʼaʼígíísh náshdóítsoh bitsʼą́ąjįʼ yisdánííłtı̨́įgo yínéésʼąąd?
21 Ákohgo Daniel éí aláahgo naatʼáanii áyidííniid, Aláahgo naatʼáanii nílíinii, hoolʼáágóó hinínáa leʼ.
22 ShiDiyin God bidiyingo naalʼaʼí yiníłʼaʼgo náshdóítsoh bitsiijįʼ daditłʼooígíí dáádadéesnóodgo áyiilaa, áko tʼáadoo atídashiilaa da, háálá Diyin God binááł tsʼídá tʼáadoo bee shikʼíhótʼahígóó shééhoozin áádóó, aláahgo naatʼáanii nílíinii, ninááł tsʼídá tʼáadoo íítʼįįdí da.
23 Ákohgo aláahgo naatʼáanii ayóó átʼéego haa bił hóózhǫǫd áádóó éí náshdóítsoh bitsiijįʼ daditłʼooígíí shijééʼdę́ę́ʼ Daniel háádooltéełgo yee haadzííʼ. Ákohgo náshdóítsoh bitsiijįʼ daditłʼooígíí shijééʼdę́ę́ʼ Daniel hanááltı̨́įgo tsʼídá tʼáadoo ádahoolaaí da lá, háálá haDiyin God beijólíigo joodlą́.
24 Áko aláahgo naatʼáanii haadzíiʼgo éí Daniel bikʼi dahozhdiiʼáanii nihoʼdiishtʼeezhgo, hadaʼáłchíní áádóó hwedaʼasdzą́ą́ tʼáá bił, náshdóítsoh bitsiijįʼ daditłʼooígíí shijééʼ góyaa adahoʼdiistłʼíidgo tʼah hadah dazhnéedéehgo náshdóítsoh bitsiijįʼ daditłʼooígíí hachʼįʼ dah diijéeʼgo ahádahwiizhnizhgo dahatsʼin nidi ałtso dayííʼaal.
25 Ákohgo aláahgo naatʼáanii Daráíyas éí diné danilíinii áádóó ałʼąą dineʼé danilíinii índa bizaad ałʼąą átʼéego yee yádaałtiʼii éí nahasdzáán bikááʼgóó kéédahatʼíinii tʼáá ałtso yichʼįʼ akʼeʼashchı̨́: Bee hashtʼehodítʼéii nihichʼįʼ kʼeeʼąą yilzhish dooleeł, yidííniid.
26 Bee haasdziihii bidziilgo áshłééh; éí bee shóhólníihgo bił nidahazʼáanii tʼáá ałtso biyiʼ diné éí Daniel biDiyin God deidísin doo áádóó nidabiiłnáa doo, háálá Diyin God Hináanii nilı̨́ áádóó hoolʼáágóó haʼólní áádóó bee óhólnííh bił hazʼáanii tʼáadoo áyółdįįhí da índa hooʼáłígíí doo nidootʼih da.
27 Yisdáʼiinííł áádóó bineʼ naʼadziʼ; bee éédahózinii ayóó átʼéego ádahoonííł; éí yáʼąąshdi áádóó nahasdzáán bikáaʼgi áánííł; jó, náshdóítsoh bitsiijįʼ daditłʼooígíí bitsʼą́ąjįʼ Daniel yisdáyííłtı̨́.
28 Ákohgo Daráíyas nantʼá yę́ędą́ą́ʼ áádóó Pérzha kéyahdóó diné Sáíras nantʼá yę́ędą́ą́ʼ díí Daniel yáʼátʼééh há áhooníiłgo náás jiníyá.
