Daniel 7:1-28
7 Bábilangi Belsházar aláahgo naatʼáanii nilı̨́įgo áłtsé náhááh góneʼ, Daniel hatsáskʼeh bikááʼ dziztı̨́įgo nijiiyeeł áádóó hoł áhóótʼįįd. Áko baa nijiizyeelii baa hojoolneʼgo bee akʼeʼjishchı̨́:
2 Daniel haadzíiʼgo ání, Tłʼéeʼgo shił áhoodzaago yiiłtsánígíí shoo, yáʼąąshdę́ę́ʼ tʼáá dı̨́ı̨́ʼdę́ę́ʼ deeyolgo tónteel ayóó átʼéii nayiisnááʼ.
3 Áko naaldlooshii dı̨́įʼgo ayóó ádaatʼéé léiʼ tónteel biyiʼdę́ę́ʼ haaskai; éí ádaatʼéhígíí tʼáá ałʼąą ádaatʼé.
4 Átséhígíí náshdóítsoh bitsiijįʼ ditłʼooígíí nahalin, ákondi atsá bitʼaʼígíí bitʼaʼ. Hazhóʼó nééłʼı̨́ı̨́ʼ nítʼééʼ bitʼaʼ niʼdiiʼnizh, áádóó de ádzaago dinégi átʼéego yiizįʼ. Áko diné bíniʼígíí baa deetʼą́.
5 Áádóó shoo, náánáłaʼ naaldlooshii naaki góneʼígíí éí shash nahalin; éí de ádzaago átsą́ą́ʼ táaʼgo dah yoołtsah áádóó áhodooʼniid, Nídoohjeehgo ląʼígo daʼołghał.
6 Áádóó náábikʼijįʼ dééʼı̨́ı̨́ʼ nítʼééʼ, shoo, tááʼ góneʼígíí éí náshdóítsoh łikizhígíí nahalin; bííshgháándę́ę́ʼ dı̨́įʼgo bitʼaʼígíí tsídii bitʼaʼ nahalin, áko bitsiitsʼiin éí dı̨́ı̨́ʼ. Áádóó bee óhólníihii baa deetʼą́.
7 Áádóó díí yiiłtsą́ągo shił ádzaaígíí níshʼı̨́ı̨́ nítʼééʼ, shoo, naaldlooshii dı̨́ı̨́ʼ góneʼígíí tsʼídá tʼóó báhádzidgo áádóó tʼóó bikʼeʼíyéeʼgo índa tsʼídá ayóó ábóodziilgo béésh nitłʼizii ayóó ádaníłtsoii biwooʼ. Éí yee aldeeł áádóó adiséí índa yidziihígíí yikʼi naayá. Nidaaldlooshii bilą́ąjįʼígíí éí doo yił ahedaałtʼée da; bideeʼ éí neeznáá yadaaʼá.
8 Áko bideeʼ yadaaʼáhígíí níshʼı̨́ı̨́ nítʼééʼ, shoo, bideeʼ yadaaʼáhígíí bitahdę́ę́ʼ áłtsʼíísígo adeeʼ łaʼ hááʼá; éí bidááhdóó yadaaʼáhígíí táaʼgo behétłʼóól tʼáá bił haaltsʼǫ́ǫ́d; nítʼééʼ diné binááʼ nahalingo adeeʼ áłtsʼíísígíí binááʼ hólǫ́, áádóó bizééʼ hólǫ́ǫgo ayóó áníshtʼé nízingo ádá yáltiʼ, jóʼakon.
9 Áko dééʼı̨́ı̨́ʼ nítʼééʼ bikʼi dah asdáhí bikááʼdóó nidahatʼáii nidaasnil, áádóó Asʼahdę́ę́ʼ Bíyoołkááł wolyéii éí łaʼ yikááʼ dah neezdá; biʼééʼ éí yas nahalingo łigai, índa bitsiiʼ éí aghaaʼ łigaii tsʼídá niłtólígíí nahalingo łigai. Bibikʼi dah asdáhí bikááʼdóó nahatʼáii kǫʼ nahalingo bitsʼáhodinaʼ áádóó déesʼeezgi kǫʼ diltłiʼ nahalin.
10 Bidááhdę́ę́ʼ kǫʼ tooh nahalingo nílı̨́. Miiltsoh ádanéelą́ąʼgo bá nidaasʼaʼ, índa neeznádiindi mííltsoh ádanéelą́ąʼgo bidááhdóó deizįʼ, áko naaltsoos ąą ádaalyaago* haa nídahastʼįįd.
11 Adeeʼ áłtsʼíísígíí ayóó átʼéego ádaa yáltiʼgo disétsʼą́ąʼgo biniinaa dééʼı̨́įʼgo naaldlooshii naayééʼ nilíinii seesyı̨́ áádóó bitsʼíís atílyaago kǫʼ biyiʼ góneʼ ahoolghan.
12 Naaldlooshii naayééʼ danilíinii yidzíʼígíí yee bídahólníihii bitsʼą́ąjįʼ kódaalyaa, nidi náasdi tʼóó kónígháníjįʼ bá hashja nááhodooʼnííł biniyé tʼáá dahiná.
13 Tłʼéeʼgo shił áhoodzaago, shoo, Diné Silı̨́įʼii nahalingo yáʼąąshdę́ę́ʼ kʼos bił yildohgo áádóó Asʼahdę́ę́ʼ Bíyoołkááł wolyéii yichʼįʼ yigáałgo áádóó yił yaadaaskaigo yiiłtsą́.
14 Áádóó bee óhólníihii áádóó ayóó átʼéii índa bee óhólnííh bił hazʼáanii baa deetʼą́, áko diné danilíinii, ałʼąą dineʼé danilíinii índa bizaad ałʼąą átʼéego yee yádaałtiʼii tsʼídá tʼáá ałtso há nidaalʼaʼ dooleeł. Hoolʼáágóó bee óhólníihii hólǫ́ǫgo éí tsʼídá doo bił yóóʼahodoogáał da índa bee óhólníihgo bił hazʼáanii tsʼídá doo ádooldįįł da.
15 Shí, Daniel yinishyéii, tʼáá íiyisí yínííł biih neitłizh índa shił áhoodzaaígíí shił yééʼ áhoolaa.
16 Áadi naazínígíí łaʼ bitʼáahjįʼ niníyáago díí áhoodzaaígíí tʼáá aaníí ááhyiłníinii tʼáá átʼé bínabídééłkidgo yee shił náhoolneʼ áádóó shił bééhózingo áshiilaa.
17 Díí naaldlooshii dı̨́įʼgo naayééʼ danilínígíí éí aláahgo naatʼáanii dı̨́įʼgo nahasdzáán bikááʼdóó nídahididookahígíí átʼé.
18 Nidi Aláahgo Ayóóʼátʼéii bidiyı̨́ı̨́ʼ danilíinii bee óhólníihii yiih dahidookahgo hoolʼáágóó ahoolʼáágóó bííʼ danilı̨́įgo ahoolʼáa doo.
19 Ákohgo dı̨́ı̨́ʼ góneʼ naaldlooshii naayééʼ nilínígíí ááhyiłnínígíí shił bééhodoozįįł niizı̨́ı̨́ʼ łaʼígíí tʼáá ałtso doo yił ahedaałtʼée da; tsʼídá tʼáá íiyisí tʼóó báhádzidígíí éí béésh nitłʼizii biwooʼgo ooldéél áádóó béésh łitsoii bíláshgaango adííséí índa yidziihígíí yikʼi naayá.
20 Áádóó bitsiitʼáádóó bideeʼ neeznáá hadaazʼáii áádóó adeeʼ náánáłaʼ hááʼáhígíí éí bidááhdóó táaʼgo naaʼaníídeeʼgo éí binááʼ hólǫ́ áádóó bizééʼ hólǫ́ǫgo ayóó áníshtʼé nízingo ádá yáltiʼgo índa adeeʼ yadaaʼááh nítʼééʼ yę́ę biláahgo nitsxaaz noolninii éí ááhyiłníinii shił bééhodoozįįł niizı̨́ı̨́ʼ.
21 Áko dééʼı̨́ı̨́ʼ, nítʼééʼ díí adeeʼ éí Diyin God bidiyı̨́ı̨́ʼ danilíinii yichʼįʼ anaʼííłʼı̨́įgo yikʼeh didlı̨́.
22 Áko Asʼahdę́ę́ʼ Bíyoołkááł wolyéii beiníłką́ bijı̨́įjįʼ Aláahgo Ayóóʼátʼéii bidiyı̨́ı̨́ʼ danilíinii yá einístʼįįd áádóó baa hoolzhiizhgo bidiyı̨́ı̨́ʼ éí bee óhólníihgo bił hazʼáanii bííʼ daazlı̨́ı̨́ʼ.
23 Nítʼééʼ kóní, Dı̨́ı̨́ʼ góneʼ naaldlooshii naayééʼ nilíinii díí nahasdzáán bikáaʼgi dı̨́ı̨́ʼ góneʼ bee óhólníihgo bił hazʼą́ą dooleełii átʼé; éí tʼáá ałtsogóó bee ídahólníihgo bił dah nahazʼáanii doo bił aheełtʼée da dooleeł áádóó nahasdzáán tʼáá siʼą́ą́ nítʼééʼ yidooldił áádóó yididooséigo ałtso yikʼi nidoogaał.
24 Áko bideeʼ neeznáá yadaaʼáhígíí bee óhólnííh bił hazʼáanii biiʼdóó éí aláahgo naatʼáanii neeználtʼéego nídahidiikáhígíí átʼé. Díí bikéédę́ę́ʼ aláahgo naatʼáanii nínáádidoodáałgo neeználtʼéhígíí doo yił aheełtʼée da dooleełgo éí aláahgo naatʼáanii táltʼéhígíí yikʼeh didoodleeł.
25 Éí Aláahgo Ayóóʼátʼéii yikʼijįʼ yáłtiʼ doo áádóó Aláahgo Ayóóʼátʼéii bidiyı̨́ı̨́ʼ danilíinii atííłʼı̨́įgo yikʼee chʼééh didookah áádóó dahwéelzhíshígíí índa bee nahazʼáanii łahgo ánéidoodlíiłgo yaa nitsíkees dooleeł. Áko łaʼ hoolzhish áádóó náádahwéelzhííshgóó índa ałníiʼjįʼ anááhoolzhiizhjįʼ bidiyı̨́ı̨́ʼ bílákʼe dooʼnił.
26 Nidi ánihwiitʼaah beiníłką́ągo bee bóhólníihii bitsʼą́ą́ʼ nahjįʼ nididootʼáałgo tʼáá nihoníyáajįʼ ałtso ádooldįįł.
27 Áko yádiłhił biyaagi tʼáá náhwiizʼą́ą́ nítʼééʼ bee óhólníihgo bił hazʼáanii áádóó yee nantʼáii índa yee ayóó átʼéii éí Aláahgo Ayóóʼátʼéii bidiyı̨́ı̨́ʼ bidineʼé danilíinii baa didootʼááł; bee bóhólníihgo bił hazʼáanii éí hoolʼáágóó bee bóhólníih doo áádóó bídahólníihii bá nidaalʼaʼ doo índa bikʼeh dahółʼı̨́į dooleeł.
28 Shí, Daniel yinishyéii, díí ałtso baa neisíyeelgo baa nitséskees nítʼééʼ; tsʼídá ayóó átʼéego shiʼdiiłʼá áádóó doo ákwálkágí da, nidi áhóótʼįįdígíí tʼáá adíyiʼídi tʼóó bił áníshtʼé.
Footnotes
^ Diné ádáátʼįįdígíí bee naaltsoos siʼą́. Rev. 20:12.
