Daniel 8:1-27
8 Aláahgo naatʼáanii Belsházar nantʼáago tááʼ náhááh góneʼ shí, Daniel yinishyéii, átsé shił áhoodzaa áádóó shił ánááhoodzaa.
2 Áko shił áhoodzaago yiiłtsánígíí éí Íílam nahósʼaʼgi Shúshan* kin haalʼáagi naashá nisin; shił áhoodzaago Yúlaii tooh nílínígíí bibąąhgi sézı̨́ nisin.
3 Ákohgo háighal nítʼééʼ, shoo, tooh nílínígíí bibąąhgóó deenástsʼaaʼ léiʼ sizı̨́įgo yiiłtsą́. Bideeʼ naakigo tʼáá ałchʼijí nineezgo yaaʼá; tʼááłáʼí éí atisgo yaaʼá, nidi éí akéeʼdi haníísą́.
4 Deenástsʼaaʼ éí eʼeʼaahjigo áádóó náhookǫsjigo índa shádiʼáahjigo éí adigohgo yiiłtsą́; doo łaʼda bidááhdę́ę́ʼ dzoozįįh átʼée da, índa bibee adziilii bitsʼą́ąjįʼ doo yisdájóyaʼ átʼée da, nidi tʼáá bí bíniikʼehgo ááníiłgo tsʼídá ayóó átʼéii íʼdiilyaa.
5 Áko baa nitsískees nítʼééʼ, shoo, tłʼízíchǫǫh léiʼ eʼeʼaahdę́ęʼgo doo niʼ nihideeltaałgóó nahashkááʼ hooleeł; tʼáadoo bahatʼaadí binátaʼdę́ę́ʼ bideeʼ deezʼá.
6 Tooh bibąąhgi deenástsʼaaʼ bideeʼ naakigo yiiłtsánígíí yaa yílwod áádóó tʼóó báhádzidgo ádá hoolchįįdgo yichʼįʼ dah diilwod.
7 Éí deenástsʼaaʼ áhą́díjįʼ yichʼįʼ yilwołgo yiiłtsą́, áko tʼáá íiyisí yee nahodeeshzhǫʼgo atíyiilaa, áádóó bideeʼ naakiígíí kʼíinítiʼgo deenástsʼaaʼ doo bidziil da silı̨́įʼgo nihíideestsxisgo yikʼi naayá, áádóó yee bidziilii bitsʼą́ąjįʼ tʼáadoo deenástsʼaaʼ yisdáyółtéłí da.
8 Ákohgo tłʼízíchǫǫh ayóó átʼéii íʼdiilyaa, nidi bidziil silı̨́įʼgo bideeʼ ayóó átʼéii kʼéʼéltǫʼgo ííʼá yę́ęgi adeeʼ dı̨́įʼgo tʼáadoo bahatʼaadí hadaneesą́ągo tʼáá dı̨́ı̨́ʼgóó yádiłhił bichʼįʼgo dadeezʼá silı̨́ı̨́ʼ.
9 Áko bideeʼ hadaazʼáii łaʼ bąąhdóó adeeʼ áłtsʼíísígo hááʼá silı̨́ı̨́ʼ; éí shádiʼáahjigo áádóó haʼaʼaahjigo índa kéyah hózhóní bichʼįʼgo tʼóó báhádzidgo nídiidzá.
10 Áko yáʼąąshdi dah daʼínéehii áádóó sǫʼ yílʼáii yichʼįʼ ayóó átʼéego nídiidzá índa sǫʼ yílʼá łaʼ niʼjįʼ nayííghazgo yikʼi naayá.
11 Tʼáá bí ayóó átʼéego ádaa haʼniihgo dah daʼínéehii binanitʼaʼí nilíinii yił aheełtʼéego íʼdiilyaa, áko tʼáá áłahíjįʼ didlidgo nááhániihii yitsʼáhwiistłʼííd, áádóó hodiyingo hazʼáanii yiyííłchxǫʼ.
12 Áko ádił nidaʼdziilzíihgo biniinaa dah daʼínéehii áádóó tʼáá áłahjįʼ didlidgo nááhániihii baa deetʼą́, áko tʼáá aaníinii niʼjįʼ ayiyííłhan, áádóó tʼáá bí nízinígi áátʼįįdgo yee náás deeyá.
13 Ákohgo diyinii łaʼ yáłtiʼgo disétsʼą́ą́ʼ, nítʼééʼ diyinii náánáłaʼ éí yáłtiʼii yichʼįʼ haadzíiʼgo ání, Haash nízáagi tʼáá áłahjįʼ didlidgo nááhániihii ił ádzaa yę́ę éí ádił niʼiidzííh bikʼeʼíyéeʼii ííłʼı̨́įgo diyingo hazʼánígíí áádóó dah daʼínéehii yikʼi nidooldah?
14 Áko áshidííniid, Naakidi mííldóó baʼaan táadi neeznádiin iʼííʼą́ąjįʼ áádóó hoosʼįįdjįʼ índa hodiyingo hazʼáanii hashtʼééhodoolnííł.
15 Ákohgo shí, Daniel yinishyéii, díí shił áhoodzaaígíí ááhyiłníinii bikʼidiʼdeeshtı̨́ı̨́ł biniyé baa nitsískees nítʼééʼ, shoo, łaʼ diné nahojílingo shidááhdę́ę́ʼ dziizįʼgo yitʼíní ízhʼdiilyaa.
16 Áko Yúlaii tooh nílı̨́ bikááʼdóó diné biinééʼ disétsʼą́ąʼgo ání, Géíbriyel nílíinii, díí diné bił ádzaaígíí ááhyiłníinii bee bił hólneʼ.
17 Ákohgo sízínígi shitʼáahjįʼ niníyá, áko shaa níyáago tʼáá íiyisí shił yééʼ hazlı̨́įʼgo niʼjįʼ tséʼyaa néshjoolgo áshidííniid, Diné nílíinii, nił ádzaaígíí éí nihoolzhíshígíí átʼéego bikʼiʼdiitįįh.
18 Áko tʼah shichʼįʼ yáłtiʼgo tʼáá íiyisí bił niizı̨́įʼgo naaʼiʼííłhaazh lá, nidi shideelchidgo náshiisįʼ.
19 Áko áshíłní, Shoo, nihoníyáadi ayóó áhodooníłígíí bee nił hodeeshʼnihgo nił bééhonisįįh, háálá nihodoogáłígíí tsʼídá baa hodoolzhish.
20 Deenástsʼaaʼ bideeʼ naakigo yiniłtsáanii éí Míídiya índa Pérzha kéyahdóó aláahgo naatʼáanii átʼı̨́.
21 Áko tłʼízíchǫǫh éí Gríis kéyahdóó aláahgo naatʼáanii nilíinii átʼı̨́, áko binátaʼdę́ę́ʼ bideeʼ ayóó átʼéii éí alą́ąjįʼ aláahgo naatʼáanii nilíinii átʼı̨́.
22 Áko adeeʼ kʼéʼéltǫʼígíí bitsáskʼehgi dı̨́įʼgo hanáádaneesánígíí éí dineʼé bitahdóó dı̨́įʼgo bee óhólníihii nááhodoodleeł nidi, tʼáá bí bidziilígíí bee éí dooda.
23 Áko bee óhólníihgo bił hazʼáanii bił nihoolzhíishdi ádił nidaʼiisííh bílátah dahashzhiizhgo aláahgo naatʼáanii hashké nídzinii índa tʼáá naaki nahwiiláii nídidoodááł.
24 Áko bibee adziilii ayóó átʼée doo, nidi tʼáá bí bidziilígíí bee éí dooda áádóó tʼóó ayóogo óʼoołdįįł doo índa yaa naagháii yee náás yigáałgo dineʼé ayóó ádaatʼéii índa diyin dineʼé íidoołdįįł.
25 Áko anóʼáahgo yee łéʼáchxáazhgo náás doogááł; tʼáá bí íinízinígi ayóogo ádaa haʼniihgo nitsíkees doo, hodéezyéelgo kééhojitʼíinii tʼáadoo kótʼéʼílíní tʼóó ahojíyóí áhodoołdįįłgo naatʼáanii danilíinii yinanitʼaʼí yichʼįʼ nídidoodááł, nidi tʼáadoo biʼdeelníhí atíbidiʼdoolnííł.
26 Iʼííʼą́ągo índa abínígo nił áhóótʼįįdígíí éí tʼáá aaníígóó bee nił hóóneʼ, nidi nił áhoodzaaígíí naníłʼin, háálá tʼóó ahayóí néidoolkááł.
27 Áko shí, Daniel yinishyéii, shitah doo hóótsʼíídgóó tʼóó sétı̨́įgo díkwíí shı̨́ı̨́ yiską́, ákohgo nídiishʼnaʼgo aláahgo naatʼáanii hánídíshnish, nidi shił áhoodzaaígíí tʼáá íiyisí bikʼee tʼóó shił ahayóigo tʼáadoo łaʼ yikʼiʼdiitání da.
Footnotes
^ Kéyah shádiʼááhjígo haigo kin haalʼáagi naatʼá bá hooghan.
