Daniel 9:1-27
9 Ahazawííras biyeʼ Daráíyas naatʼáanii nilı̨́įgo łaʼ náhááh góneʼ, hó éí Míídiya dineʼé jílı̨́įgo Kaldíya dineʼé bee óhólnííh bił hazʼą́ągi aláahgo naatʼáanii áhoʼdiilyaa.
2 Nazhnitʼáago átsé náhááh góneʼ éí ląʼí nááhaídą́ą́ʼ naaltsoos biiʼ Bóhólníihii áníinii bikʼehgo shí Daniel éí Diyin God yá halneʼii Jeremáíyah yee akʼeʼashchíinii bikʼiʼdiitą́ągo tsostsʼidiin nááhaijįʼ Jerúsalem nabíʼásdeeʼ dooleeł, níiniʼ.
3 Áko hodíínísingo doo ashą́ą́góó tłʼoh yishbizhii shiʼéeʼgo łeeshchʼiih ákʼéhésgazgo sodiszingo náʼooshkąąhgo Bóhólníihii Diyin God bichʼįʼ dééʼı̨́ı̨́ʼ.
4 Bóhólníihii shiDiyin God bichʼįʼ sodiszingo ádił niʼiidzííh bee ádaa hashneʼgo ádíshní, Bóhólníihii ayóó átʼéii Diyin God tʼóó báhádzidii nílíinii, ayóóʼádanóʼníinii índa nibee hazʼáanii yikʼeh dahółʼíinii baa aʼááh nínízingo bee ahaʼdeetʼáanii yiʼósinii nílíinii,
5 nibikʼehgo iináanii índa bee aa nánítʼíinii bitsʼániikaigo ádił nidaʼiyeelzííʼ áádóó tsʼídá doo ákǫ́ǫ́ ádeiitʼįįd da índa tsʼídá doo yáʼáshónígi ádeidzaago ádił nidaniilteeʼ.
6 Aláahgo nihinanitʼaʼí áádóó nihinaatʼáanii danilı̨́ı̨́ nítʼééʼ yę́ę áádóó nihizhéʼé danilíinii índa kéyahgóó diné kéédahatʼı̨́ı̨́ nítʼééʼ yę́ę tʼáá ałtso éí ninaalʼaʼí ná dahalneʼii nízhiʼ yee nihił dahoolneʼ nidi, doo deísíníiltsʼą́ąʼ da nítʼééʼ.
7 Bóhólníihii nílíinii, tʼáá ákogi átʼéii nílı̨́. Nidi nihí Judíya kéyahdóó diné daniidlíinii índa Jerúsalem kin haalʼáádóó diné daniidlíinii áádóó Ízrel dineʼé daniidlíinii tʼáá áníiltso áhą́dí áádóó nízaadi kédaayahgóó tanihinííníłkaadii díí jı̨́ tʼóó nihaa yádahóósįįdgo nihił dahalą́, háálá nikʼijįʼ dasiidlı̨́įʼgo ádił daʼsiilziih.
8 Bóhólníihii nílíinii, aláahgo nihinanitʼaʼí áádóó nihinaatʼáanii danilíinii índa nihizhéʼé dajílíinii hoł tʼóó nihaa yádahasingo nihił dahalą́, háálá bąąhági ádeiidzaago hoł nichʼįʼ ádił daʼsiilziih.
9 Bóhólníihii nihiDiyin God aa aʼááh nízin índa ádił niʼiidzííh atsʼéidiiʼaah, nidi bichʼįʼ ádił nidasiilteeʼ,
10 áádóó Bóhólníihii nihiDiyin God biinééʼ doo bikʼeh dahosiilʼįįd da; bá naalʼaʼí éí bá dahalneʼii danilíinii binahjįʼ bibee hazʼáanii nihaidiníʼáanii doo bikʼehgo daniikai da.
11 Tʼáá aaníí, Ízrel dineʼé tʼáá ałtso nibee hazʼáanii dayiitíihgo ádíníinii doo yikʼeh dahóółʼįįd da, áko Mózes ninaalʼaʼí nilíinii bee hazʼáanii biyiʼ yee akʼeʼashchı̨́įgo hóyéeʼjįʼ nihá haʼoodzíiʼgo bee nihootʼáanii nihikʼi hooleʼ, háálá Diyin God bichʼįʼ ádił daʼniilzííʼ.
12 Áko nihí índa nihá dahwéeʼaahii danilíinii tsʼídá tʼáá aaníígóó nizaad nihikʼijįʼ bee háínídzíiʼii bikʼehgo ayóó átʼéego atínihiinilaa; jó, Jerúsalem kin haalʼáii ábiʼdiilyaaígi átʼéego nidahoneesʼą́ą́góó tsʼídá tʼah doo ákóhánéeh da nítʼééʼ.
13 Mózes yee hasʼáanii bee akʼeʼashchínígíí bikʼehgo ayóó átʼéego atínihiʼdiilyaa, nidi doo ákwii ádeiitʼįįdii doo bitsʼáhidiikahgóó áádóó nitʼáá aaníinii doo bikʼidaʼdiyiitįįhgóó Bóhólníihii nihiDiyin God yee achʼooʼníinii tʼáadoo há deiitʼįįd da.
14 Éí bąągo Bóhólníihii éí tsʼídá tʼáá íiyisí yínííł bikʼeʼíyéeʼii hashtʼeyósingo yee atínihiilaa, háálá Bóhólníihii nihiDiyin God tʼáá ałtsoní binaanishígíí tsʼídá tʼáá ákwii átʼé, nidi áníinii doo bikʼeh dahoniilʼı̨́į da nítʼééʼ.
15 Áko kʼad, Bóhólníihii nihiDiyin God nílíinii, Ííjipdę́ę́ʼ nidineʼé nibee adziilii bee chʼííníʼeezhgo díí jı̨́ átʼéhígi átʼéego nízhiʼ bééhózingo íinilaa. Ádił nidaʼayeelzííʼ; tsʼídá doo yáʼáshónígi ádeiitʼįįd.
16 Bóhólníihii nílíinii, tsʼídá tʼáá ákogi átʼéego ááníiłii tʼáá ałtso bikʼehgo, jó, Jerúsalem nikin haalʼáii, nidził diyinii bichʼįʼ náhóóchįįdgo hashké ninidzı̨́ʼígíí łahgo ánánídléehgo baa nánooshkąąh; jó, nihí ádił nidaʼayeelzíiʼgo índa danihizhéʼé yę́ę ádił nidaʼiisíiʼgo biniinaa nihinaagóó kéédahatʼíinii éí Jerúsalem índa nidineʼé tʼóó yá nidahałtʼiʼ.
17 Éí bąągo kʼad, nihiDiyin God nílíinii, ninaalʼaʼí nishłíinii shisodizin índa shináʼookąąh shá diitsʼı̨́ı̨́h, áádóó, Bóhólníihii nílíinii, nihodiyingo hazʼą́ągi tʼáá ádzaaí silı̨́ʼígíí ádá yáʼátʼéehgo baa tsídíkees.
18 ShiDiyin God nílíinii, shidiitsʼı̨́ı̨́h; nihiníníłʼı̨́ áádóó nikin haalʼáii nízhiʼ bee wójíhígi doo naagháhí daígíí níníłʼı̨́, háálá tʼáá ákogi ádaniitʼéego bąą doo nídaniikąąh da, nidi nee aʼááh hasin ayóó átʼéii bąą nídaniikąąh.
19 Bóhólníihii nílíinii, nihidiitsʼı̨́ı̨́h; Bóhólníihii nílíinii, bąąhági átʼéii nihitsʼádiníʼaah; Bóhólníihii nílíinii, nihidiitsʼı̨́įhgo nihá ánínééh; shiDiyin God nílíinii, ádá tʼáadoo tʼah níníziní, háálá nikin haalʼáii índa nidineʼé danilíinii nízhiʼ bee wójí.
Tsostsʼidiindi damóojįʼ áhodoonííł baa haneʼ
20 Áko shibąąhági átʼéii índa shidineʼé Ízrel bibąąhági ádaatʼéii bá bee ádaa hashneʼgo sodeeszingo Bóhólníihii shiDiyin God bidził diyinii bá náʼooshkąąhgo
21 tʼahdii sodiszingo diné léiʼ Géíbriyel wolyéii átsé shił ádzaa yę́ę tʼáá nááná éí iʼííʼą́ągo nááʼiiniihjįʼ ahoolzhiizhgo tʼáadoo hooyání shaa yítʼaʼgo shideelchid.
22 Áko shaa honíleʼgo shichʼįʼ yáłtiʼgo nashintingo áshidííniid, Daniel yinílyéii, bee hódzą́ índa bee akʼidiʼyiitįįhii naa dideeshʼááł biniyé naa honíleʼ.
23 Baa náʼiinikąąhgo tʼóó sodiʼnilzin yę́ędą́ą́ʼ ná bee hooʼaʼ áádóó bee nił hodeeshnih biniyé naa honíleʼ, háálá Diyin God ayóóʼánóʼní; éí bąą nił áhoodzaago yiniłtsánígíí ááhyiłníinii yísíníłtsʼą́ąʼgo bikʼidiʼdíítı̨́ı̨́ł.
24 Tsostsʼidiindi damóo azlı̨́įʼjįʼ éí nidineʼé índa diyingo nikin haalʼáii átʼée dooleełii nideetʼą́, éí tsʼídá bąąhági áhooníiłii bíighah adooleełgo bąąhági átʼéii ádooldįįł, áádóó bąąhági ádaatʼíinii bá kʼénáhodoodleełgo hoolʼáágóó tsʼídá tʼáá ákogi átʼéii biih hidootʼish áádóó éí nił ádzaii índa áhodoonííł baa hóóneʼígíí tsʼídá bohodoolnííł índa tsʼídá aláahgo diyingo hazʼą́ atsʼádeetʼą́ dooleełgo akʼah bikʼi yeidoodziłgo hodoosı̨́ı̨́ł biniyé nideetʼą́.
25 Áko Jerúsalem kin haalʼá hashtʼéédoolníiłgo bee nihootʼáanii Diyin Kʼehgo Atsʼáltíinii níyáajįʼ éí tsostsʼidi damóo índa hastą́diindóó baʼaan naakidi damóo azlı̨́įʼjįʼ nił bééhózingo bikʼidiʼdíítı̨́ı̨́ł; azhą́ achʼįʼ nahwiiʼnáa nidi, kintah nidaʼaztiin áádóó ahééʼígeedii bee tʼáá bił áńdadoolnííł.
26 Áko hastą́diindóó baʼaan naakidi damóo azlı̨́ı̨́ʼdóó bikʼijįʼ Diyin Kʼehgo Atsʼáltíinii ábidiʼdooldįįłgo bee bikʼíhátʼáahii ádin doo áádóó naatʼáanii doogáłígíí bidineʼé doonéełgo éí kin haalʼáii índa hodiyingo hazʼáanii ałtso ádeidoołdįįł. Áko ayóó átʼéego tó yíląąd nahalingo tʼáá anaaʼ hólǫ́ǫgo nihodootʼihgo kintsʼiil tʼéí naazhjaaʼ doo.
27 Áko tʼááłáʼí damóo azlı̨́įʼjįʼ jiląʼí bidziilgo hoł ahaʼdidootʼááł, nidi éí damóo aleehígíí ałnííʼgóó hoolzhishgo didlidgo nááhániihii índa nááʼiiniihígíí áidoosįįł. Áádóó ałtso ábiʼdidooldįįł nideetʼáanii baa hoolzhiizhjįʼ niʼiiłchǫǫhii éí diyingo hazʼánígi tʼáá íiyisí doo haldingóó áhodoolííł.
