Deuteronomy 13:1-18
13 Nihitahdóó łaʼ áhodooníiłii yaa halneʼii, doodaiiʼ nayiiyeełgo yee bił ééhózinii nídiidzáago, éí bee ééhózinii, doodaiiʼ tʼóó bikʼee ił ahayóii áyoolíiłgo
2 áádóó bee ééhózinii, doodaiiʼ bikʼee tʼóó ił ahayóii nihichʼįʼ yee yáłtiʼ yę́ę bikʼeh áhoodzaago, jó, tʼáá bítséedi kónihidííniid, Tįʼ, diyin dabidiʼníinii doo béédahonohsinii bikééʼ dah dahididiikah áádóó bá nideilʼaʼ doo.
3 Áko áhodoonííł yaa halneʼii, doodaiiʼ éí nayiiyeełgo yee bił ééhózinii bizaad doo dzółtsʼą́ąʼ da; jó, Bóhólníihii nihiDiyin God hanihisííd, áko Bóhólníihii nihiDiyin God daatsʼí nihijéí tʼáá átʼé bee índa nihiiʼ sizíinii tʼáá átʼé bee ayóóʼádeínóhʼníigo bił bééhózin doo.
4 Bóhólníihii nihiDiyin God bikééʼ wohkah áádóó dadíínóhsin áádóó bibikʼeh óʼooʼníiłii bikʼeh dahonołʼı̨́įgo biinééʼ deísółtsʼą́ą́ʼ índa bá nidaałʼaʼgo bąąh dah shoojééʼ.
5 Éí áhodoonííł baa hojilneʼii, doodaiiʼ nijiiyeełgo bee hoł ééhózinii hodiʼyoolyééł, háálá éí Bóhólníihii nihiDiyin God yitsʼánihidínóoʼah yiniyé nihichʼįʼ yáłtiʼ; éí Diyin God nilíinii Ííjip kéyahdóó háánihííʼeezh, áádóó naalteʼ danohłı̨́ yę́ędóó náánihiisniiʼ; Bóhólníihii nihiDiyin God nihichʼįʼ yee haadzíiʼii bidaʼíínóhsingo deínóhkáah dooleełígíí yitsʼánihidínóoʼah yiniyé nihichʼįʼ yáłtiʼ. Ákótʼéego doo yáʼátʼéhígi ádaatʼéhígíí nihitahdóó nahjįʼ kódaałʼı̨́į doo.
6 Bił háíníʼáázh, éí nimá biyáázh, doodaiiʼ niyeʼ łaʼ, doodaiiʼ nitsiʼ łaʼ, doodaiiʼ neʼasdzą́ą́ ayóóʼííníʼníinii, doodaiiʼ áhą́dígo nikʼis nilíinii tʼáá nahontʼinee nihíniʼ nihá áháléehgo kónihididooniiłgo, Tįʼ, diyin dabidiʼníinii bá nideiilʼaʼ doo; éí nihí áádóó danihizhéʼé yę́ę ałdóʼ bił doo béédahonohsin da
7 éí diyin dabidiʼníinii daʼanaʼí nihináágóó áhą́dígi, doodaiiʼ nízaadi kéédahatʼíinii tʼáá éí nahasdzáán nidahoneesʼą́ą́góó kéédahatʼíinii dabidiyin ádaatʼé.
8 Ánihizhdííniidígíí tʼááká hachʼįʼ lą́ daʼoohłeʼ lágo, tʼáadoo dahwíísółtsʼą́ʼí, tʼáadoo haa aʼááh nohsiní áádóó tʼááká yisdádahołtééł lágo índa tʼááká nídahodołʼįįh lágo.
9 Nidi nihí hakʼéí nohłíinii tʼáádóo nídí dahodiyoołhééł; dahodiyoołhééł biniyé nihí alą́ąjįʼ dahodoohsił áádóó índa diné tʼáá ałtso dahodoosił.
10 Áádóó tsé bee hoł nidazdoołniiłgo dazdootsaał, háálá Bóhólníihii nihiDiyin God bitsʼánihizhdínóoʼah biniyé nihíká ájíítʼįįd; jó, Diyin God éí Ííjip kéyahdóó naalteʼ danohłı̨́ yę́ędę́ę́ʼ háánihííʼeezh.
11 Áko Ízrel dineʼé tʼáá ałtso díí yaa dahodidootsʼı̨́ı̨́ł áádóó yikʼee bił daayéeʼ doo, índa nihitahgóó doo yáʼádaashónígi áhátʼíinii doo łaʼ ánáádoolníił da.
12 Nihikin hadaasʼáhígi łahgo łaʼ kójíníigo dahodidoohtsʼı̨́ı̨́ł; éí Bóhólníihii nihiDiyin God nihaa hodiníʼánígi kéédahohtʼı̨́įgo ákwii łaʼ ázhdidooniił,
13 Diné doo yáʼádaashóonii léiʼ nihitahdóó hadahaaskaigo bikin haalʼáhídóó kéédahatʼíinii yóóʼadeineeʼaaʼgo kódeiłníigo, Tįʼ, diyin dabidiʼníinii bá nideiilʼaʼ doo (éí doo béédahonohsin da).
14 Áko bíndaʼídółkidgo áádóó hadanohtáago haleebee bíndaʼídídóołkił; jó, tʼáá aaníí ákótʼéego índa tʼáá íídą́ą́ʼ tsʼídá doo daaldinii nihitahjįʼ kólyaago baa ákodanoozı̨́įʼgo
15 tʼáá aaníí éí kin haalʼáii ákwii kéédahatʼínígíí diltłish bee tsʼídá ałtso ádadoołdįįł, índa ákwii dahólónígíí tʼáá átʼé, alı̨́įʼda diltłish bee ałtso nidadoołtsxił.
16 Áko bindaalyeʼé bąąh dabiʼdoogą́ʼígíí tʼáá átʼé kintaa aztiingi ałkʼi yáádeidoohtsihgo tʼáá átʼé Bóhólníihii nihiDiyin God bichʼįʼ dadohłidgo náádahidoołnih, índa éí kin haalʼáhígíí ałkʼi yanáaʼáago ahoolʼáa doo; ákweʼé doo náánáłaʼ kin haalʼáago ánáádoolníił da.
17 Áko ádadooldįįłgo nideetʼáanii tsʼídá doo nijilée da, áko Bóhólníihii yee hashké nídzinii bikʼeʼíyéeʼii doo nihikʼi hwiidooleeł da, nidi nihaa aʼááh dínóozįįł áádóó nihaa aʼáhí dínóozįįł índa kʼeeʼąą noohtʼı̨́įłgo ánihidoolííł, ákótʼéego danihizhéʼé yę́ę yichʼįʼ yee ádee hadoodzííʼ.
18 Bóhólníihii nihiDiyin God bizaad hazhóʼó deísółtsʼą́ąʼgo áádóó bibikʼeh óʼooʼníiłii tʼáá átʼé díí jı̨́ nihichʼįʼ bee haasdzíʼígíí bikʼeh dahonołʼı̨́įgo índa Bóhólníihii nihiDiyin God binááł tʼáá ákóneʼ átʼéii baa nidaahkaigo éí yee nihikʼiinítʼı̨́įʼ doo.
