Deuteronomy 14:1-29
14 Bóhólníihii nihiDiyin God baʼáłchíní danohłı̨́; daneeznánígíí bá tʼááká nidaʼádiyołgéésh yíilaʼ, éí doodaiiʼ nihítáaʼgi tʼááká bá bídaahshééh yíilaʼ.
2 Háálá Bóhólníihii nihiDiyin God bichʼįʼ diné dadiyinii danohłı̨́, áádóó Bóhólníihii tʼáá bí ádá tʼáá sahdii ánóhtʼée doo biniyé nánihidiinilgo nihokááʼ dineʼé tʼáá ałtso biláahgo ánóhtʼéego ánihósin.
Naaldlooshii daadáanii índa doo daadáanii
3 Tʼáá haʼátʼíhída Bóhólníihii doo yíłdinii doo jiyą́ą da.
4 Naaldlooshii kódaatʼéhígíí daohsą́: éí béégashii lá, dibé lá índa tłʼízí lá.
5 Bįįh, jádítsoh, bįįh łitsoii, tłʼízí ałchinii, tsétah tłʼízí, jádí índa tsétah dibé daahsą́.
6 Áádóó naaldlooshii kódaatʼéii bikéshgaan dahałgizhígíí índa nídaʼatʼaałígíí éí tʼéí daohsą́.
7 Naaldlooshii bikéshgaan dahałgizhígíí, doodaiiʼ nídaʼatʼaałígíí łaʼ doo yidą́ą da: éí ghą́ą́ʼaskʼidii áádóó gah índa dlǫ́ʼiigi átʼéhígíí, háálá éí nídaʼatʼaał nidi bikeeʼ doo dahałgizh da. Éí doo nihá yáʼádaatʼéeh da.
8 Áádóó bisóodi éí bikeeʼ hałgizh nidi doo náʼátʼaałgóó bąą doo nihá yáʼátʼéeh da; bitsįʼígíí doo łaʼ dadoohsı̨́įł da áádóó daninéhígíí bitsʼíís doo biʼdeelchíid da.
9 Díí táyiʼ nidaaldeehii tʼáá ałtso kódaatʼéhígíí daohsą́: bitʼaʼ dahólónígíí índa bikágí ałkʼi dadookʼįhígíí éí daahsą́.
10 Nidi bitʼaʼ ádaadinígíí índa bikágí doo ałkʼi dadookʼįhígíí doo yidą́ą da. Éí doo nihá yáʼádaatʼéeh da.
11 Nidaatʼaʼii yáʼádaatʼéehii tʼáá ałtso daohsą́.
12 Nidi díí éí tʼáadoo daohsání: éí atsá áádóó jeeshóóʼ áádóó jeeshóóʼ diłhiłii
13 áádóó atseełtsoii áádóó giní índa atsá ałʼąą ádaatʼéii
14 áádóó gáagii ałʼąą ádaatʼéii
15 áádóó tsídiitsoh ástrich wolyéii áádóó náʼáshjaaʼ áádóó tábąąsdísí índa giní ałʼąą ádaatʼéii
16 áádóó dlǫ́ʼátah náʼáshjaaʼ áádóó náʼáshjaatsoh áádóó náʼáshjaałgaii
17 áádóó naalʼeełí bidaasʼnézí áádóó chʼil haatʼagii áádóó toohjįʼ noołnahii
18 tábąąsdísí bijáásʼnézí áádóó tábąąsdísí ałʼąą ádaatʼéii áádóó tsé noolchʼóshii áádóó jaaʼabaní
19 áádóó chʼosh nidaatʼaʼii doo nihá yáʼádaatʼéeh da, éí doo daadą́ą da.
20 Nidi nidaatʼaʼii yáʼádaatʼéehii tʼáá ałtso daohsą́.
21 Tʼáá haʼátʼíhída tʼáá bíniʼídi daaztsáanii tʼáadoo daohsání; déʼéyóní bił kéédahohtʼínígíí baa dahidohʼaahgo éí deiyą́ą doo, doodaiiʼ déʼéyóní danilíinii bichʼįʼ nidahołniih doo, háálá Bóhólníihii nihiDiyin God bidineʼé diyinii danohłı̨́.
Tłʼízí yázhí bitsįʼ tʼáadoo bimá bibeʼ bee daałbézhí.
Neeznáá daníjaaʼígíí éí tʼááłáʼígo shijaaʼjí bee hazʼáanii
22 Tʼáádóo nídí nínádanołtʼı̨́hígíí tʼáá átʼé bitsʼą́ą́dóó neeznáá daníjaaʼígíí éí tʼááłáʼígo shijaaʼ ninádahidohʼaah; éí tʼáá nináhah bikʼeh ákódaahtʼı̨́į doo.
23 Bóhólníihii nihiDiyin God binááł díí nídaahdı̨́įh doo: éí náhodidooʼ áłígi ákwii bízhiʼ dólzingo hazʼą́ągi tłʼoh naadą́ą́ʼ neeznáá daníjaaʼígíí éí tʼááłáʼígo shijaaʼ áádóó wáin ániidíii neeznáá daníką́ągo tʼááłáʼí siką́ągo áádóó tsin áliv bineestʼąʼ bikʼah neeznáá daníką́ągo tʼááłáʼí siką́ągo índa nihilı̨́ı̨́ʼ áádóó nihidibé alą́ąjįʼ nidahaazhchíinii náádahołniihii daahsą́ą doo. Ákódaahtʼı̨́įgo díí bídahoołʼaah doo: Bóhólníihii nihiDiyin God tʼáá áłahjįʼ dadíínóhsin doo.
24 Nihighandóó diyingo hazʼáníjįʼ atiinígíí nihá doo deighání dago áádóó baa nídahidohʼaahígíí nidahohjáahgo doo bídanoołʼą́ą́góó, doodaiiʼ éí hazʼánígóó nihá aláahgo nízaadgo éí Bóhólníihii Diyin God náhodidooʼáłígi ákwii bízhiʼ dólzingo hazʼáníjįʼ biyah hóyéeʼgo Bóhólníihii nihiDiyin God nihikʼijisdliʼgo
25 baa nídahidohʼaahígíí éí béeso bił ałgháádaʼayohʼníiłgo ałchʼįʼ bidaʼastłʼǫ́ǫgo Bóhólníihii nihiDiyin God náhodidooʼáłígóó nídadohkah doo.
26 Áádóó béeso nihaa dahindéhígíí bee nihił bidáádahaníinii nishódahoołtʼeeh; éí béégashii, doodaiiʼ dibé, doodaiiʼ wáin, doodaiiʼ yidlą́ bitsxeʼii éí Bóhólníihii nihiDiyin God binááł nihaʼáłchíní bił nihił nidahoozhǫǫhgo nídaahdı̨́įh doo.
27 Líívai dineʼé nihił kééhatʼínígíí tʼááká yóóʼadadoohʼááł lágo, háálá éí nihííʼ dooleełii doo bił ałtsʼą́ą́ʼ daʼnołkʼiiz da.
28 Tááʼ náhááh góneʼ nínádanołtʼı̨́įhii tʼáá átʼé bitsʼą́ą́dóó neeznáá daníjaaʼígíí éí tʼááłáʼígo shijaaʼ tʼáá éí yihahígíí binih nihikin hadaasʼáá góneʼ nooh náʼáchíihgi hashtʼeʼnidahohnííł.
29 Áko nihííʼ dooleełii Líívai dineʼé doo bił ałtsʼą́ą́ʼ daʼnołkʼiizii áádóó déʼéyóní áádóó áłchíní bizhéʼé ádaadinii índa asdzání bąąh áhásdįįdii nihikintahgi nihił kéédahatʼíinii nídaakahgo nihił nídaʼadı̨́įhgo hwiih nídaadleeh doo; ákódaohtʼı̨́įgo Bóhólníihii nihiDiyin God éí naanish baa nidaahkaígíí tʼáá ałtso yił nihikʼijidlíi doo.
