Deuteronomy 15:1-23
15 Tsostsʼid náhááh góneʼ ąąh hadasoołʼáhígíí tʼóó bikʼindadiʼyohzóoh dooleeł.
2 Ąąh hááʼá bikʼińdaʼdeesdzooígíí kótʼéego bee hazʼą́ą doo: tʼáá háiida bił kééhojitʼíinii bąąh hajííłʼáhígíí tʼóó bá bikʼinízdoozoh. Bił kééhojitʼíinii, doodaiiʼ hakʼis bąąh hajííłʼáhígíí doo bee bizhdiilkaal da doo, háálá Bóhólníihii ąąh hááʼá tʼóó aa hiditʼaahgo yee nihoníʼą́.
3 Doo Ízrel dineʼé nilíinii tʼáá nichʼįʼ nináʼdoodléełgo bee bidinilkaal doo, nidi Ízrel dineʼé nilíinii bąąh háíníłʼáhígíí tʼóó bá bikʼińdíízoh.
4 Áko nihitahgi doo łaʼda bahojoobáʼí da doo, háálá Bóhólníihii nihiDiyin God nilíinii kéyah nihííʼ dadooleełgo nihaidiníʼánígíí biyiʼ Bóhólníihii tʼáá íiyisí nihikʼijidlíi doo.
5 Bóhólníihii nihiDiyin God hazhóʼó biinééʼ deísółtsʼą́ąʼgo díí bikʼeh óʼooʼníiłii tʼáá átʼé bee nihichʼįʼ haasdziihígíí ádaa dasoosįįdgo tʼéiyá nihikʼijidlíi doo.
6 Áko Bóhólníihii nihiDiyin God yee nihoníʼáanii bikʼehgo nihikʼijidlíi doo, áádóó ałʼąą anaʼí tʼóó ahayóígíí bichʼįʼ béeso aʼiiníiłii danohłı̨́į doo, nidi bí éí doo nihadaʼiiníił da doo, índa ałʼąą anaʼí tʼóó ahayóígíí bindanohtʼáa doo, nidi bí éí doo nihindantʼáa da dooleeł.
7 Nihitahgóó téʼéʼı̨́ yikʼee naagháii nihikʼisóó danilíinii łaʼ nilı̨́įgo, éí nihikéyah Bóhólníihii nihiDiyin God nihaidiníʼánígi nihikin hadaasʼáagi łahgo kééhatʼı̨́įgo doo bichʼįʼ nihijéí doołtłʼis da, doodaiiʼ doo tʼóó bídadínóołyęsh da.
8 Nidi bichʼįʼ nihił dahadleeʼgo yídin nilínígíí bíighahgo béeso baa nídaʼohniłgo bił yáʼátʼéeh doo.
9 Tʼááká yíilaʼ nihijéí bee nichxǫ́ʼígo tsídóhkeesgo kódóhniih lágo, Tsostsʼid náhááh góneʼ ąąh hááʼá bikʼińdaʼdidzóóh baa nááhoolzhíísh. Áko nihikʼis téʼéʼı̨́ nilı̨́įgo tʼóó nabídanołyęęshgo áádóó doo tʼáá kʼad badaʼsooláágóó tʼóó nihikʼijįʼ nilı̨́įgo Bóhólníihii yíká áníi doo, índa bí biniinaa ádił daʼsoołziih doo.
10 Tʼáádóo nídí bichʼįʼ nihił dahadleeʼ áádóó bichʼįʼ danihíłtłeehígíí tʼáadoo bikʼédí danohłíní; ákódaohtʼı̨́įgo Bóhólníihii nihiDiyin God nihinaanish nilíinii índa tʼáá ádaohłíłígíí tʼáá ałtso yił nihikʼijidlíi doo.
11 Háálá kéyahgi badahojoobáʼíígíí áłahjįʼ nihił dahólǫ́ǫ doo; éí bąą díí nihichʼįʼ bee haasdziihgo kódíshní, Nihikʼisóó danilíinii badahojoobáʼíii áádóó hojoobaʼ nahasʼáanii nihikéyahgi nidaakaígíí bichʼįʼ nihił dahadleeʼ doo.
Naalteʼ danilíinii baa áháyą́ągi (Ex. 21:1-11)
12 Áádóó nihidineʼé éí Hííbrew dineʼé nilı̨́įgo hastiin, doodaiiʼ asdzánída nihinaalteʼ danilı̨́į doo biniyé nihichʼįʼ nidabiʼdiiniihgo hastą́ą́h nínáhahjįʼ nihá ninádaalʼaah doo, nidi tsostsʼid náhááh góneʼ béédahidohchíid doo.
13 Áko tʼáadoo átʼéhígóó béédahidohchíidgo tʼáá ákohígo tʼáadoo béédaʼayołnéhí.
14 Nihidibé danihíłtłeehgo łaʼ bá atsʼádadoohnił, áádóó tłʼoh naadą́ą́ʼ haaltséedii łaʼ baa dadoohjih, índa chʼil naʼatłʼoʼii yishjizhgo bąąh haaʼniiʼii łaʼ baa dadoohsił. Bóhólníihii nihiDiyin God nihikʼidajisdliʼígi átʼéego baa dajiidoohbaał.
15 Ííjip kéyahdi naalteʼ danohłı̨́ı̨́ nítʼééʼ yę́ę nibéédahołníih dooleeł, áko Bóhólníihii nihiDiyin God náánihiisniiʼgo nihikʼé nináʼídláago bąą díí jı̨́ díí kódaatʼéhígíí nihichʼįʼ bee haasdziih.
16 Kóhodoonííł: bí ánihididooniiłgo, Doo nihitsʼą́ą́ʼ dah dideesháał da, háálá ayóóʼánihóʼní áádóó naʼáłchíní ayóóʼáyóʼní índa nihaʼałkʼee bił yáʼáhootʼééh.
17 Tsah nitsaazii bee dáádílkał bikʼijįʼ bijaaʼ bighádaʼdoohtsih, áádóó náásgóó nihá naalʼaʼ doo, índa asdzání nihinaalteʼii ałdóʼ tʼáá ákódadoohłííł.
18 Nidi doo nihá nantłʼagóó nihinaalteʼ nihitsʼą́ą́ʼ dah nídidoodááł, háálá ílı̨́įgo adeenáago naalnishii biláahgo ahą́ą́h nániiláago naalnishgo hastą́ą́h nááhai, áko Bóhólníihii nihiDiyin God éí nihindaanish tʼáá átʼé yikʼijidlíi doo.
Alą́ąjįʼ nidahachíihii diyingo nináhiditʼaahii
19 Nihilı̨́ı̨́ʼ bikąʼii alą́ąjįʼ nidahachíhígíí éí Bóhólníihii nihiDiyin God bichʼįʼ dílzingo ádadoohłííł; béégashii bikąʼii alą́ąjįʼ nidahachíhígíí doo bee nihoyíłdlaad da doo, índa dibékąʼii alą́ąjįʼ nidahachíhígíí doo tánídadohgish da doo.
20 Bóhólníihii nihiDiyin God binááł tʼáá nináhááh bikʼeh nídaʼohdı̨́įh doogo Bóhólníihii náhodidooʼáałgi nihí índa nihadaʼáłchíní bił ákódaahtʼı̨́į doo.
21 Áádóó haʼátʼéegoda alı̨́ı̨́ʼ bąąh dahazʼą́ągo naʼniłhodgoda, doodaiiʼ doo ooʼı̨́įgoda, doodaiiʼ yéego bąąh dahazʼą́ągoda éí tʼááká Bóhólníihii nihiDiyin God bichʼįʼ náádahołniih yíilaʼ.
22 Nidi tʼáá danihiníghanídi dadoohsı̨́ı̨́ł, doo biʼdidéehii áádóó biʼdidéehii éí jádí bitsįʼ áádóó bįįh bitsįʼ yidánígi átʼéego deiyą́ą doo.
23 Tʼáá hazhóʼó bidił tʼéí tʼáadoo daohsání; łeeshtahjįʼ tó yaadzídígi átʼéego niʼjįʼ yadahoohsíid doo.
