Deuteronomy 16:1-22
16 Ábiib nídízídígíí tsʼídá béédaołniih; jó, ákóneʼ Bóhólníihii nihiDiyin God bichʼįʼ atisʼadeesdzá bee bééhániihii bee bichʼįʼ ninádahołaah doo, háálá Ábiib nídízídígíí binih tłʼéeʼgo Ííjip kéyahdę́ę́ʼ Bóhólníihii nihiDiyin God chʼínihiníʼeezh.
2 Éí bąą Bóhólníihii nihiDiyin God bichʼįʼ atisʼadeesdzá bee bééhániihii néitʼaahgo Bóhólníihii náhodidooʼáłígi nihidibé áádóó nihibéégashii łaʼ náádahołniih doo; ákwii bízhiʼ dólzingo óolzin doo.
3 Dííkʼǫsh bił bááh ályaii éí náádahołniihii tʼáadoo bił daohsání; tsostsʼid jı̨́ dííkʼǫsh tʼáágééd bááh ályaii éí bááh achʼįʼ nahwiiʼnáago ályaii nídaohdı̨́įh doo, háálá tʼóó hatsxı̨́įłgo Ííjip kéyahdę́ę́ʼ chʼínooná. Kótʼéego Ííjip kéyahdę́ę́ʼ chʼínoonánígíí náás nihídeídíiską́ą́góó béédaołniih doo.
4 Dííkʼǫsh bił bááh ályaii nihikéyahgi tsostsʼid jı̨́ tʼááká łaʼ tʼáá nihee hólǫ́ yíilaʼ, áádóó hahóóyá bijı̨́ iʼííʼą́ągo atsįʼ náádahoołniiʼígíí hoosʼįįdjįʼ tʼááká łaʼ chʼínółnééh lágo.
5 Atisʼadeesdzá nááhániihii nihikin hadaasʼáagi tʼáadoo náádahołniihí; éí kin hadaasʼáii Bóhólníihii nihiDiyin God nihaidiníʼánígi tʼáadoo nídaołʼaahí.
6 Nidi Bóhólníihii nihiDiyin God bízhiʼ dólzin dooleeł biniyé náhodidooʼáłígi ákwii atisʼadeesdzá bee bééhániihgo nááhániihii eʼeʼáahgo náádahołniih doo; Ííjip kéyahdę́ę́ʼ chʼínooná yę́ęjįʼ anáhwiilzhíishgo nídaołʼaah doo.
7 Bóhólníihii nihiDiyin God náhodidooʼáłígi ninádaʼayołtʼis áádóó nídaohdı̨́įh doo. Abínígo danihiníbaalígóó anídahohkáah doo.
8 Hastą́ą́h jı̨́ dííkʼǫsh tʼáágééd bááh ályaii daohsą́ą doo; tsostsʼid yiską́ą́ góneʼ Bóhólníihii nihiDiyin God bichʼįʼ hodílzingo áłah náhdleeh doo; ákóneʼ tʼáá haʼátʼéegoda doo nidoołnish da.
9 Tsostsʼidi hááʼáyı̨́ı̨́h jı̨́ niʼiileehígíí nídeínółtah doo; tłʼoh naadą́ą́ʼ bee higéshí bee tłʼoh naadą́ą́ʼ higéésh hahalzhishdóó níléí tsostsʼidi hááʼáyı̨́ı̨́h jı̨́ niʼiileehígíí nídeínółtah doo.
10 Atisʼadeesdzá bééhániihgo néitʼaahdóó tsostsʼidi damı̨́įgo náʼádleeh biiłkáhí Bóhólníihii nihiDiyin God bichʼįʼ hodílzingo áłah náhdleehgo nályééh, éí tʼáá nihí ádeinohsingo nááhániihii átʼéego ałdóʼ bichʼįʼ náádahołniih doo; Bóhólníihii nihiDiyin God nihikʼijisdliʼígi átʼéego ádeínóhsin.
11 Bóhólníihii nihiDiyin God binááł nihił nidahoozhǫǫh doo; nihí áádóó nihiyeʼké áádóó nihitsiʼké áádóó diné nihá nidaalʼaʼí áádóó asdzání nihá nidaalʼaʼí áádóó Líívai dineʼé nihitahgóó kéédahatʼínígíí áádóó déʼéyóní áádóó áłchíní bizhéʼé ádaadinii índa asdzání bąąh áhásdįįdii nihitahgóó kéédahatʼínígíí éí Bóhólníihii nihiDiyin God bízhiʼ dólzingo óolzin doo biniyé náhodidooʼáłígi bił nihił nidahoozhǫǫh doo.
12 Áko Ííjip kéyahdi naalteʼ danohłı̨́ı̨́ nítʼééʼ yę́ę nibéédahołníih dooleeł áádóó díí yee nihwiizʼáanii ádaa daohsįįhgo bikʼeh dahonołʼı̨́.
13 Chahaʼohgi hodílzingo áłah náʼádleeh tsostsʼid jı̨́ nídaołʼaah doo; éí tłʼoh naadą́ą́ʼ háádaołchʼih áádóó chʼil naʼatłʼoʼii dashoołjizhdóó bikʼijįʼ ákódaʼółʼı̨́į doo.
14 Hodílzingo áłah náʼádleehgo nihił nidahoozhǫǫh doo; nihí áádóó nihiyeʼké áádóó nihitsiʼké áádóó diné nihá nidaalʼaʼí áádóó asdzání nihá nidaalʼaʼí áádóó Líívai dineʼé áádóó déʼéyóní áádóó áłchíní bizhéʼé ádaadinii índa asdzání bąąh áhásdįįdii nihitahgóó kéédahatʼínígíí bił nihił nidahoozhǫǫh doo.
15 Tsostsʼid jı̨́ Bóhólníihii nihiDiyin God bichʼįʼ hodílyingo áłah náʼádleeh Bóhólníihii náhodidooʼáłígi nídaołʼaah doo, háálá Bóhólníihii nihiDiyin God nihikʼiizhdoodliiłgo łą́ągo nínádanołtʼı̨́hígíí tʼáá átʼé áádóó nihindaanishígíí tʼáá átʼé nihá bilááh ánáyoodlíił doo; éí bąą tʼáá íiyisí nihił nidahoozhǫǫh doo.
16 Nínáhahjįʼ táadi nihí diné danohłíinii tʼáá ánółtso Bóhólníihii nihiDiyin God binááł Bóhólníihii náhodidooʼáłígi bichʼįʼ nináhkah doo; dííkʼǫsh tʼáágééd bááh ályaii áádóó tsostsʼidi damı̨́įgo náʼádleeh biiłkáhí índa chahaʼohgi hodílzingo áłah nídaʼadleehgi Bóhólníihii binááł náádahaniihii doo tʼáágééd nídaahkah da doo.
17 Nidi diné tʼááłáʼí jinítínígo tʼáá bídajíighahígo Bóhólníihii nihiDiyin God yee hakʼijisdliʼii bikʼehgo baa nídahizhdiʼaah doo.
Tsʼídá tʼáá ákogi átʼéego bee óhólníihii
18 Ándahwiiʼaahii áádóó bídahólníihii nihikin dah naazhjaaʼgóó nidahidoohnił; Bóhólníihii nihiDiyin God nihaidiníʼánígíí biyiʼ nihidineʼé bikʼehgo ákódadoohłííł, áko tsʼídá tʼáá ákogi átʼéego diné yá nidahodiiʼaah doo.
19 Tʼáá ákogi átʼéego ánihodiyiitʼaah tʼáadoo bił náʼílnaadí; tʼáadoo łaʼ ałʼohgo diné baa nitsídaohkeesí; bee naniʼdiiniihii doo nídidííléeł da, háálá bee nahoʼdiiniihígíí diné hóyáanii yíniʼ ííłdingo áyiiłʼįįh, áádóó diné tʼáá ákogi ááníiłii bizaad woochʼííd ádeileʼ.
20 Tʼáá ákogi ádaatʼéii bikʼehgo deínóhkáah doo, áko dahinohnáa doo, áádóó Bóhólníihii nihiDiyin God éí kéyah nihaidiníʼánígíí ádííʼ ádadoohłííł.
21 Bóhólníihii nihiDiyin God bibikááʼ nááʼiiniihí ádá ádadoohłíłígíí bíighahgi tsin bee eʼelyaii doo łaʼ nidíítı̨́įł da.
22 Tsé bee eʼelyaii łaʼ daboohsįįh lágo, jó, Bóhólníihii nihiDiyin God nilíinii éí yijoołxá.
