Deuteronomy 17:1-20
17 Áádóó dóola índa dibé tídadiilyaii, doodaiiʼ doo hadaałtʼéii Bóhólníihii nihiDiyin God bichʼįʼ doo náádahidoołnih da, háálá Bóhólníihii nihiDiyin God éí doo yíłdinii átʼé.
2 Nihikin hadaasʼáágóó nihitahgi Bóhólníihii nihiDiyin God nihaa hodiníʼánígi diné, doodaiiʼ asdzánída Bóhólníihii nihiDiyin God binááł doo yáʼáshónígi ádziidzaago bibee ahaʼdeetʼáanii kʼízhdootihgo
3 éí diyin dabidiʼníinii yá naalʼaʼgo áádóó yichʼįʼ nahałáago, azhą́ jı̨́honaaʼéí, doodaiiʼ tłʼéhonaaʼéí, doodaiiʼ yá biyiʼ hiníláii éí doo bichʼįʼ nahodoodlaałgóó bee haasdzíiʼii
4 áádóó bee nihił hóóneʼgo baa dahosidootsʼą́ąʼgo haleebee bíndaʼídóołkid; jó, tʼáá aaníí átʼé áádóó tʼáádóo nídí Ízrel dineʼé bitahgi tsʼídá doo haldinígi áhóótʼįįdgo
5 diné, doodaiiʼ asdzánída éí doo yáʼáshóonii yaa naayáhígíí kéédahohtʼı̨́ı̨́dóó dáńʼdítı̨́hí góneʼ diné, doodaiiʼ asdzánída chʼídadoohłóosgo tsé bee bił nidazdoołniił.
6 Ooʼíinii nidiltʼé, doodaiiʼ táltʼéego dahalneʼgo tʼéiyá ajisiihii há nihootʼánígíí hoł nizdoolniił; ooʼíinii tʼááłáʼí halneʼgo éí doo hoł nizdoolniił da.
7 Ooʼíinii dajílíinii alą́ąjįʼ áádóó índa diné náánáłaʼígíí tʼáá ałtso tsé yee hoł nidazdoołniił. Ákótʼéego nihitahdóó doo yáʼáshóonii nahjįʼ kódaałʼı̨́į doo.
8 Aa hwiinítʼı̨́įgi baa saad hólóonii aláahgo nihá nantłʼago, éí tʼáá ákójínéehgo, doodaiiʼ doo tʼáá ákójínééhgóó diné jiisxíinii, doodaiiʼ ałghaʼditʼáahgo bá baa náhátʼíinii, doodaiiʼ atíʼahilʼíinii kééhohtʼı̨́įgi baa ałghaʼditʼááh hólóonii nihá nantłʼago, Bóhólníihii nihiDiyin God náhodiiʼáníjįʼ doohkah,
9 áádóó éí yoołkáałdi nááʼiiłniihii Líívai dineʼé nilíinii, doodaiiʼ ánihwiiʼaahii nilíinii baa doohkahgo nideídídóołkił, haash yitʼéego á nihodootʼáłígíí nihił ííshjání ádeidoolííł.
10 Yee nidahodiizʼánígíí bikʼehgo ádanohtʼée dooleeł; éí Bóhólníihii nihiDiyin God náhodidooʼáłídóó nihichʼįʼ ííshją́ą́ ádeidoolíłígíí tʼáá ałtso ádaa dadoohsįįł.
11 Bee hazʼáanii bikʼehgo yee nihodiiʼaahígíí yíndanihiniłtingo áádóó bikʼehgo ándahwiiʼaahígíí yee nihił dahalneʼgo bikʼeh ádanohtʼé; yee nidahodiizʼáanii nihił ííshją́ą́ ádeidoolíłígíí tʼááká nishʼnáajigo, doodaiiʼ nishtłʼajigo bitsʼą́ąjįʼ ádanohtʼé yíilaʼ.
12 Diné tʼáá bí agháʼádoolʼáii, éí Bóhólníihii nihiDiyin God binááł nááʼiiłniihii naalʼaʼgo ahidíízínígíí, doodaiiʼ ánihwiiʼaahii doo jíistsʼą́ą́ʼgóó éí tʼóó dazdootsaał. Ákótʼéego Ízrel dineʼé bitahdóó doo yáʼáshóonii nahjįʼ kódaałʼı̨́į doo.
13 Áko diné tʼáá ałtso dadiʼdootsʼı̨́ı̨́ł áádóó dahodísin doo índa diné doo łaʼ tʼáá bí tʼéí agháʼínááʼdoolʼáa da doo.
Aláahgo naatʼáanii átʼée dooleełgi
14 Áko Bóhólníihii nihiDiyin God nilíinii kéyah nihaidiníʼánígíí biih woonáago ádííʼ ádaahłaa áádóó ákwii kééhohtʼı̨́įgo ádadidoohniił, Shinaagóó ałʼąą anaʼí ádaatʼéhígi átʼéego aláahgo naatʼáanii łaʼ shinantʼáago ádeeshłííł.
15 Tʼáá aaníí aláahgo naatʼáanii nihinantʼáa doo biniyé Bóhólníihii nihiDiyin God néididoołtéełii nídadidoołtééł; nihikʼisóó bitahdę́ę́ʼ aláahgo naatʼáanii nihinantʼáa dooleełii nidadoołtééł; déʼéyóní doo nihinantʼá biniyé nídadidoołtéeł da; jó, éí doo nihikʼis nilı̨́į da.
16 Nidi łı̨́ı̨́ʼ doo ádá néidínóołtʼı̨́įł da, doo nidi bidineʼé éí Ííjip kéyah góyaa doo yíká iʼdoołʼaał da, éí łı̨́ı̨́ʼ néidínóołtʼı̨́ı̨́ł biniyé, háálá Bóhólníihii nihichʼįʼ yee haadzíiʼgo ádííniid, Doo ákǫ́ǫ́ nátʼą́ą́ʼ nihééhidoohkah da.
17 Doodaiiʼ doo tʼóó ahayóí beʼasdzą́ą da doo, áko Bóhólníihii doo yitsʼádoogáał da áádóó béésh łigaii índa óola doo tʼóó ahayóí ádá íidoolíił da.
18 Áko kótʼée doo: aláahgo bee bóhólníihgo bił hazʼą́ągi bibikááʼdóó nahatʼáii yikááʼ dah neezdáago Líívai dineʼé náádaʼiiłniihii bidáahgi naaltsoos siʼánígíí biyiʼdóó bee hazʼáanii náánáłahjįʼ naaltsoos ałchʼįʼ yisdisii bikááʼ yee ádá yikʼi nááʼdoolchííł.
19 Áádóó éí neiʼáago niʼníłdįįd bijı̨́įjįʼ tʼáá ákwíí jı̨́ yółtaʼ doo, áko Bóhólníihii tʼáá bí biDiyin God nilı̨́įgo yidósingo yíhoołʼaah doo índa díí saad tʼáá ałtso bikʼehgo bee hazʼáanii áádóó yee nihwiizʼáanii yikʼeh hółʼı̨́įgo yéʼéłʼı̨́į doo.
20 Áádóó bikʼisóó danilíinii doo yiláahgo íʼdólzin da doo, índa bikʼeh óʼooʼníiłii bitsʼą́ąjįʼ nishʼnáajigo, doodaiiʼ nishtłʼajigo doo dah didoogáał da, áko Ízrel dineʼé bitahgi bí áádóó baʼáłchíní bił aláahgo bee bóhólníihgo bił hazʼą́ągi asʼahgóó abídeidiyoołkááł.
