Deuteronomy 18:1-22
18 Líívai dineʼé náádaʼiiłniihii áádóó Líívai dineʼé tʼáá ałtso éí Ízrel dineʼé daabíiʼii, doodaiiʼ bííʼ dadooleełii doo yił ałtsʼą́ą́ʼ daʼíłkʼiiz da. Nidi Bóhólníihii bichʼįʼ didlidgo náádahaniihígíí áádóó baa náhiditʼaahígíí deiyą́ą doo.
2 Éí bąą Ízrel dineʼé bííʼ dadooleełii doo bił ałtsʼą́ą́ʼ daʼdzíłkʼiiz da; Bóhólníihii tʼéí hóóʼ dooleełii nilı̨́įgo hachʼįʼ ádee hadoodzííʼ.
3 Áádóó nááʼiiłniihii díí baa hiditʼaah doo: éí béégashii, doodaiiʼ dibé náádayiiłniihígíí bigaan áádóó biyaatsʼiin índa bibid, éí nááʼiiłniihii yaa dayiiníił doo.
4 Tłʼoh naadą́ą́ʼ alą́ąjįʼ daneestʼáanii áádóó wáin alą́ąjįʼ hashtʼeelyaii áádóó áliv tsin naazkaadii bikʼah alą́ąjįʼ hashtʼeelyaii índa dibé alą́ąjįʼ tádoogizhii bighaaʼ hashtʼeelyaii éí baa dahidohʼaah.
5 Háálá Ízrel dineʼé tʼáá ałtso bitahdóó Bóhólníihii nihiDiyin God nábidiiłtı̨́įgo Bóhólníihii bízhiʼ yidósingo, bí áádóó biyeʼké yił naazı̨́įgo nidaalʼaʼgo ahoolʼáa doo.
6 Ízrel dineʼé danohłíinii nihikin dah naazhjaaʼídóó Líívai dineʼé łaʼ Bóhólníihii náhodiiʼaahíjįʼ deeshááł jinízingo jiníyáago
7 éí Bóhólníihii haDiyin God nilíinii bízhiʼ jidósingo nijilʼaʼ doo; hakʼisóó Líívai dineʼé tʼáá ałtso Bóhólníihii binááł ádahideezı̨́įgo nidaalʼaʼígi átʼéego nijilʼaʼ doo.
8 Hazhéʼé bííʼ nítʼééʼ yę́ę bą́ą́h daʼazlı̨́įʼii chojoołʼı̨́į nidi, aheełtʼéego chʼiyáán deiyánígíí łahjįʼ jiyą́ą doo.
Ałʼąą anaʼí biʼéʼélʼįʼ bééʼélʼíinii yóweh hodooʼniid
9 Bóhólníihii nihiDiyin God éí kéyah nihaidiníʼánígíí biih woonáago ałʼąą anaʼí doo haldin yaa naakaígíí tʼáadoo bidaʼíínóhsingo bídahoołʼaahí.
10 Nihitahgóó tʼááká hayeʼ, doodaiiʼ hatsiʼ jidiłidgo náájiyółniih yíilaʼ; tʼááká łaʼda nidadilniihii choyoołʼı̨́ yíilaʼ; tʼááká łaʼda áhodooníiłii neiłkaah yíilaʼ; tʼááká łaʼda ihondzin yaa chʼíhwiiʼaah yíilaʼ; tʼááká łaʼda adigąsh yaa naaghá yíilaʼ;
11 tʼááká łaʼda biʼiiníziin yíilaʼ; tʼááká łaʼda chʼı̨́įdii yábiiłtiʼ yíilaʼ; tʼááká łaʼda álíleego níłchʼi yee haniih yíilaʼ; tʼááká łaʼda chʼı̨́įdii yił ałchʼįʼ yáłtiʼ yíilaʼ.
12 Kódaatʼéii baa dajíkáhígíí tʼáá ádzíłtso Bóhólníihii doo hółdin da, áko díí doo haldin yaa nidaakaígíí biniinaa nihinááł Bóhólníihii nihiDiyin God nihitsʼą́ąjįʼ chʼíbiniiłkaad.
13 Bóhólníihii nihiDiyin God bichʼįʼ tsʼídá tʼáadoo bee nihikʼíhótʼahí da doo.
14 Háálá díí ałʼąą anaʼí chʼídahidínóołkałígíí éí áhodooníiłii neiłkaahii áádóó nidadilniihii dayíistsʼą́ą́ʼ nítʼééʼ, nidi nihí éí Bóhólníihii nihiDiyin God díí doo bidazhdoolíił da, nihóʼní.
Diyin God yá halneʼí łaʼ Mózesgi átʼéii éí Diyin God yee nihoníʼą́
15 Bóhólníihii nihiDiyin God nihichʼįʼgo halneʼí nihitsʼą́ą́dę́ę́ʼ tʼáá éí nihikʼisóó bitsʼą́ą́dę́ę́ʼ shígi átʼéii łaʼ néididoołááł; éí deísółtsʼą́ąʼ doo.
16 Díí tʼáá ałtso bídin danohłíinii Bóhólníihii nihiDiyin God bídeínóhkeedgo Hórebgi áłah nohłı̨́įgo yoołkááł yę́ędą́ą́ʼ ádadooniid, Bóhólníihii shiDiyin God biinééʼ doo náádideestsʼı̨́įł da, doodaiiʼ díí kǫʼ ayóó átʼéii doo néideestséeł da, áko doo dadeestsaał da.
17 Áko Bóhólníihii áshidííniid, Yee hadahaasdzíiʼii yáʼátʼéehgo yee hadaasdzííʼ.
18 Shá halneʼii nábidideeshłáałgo tʼáá hó hakʼisóó bitahdóó nigi átʼéii łaʼ biideesįįł, áko shizaad bizadeeshłéełgo yee hachʼįʼ yáłtiʼ dooígíí éí bee bichʼįʼ hahásdzíiʼii tʼéí ííłʼı̨́į doo.
19 Kótʼée dooleeł: tʼáá háiida shizaad doo jíistsʼą́ą́ʼgóó shízhiʼ hachʼįʼ yee yáłtiʼii bee hohodideeshtʼih.
20 Nidi áhodoonííł yaa halneʼii léiʼ agháʼídoolʼáago shízhiʼ choyoołʼı̨́įgo saad yee yáłtiʼii, éí tʼáadoo bee hahásdzíiʼii yee hahadziihgo, doodaiiʼ diyin dabidiʼníinii bízhiʼ binahjįʼ yáłtiʼgo áhodoonííł yaa halneʼii tʼóó bidiʼyoolyééł.
21 Tʼáá nihijéí biyiʼídi kódooniidgo, Haʼátʼíísh bee díí saad bee haʼiidziihii Bóhólníihii tʼáadoo yee hahasdzíiʼii átʼéego nihił béédahodoozįįł?
22 Áhodoonííł yaa halneʼii nilíinii Bóhólníihii bízhiʼ yee yáłtiʼgo doo bihalnééhgóó, doodaiiʼ doo bikʼíhálzhííshgóó éí Bóhólníihii doo yee hahadziihii átʼée da, nidi halneʼii tʼóó agháʼídoolʼáago niyáháłtéehii átʼé; éí tʼáadoo béédaołdzidí.
