Deuteronomy 19:1-21
19 Bóhólníihii nihiDiyin God éí ałʼąą anaʼí ałtso íísdįįdgo, bikédaayah Bóhólníihii nihiDiyin God nihaidiníʼą́ągo, nihííʼ ádadoohłííł áádóó bikin hadaasʼáhígóó índa dabikin biiʼ kéédahohtʼı̨́į doo.
2 Kin hadaasʼáhígíí nihikédaayahgi táaʼgo kin haalʼáii tʼáá nihí ádá nidadidoohʼááł; éí kédaayah Bóhólníihii nihiDiyin God nihaidiníʼánígíí ádííʼ ádadoohłííł.
3 Éí kin haalʼáii bichʼįʼ adahwiiztʼiʼgo ádahodoohłííł áádóó nihikédaayah ahádahidoohsohgo, éí Bóhólníihii nihiDiyin God nihaidiníʼánígíí ádííʼ ádadoohłíiłgo tááʼgóó ałtsʼádadoohsoh, áko diné yiyiisxíinii áajįʼ yisdádahinichéeh doo.
4 Kótʼéego diné yiyiisxíinii yisdádínóochéełgo hináa doo: tʼáá háiida yił kééhatʼíinii doo tʼáá ákwíílééhgóó yiyiisxı̨́įgo doo yikʼee diniihgóó bá átʼé.
5 Diné łaʼ tsin yidootsił biniyé yił kééhatʼíinii tsintahgóó yił dah diiʼáazhgo áádóó tsin kʼíyiyiiłneʼgo tsénił yee atseełígíí baa diiltáalgo yił kééhatʼíinii bístałgo daaztsą́ągo, hó éí łaʼ kin haalʼáhíjįʼ azhdínóochéełgo jiináa doo.
6 Doodaiiʼ éí diné jiisxínígíí dił bąąh háálı̨́ ájiilaii biniinaa bikʼéí kʼééhodidoodlíłígíí bił hodoochxih áádóó hódoolwoł; jó, yisdázhdínóochéłígóó há doo deeghání dago biniinaa hodiyoołhééł, azhą́ biniinaa hodiʼyoolyéłígíí doo bą́ą́h ílı̨́į da nidi, áádóó doo bikʼeezhdiniihgóó hoolzhiizh da nítʼééʼ nidi hodiyoołhééł.
7 Éí bąą díí nihichʼįʼ bee haasdzíiʼgo ánihidííniid, Táaʼgo kin haalʼá nídahodidoohʼááł.
8 Bóhólníihii nihiDiyin God éí kéyah hótsaago nihá yínéidoozohgo, jó, ákótʼéego danihizhéʼé yę́ę yichʼįʼ yee ádee hadoodzííʼ áádóó éí kéyah tʼáá átʼé nihaididooʼáałgo, danihizhéʼé yę́ę yichʼįʼ yee ádee hadoodzííʼ
9 áádóó díí bikʼeh óʼooʼníiłii tʼáá átʼé díí jı̨́ nihichʼįʼ bee haasdziihígíí bikʼeh ádanohtʼéego áádóó Bóhólníihii nihiDiyin God ayóóʼádeínóhʼníigo índa tʼáá áłahjįʼ bibikʼeh honítʼiʼii bikʼehgo deínóhkáahgo kódanohtʼéego tʼéiyá táaʼgo kin haalʼáhígíí táaʼgo ádá łaʼ bínáádeidoohnił.
10 Áko diné doo ádihodiiltʼiʼii doo bidił bitsʼánílı̨́įgo ádoohłíiłgo diyoołhéeł da; jó, nihikéyah bikáaʼgi Bóhólníihii nihiDiyin God éí kéyah ádííʼ ádadoohłíiłgo nihaidiníʼą́, áko bidił doo bee ádidahodidoołtʼih da.
11 Nidi diné łaʼda yił kééhatʼíinii yikʼee deeznihgo áádóó yaa niheedzáago áádóó yił adoodiłgo yił niizníłhaalgo índa bí tʼéí díí łaʼ kin haalʼáajįʼ adínóochéełgo,
12 áko hakin haalʼáhídóó hastóí aląąjįʼ naazíinii háká idaʼdoołʼaałgo nihodiʼdoodlóós áádóó dił biniinaa kʼééhodidléehii yaa dahodidooʼáałgo hodiyoołhééł.
13 Dooyéí haa aʼáhí dadínóohsįįł da nidi diné doo ádihodiiltʼiʼii seesyı̨́įgo bidił bitsʼánílı̨́įgo éí bee ádihodidootʼihii Ízrel dineʼé bitahdóó nahjįʼ kódaałʼı̨́į doo, áko nihá yáʼátʼéehgo áhooníił doo.
14 Bił kééhótʼíinii bikéyah bikáaʼgi tsé adeiztsih yę́ę doo łahgo anáádahidoohtsih da; éí náshiinídą́ʼídi danihizhéʼé yę́ę kéyah bee bééhózin doo biniyé tsé yee dahodeezo nítʼééʼ. Jó, Bóhólníihii nihiDiyin God nilíinii kéyah nihííʼ dooleełgo nihaidiníʼánígíí ádííʼ ádadoohłííł.
Ooʼíinii kʼehgo halneʼii bá bee hazʼáanii
15 Ooʼíinii tʼááłáʼígo éí, Doo ákwii ájíítʼįįd da, doodaiiʼ, Ádił adzisiihii bee ádił adzisiih, jiníigo éí doo bikʼehgo diné baa náhódóotʼįįł da, nidi ooʼíinii naaki, doodaiiʼ táaʼdago tʼéiyá baa náhódóotʼįįł.
16 Łaʼda tʼáá ádzaagóó diné yide nídiidzáago yikʼi hodiiʼaahgo, Doo yáʼáshónígi ájíítʼįįd, níigo
17 éí diné tʼáá ájíłah saad ahíjítʼáhígíí éí Bóhólníihii áádóó náádaʼiiłniihii áádóó ándahwiiʼaahii ákwii hólǫ́ǫgo yoołkáłígíí bidááhdóó nizhdooʼash.
18 Ándahwiiʼaahii tsʼídá haleebee nidahodoołkah; jó, hojilneʼígíí tʼáá áhoodzaagóó hojilneʼgo hakʼis tʼáá ádzaagóó baa hojilneʼgo hwééhodoozįįł.
19 Áko diné biyoochʼíidii kódahodoohłííł: Shikʼis ádeeshłííł, dzinízin yę́ęgi átʼéego, jó, hóda ákódahodoohłííł; kótʼéego nihitahdóó doo yáʼáshóonii nahjįʼ kódaałʼı̨́į doo.
20 Áádóó tʼáá ákǫ́ǫ́ kéédahojitʼínígíí éí daʼdzíistsʼą́ąʼ doo índa hoł daayéeʼ doo, áko kodóó nihitahgi doo yáʼáshóonii doo łaʼ ánáádazhdoodlíił da.
21 Dooyéí haa aʼáhí dadínóohsįįł da; iiná hąąh yizʼįįdii iiná bąąh nídootʼįįł, binááʼ atíjiilaago hanááʼ atínídoolnííł, biwooʼ atíjiilaago hawooʼ atínídoolnííł, bílaʼ atíjiilaago hálaʼ atínídoolnííł, bikeeʼ atíjiilaago hakeeʼ atínídoolnííł.
