Deuteronomy 20:1-20
20 Nihiʼanaʼí danilíinii bikʼiiojéeʼgo łı̨́ı̨́ʼ áádóó tsindaabąąs bijáád naakiígíí índa siláo nihilááh ánéelą́ąʼgo baa ákodanoozı̨́įʼgo tʼáadoo béédaałdzidí, háálá Bóhólníihii nihiDiyin God éí Ííjip kéyahdę́ę́ʼ chʼínihiníʼeezhii nihił hólǫ́.
2 Áko kótʼée doo: anaaʼ dahodoohłeeł biniyé nihiʼanaʼí bitʼáahjįʼ ninoohkaigo nááʼiiłniihii bidineʼé yichʼįʼ nidoogáałgo yichʼįʼ yádoołtih.
3 Áko íididooniił, Ízrel dineʼé danohłíinii, daʼíísínółtsʼą́ą́ʼ, díí jı̨́ nihiʼanaʼí danilíinii bichʼįʼ hidohkáahgo bikʼiohjeeh; tʼááká bikʼee nihił ádahódįįh lágo; tʼááká béédaołdzííd lágo, tʼááká bikʼee nihitah dahodiyółnááł yíilaʼ, índa binááł tʼááká bikʼee ádił nídahodołchił yíilaʼ.
4 Háálá Bóhólníihii nihiDiyin God nihił yikahgo nihiʼanaʼí yichʼįʼ nihá anaaʼ áhodoolíiłgo yisdánihidoonił.
5 Siláo binanitʼaʼí danilíinii éí diné yichʼįʼ hadadoodzihgo ádadidooniił, Háísh diné shı̨́ı̨́ bighan áyiilaago tʼáadoo daʼazhdlish da? Bíniʼ éí bighangóó nídoodáałgo daʼdoodlish; éí doodaiiʼ anaaʼdi biʼdiisyı̨́įgo diné náánáłaʼ éí hooghan daʼdoodlish.
6 Áádóó háísh diné shı̨́ı̨́ chʼil naʼatłʼoʼii kʼiidííláago bineestʼąʼ tʼah doo yiyą́ą da? Bíniʼ éí bighangóó nídoodááł; éí doodaiiʼ anaaʼdi hoʼdiisyı̨́įgo diné náánáłaʼ hachʼil naʼatłʼoʼii bineestʼąʼ yidooyı̨́ı̨́ł.
7 Índa háísh diné shı̨́ı̨́ asdzání łaʼ yił ahaa dootʼashgo yił ahaʼdeetʼą́ągo tʼah doo yił ahaa yítʼaash da? Bíniʼ éí bighangóó nídoodááł; éí doodaiiʼ anaaʼdi hoʼdiisyı̨́įgo diné náánáłaʼ éí asdzání yił ahaa dootʼash.
8 Áádóó siláo binanitʼaʼí diné yichʼįʼ hanáádadoodzihgo ánáádeididooʼniił, Háísh diné shı̨́ı̨́ bił yéeʼgo bił ánáhádįįh? Bíniʼ éí bighangóó nídoodááł; éí doodaiiʼ nídzíldzidígi átʼéego hakʼisóó ałdóʼ nídadooldzííł.
9 Índa siláo binanitʼaʼí ałtso diné yichʼįʼ yádááłtiʼgo, siláo dah deínéehii bindanitʼaʼí nidaʼaʼeesh dooleełii nideidoonił.
10 Áko łaʼ kin haalʼáhígi kéédahatʼínígíí bikʼiidoohjah biniyé bitʼáahjįʼ ninoohkaigo, Kʼé nídahodiidleeł, dabididoohniił.
11 Ákohgo, Kʼé náhodoodleeł lą́ą, danihidííniidgo áádóó dáńʼdítı̨́hí ąą ádayiilaago diné tʼáá ałtso bikʼídahisoohkaígíí nihinaalteʼ dadooleeł áádóó nihá nidaalʼaʼ doo.
12 Nidi doo nihił kʼé nídahałeehgóó tʼóó nihikʼiijéeʼgo binídoołzhish.
13 Áko Bóhólníihii nihiDiyin God éí nihílákʼee bididooʼáałgo diné danilínígíí tʼáá ałtso diltłish bee nidadoołtsxił.
14 Nidi asdzání danilíinii áádóó áłchíní áádóó alı̨́ı̨́ʼ ałʼąą ádaatʼéii áádóó kin haalʼáagi naalyeʼé tʼáá átʼé ádá áłah ádadoohłííł, índa nihiʼanaʼí danilíinii bindaalyeʼé éí doodı̨́įłii tʼáá bił Bóhólníihii nihiDiyin God nilíinii nihaididooʼááł.
15 Ákótʼéego doo deeghánídi kin hadaasʼáhígíí éí tʼáá ałtso ákódadoohłííł; kin hadaasʼáhígíí doo kǫ́ǫ́ anaʼí bikin hadaasʼáa da.
16 Nidi díí anaʼí bikin hadaasʼáhígóó kéyah ííʼ dooleełgo Bóhólníihii nihiDiyin God nihaididooʼáłígíí bikáaʼgi dahináanii doo łaʼ ą́ą́dadoohsįįł da.
17 Nidi tsʼídá ałtso ádadoołdįįł: Het dineʼé áádóó Ámor dineʼé, Kéínan dineʼé áádóó Píírez dineʼé, Háíva dineʼé índa Jííbas dineʼé ákódadoohłííł; jó, ákótʼéego Bóhólníihii nihiDiyin God nihichʼįʼ yee haadzííʼ.
18 Áko bidiyin dabidiʼníinii yichʼįʼ nidahałáago bee doo yildinígi ádaatʼínígíí bikʼeh ádanohtʼée doogo doo nidanihinitin da doo. Bóhólníihii nihiDiyin God bichʼįʼ ádił daʼdoohsihgi doo yee nidahidínóotįįł da.
19 Kin haalʼáii tʼáá bizééshoołzhiizhgo nízaadgóó ahoolzhiizhgo, bighadahodidoohtʼááł biniyé bił daʼahohgą́ągo, ákwii tsin naazkaadii tʼáadoo naaʼadahohtsxeełí, háálá éí bineestʼąʼ daahsą́ą doo; tʼáadoo naaʼadahohtseełí; jó, tsin yílʼáhígíí diné beʼiinaʼ átʼéego kin haalʼáii bizééshoołzhiizhgo éí chodeinołʼı̨́į doo biniyé tʼáadoo haada daałʼíní.
20 Tsin naazkaadii doo bąąhdóó ódą́ą́ʼ átʼéii nihił béédahózinígíí tʼéiyá tʼáá haada daałʼı̨́ índa naaʼadahohtsxeełgoda; éí bee neelkáalgo bineʼ naʼadziʼii ádadoohłííł, áko kin haalʼáádóó nihikʼi néijahígíí bikʼeh dasidoohdlı̨́įʼjįʼ éí bineʼ nidaohdziʼ doo.
