Deuteronomy 21:1-23
21 Łaʼ kéyahgi hoʼdiisyı̨́įgo éí Bóhólníihii nihiDiyin God éí kéyah nihaidiníʼánígíí ádííʼ ádadoohłíiłii bikáaʼgi dzígaidi dziztı̨́įgo łaʼda hakʼíníyáago, nidi diné hwiisxíinii doo bééhózingóó,
2 áko nihadahastóí aląąjįʼ naazíinii áádóó ándahwiiʼaahii nidahidookahgo hoʼdiisyíinii dziztínídóó kin hadaasʼáhíjįʼ yídadíʼnóołʼąął.
3 Áádóó kótʼée doo: kin haalʼáhídóó áhánígi hoʼdiisyı̨́įgo kin haalʼáhídóó hastóí aląąjįʼ naazíinii éí béégashiitsaʼii ániid naagháhígíí tʼah doo bee adiníishii áádóó tʼah doo bizéédéetįįhgo bee adiníishii łaʼ nídeididoolóós.
4 Áádóó kin haalʼáádóó hastóí aląąjįʼ naazíinii éí chʼíldzis góyaa tó nílínígi doo nináhwiidlaʼígi áádóó doo kʼéédílyéhígi béégashiitsaʼii nideidoolóosgo bikʼos kʼídeidootih.
5 Áko Líívai dineʼé biyeʼké náádaʼiiłniihii yichʼįʼ nidookah, háálá Bóhólníihii nihiDiyin God nábidiinilgo nidaalʼaʼ áádóó Bóhólníihii bízhiʼ bee akʼihojidlí yee yádaałtiʼ; yee hadahadziihígíí yee ałghaʼditʼáhígíí áádóó atíʼaheʼelʼínígíí tʼáá átʼé hashtʼéédayoodlííł.
6 Kin haalʼáádóó hastóí aląąjįʼ naazíinii tʼáá ałtso bił hazʼánídóó áhą́dígi diné biʼdiisyı̨́įgo éí chʼíldzis góyaa béégashii bikʼos kʼídeiztiʼígíí bikʼijįʼ bílaʼ táádeidoogis.
7 Áádóó ándadidooʼniiłgo ádadidooniił, Díí diné bidił doo bitsʼánílı̨́įgo ádeiilyaa da, doo nidi nihinááł áhóótʼįįd da.
8 Bóhólníihii nílíinii, nidineʼé Ízrel nilíinii tʼą́ą́ʼ nááhíníłniiʼígíí baa aʼáhí niizįįh áádóó tʼáadoo biniinaanígóó diné bidił deeznaʼígíí nidineʼé Ízrel nilíinii tʼáadoo bikʼijįʼ síníłʼání. Áko díí diné bidił bąąh háánaʼígíí doo bee łaʼda bikʼíhátʼáah da doo.
9 Kótʼéego tʼáadoo baanígóó nihiníiʼgi diné dił bitsʼánílı̨́įgo ádaalneʼígíí nahjįʼ nidahidohʼaah; Bóhólníihii binááł tsʼídá tʼáá ákóneʼ ádaahtʼı̨́į dooleeł.
Asdzání yisnááh danilíinii ádoolníiłgi
10 Áko nihiʼanaʼí bikʼiiojéeʼgo áádóó Bóhólníihii nihiDiyin God nihílákʼee bidííʼą́ągo índa yisnááh ádaahłaago
11 áádóó dasoołnánígíí bitahgi asdzání łaʼ ayóó ánóolninii hadíínílʼı̨́įʼgo áádóó bidáahjįʼ sínílı̨́įʼgo, Éí sheʼasdzą́ą́ ádeeshłííł, nínízingo,
12 áko nighangóó bił nídíítʼashgo áadi bitsiiʼ yikʼiidooshih áádóó bíláshgaan yidiyoogish.
13 Áádóó biʼééʼ yiiʼ sitı̨́įgo biʼdisnánígíí haididooʼniłgo nighangi sidáa doo, áádóó tʼááłáʼí nídeezidjįʼ bimá áádóó bizhéʼé yaa atínídindleeh doo, áádóó bikʼijįʼ báʼdííyehgo bahastiin dííleeł, índa bí éí neʼasdzą́ą dooleeł.
14 Áko kótʼée doo: doo baa nił hózhǫ́ǫ́góó bíniʼdii bééʼdííłnihgo tʼáá bí nízingóó adoogááł, nidi béeso doo bee nahidiyííłnih da, doo hwee adíítʼįįł da, háálá bidáníínílnihgo neʼasdzą́ą́ íinilaa nítʼééʼ.
Alą́ąjįʼ yizhchíinii bá bee hazʼáanii
15 Diné łaʼda hweʼasdzą́ą́ naakigo łaʼ ayóóʼájóʼníigo áádóó łaʼ jijoołáago, áko ayóóʼájóʼnínígíí áádóó jijoołáhígíí tʼáá áłah há ashchı̨́įgo áádóó hayeʼ alą́ąjįʼ há yizhchíinii éí jijoołáhígíí biyáázh nilı̨́įgo,
16 áko kótʼée doo: hwee hólóonii hayeʼké baazhdeeʼaahgo ayóóʼájóʼnínígíí biyáázh doo átsé baazhdidooʼáał da, háálá jijoołáhígíí biyáázh tʼáá aaníí alą́ąjįʼ yizhchíinii nilı̨́.
17 Nidi hweʼasdzą́ą́ jijoołáhígíí biyáázh alą́ąjįʼ há yizhchíinii baa ákoznízingo hwee hólóonii tʼáá átʼé naakidi ahą́ą́h nániiláago baazhdidooʼááł, háálá bitsxeʼii bineestʼąʼ bee deeztʼiʼii nilı̨́; alą́ąjįʼ biʼdizhchíinii nilı̨́įgo bíiʼii bííʼ dooleełgo bee bá hazʼą́.
Ayeʼ naalteehii
18 Diné łaʼ hayeʼ bízhą́ʼílı̨́įgo áádóó naalteehgo índa bizhéʼé, doodaiiʼ bimá bizaad doo yikʼeh hółʼı̨́ı̨́góó, áko nítʼééʼ bichʼanáhojishkeeh, nidi doo hwíistsʼą́ą́ʼgóó
19 bizhéʼé áádóó bimá éí kin haalʼáagi kééhatʼı̨́įgi hastóí aląąjįʼ naazíinii yah aʼatiiníjįʼ yichʼįʼ niidoolóós.
20 Áko kin haalʼáádóó hastóí aląąjįʼ naazíinii áyididooniił, Díí nihiyázhí bízhą́ʼílı̨́ áádóó naalteehii nilı̨́ índa doo nihikʼeh hółʼı̨́ı̨́góó dibidii áádóó adláanii nilı̨́.
21 Áádóó kin haalʼáagi kééhatʼínídóó diné danilíinii tʼáá ałtso tsé yee hoł nidazdoołniiłgo dazdootsaał; ákótʼéego nihitahdóó doo yáʼáshóonii nahjįʼ kódaołʼı̨́į doo, áko Ízrel dineʼé tʼáá ałtso daʼíistsʼą́ąʼgo bił daayéeʼ doo.
Ałʼąą ádaatʼéii bá bee nahazʼáanii
22 Áádóó diné łaʼda ádił asiihgo aniné yą́ą́h nilı̨́ íʼdiilyaago, áádóó bidiʼyoolyéełgo tsin bąąhjįʼ dabidiʼdoodlohgo
23 éí bitsʼíís doo tłʼééʼ bíighah dah hidíłtı̨́į da doo, nidi tʼáá éí bijı̨́ yóóʼábidiʼdoolnííł, háálá dah biʼdiidloʼígíí éí Diyin God hóyéeʼjįʼ bá haadzíʼígíí átʼé, áko Bóhólníihii nihiDiyin God éí kéyah nihaidiníʼánígíí ádííʼ ádadoohłíiłii doo dadoołchxǫǫł da.
