Deuteronomy 22:1-30
22 Nikwáʼásiní bibéégashii, doodaiiʼ bidibéda yóóʼííyáhígíí yiniłtsą́ągo doo tʼóó dínííłʼįįł da; tʼáá haʼátʼéegoda nikwáʼásiní bichʼįʼ nátʼą́ą́ʼ kónídíídlííł.
2 Éí bilı̨́ı̨́ʼ ílíinii doo áhánígi kééhatʼı̨́ı̨́góó, doodaiiʼ doo bééhonísingóó tʼáá ni nighangi bá baa áhólyą́ą doo, áádóó bilı̨́ı̨́ʼ ílíinii bilı̨́ı̨́ʼ yíká nihidíníitą́ąʼjįʼ bá baa áhólyą́ą doo, áko índa bichʼįʼ kónídíídlííł.
3 Áádóó bitélii ałdóʼ tʼáá ákódíílííł áádóó biʼééʼ índa nikwáʼásiní tʼáadoo leʼé yóóʼayiiníłígíí náhíláahgo ałdóʼ tʼáá ákótʼéego baa náhíʼníił doo, doo éí tʼóó dínííłʼı̨́įł da.
4 Nikwáʼásiní bibéégashii, doodaiiʼ bitéliida atiin bąąhgóó diniiteʼgo doo tʼóó dínííłʼı̨́įł da, nidi bíká adíílwołgo bił nídidíídzı̨́ı̨́s.
5 Asdzání éí diné biʼééʼ doo bee hazhdítʼée da doo, doodaiiʼ diné nidi asdzání biʼééʼ doo biiʼ dziztı̨́į da doo, háálá ákódajitʼínígíí tʼáá ádzíłtso éí Bóhólníihii nihiDiyin God bichʼįʼ tʼóó badajíʼih.
6 Tsin bąąhgi, doodaiiʼ niʼgóoda atʼoh biiʼ tsídii biyázhí shijéeʼgo, doodaiiʼ biyęęzhii sinilgo, ákohgo amá biyázhí, doodaiiʼ biyęęzhii yikʼi sidáago bikʼííníyáago doo tʼáá bił nídidíínił da,
7 nidi amáhígíí tsʼídá béédidííchiłgo ayázhíígíí tʼéí nídidíínił, ákónítʼı̨́įgo yáʼátʼéehgo ná áhooníił doo áádóó asʼahgóó níyoołkáał doo.
8 Kin ániidíii ádá áníléehgo bikááʼdę́ę́ʼ bibąąhgóó tsé ahéédíítłʼı̨́ı̨́ł, áko áádę́ę́ʼ tʼáá háiida doo adah adootłish da, índa dił doo bee ádihodidííltʼih da.
9 Chʼil naʼatłʼoʼii kʼidíléego bitaʼgóó náánáłaʼ álástsiiʼ tʼááká bił kʼidóólééł lágo, éí ákwíinilaago tʼáá áłah bineestʼąʼ bąąh hazlı̨́ʼígíí yidoołchxǫǫł.
10 Tʼááká béégashii áádóó télii yił ahąąh sizı̨́įgo bee nihoyółdlaad lágo.
11 Aghaaʼ áádóó naʼatʼą́hí łigaii ditsʼidgo bee ééʼ ályaaígi átʼéii doo biih díínáał da.
12 Nibeeldléí ákʼínáníltihígíí tʼáá dı̨́ı̨́ʼgóó bijánil hólǫ́ǫgo ánéinilʼįįh doo.
Bizháán naagháii bá bee nahazʼáanii
13 Diné tʼáá háiida beʼasdzą́ą́ hazlı̨́įʼgo yił biiską́ą́dóó bikʼijįʼ yijoosłxáaʼgo,
14 nítʼééʼ tʼáá ádzaagóó yaa halneʼgo díí asdzání doo ílíinii nahalingo áyiilaago ání, Díí asdzání bił ahaa nishtʼáazhgo bił shiiską́ągo, nítʼééʼ diné bee haleeh nítʼéeʼgo áshʼı̨́ı̨́ lá.
15 Áko asdzání bizhéʼé índa bimá éí asdzání tʼah doo diné bee haleehgóó bee bééhózinii yoołtsosgo kin haalʼáagi yah aʼatiiníjįʼ hastóí aląąjįʼ naazíinii yichʼįʼ dooʼash.
16 Ákohgo asdzání bizhéʼé éí hastóí aląąjįʼ naazíinii áyididooniił, Díí shitsiʼ éí diné yeʼasdzą́ą́ dooleeł biniyé baa níłtı̨́ı̨́ nítʼééʼ, áko doo yiniizı̨́įʼ da.
17 Jóʼakon, tʼáá ádzaagóó yikʼi hodiiʼą́ągo kóní, Nitsiʼ doo bizháán naagháa da lá. Ákondi kǫ́ǫ́ díí shitsiʼ éí diné bee ádingo bee bééhózinii átʼé. Áádóó kin haalʼáádóó hastóí aląąjįʼ naazíinii bidáahjįʼ ééʼ bee ééhózinígíí niidoołkał.
18 Áko kin haalʼáádóó hastóí aląąjįʼ naazíinii éí diné nídeidínóołtsxis.
19 Áádóó béésh łigaii shékel wolyéii neeznádiingo ninázhdoodléełgo éí asdzání bizhéʼé baa dooʼnił, háálá Ízrel dineʼé chʼikę́ę́h yízhí doo ílíinii bee wójíigo ájiilaa. Áádóó hweʼasdzą́ą́ nilı̨́įgo nizhníłdįįd bijı̨́įjįʼ doo yóóʼazhdidooʼáał da.
20 Nidi díí chʼíhootʼánígíí tʼáá aaníígóó chʼikę́ę́h tʼah doo diné bee haleehii bee bééhózinii tʼáadoo bééhoozingóó
21 chʼikę́ę́h éí hazhéʼé bighandóó chʼíhodiʼdoodlóosgo kintahdóó diné danilíinii tsé yee hoł nidazdoołniił, háálá Ízrel dineʼé éí hazhéʼé bikʼéí danilíinii bitahgi baa yáhásinii baa nijiyá; ákótʼéego nihitahdóó doo yáʼáshóonii nahjįʼ kódaołʼı̨́į doo.
22 Diné łaʼ asdzání bahastiin hólóonii yił shitéezhgo habiʼdeelʼı̨́įʼgo, asdzání bił jineezhtézhígíí tʼáá bił nahodiʼdootsił. Kótʼéego Ízrel dineʼé bitahdóó doo yáʼáshóonii nahjįʼ kódaołʼı̨́į doo.
23 Chʼikę́ę́h éí diné łaʼ bił ahaazhdootʼash biniyé bił ahazhdeetʼą́ągo, nítʼééʼ diné łaʼ hakʼíníyáago hoł neezhtéezhgo,
24 éí kin haalʼáagi yah aʼatiiníjįʼ nihodiʼdootʼishgo tsé yee hoł nidazdoołniił; éí chʼikę́ę́h kintahgi nijigháa nidi háká iʼdoolwołígíí tʼáadoo bíká hazhdoolghaazhgóó biniinaa hodiʼyoolyééł áádóó éí diné bił kééhojitʼíinii beʼasdzą́ą́ dooleełígíí baa yáhásinígi ájiilaago biniinaa ałdóʼ hodiʼyoolyééł. Kótʼéego nihitahdóó doo yáʼáshóonii nahjįʼ kódaołʼı̨́į doo.
25 Nidi chʼikę́ę́h éí diné łaʼ bił ahaazhdootʼashgo bił ahazhdeetʼą́ągo halgaigóó ajííyáago, nítʼééʼ diné łaʼ hakʼíníyáago hoł ninídéelgo, diné ił nizhnídélígíí tʼéiyá hodiʼyoolyééł.
26 Nidi chʼikę́ę́h éí doo haada dadoohłíił da; hoł oodzíʼígíí biniinaa hodiʼyoolyéełgi doo bą́ą́h ílı̨́į da; jó, díí áhóótʼįįdígíí éí diné bikwáʼásiní yikʼiilwodgo yiyiisxínígíí bił ałkʼeh,
27 háálá halgaidi asdzání naagháago bikʼízhníyá áádóó azhą́ chʼikę́ę́h bíká adoolwołii chʼééh yíká dilwosh nítʼééʼ nidi tʼáadoo bíká aalwodí da.
28 Diné łaʼ éí chʼikę́ę́h tʼah doo diné bee haleehii, éí diné łaʼ yił ahaa dootʼashgo tʼah doo yił ahaʼdeetʼaahii bił nizhnídéelgo áádóó bił jizhtéezhgo hoʼdiiltsą́ągo
29 diné éí chʼikę́ę́h bił jineezhtézhígíí bizhéʼé béésh łigaii shékel wolyéii ashdladiingo baazhdoonił áádóó chʼikę́ę́h hweʼasdzą́ą́ dooleeł, háálá baa yáhásinígi ájiilaa; nizhníłdįįd bijı̨́įjįʼ doo yóóʼazhdidooʼáał da.
30 Diné łaʼda hazhéʼé beʼasdzą́ą́ doo hweʼasdzą́ą́ ázhdoolíił da, doodaiiʼ hazhéʼé beʼasdzą́ą́ doo tʼáá tséʼédingo ázhdoolíił da.
