Deuteronomy 23:1-25
23 Diné łaʼ bichoʼ ayęęzhii haaʼnilígíí, doodaiiʼ bichoʼ kʼígizhígíí éí Bóhólníihii baa áłah náʼoodleełgi doo yah adoogáał da.
2 Wótashkiʼ éí Bóhólníihii baa áłah náʼoodleełgi doo yah adoogáał da, índa hatsʼą́ą́dóó neeznáadi ałkʼi náʼázhchı̨́įjįʼ nidi Bóhólníihii bichʼįʼ nahadlá biniyé áłah náʼoodleełjįʼ doo yah anídaakah da doo.
3 Áman dineʼé, doodaiiʼ Móʼab dineʼé łaʼ Bóhólníihii bichʼįʼ nahadlá biniyé áłah náʼoodleełjįʼ doo yah anídaakah da doo; hatsʼą́ą́dóó neeznáadi ałkʼi náʼázhchı̨́įjįʼ nidi Bóhólníihii bichʼįʼ nahadlá biniyé áłah náʼoodleełjįʼ doo yah anídaakahgóó ahóyéelʼáa doo.
4 Háálá noonáádę́ę́ʼ chʼiyáán áádóó tó tsʼídá tʼáadoo bee nihíká ajííjéeʼ da; jó, Ííjip kéyahdóó chʼéénohnáádóó wóshdę́ę́ʼ nidi, áádóó Mesopotéímiyagi Pííthordę́ę́ʼ Bíyor biyeʼ Béílam hóyéeʼjįʼ nihá hadoodzih biniyé tʼóó dadzooskan.
5 Azhą́ ákódzaa nidi Bóhólníihii nihiDiyin God éí Béílam doo tʼáá kʼad yidiiztsʼą́ąʼ da, nidi Bóhólníihii nihiDiyin God éí hóyéeʼjįʼ haʼoodzíʼígíí nihá akʼihojidlí áyiilaa, háálá Bóhólníihii nihiDiyin God ayóóʼánihóʼní.
6 Bee bił hashtʼedahodítʼéii áádóó yáʼátʼéehgo bá áhooníił dooleełígíí tʼáadoo bá hádaohtʼínígo nihí dayéełkaahgo ahoolʼáa doo.
7 Íídam dineʼé tʼáadoo dajiinohłáhí, háálá éí nihikʼis nilı̨́. Ííjip dineʼé tʼáadoo dajiinohłáhí, háálá bikéyah biyiʼ déʼéyóní danohłı̨́ı̨́ nítʼééʼ.
8 Bitsóóké, doodaiiʼ binálíké danilínígíí táadi ałkʼi náʼáshchı̨́įdi éí Bóhólníihii bichʼįʼ nahadlá biniyé áłah náʼoodleełjįʼ yah anídaakah doo.
Anaaʼ biniyé dah oonéełgi doo yáʼáshóonii ádingo áhólzin
9 Nihidaʼanaʼí bikʼijįʼ nídahidoohbáahgo doo yáʼádaashóonii tʼáá ałtso bitsʼąą ádaa ádahołyą́.
10 Nihitahdóó diné łaʼ ajiłhoshgo hwíígąsh haanahgo biniinaa doozh diyin da jileehgo, éí níbaal haalʼáádóó chʼízhdoogááł áádóó doo yah anízhdoodáał da,
11 nidi kótʼée doo: yaa adeezʼą́ągo táʼádizdoogis áádóó iʼííʼą́ągo níbaal haalʼáhí góneʼ yah anízhdoodááł.
12 Niiʼoh nídaahkah biniyé nihiníbaal haalʼá bitsʼáhwiiníʼą́ądi bá hazʼą́ągo ádeínóhsin doo.
13 Nihibee naʼabaahii gish bił nidaahjaah doo; éí niiʼoh nídaahkahgo bee háádahoyohdziʼgo ákóyaa nidaʼayohchįįh áádóó bikʼéédahoohdziʼ doo.
14 Háálá Bóhólníihii nihiDiyin God éí nihiníbaal haalʼáhígi nihitahgi hólǫ́, áko yisdánihiinííł áádóó nihiʼanaʼí nihílákʼee yidiiʼaah; éí bąą nihiníbaal haalʼáagi hodiyin dooleeł, áko doo yáʼáshóonii doo łaʼ nihitahgi yiidoołtséeł da, áádóó doo nihitsʼą́ą́ʼ dah hodidooleeł da.
Ałʼąą ádaatʼéii bá bee nahazʼáanii
15 Áko naalteʼ éí yá naalʼaʼí yitsʼą́ą́ʼ yóóʼeelwodii nihaa yílwodgo yá naalʼaʼí doo baa nídadoołtéeł da.
16 Nihił kééhatʼı̨́į doo; nihitahgi nihikin hadaasʼáagi łahgo náhodiiʼaah, tʼáá bił yáʼáhootʼéhígi kééhatʼı̨́įgo ádadoohłííł; tʼáadoo bide ádahwíínóhsiní.
17 Áko Ízrel dineʼé bitsiʼké doo łaʼ ałjiłnii nilı̨́įgo nihitaagháa da doo índa biyeʼké doo łaʼ diné tʼáá bí ahaa nináldeehii danilı̨́į da doo.
18 Áko ałjiłnii bichʼįʼ nahalyéii, doodaiiʼ diné tʼáá bí ahaa nináldeehii* bichʼįʼ nahalyéii éí Bóhólníihii nihiDiyin God bihodiyin hazʼą́ąjįʼ doo bee ádee hadadidoohdzih da, háálá éí tʼáá áłah ákóʼélʼíinii Bóhólníihii nihiDiyin God bił tʼóó baaʼih.
19 Ínáóltąʼí binahjįʼ nikwáʼásiní doo béeso baʼdíínił da: béeso, doodaiiʼ chʼiyáán, doodaiiʼ tʼáá haʼátʼíhída éí ínáóltąʼí binahjįʼ doo aʼdííléeł da.
20 Déʼéyóní éí ínáóltąʼí biniyé béeso badaʼayohníiłgo tʼáá áko, nidi nihikwáʼásiní éí ínáóltąʼí tʼáágééd béeso badaʼayohníił doo; ákótʼéego Bóhólníihii nihiDiyin God éí baa nidaahkaii tʼáá ałtso yikʼijidlíigo kéyah biih wohnéehgo ádííʼ ádadoohłííł.
21 Bóhólníihii nihiDiyin God bichʼįʼ ádee hadadidoodzihgo tʼáadoo baa nidaʼáhodołziidí, háálá Bóhólníihii nihiDiyin God éí tsʼídá tʼáádóo nídí ákódaohtʼı̨́į doo nihóʼní, doodago éí ádił nidaʼayohsíih doo.
22 Nidi doo ádee hadasoohdzííʼgóogo éí doo bee ádił nidaʼayohsíih da doo.
23 Bee ádee hadadoohdzíʼígíí hazhóʼó baa ádahołyą́ągo bidaʼoohłííł; tʼáá nihí ádeinohsingo náádahołniihii Bóhólníihii nihiDiyin God bichʼįʼ ádee hadahidoohdzíiʼgo bee nidahosooʼánígíí bidaʼoohłííł.
24 Bił kéédahohtʼíinii bichʼil naʼatłʼoʼii yílʼáhígi nidahisoohkaigo tʼáá nihí danohsinígi ánéeltʼeʼgo dadoohsı̨́įłgo tʼáá áko, nidi niheʼásaaʼ doo biiʼ hééł ádadoohłíił da.
25 Bił kéédahohtʼíinii bitłʼoh naadą́ą́ʼ yílʼáhígi nidahisoohkaigo tłʼoh naadą́ą́ʼ bineestʼąʼ daohnizhgo nihílákʼee hadeezbingo daohnizh; éí daohsą́ągo tʼáá áko, nidi bił kéédahohtʼíinii bitłʼoh naadą́ą́ʼ yílʼáhígíí bee iigéshí bee tʼáadoo dahogéshí.
Footnotes
^ Łééchąąʼí jiníigo éí diné tʼáá bí ahaa nináldeehii níigo ááhyiłní.
