Deuteronomy 24:1-22
24 Diné łaʼda hweʼasdzą́ą́ dooleełii nízhdiiłtı̨́ áádóó báʼdzízyehgo, nítʼééʼ doo yaa bił hózhǫ́ǫ́góó baa ákozniizı̨́įʼgo, háálá doo iʼdidéehii łaʼ bił hazhdeelʼı̨́ı̨́ʼ; éí naaltsoos bikʼehgo ałtsʼáʼiitʼaashígíí bá hazhdidoolíiłgo áádóó bazhdoołtsosgo haghandóó béézhʼdoołnih.
2 Áko haghandóó dah diiyáádóó bikʼijįʼ diné náánáłaʼ yeʼasdzą́ą́ náádoodleeł.
3 Nítʼééʼ akéeʼdi bahastiin silı̨́ʼígíí náábijoosłxáaʼgo naaltsoos bikʼehgo ałtsʼáʼiitʼaashígíí há haididoolííł áádóó haidoołtsosgo bighandóó tʼóó hwééʼdoołnih, doodaiiʼ akéeʼdi hahastiin silı̨́ʼígíí beʼasdzą́ą́ jílı̨́į dooleełii daaztsą́ągo
4 átséédą́ą́ʼ hahastiin nítʼéʼígíí bighandóó chʼíhoníłʼaʼígíí doo bił ahaa nínáázhdootʼash da, háálá ákóhátʼı̨́įgo Bóhólníihii bił tʼóó baaʼih; ázhdoolchxǫʼdóó bikʼijįʼgo ákótʼé. Áko kéyah bikááʼ doo ádił niʼiidzííh ádoohłíił da; jó, éí Bóhólníihii nihiDiyin God nihaidiníʼánígíí ádííʼ ádadoohłíiłii átʼé.
5 Diné łaʼ ániid beʼasdzą́ą́ hazlı̨́įʼgo doo anaaʼgóó doogáał da, áádóó doo haʼátʼéegoda naanish bee bóhólníihgo óolzin da doo, nidi beʼasdzą́ą́ silı̨́ʼígíí yił hóshǫ́ǫ doo biniyé bighangi naagháago tʼááłáʼí nídoohah.
Ałʼąą ádaatʼéii bá bee nahazʼáanii
6 Diné łaʼda tsédaashjééʼ, doodaiiʼ tsédaashchʼíní doo ąąh nizhdooʼáał da, háálá ákódziidzaii diné yee hináanii ąąh nizhʼnílá.
7 Diné łaʼ bikwáʼásiní éí Ízrel dineʼé łaʼ hanaalteʼ biniyé jiniʼįįhgo, doodaiiʼ naalteʼ biniyé naalyéhígi átʼéego haa nahaniihgo éí azhniʼįįhígíí hodiʼyoolyééł. Kótʼéego nihitahdóó doo yáʼáshóonii nahjįʼ kódaołʼı̨́į doo.
8 Naałniih łóód atsʼíís yiyáanii naałdzidii bitsʼąą ádaa ádahołyą́ągo haleebee baa ákodanoohsįįh, áko Líívai dineʼé náádaʼiiłniihii éí yee nidanihinitinígíí tʼáá ałtso bichʼįʼ bee haasdzíiʼii bikʼehgo ádaa daahsįįhgo bidaʼołʼı̨́.
9 Shą́ą́ʼ, Bóhólníihii nihiDiyin God éí wohnéełgo Míriyam yaa honíłniiʼígíí béédaołniih; jó, éí Ííjip kéyahdę́ę́ʼ chʼéénoohʼnáádóó bikʼijįʼ ákódzaa.
10 Tʼáá haʼátʼíhída nikwáʼásiní bąąh ninooláago bighan góneʼ náádidíídlééł biniyé doo yah adíínáał da.
11 Nidi tʼáá tłʼóóʼdę́ę́ʼ sínízı̨́įgo nikwáʼásiní bąąh niʼííníláhígíí nichʼįʼ chʼéidoodlééł.
12 Éí diné bahojoobáʼígo ąąh niiníláhígíí doo tʼáá nihaʼałkʼee siłtsoozgo yidoołkáał da.
13 Ąąh niiníláhígíí tʼáá eʼeʼááh bikʼeh baa náhíłtsóos doo, áko yee nánítéehgo naahaniih doo; éí Bóhólníihii nihiDiyin God éí tʼáá ákogi áhátʼíinii átʼéego nihaa nitsíkees doo.
14 Adeenáago nihá naalʼaʼí bahojoobáʼígo índa hojoobaʼ hasʼáanii nilı̨́įgo tʼáadoo bide ádahwíínóhsiní; éí nihikwáʼásiní nilı̨́įgo, doodaiiʼ déʼéyóní nilı̨́įgo nihikéyahgi kin naazhjaaʼígi hoł kééhatʼı̨́įgo doo bide áhodzósin da.
15 Tʼáadoo eʼeʼaahí yoosbánígíí bichʼįʼ nidoohłééł, háálá bahojoobáʼíii nilı̨́įgo éí tʼáá íiyisí yídin nilı̨́; doo ákódaołʼı̨́ı̨́góó Bóhólníihii yíká áníigo nihikʼijįʼ nilı̨́įgo sodilzin doo, áko éí bee tʼóó ádił nidaʼayołzííh.
16 Azhéʼé danilíinii badaʼáłchíní bitsáskʼehgi doo nidabidiʼtseed da doo, doodaiiʼ áłchíní ałdóʼ bizhéʼé bitsáskʼehgi doo nidabidiʼtseed da doo. Diné tʼáá łah diltʼéhígo tʼáá hó bee ádił niʼdziilzíhígíí biniinaa hodiʼyoolyééł.
17 Déʼéyóní, doodaiiʼ áłchíní bizhéʼé ádaadinii nabikʼíyátiʼgo doo tʼáá ádzaagóó bitsʼą́ą́ʼ nidoohgis da, áádóó asdzání bąąh áhásdįįdii biʼééʼ doo bitsʼą́ą́ʼ ąąh nidoołtsos da.
18 Nidi díí béédaołniih: Ííjip kéyahdi naalteʼ danohłı̨́ı̨́ nítʼééʼ áádóó Bóhólníihii nihiDiyin God tʼą́ą́ʼ náánihiisniiʼ; éí bąą díí nihichʼįʼ bee haasdzíiʼii bidaʼíínóhsin doo.
19 Nihidádaʼakʼehgóó tłʼoh naadą́ą́ʼ dahohgéeshgo, ałchʼįʼ bidaʼsoohtłʼónígíí łaʼ beisoonahgo, doo ákǫ́ǫ́ bíká nídoohdáał da, nidi déʼéyóní áádóó áłchíní bizhéʼé ádaadinii índa sáanii bąąh ádahasdįįdii bá átʼée doo, áko Bóhólníihii nihiDiyin God éí baa nidaahkaígíí tʼáá ałtso nihá yikʼijidlíi doo.
20 Áádóó áliv tsin naazkaadii bineestʼąʼ bąąh nidahołhaałgo bikéédę́ę́ʼ tʼáadoo bąąh nináádahołhaałí; éí déʼéyóní áádóó áłchíní bizhéʼé ádaadinii índa sáanii bąąh ádahasdįįdii bá átʼée doo.
21 Chʼil naʼatłʼoʼii deínóhbéego bikéédę́ę́ʼ tʼáadoo náádayínóhbéhí; nidahaasdzíʼígíí éí déʼéyóní áádóó áłchíní bizhéʼé ádaadinii índa sáanii bąąh ádahasdįįdii bá átʼée doo.
22 Díí béédaołniih: Ííjip kéyahdi naalteʼ danohłı̨́ı̨́ nítʼééʼ; éí bąą díí nihichʼįʼ bee haasdzíiʼii bidaʼíínóhsin doo.
