Deuteronomy 25:1-19
25 Diné ałghazhditʼáahgo, aa dahwiinítʼı̨́įjįʼ ándahwiiʼaahii há hashtʼéédeidoodlííł biniyé baazhdooʼashgo, łaʼ tʼáá ákogi átʼéego yá hadoodzih, índa łaʼígíí éí baʼátʼeʼ biniinaa yá nihodooʼááł.
2 Áko kótʼée doo: diné doo yáʼáshóonii náhodíʼnóoltsxis bą́ą́h jílı̨́įgo, éí ánihwiiʼaahii hodínóołtéełgo ádąąh dahodzistʼánígíí bikʼehgo binááł díkwíidi shı̨́ı̨́ náhodiʼdooltxis.
3 Dízdiindi nídidooltsxisgo tʼáá ákódí doo, áádóó biláahgo éí dooda; nídiʼdooltsxisgo bee hazʼánígíí biláahgo bił dziizdeestsxasgo éí hakʼis tʼáadoo nilínígóó ájiilaa doo.
4 Béégashii éí tłʼoh naadą́ą́ʼ haiłʼéesgo tʼáadoo bíchı̨́ı̨́h bąąh nidaʼsoołʼání.
Hakʼis bił hajííʼázhígíí beʼasdzą́ą́ bá náázhdoogehgo bee hazʼáanii
5 Diné tʼáá łaʼ hááʼáazhgo tʼááłáhígóó kééhatʼı̨́įgo, nítʼééʼ łaʼ daaztsą́ągo áádóó baʼáłchíní tʼáadoo hazlı̨́ı̨́ʼgóó, hweʼasdzą́ą́ nítʼéʼígíí doo hakʼéí nilíinii doo yił ahaa dootʼash da, nidi bahastiin yę́ę bitsáskʼehgi bikʼis beʼasdzą́ą́ náájídlı̨́į doo biniyé baa nínááhodiʼdooltééł índa ahastiin yę́ę bikʼis hwee ádíhólníihgo haʼáłchíní hodooleeł.
6 Áádóó kótʼée doo: alą́ąjįʼ há yizhchínígíí hakʼis ádinígíí bízhiʼ bee yízhdóozhiił, áko éí Ízrel dineʼé bitahdóó bízhiʼ doo nahjįʼ kódoolníił da.
7 Áko éí diné doo tʼáá kʼad bikʼis yę́ę beʼasdzą́ą́ yáʼázyehgóó éí asdzání kééhojitʼínígi yah aʼatiinjįʼ hastóí aląąjįʼ naazíinii bichʼįʼ nizhdoogáałgo ábizhdidooniił, Shahastiin yę́ę bikʼis éí tʼáá bí bikʼis bízhiʼ Ízrel dineʼé bitahgi náás yitʼih dooígíí doo yinízin da. Shahastiin yę́ę bikʼis jílı̨́įgo shee ádíhojólníih dooígíí doo jinízin da.
8 Áko hakin haalʼáádóó hastóí aląąjįʼ naazíinii hágo dahodidooniiłgo hachʼįʼ yádadoołtih, nidi, Doo sheʼasdzą́ą́ jidooleeł da, níigo yee yisteeʼgo
9 hakʼis yę́ę beʼasdzą́ą́ nítʼéʼígíí hachʼįʼ nidoogáałgo éí hastóí aląąjįʼ naazíinii binááł hakeeʼ haididooʼáałgo haniiʼjįʼ yikʼídidoozhahgo ádidooniił, Díí diné bikʼis yę́ę bitsáskʼehgi doo tʼáá kʼad áłchíní náás oochííł áyiilaaígíí kóhodiʼdoolnííł.
10 Áko Ízrel dineʼé bitahgi, Bikeeʼ baa diilyáii baʼáłchíní, bee hoʼdójíi doo.
Bee nahazʼáanii náádaałaʼígíí
11 Diné nidiltʼéego ahigą́ągo, nítʼééʼ łaʼ beʼasdzą́ą́ bíká adoolwoł biniyé áajįʼ adoolchidgo, bahastiin bitsʼą́ą́ʼ atííłʼíinii yaa azhjihgo
12 éí asdzání hálaʼ kʼídoogish; tʼáadoo haa aʼááh danohsingo dahonółʼíní.
13 Bee dah níʼdiidlohí ałʼąą átʼéii tʼáadoo nihidah naʼayizii biiʼ nidasoołnilí; éí nitsaaígíí índa áłtsʼíísígíí tʼáadoo chodaołʼíní.
14 Nihighan góneʼ bee ídaʼneelʼąąhí ałʼąą átʼéii tʼáadoo nisoołnilí; éí nitsaaígíí índa áłtsʼíísígíí tʼáadoo chodaołʼíní.
15 Nidi bee dah níʼdiidlohí tʼáá ákogi átʼéii áádóó bee ídaʼneelʼąąhí tʼáá ákogi átʼéii hazhóʼó nidasoołnil, áko Bóhólníihii nihiDiyin God kéyah nihaidiníʼánígíí bikááʼ asʼahgóó anihídayiiłkaah doo.
16 Tʼáá ałtso kódaatʼéii yaa nidaakaii índa doo tʼáá ákogi ádaatʼíinii éí Bóhólníihii nihiDiyin God doo bíłdin da.
Ámalek dineʼé ałtso ádooldįįł biniyé haʼoodzííʼ
17 Ííjip kéyahdóó chʼínoonáago wohnéełgo Ámalek dineʼé doo ákǫ́ǫ́ ádanihííłʼįįdígíí béédaałniih.
18 Shą́ą́ʼ, aadę́ę́ʼ wohnéełgo nihaa hideeskaigo nihikéédę́ę́ʼ íínáago éí doo dahadziilii nihikéédę́ę́ʼ joonéłígíí nidahastseed; tʼáá éí nídazdínéeskaii áádóó chʼééh dazdeeskaii ákódahóółʼįįd, áko Diyin God doo yikʼee bił daayéeʼ da.
19 Áko kótʼée doo: éí Bóhólníihii nihiDiyin God éí nihiʼanaʼí nihinásʼáhígíí bitsʼąą hááʼáyı̨́ı̨́h nihaidiníʼą́ągo kéyah Bóhólníihii nihiDiyin God nihaidiníʼánígíí ádííʼ ádadoohłíiłgi kéédahohtʼı̨́įgo, Ámalek dineʼé danilíinii yádiłhił biyaagi doo béédahodoonih da biniyé ałtso nidadoołtsxił. Éí tʼááká baa dayoohnééh lágo.
