Deuteronomy 26:1-19
26 Áko kótʼée doo: Bóhólníihii nihiDiyin God éí kéyah nihaidiníʼánígíí biih woonáago áádóó ádííʼ ádaahłaago índa biiʼ kééhohtʼı̨́įgo tʼéiyá
2 kéyahdóó átsé daneestʼáanii ałtso áłah ádaahłééh; éí nihikéyah Bóhólníihii nihiDiyin God nihaidiníʼánígóó nídaneestʼáanii łaʼ tsʼiizis biiʼ hééł ádadoohłiiłgo Bóhólníihii nihiDiyin God bízhiʼ dólzin doo biniyé náhodiiʼáníjįʼ nidahidoohkááł.
3 Ákohgo éí yoołkáałdi nááʼiiłniihii nilíinii baa doohkahgo ádabididoohniił, Díí jı̨́ Bóhólníihii nihiDiyin God díí bee bił hashneʼ: Bóhólníihii nihiDiyin God éí kéyah nihaididooʼááł biniyé danihizhéʼé yę́ę yichʼįʼ yee ádee hadoodzíiʼii biih yíyá, dishní.
4 Áádóó tsʼiizis bee nidahisookánígíí éí nááʼiiłniihii nihílákʼeedóó néidiyiikaahgo Bóhólníihii nihiDiyin God bibikááʼ nááʼiiniihí bidáahgi niidiyookááł.
5 Áko Bóhólníihii nihiDiyin God binááł kódadidoohniił, Nihizhéʼé yę́ę éí Síriya dineʼé nilı̨́įgo kʼad dichin biiłhéego naagháá nítʼééʼ; Ííjip góyaa diné tʼáá díkwíí yił eekai nítʼééʼ; áadi dineʼé ayóó átʼéii áádóó dabidziilii índa tʼóó ahayóí silı̨́ı̨́ʼ.
6 Áádóó Ííjip dineʼé doo yáʼátʼéhígi ádanihííłʼįįd índa yéego nihichʼįʼ nidahwiiłnáago binaalteʼ ádanihósin nítʼééʼ.
7 Áko danihizhéʼé yę́ę biBóhólníihii Diyin God nilíinii bichʼįʼ nídaʼiikąąhgo nihidiiztsʼą́ą́ʼ áádóó nihichʼįʼ nidahwiiʼnáanii áádóó yéego nideilnishii índa nihide ádahólzinii haideelʼı̨́ı̨́ʼ.
8 Áko Bóhólníihii éí Ííjip kéyahdę́ę́ʼ chʼéénihiníʼeezh; bílaʼ ayóó ábóodziilgo áádóó bigaan bitsʼáhoníyéeʼgo áádóó tʼóó báhádzidgo bikʼeʼíyéeʼgo áádóó bee éédahózinii índa ayóó átʼéego ádahooníiłii áyoolíiłgo ákóʼiilaa.
9 Ákohgo díí hazʼáníjįʼ anihííʼeezh; tʼáá díí kéyah nihaa hodiníʼánígi abeʼ áádóó tsésʼná bitłʼizh bee ádaʼazįįd.
10 Kʼad, shoo, Bóhólníihii nílíinii, kéyahdóó átsé daneestʼáanii shaa dííníʼánígíí naa níjaaʼ. Áko Bóhólníihii nihiDiyin God bidáahgi nidadoohjih, áádóó Bóhólníihii nihiDiyin God bichʼįʼ nidahodoohłaał.
11 Áádóó yáʼádaatʼéehii tʼáá ałtso baa nihił nidahoozhǫǫh doogo Bóhólníihii nihiDiyin God nihikʼidzisdliʼ; éí nihí áádóó nihaʼáłchíní áádóó Líívai dineʼé índa déʼéyóní nihitahgi kéédahatʼínígíí bił nihaa deetʼą́.
12 Áádóó nídanoołtʼáanii bilááh nídaasdlı̨́ʼígíí neeznáá daníjaaʼígíí éí tʼááłáʼígo shijaaʼ aa nídahidohʼaahii tʼáá ałtso tááʼ náhááh góneʼ yihahígíí, éí aa nídahidohʼaahii yihahígíí, biyiʼ nínádanołtʼı̨́įhii ałtso ninádahidooʼą́ągo áádóó Líívai dineʼé áádóó déʼéyóní áádóó áłchíní bizhéʼé ádaadinii índa sáanii bąąh ádahasdįįdii bichʼįʼ kódaohłeʼgo kéédahohtʼı̨́įgi deiyą́ągo índa yee hwiih danilı̨́įgo,
13 Bóhólníihii nihiDiyin God binááł kódadidoohniił, Dílzingo tʼáá sahdii nidiníʼáanii shighan hazʼą́ą́dóó chʼíhíjaaʼgo Líívai dineʼé áádóó déʼéyóní áádóó áłchíní bizhéʼé ádaadinii índa sáanii bąąh ádahasdįįdii baa nínil; nibikʼeh óʼooʼníiłii tʼáá ałtso shichʼįʼ bee háínídzíiʼii bikʼehgo íʼiishłaa; nibikʼeh óʼooʼníiłii doo kʼéhétiʼ da, doo nidi baa yisénah da.
14 Yínííł nishłı̨́įgo tʼáadoo łaʼ yíyą́ąʼ da, doodaiiʼ doo biʼdidéehii nishłı̨́įgo tʼáadoo łaʼ chʼíníjaaʼ da, doodaiiʼ dadziztsáanii bąą tʼáadoo łaʼ aa diníʼą́ą da, nidi Bóhólníihii shiDiyin God biinééʼ yínístsʼą́ą́ʼ áádóó shichʼįʼ yee haadzíiʼii tʼáá ałtso bikʼeh áníshtʼé.
15 Tʼáá ni tʼéí hodiyingo honílǫ́ǫ́dę́ę́ʼ, yádiłhił bilááhdę́ę́ʼ hadah dííníʼı̨́ı̨́ʼ, áádóó nidineʼé Ízrel niidlíinii áádóó kéyah nihaa dííníʼánígíí bikʼijídliih; éí kéyahígíí danihizhéʼé yę́ę bichʼįʼ bee ádee hadíínídzíiʼii bikáaʼgi abeʼ áádóó tsésʼná bitłʼizh bee ádaʼazįįd.
Bóhólníihii bichʼįʼgo dineʼé dadiyinii
16 Díí jı̨́ Bóhólníihii nihiDiyin God díí yee nihwiizʼáanii áádóó yee nihodiiʼaahii bikʼeh ádanohtʼée doogo nihichʼįʼ yee haadzííʼ; éí bąą danihijéí tʼáá átʼé bee índa nihiiʼ sizíinii tʼáá átʼé bee bikʼeh dahonołʼı̨́į doo.
17 Díí jı̨́, Bóhólníihii nihiDiyin God nilı̨́, dadooniid. Éí bikʼehgo deíníikáah doo áádóó yee nihwiizʼáanii áádóó bibikʼeh óʼooʼníiłii áádóó yee nihodiiʼaahii bikʼeh dahoniilʼı̨́į doo índa áníinii deísíiltsʼą́ąʼ doo, dadooniid.
18 Bóhólníihii nihaa yáłtiʼgo bikʼehgo díí jı̨́ bidineʼé bił agháago átʼéii danohłı̨́; jó, tʼáá bí nihá yee nihoníʼą́; ákótʼéego bibikʼeh óʼooʼníiłii tʼáá ałtso bikʼeh dahonołʼı̨́.
19 Áádóó ałʼąą dineʼé áyiilaaígíí tʼáá ałtso biláahgo ádanohtʼéego nihaa dahaʼniih doo áádóó nihízhiʼ bééhoʼdílzin doo áádóó bídę́ęʼgo nihił danilı̨́į doo índa Bóhólníihii nihiDiyin God bichʼįʼ dineʼé dadiyinii danohłı̨́į doo. Jó, tʼáá bí ákótʼéego yee haadzííʼ.
