Deuteronomy 27:1-26
27 Mózes éí Ízrel dineʼé hastóí aląąjįʼ naazíinii yił naazı̨́įgo diné yichʼįʼ hadaasdzíiʼgo ádaaní, Díí jı̨́ bikʼeh óʼooʼníiłii bee nihichʼįʼ hadeiidziihígíí tʼáá ałtso bikʼeh dahonołʼı̨́į doo.
2 Áko Bóhólníihii nihiDiyin God éí kéyah nihaidiníʼánígíí bichʼįʼ Jórdan tooh haʼnaa ninooná bijı̨́ ákwii tsé dantsaii adahidoohtsih áádóó dadoohdlish.
3 Éí bikáaʼgi saad tʼáá ałtso díí bee hazʼáanii átʼéego bee akʼeʼashchı̨́įgo tséʼnaa ninoonáago ádadoohłííł, áko Bóhólníihii nihiDiyin God éí kéyah nihaidiníʼánígíí bikáaʼgi abeʼ áádóó tsésʼná bitłʼizh bee ádaʼazįįd; éí danihizhéʼé yę́ę biDiyin God Bóhólníihii éí kéyah yee nihá nihoníʼáanii átʼé.
4 Éí bąą ákótʼée doo: Jórdan tooh haʼnaa ninoonáago éí tsé adahidoohtsihígíí Dził Ííbalgi díí jı̨́ nihichʼįʼ bee haasdziih, áádóó éí tsé dadoohdlish.
5 Áadi Bóhólníihii nihiDiyin God bá bikááʼ nááʼiiniihí tsé bee ádadoohłííł; béésh bee naʼanishí doo bee bindadoołnish da.
6 Bóhólníihii nihiDiyin God bá bikááʼ nááʼiiniihí tsé doo hashtʼeʼnibíʼílneʼii bee ádadoohłííł, áádóó Bóhólníihii nihiDiyin God bichʼįʼ didlidgo nááhániihii náádahidoołnih.
7 Áádóó áadi hózhǫ́ǫ́jí nááhániihii náádahidoołnihgo daʼdoohsı̨́ı̨́ł, índa Bóhólníihii nihiDiyin God binááł nihił nidahoozhǫǫh doo.
8 Áko saad tʼáá ałtso díí bee hazʼáanii átʼéego tʼáá bééhózínígo éí tsé bikáaʼgi bee akʼeʼashchı̨́įgo ádadoohłííł.
9 Áádóó Mózes índa Líívai dineʼé náádaʼiiłniihii danilíinii éí Ízrel dineʼé tʼáá ałtso yichʼįʼ hadaasdzíiʼgo ádaaní, Ízrel dineʼé nohłíinii, ádahodoołzéehgo daʼíísółtsʼą́ą́ʼ. Díí jı̨́ Bóhólníihii nihiDiyin God bidineʼé dasoolı̨́ı̨́ʼ.
10 Éí bąą Bóhólníihii nihiDiyin God áníinii bikʼeh dahonołʼı̨́įgo bibikʼeh óʼooʼníiłii índa yee nihwiizʼáanii bikʼeh ádanohtʼée doo; éí díí jı̨́ nihichʼįʼ bee haasdzííʼ.
Dził Ííbalgi hóyéeʼgo haʼiisdzííʼ
11 Áádóó tʼáá éí bijı̨́ Mózes éí hazhóʼó diné áyidííniidgo ání,
12 Díí dineʼé éí Dził Gérazim bighą́ą́ʼdóó diné yikʼideizhdoodliił yiniyé deidoozįįł: Jórdan tooh haʼnaa ninoonáago Símiyan áádóó Líívai áádóó Júdah áádóó Ísakar áádóó Jóseph índa Bénjamin áadi deidoozįįł.
13 Áko díí dineʼé éí Dził Ííbal bighą́ą́ʼdóó hóyéeʼgo diné yá hadahadziih yiniyé deidoozįįł: Rúben áádóó Géed áádóó Ásher áádóó Zébyulan áádóó Dan índa Náftalai áadi deidoozįįł.
14 Áádóó Líívai dineʼé yádaałtiʼgo Ízrel dineʼé hastóí danilíinii tʼáá ałtso ayóó íitsʼaʼgo yichʼįʼ hadadoodzih:
15 Díí diné hóyéeʼgo bá haʼdoodzih: éí tʼáadoo leʼé naaskʼęęʼgo, doodaiiʼ doolyı̨́įʼgo eʼelyaii ájiilaii éí Bóhólníihii bił tʼóó baaʼihii átʼéego daʼiichįįhii yinaashnishii bééʼjiidlaii nahontʼingi niiníláii ákóbidiʼdooʼniił:áko diné tʼáá ałtso ádadidooniił, Tʼáá ákótʼée doo.
16 Tʼáá háiida hazhéʼé, doodaiiʼ hamá doo hoł nilíinii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
17 Tʼáá háiida bił kééhojitʼíinii bikéyah bináhásdzo bee bééhózinii nahjįʼ kójiilaii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
18 Tʼáá háiida éí diné doo ooʼíinii yóóʼadzíílóozii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
19 Tʼáá háiida éí déʼéyóní, doodaiiʼ áłchíní bizhéʼé ádaadinii, doodaiiʼ sáanii bąąh ádahasdįįdii bá bee nihodiitʼaahii bitsʼą́ą́ʼ dzidiiłgęęzii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
20 Tʼáá háiida hazhéʼé beʼasdzą́ą́ bił jineezhtéezhii hóyéeʼgo há haʼdoodzih, háálá hazhéʼé baazhdíílá:áko diné tʼáá ałtso ádadidooniił, Tʼáá ákótʼée doo.
21 Tʼáá háiida éí naaldlooshii ałʼąą átʼéii łaʼ dzizkʼéedii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
22 Tʼáá háiida hazhéʼé bitsiʼ, doodaiiʼ hamá bichʼéʼé bił jineezhtéezhii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
23 Tʼáá háiida hweʼasdzą́ą́ bimá bił jineezhtéezhii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
24 Tʼáá háiida bił kééhojitʼíinii tʼáá nahontʼinee dziisxíinii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
25 Tʼáá háiida hachʼįʼ niʼílyáago diné tʼáadoo bee bikʼíhótʼahíii dziisxíinii hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
26 Tʼáá háiida díí bee hazʼáanii tʼáá aaníígóó áníinii doo bikʼeh ájítʼéégóó éí hóyéeʼgo há haʼdoodzih:áko diné tʼáá ałtso ádadidooniił, Tʼáá ákótʼée doo.
