Deuteronomy 29:1-29
29 Díí saad bee ahaʼdeetʼáanii Bóhólníihii éí Mózes yichʼįʼ yee haadzíiʼgo ání, Móʼab kéyahgi Ízrel dineʼé bił hashtʼedadííliił; Dził Hórebgi Bóhólníihii éí Ízrel dineʼé yił ahadaʼdeestʼáanii ałdóʼ íidííłtsoł.
2 Áádóó Mózes éí Ízrel dineʼé tʼáá ałtso hágo yidííniidgo ííłní, Bóhólníihii áátʼįįdii tʼáá átʼé danóołʼı̨́įʼgo Ííjip kéyahdi aláahgo naatʼáanii Féro áádóó bá nidaalʼaʼí tʼáá ałtso índa bikéyah tʼáá átʼé nihinááł atíyííłʼįįd.
3 Naʼíhonitaah ayóó átʼéii bikʼeʼdaʼíyéeʼii danóołʼı̨́ı̨́ʼ; éí bee ééhózinii índa álílee ayóó átʼéii ádaatʼéhígíí átʼé.
4 Azhą́ ákótʼée nidi Bóhólníihii éí díí tʼah doo nihaideeʼaah da: éí ajéí bee baa ákohodínóodzįįłii, doodaiiʼ anááʼ bee dínóolʼįįłii, doodaiiʼ ajaaʼ bee íídóoltsʼįįłii.
5 Dízdiin nááhaijįʼ honoojíígóó tánihidishʼéésh nítʼééʼ; nihiʼééʼ tʼáadoo nihikʼi nidahaaztʼóod da índa nihikeeʼ tʼáadoo dadiizhaazh da.
6 Bááh nidi tʼáadoo daoyą́ąʼ da, wáin nidi tʼáadoo daohdlą́ąʼ da, doodaiiʼ tó tsiʼnaʼiiłáii tʼáadoo daohdlą́ąʼ da, áko Bóhólníihii nihiDiyin God nishłı̨́įgo nihił béédahodoozįįł.
7 Áádóó kojįʼ chʼínoonáago Héshbandóó aláahgo naatʼáanii Sáíhan wolyéii índa Béíshandóó aláahgo naatʼáanii Ag wolyéii nihichʼįʼ nídiibaaʼgo nidasiiltsxeed.
8 Áko bikéyah bighadasidiitʼą́ągo Rúben dineʼé áádóó Géed dineʼé índa Manáseh dineʼé ałnííʼdóóígíí bííʼ dadooleełgo baa dadiniitʼą́.
9 Éí bąą díí saad bee ahaʼdeetʼáanii bikʼeh ádanohtʼéego bidaʼíínóhsin, áko baa nidaahkaígíí tʼáá átʼé yáʼátʼéehgo nihá ááníił doo.
10 Díí jı̨́ tʼáá ánółtso Bóhólníihii nihiDiyin God binááł nidasoozı̨́; nihidineʼé dah dabíʼéeshii áádóó nihá aląąjįʼ naazíinii índa nihinaatʼáanii éí Ízrel dineʼé danilíinii tʼáá ałtso bił nidasoozı̨́.
11 Nihaʼáłchíní yázhí áádóó nihidaʼasdzą́ą́ índa nihiníbaal haalʼáagi déʼéyóní nidaakaii éí nihá chizh nídeidiyiiłniihdóó nihá tó ninádayiiłjiidjįʼ nihoolʼáago bił nidasoozı̨́.
12 Áko Bóhólníihii nihiDiyin God bił ahadadiʼnohtʼaah, éí ádee hadoodzíiʼgo Bóhólníihii nihiDiyin God díí jı̨́ nihił ahaʼdeetʼaah.
13 Éí chánahgo díí jı̨́ dineʼé tʼáá bí ádá niideeʼnilii ánihidoolííł áádóó nihiDiyin God nilı̨́į doo biniyé nihichʼįʼ yee haadzííʼ índa danihizhéʼé yę́ę Éíbraham áádóó Áízak índa Jéíkab yichʼįʼ yee ádee hadoodzííʼ.
14 Doo tʼáá nihí tʼéiyá díí ahaʼdeetʼáanii índa ádee haʼdidziihii nihił áshłéeh da.
15 Nidi Bóhólníihii nihiDiyin God binááł kǫ́ǫ́ díí jı̨́ nihił naazínígíí áádóó díí jı̨́ doo nihił dahólǫ́ǫ daígíí bił ahadadiʼnishtʼaah.
16 Jó, díí nihił béédahózin: haash yitʼéego Ííjip kéyahdi kééhwiitʼı̨́ı̨́ nítʼééʼ índa haash yitʼéego ałʼąą dineʼé bitahgóó hadiiʼnáago bikʼeeʼąą ahéédahisooná.
17 Áádóó doo haldin yaa nidaakaii índa bidaʼalyaii danóołʼı̨́ı̨́ʼ; jó, éí tsin, doodaiiʼ tsé, doodaiiʼ béésh łigaii, doodaiiʼ óola yee edaʼalyaii ádayiilaago dabitahgóó bichʼįʼ nidahadlá.
18 Áko diné łaʼda, doodaiiʼ asdzánída, doodaiiʼ hooghandóó dah ooldahii, doodaiiʼ łaʼ dineʼé díí jı̨́ Bóhólníihii nihiDiyin God doo yitsʼáhidookah da biniyé áádóó ałʼąą dineʼé bidiyin dabidiʼníinii doo yichʼįʼ nidahałáa da doo biniyé, áádóó nihitahdóó ehétłʼóól bitsʼą́ą́dóó báhádzidgo naʼałtseedii índa díchʼíiʼii doo hodooleeł da biniyé.
19 Ákondi éí díí saad bee hóyéeʼgo á haʼiidziihii yidiiztsʼą́ąʼgo éí tʼáá bí ádíkʼijidlíigo nitsíkeesgo kódidooniił, Hózhǫ́ǫgo naasháa doo; azhą́ ádíkʼeh honishʼı̨́įgo yisháał nidi tʼáadoo átʼéhí da. Díí áháʼnínígíí laʼ kótʼé, Dahoditłéʼígíí éí dahóółtseii tʼáá yił yidoołchxǫǫł.*
20 Áko ájínínígíí éí Bóhólníihii doo há yóóʼiididooʼáał da, nidi Bóhólníihii báháchįʼgo áádóó łeʼnízingo diné yichʼįʼ bił hodoochxih, áádóó hóyéeʼgo á haʼiisdzíiʼii tʼáá átʼé díí naaltsoos biyiʼ bee akʼeʼashchínígíí hakʼijįʼ siʼą́ą doo, índa Bóhólníihii éí yádiłhił biyaagi yízhí bee hwééhoʼdílzinígíí kʼééʼiidoołchxǫǫł.
21 Áádóó Bóhólníihii éí Ízrel dineʼé tʼáá ałtso bitahdóó atsʼáhodoołtʼeełgo atíhodoolííł; éí hóyéeʼgo á haʼiisdzíiʼii tʼáá átʼé bee ahaʼdeetʼáanii naaltsoos bee siʼánígíí biiʼ díí bee hazʼáanii bee akʼeʼashchíinii bikʼehgo ákóʼdoolííł.
22 Áko nihaʼáłchíní nihikééʼdóó náás daʼahidoolchíiłii áádóó déʼéyóní kéyah nízaadę́ę́ʼ nidahidookahígíí ádadidooniił: kéyah bikáaʼgi naałniih báádahadzidii índa ąąh dahazʼą́ bikʼeʼíyéeʼii deiníłʼı̨́įgo éí Bóhólníihii tʼáá bí kéyah yikáaʼjįʼ kóyiilaii átʼé;
23 kéyah tʼáá átʼéé nítʼééʼ bikááʼ tsékǫʼ áádóó áshįįh índa dookʼą́ąłii doo bikááʼ kʼiʼdólyééł átʼéégóó chʼil nidi doo bikááʼ hólǫ́ǫ́góó, doodaiiʼ chʼil dootłʼizhii nidi doo łaʼ hanósééł átʼéégóó hazʼánígíí deiníłʼı̨́įgo, tʼáá Sádam áádóó Gomárah áádóó Ádmah índa Ziibówim kin hadaasʼáii tʼáá bił adahizdeezkʼą́ʼígíí nahalingo Bóhólníihii báhóóchįįdgo áádóó hashké niidzı̨́įʼgo éʼésdįįd yę́ęgi áhootʼéego deiníłʼı̨́į doo.
24 Ałʼąą dineʼé tʼáá ałtso ałdóʼ nidaʼídíłkidgo kódadidooniił, Haʼátʼíishąʼ biniinaa Bóhólníihii éí díí kéyah kóyiilaa? Haʼátʼéegoshąʼ ayóó átʼéego bikʼeʼíyéeʼgo báhóóchįįd?
25 Áko diné łaʼ ádadidooniił, Dabizhéʼé yę́ę biBóhólníihii Diyin God yił ahadaʼdeestʼáanii yóóʼadeideezʼą́ągo biniinaa ákóhóótʼįįd; éí Ííjip kéyahdę́ę́ʼ chʼíbiníʼeezh yę́ędą́ą́ʼ yił ahadaʼdeestʼą́ą́ nítʼééʼ.
26 Jó, diyin dabidiʼníinii yikééʼ dah dahidiikai áádóó yá chodaoʼı̨́įgo yichʼįʼ nidahałá; éí diyin dabidiʼníinii doo yéédahósingóó índa Bóhólníihii doo beidiníʼą́ą́góó ádaatʼı̨́.
27 Áko Bóhólníihii báhóóchįįdgo díí kéyah yiih hodíínil; éí kéyahígíí bikáaʼgi hóyéeʼgo á haʼiisdzíiʼii tʼáá átʼé díí naaltsoos biyiʼ bee akʼeʼashchínígíí yee yiih hodíínil.
28 Áádóó Bóhólníihii báhóóchįįdgo áádóó hashké niidzı̨́įʼgo índa tsʼídá ayóó átʼéego báháchįʼgo hakédaayahdóó hahoniiskaadgo náánáłaʼ kéyahgóó ahoniiskaad; dííshjı̨́ı̨́góó ákótʼé.
29 Nidanilʼinii éí Bóhólníihii nihiDiyin God daabí, nidi nihichʼįʼ yitʼíní ádaalyaii éí nihaʼáłchíní bił hoolʼáágóó danihííʼ, áko díí saadígíí tʼáá átʼé bee hazʼáanii bitsʼą́ą́dóóígíí bikʼeh dahoniilʼı̨́į doo.
Footnotes
^ Éí doodaiiʼ, Doo dibááʼ hasinii éí dibááʼ hasinii bił ahíiltsood.
