Deuteronomy 3:1-29
3 Áko naanísiiʼnáago Béíshan góde dah diiʼná, áádóó nítʼééʼ Béíshandóó aláahgo naatʼáanii Ag wolyéii nihichʼįʼ chʼíheedzá; bí áádóó bidineʼé yił Édriyai kin haalʼáagi nihichʼįʼ nídadiibaaʼ.
2 Áádóó Bóhólníihii áshíłní, Tʼáadoo bikʼee nił yéʼí; bí áádóó bidineʼé índa bikéyah nihaa dideeshʼááł, áko Héshban kin haalʼáádóó Ámon dineʼé aláahgo binanitʼaʼí Sáíhan wolyéii ádaołʼįįdígi átʼéego bí ałdóʼ ákódadoohłííł.
3 Áko Bóhólníihii nihiDiyin God éí Béíshandóó aláahgo naatʼáanii Ag joolyéii áádóó hodineʼé tʼáá ałtso tʼáá bił nihílákʼee hodííʼą́, áádóó ałtso nidahosiiltseedgo tʼáadoo łaʼ yisdájííyáhí da.
4 Íídą́ą́ʼ bikin hadaasʼáhígíí tsʼídá ałtso bitsʼą́ą́ʼ dasiilná; kin haalʼáii tʼáadoo łaʼ doodaí ákódeiilyaa. Árgab nahósʼaʼgóó hastą́diingo kin haalʼáhígíí éí Béíshan kéyahgi Ag wolyéii aláahgo bee bóhólníihgo bił hazʼą́ą́ nítʼéʼígíí ałtso dasiilná.
5 Díí kin hadaasʼáhígíí tʼáá ałtso binaagóó wódahgo ditą́ągo ahéédaʼastłʼin áádóó dáńʼdadilkał índa bichʼą́ą́h dah nídaʼatı̨́įhii bee bidziilgo ádaalyaa, áádóó tʼóó ahayóigo kin dah naazhjaaʼígíí ałdóʼ doo binaagóó ahéédaʼastłʼin da nítʼééʼ.
6 Áko Héshban kin haalʼáádóó Sáíhan wolyéii aláahgo naatʼáanii ádeiilyaaígi átʼéego tsʼídá ałtso ádahosiildįįd; tʼáá kin hadaasʼáhígi dinéda áádóó asdzánída índa áłchínída tsʼídá ałtso ádahosiildįįd.
7 Nidi daʼalı̨́ı̨́ʼ ałʼąą ádaatʼéii tʼáá ałtso áádóó kin hadaasʼáhígóó naalyeʼé bąąh daʼoogą́ąʼii tʼáá nihí ádá áádasiilzįįd.
8 Íídą́ą́ʼ Ámor dineʼé aláahgo binanitʼaʼí nidiltʼéego Jórdan tooh haʼaʼaahjígo Árnan toohdóó Dził Hérman bitsı̨́įjįʼ kéyah bighadasidiitʼą́.
9 (Sáídan dineʼé danilíinii Dził Hérman hoolyéhígíí Síriyan deiłníí nítʼééʼ, áádóó Ámor dineʼé danilíinii éí Shííner deiłníí nítʼééʼ.)
10 Áádóó dadzígaigóó kin hadaasʼáhígíí tʼáá ałtso áádóó Gíliyad kéyahgóó áádóó Béíshan kéyahgóó tʼáá Salííka kin haalʼáajįʼ áádóó Édriyai kin haalʼáajįʼ éí Béíshan kéyahgi Ag wolyéii aláahgo bee bóhólníihgo bił hazʼą́ągi kin hadaasʼáhígíí tʼáá átʼé bighadasidiitʼą́.
11 (Áko Béíshan kéyahdóó aláahgo naatʼáanii Ag wolyéii yéʼiitsoh łaʼ nilı̨́įgo éí tʼéí yidziih. Jó, tsáskʼeh yikááʼ nitéhígíí béésh nitłʼizii bá nidaazʼáago ályaa. Éí Ámon dineʼé bikin haalʼáhígi Rábah hoolyéegi siʼą́. Tááʼtsʼáadahdóó náʼáłníiʼgo ké silá áníłnééz áádóó naaniigo éí hastą́ądi ké silá áníłtéél. Kúbit wolyéhígíí achʼoozlaaʼdóó álaʼ anííʼdę́ʼígíí bílátahjįʼ bee íʼneelʼąąhígíí átʼé.)
Rúben dineʼé áádóó Géed dineʼé índa Manáseh dineʼé ałnííʼdóóígíí Jórdan tooh haʼaʼaahjígo nidahaazná (Num. 32:1-42)
12 Áko díí kéyah nihííʼ ádeilyaa yę́ędą́ą́ʼ Aróʼer kin haalʼáádóó Árnan tooh bibąąhgi hazʼánídóó Dził Gíliyad náʼáłníiʼjįʼ kin hadaasʼáhígíí tʼáá bił Rúben dineʼé áádóó Géed dineʼé baa diníʼą́.
13 Áádóó Gíliyad kéyah łahjįʼ índa Béíshan kéyah tʼáá náhwiizʼą́ą́ nítʼééʼ Ag wolyéii aláahgo bee bóhólníihgo bił hazʼáanii éí Manáseh dineʼé ałnííʼdóóígíí baa diníʼą́. Árgab nahósʼaʼgóó tʼáá átʼé Béíshan kéyah tʼáá náhwiizʼą́ą́ nítʼééʼ ałdóʼ yéʼiitsoh bikéyah hoolyéé nítʼééʼ.
14 Manáseh biyeʼ Jéíyer wolyéii Árgab kéyah tʼáá átʼé tʼáá Gíísher dineʼé índa Méíyakah dineʼé bihoodzojįʼ nidi náhodiiʼą́, áádóó bikʼijįʼ tʼáá bí bízhiʼ yee dayíízhiʼ. Díí jı̨́ı̨́góó Héívath-jéíyer yee dayózhí.
15 Áko Gíliyad nahósʼaʼgi Méíker wolyéii baa diníʼą́.
16 Áádóó Gíliyad hahoodzodóó Árnan toohjįʼ áádóó Jábak tooh bíighahjįʼ Áman dineʼé bihoodzojįʼ Rúben dineʼé índa Géed dineʼé baa diníʼą́.
17 Jórdan tooh bibąąhgi dahoníteelígóó Kíniireth hoolyéédóó Tónteel Dókʼǫ́ǫzhii hoolyéhíjįʼ éí Dził Pízgah bitsı̨́ı̨́dóó haʼaʼaahjigo ałdóʼ baa diníʼą́.
18 Áko íídą́ą́ʼ bee ánihidííniidgo ádíshní, Bóhólníihii nihiDiyin God díí kéyah nihaidiníʼánígíí nihííʼ ádaahłééh. Doo nídanilyéesii danohłíinii, bee naʼabaahí hashtʼeetʼéego ádaahłéehgo nihikʼisóó Ízrel dineʼé danilíinii bilą́ąjįʼ haʼnaa nidoohʼnééł.
19 Nidi nihidaʼasdzą́ą́ áádóó nihadaʼáłchíní yázhí índa danihilı̨́ı̨́ʼ dahólǫ́, (jó, tʼáá hazhóʼó nihilı̨́ı̨́ʼ deílʼáago shił bééhózin,) éí nihikin hadaasʼáhígóó tʼáá nihaa hodiníʼánígi bíniʼdii tʼáá ákǫ́ǫ́ nidaakai dooleeł.
20 Bóhólníihii éí nihikʼisóó danilíinii hashtʼehodítʼé yeidiníʼą́ągo áádóó nihí ałdóʼ nihaidiníʼą́ągo áádóó Jórdan tooh wónaanídi Bóhólníihii nihiDiyin God nilíinii kéyah haidiníʼánígíí hóóʼ ádajiilaago índa tʼááłáʼí nootínígo kéyah nihaa diníʼánígíí nihííʼ ádadoohłííłgóó nihéédahidoohkah.
21 Íídą́ą́ʼ Jáshowa bichʼįʼ haasdzíiʼgo kóbidishní, Bóhólníihii niDiyin God éí aláahgo naatʼáanii nidiltʼéego atííłʼı̨́įgo yiniłtsą́; ídahólníihii bił nahazʼą́ą́góó tʼáá ałtso biiʼ táhodíleehgóó Bóhólníihii ałdóʼ ákóháłʼı̨́į doo.
22 Éí tʼáadoo bikʼee nił yéʼí, háálá Bóhólníihii niDiyin God ná naabaah doo.
Mózes éí Kéínan kéyah doo biih díínáał da biʼdooʼniid
23 Áko íídą́ą́ʼ Bóhólníihii néisíkango ádííniid,
24 Bóhólníihii Diyin God nílíinii, ná naalʼaʼí binááł ayóó ánítʼéhígíí índa nibee adziilii yitʼíní íínísingo hodideeshzhiizh. Haʼátʼíí diyin shı̨́įshąʼ yádiłhił biyiʼdi, doodaiiʼ nahasdzáán bikáaʼgi ayóó ádaatʼéii ádeinilaaígi átʼéego índa baa nisíníyáhígi átʼéego niʼdoolíiłgo yíneelʼą́?
25 Tʼáá shǫǫdí, Jórdan tooh wónaanídi kéyah ayóó ánóolninígóó áádóó daadził dahózhónígóó índa Lébanangóó deesháałgo hwiideestséełgo shaʼdiʼníʼaah.
26 Nidi Bóhólníihii éí nihiniinaa shichʼįʼ báhóóchįįdgo doo shíistsʼą́ąʼ da, áádóó Bóhólníihii áshíłní, Tʼáá ákódígo bee handziih; ákwíinínízinígíí doo bee shichʼįʼ hanáádíídzih da.
27 Dah diináahgo Dził Pízgah wolyéii bighą́ą́ʼgóó hasínááh, áádóó eʼeʼaahjigo áádóó náhookǫsjigo áádóó shádiʼáahjigo índa haʼaʼaahjigo dídííʼįįł. Nidi tʼóó ninááʼ tʼéí bee hwiidííłtsééł, háálá Jórdan tooh doo haʼnaa nidíínáał da.
28 Nidi Jáshowa bichʼįʼ handziihgo chánah ánílééh áádóó bidziilgo ánílééh, háálá díí dineʼé yooʼishgo haʼnaa nidoogááł, áko kéyah ííʼ dooleełii ádííʼ ádeidoolíiłgo íidoolíłígíí yidííłtsééł.
29 Áko Beth-píyor honíteel binaashiijí kéédahwiitʼı̨́ı̨́ nítʼééʼ.
