Deuteronomy 30:1-20
30 Áko kótʼée doo: díí nihichʼįʼ kódahooníłígíí tʼáá átʼé, éí akʼihojidlíii índa hóyéeʼgo á haʼiidziihii nihichʼįʼ yitʼíní áshłaaígíí nihikʼi dahooleʼgo áádóó ałʼąą dineʼé tʼáá ałtso bitahgóó Bóhólníihii nihiDiyin God anihiniiskaadgo áadi nibéédahołníihgo,
2 áádóó Bóhólníihii nihiDiyin God bichʼįʼ dah nídahidoohkaigo áádóó áníinii bikʼeh dahonołʼı̨́įgo díí jı̨́ tʼáá átʼé nihichʼįʼ bee haasdziihígíí bikʼeh ádanohtʼéego, éí nihí áádóó nihaʼáłchíní bił nihijéí tʼáá átʼé bee índa nihiiʼ sizíinii tʼáá átʼé bee ákónóhtʼéego,
3 áko Bóhólníihii nihiDiyin God éí danihiʼdisná yę́ędę́ę́ʼ ninánihidiyooʼish áádóó nihaa aʼááh dínóozįįł índa nihaa náhoníleʼgo ałʼąą dineʼé tʼáá ałtso bitahdę́ę́ʼ áłah ánánihidoodlííł; éí bitahgóó Bóhólníihii nihiDiyin God tanihinooskaad nítʼééʼ.
4 Nihidineʼé łaʼ yá nidaneesʼą́ąjįʼ abidiʼnoolkaadgo áádę́ę́ʼ Bóhólníihii nihiDiyin God áłah ánánihidoodlííł; jó, áádę́ę́ʼ ninánihidiyooʼish.
5 Áádóó Bóhólníihii nihiDiyin God éí danihizhéʼé yę́ę kéyah daabí nítʼééʼ yę́ę yiih nánihidooʼishgo danihííʼ dooleeł, áádóó yáʼátʼéhígi ánihoolíił doo, índa danihizhéʼé yę́ę biláahgo kʼeeʼąą noohtʼı̨́įł doo.
6 Bóhólníihii nihiDiyin God éí ąąh náhinilgishiigi átʼéego danihijéí índa nihaʼáłchíní náás ahoolchíiłii dabijéí diyingo íidoolííł, áko Bóhólníihii nihiDiyin God ayóóʼádeínóhʼníigo nihijéí tʼáá átʼé bee índa nihiiʼ sizíinii tʼáá átʼé bee ákónóhtʼéego dahinohʼnáa doo.
7 Áádóó Bóhólníihii nihiDiyin God éí díí hóyéeʼgo á hadaʼiisdzíiʼii tʼáá átʼé nihiʼanaʼí yikʼijįʼ kwíidoolííł áádóó danihijoołxáhígíí atídanihiłʼíinii ałdóʼ ákwíidoolííł.
8 Áko Bóhólníihii nihiDiyin God bichʼįʼ tʼą́ą́ʼ nináhidoohkahgo áníinii bikʼeh dahonołʼı̨́į doo índa bibikʼeh óʼooʼníiłii tʼáá átʼé éí díí jı̨́ nihichʼįʼ bee haasdziihígíí bidaʼíínóhsin doo.
9 Áádóó Bóhólníihii nihiDiyin God éí naanish bee ídaʼazįįdgo íidoolíiłgo nidaałnish doo áádóó nihitsʼą́ą́dóó nidahachíihii áádóó nihilı̨́ı̨́ʼ nidahachíihii índa nihidádaʼakʼehdóó aneestʼąʼ bilááh náádleełgo yee nihikʼijidlíi doo; jó, Bóhólníihii éí yáʼátʼéehii bee náás náádahodeeztʼiʼii biniyé nihaa bił ninááhoozhǫǫh doo; danihizhéʼé yę́ę yaa bił nihoozhǫǫh nítʼééʼ yę́ęgi ádoonííł.
10 Bóhólníihii nihiDiyin God áníinii deísółtsʼą́ąʼgo bibikʼeh óʼooʼníiłii áádóó yee nihwiizʼáanii, éí díí naaltsoos biiʼ bee hazʼáanii bee akʼeʼashchínígíí bikʼeh dahonołʼı̨́įgo áádóó Bóhólníihii nihiDiyin God nihijéí tʼáá átʼé bee índa nihiiʼ sizíinii tʼáá átʼé bee bichʼįʼ dah nídahidoohkáahgo nihaa bił ninááhoozhǫǫh doo.
11 Jó, díí bikʼeh óʼooʼníiłii díí jı̨́ nihichʼįʼ bee haasdziihígíí éí doo nihá nantłʼa da, doodaiiʼ doo nihitsʼą́ądi nízaadi hólǫ́ǫ da.
12 Doo yáʼąąshdi hólǫ́ǫ da; dooyéí kódadidoohniił da, Háishąʼ yáʼąąshgóó nihá doogáałgo áádę́ę́ʼ yił nihaa nídoodááł, áko éí deísíníiltsʼą́ąʼ doo, índa bikʼehgo ádaniitʼée dooleeł?
13 Áádóó doo tónteel wónaanídi hólǫ́ǫ da; dooyéí kódadidoohniił da, Háishąʼ tónteel wónaanígóó nihá doogáałgo áádę́ę́ʼ yił nihaa nídoodááł, deísíníiltsʼą́ąʼ doo áádóó bikʼeh ádaniitʼée doo?
14 Nidi saad éí níighahgóó hólǫ́; nihizálátahdóó índa nihijéí biiʼ hólǫ́ǫgo bee yádaołtiʼgo éí bikʼeh ádaahníił doo.
15 Shoo, iiná áádóó yáʼátʼéehii áádóó aniné índa doo yáʼáshóonii díí jı̨́ nihidáahgi hólǫ́ǫgo áshłaa.
16 Díí jı̨́ nihichʼįʼ bee haasdziihígíí bikʼehgo Bóhólníihii nihiDiyin God ayóóʼádeínóhʼní, áádóó bikʼehgo deínóhkááh áádóó bibikʼeh óʼooʼníiłii áádóó yee nihwiizʼáanii índa yee nihodiiʼaahii bikʼeh dahonołʼı̨́įgo dahinohnáa doo; kʼeeʼąą noohtʼı̨́įł doo, áko kéyah biih woonáago Bóhólníihii nihiDiyin God nihikʼijidlíigo kéyah ádííʼ ádadoohłííł.
17 Nidi nihijéí bee doo ákótʼéégóó tsídasidookéezgo biniinaa doo daʼíísółtsʼą́ą́ʼgóogo áádóó yóóʼadanihidiʼniitʼáahgo diyin dabidiʼníinii bichʼįʼ nidahohłáago índa bá chodaohʼı̨́įgo.
18 Shoo, díí jı̨́ kónihidishní, Tʼáá aaníí ałtso ádoohdįįł, áádóó kéyah bikááʼ doo asʼahgóó adanihíyiiłkaah da dooleełígíí bichʼįʼ Jórdan tooh haʼnaa nidoohnéełgo, éí kéyah baa doohnéełgo ádííʼ ádadoohłííł.
19 Yáʼąąsh áádóó nahasdzáán bíká ádíshníigo díí jı̨́ ooʼíinii kʼehgo nihaa halneʼ doo, Nihidáahgi iiná áádóó aniné, akʼihojidlíii áádóó hóyéeʼgo á haʼiidziihii hólǫ́ǫgo áshłaa; éí bąą iiná nidadinohʼaah, áko nihí índa nihaʼáłchíní náás ahoolchíiłii bił dahinohnáa doo,
20 áádóó Bóhólníihii nihiDiyin God ayóóʼádeínóhʼníi doo áádóó áníinii bikʼeh dahonołʼı̨́į doo índa bąąh dah shoojéeʼ doo, háálá éí bee dahinohná, áádóó éí bee asʼahgóó adanihíyiiłkaah doo; éí kéyah bikááʼ kéédahohtʼı̨́įgo iiná nidahidohʼaah doogo Bóhólníihii éí danihizhéʼé yę́ę, Éíbraham áádóó Áízak índa Jéíkab yichʼįʼ yee ádee hadoodzíiʼgo yeidiníʼą́.
