Deuteronomy 31:1-30
31 Áko Mózes éí Ízrel dineʼé tʼáá ałtso yichʼįʼ díí saad yee yááłtiʼ.
2 Áádóó ííłní, Díí jı̨́ neeznádiindóó baʼaan naadiin shinááhai, áko chʼínáshdááh áádóó yah anáshdááh biʼoh neeshʼą́ sélı̨́ı̨́ʼ, áádóó ałdóʼ Bóhólníihii áshidííniid, Díí Jórdan tooh haʼnaagóó doo díínáał da.
3 Bóhólníihii nihiDiyin God nihilą́ąjįʼ haʼnaa nihodooleeł áádóó ałʼąą dineʼé nihilą́ąjįʼ áyoołdįįł doo índa bikéyah nihííʼ dooleeł, áko Jáshowa éí nihilą́ąjįʼ haʼnaa nidoogááł; jó, Bóhólníihii ákódííniid niʼ.
4 Áádóó Bóhólníihii éí Ámor dineʼé aláahgo binanitʼaʼí nilíinii Sáíhan áádóó Ag wolyéii índa bikéyah áyííłʼįįdígi átʼéego atíhodoolíiłgo áhodoołdįįł.
5 Áko Bóhólníihii éí nihinááł nihílákʼe hodidooʼáałgo éí atídadoohłíiłgo bikʼeh óʼooʼníiłii tʼáá átʼé bikʼehgo nihichʼįʼ bee haasdzíiʼ niʼ.
6 Nihidziilgo ídaʼdííʼnółzin, áádóó chánah ídaʼdííʼnółzin; tʼáadoo bikʼee nihił daayéʼí, tʼáadoo béédaałdzidí, háálá Bóhólníihii nihiDiyin God tʼáá bí nihił hólǫ́ǫgo nihooʼish doo; doo chʼééh nihá ádootʼįįł da, doodaiiʼ doo yóóʼanihididooʼáał da.
7 Áádóó Mózes éí Jáshowa hágo yidííniidgo Ízrel dineʼé tʼáá ałtso binááł ííłní, Nidziilgo íʼdííʼnílzin áádóó chánah íʼdííʼnílzin, háálá díí dineʼé bił kéyahgóó nídidíínéełgo Bóhólníihii éí dabizhéʼé yę́ę yeididooʼáałgo yichʼįʼ yee ádee hadoodzíiʼii bííʼ dadooleełgo biih dííʼish.
8 Áádóó Bóhólníihii tʼáá bí nilą́ąjįʼ hooleełígíí nił hólǫ́ǫ doo; doo chʼééh ná ádootʼįįł da, índa doo yóóʼandidooʼáał da; tʼáadoo nił yéʼí, doodaiiʼ tʼáadoo nąąh nááhákaʼí.
Tsostsʼid nínáhah bikʼeh bee hazʼáanii náwóltah
9 Áádóó Mózes díí bee hazʼáanii yee akʼeʼashchı̨́įgo Líívai dineʼé náádaʼiiłniihii éí Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii deíʼaahígíí áádóó Ízrel dineʼé bitahgi aląąjįʼ naazíinii tʼáá ałtso baazhdiníʼą́.
10 Áádóó Mózes díí hachʼįʼ yee haadzíiʼgo ání, Tʼáá tsostsʼid nínáhahgo hodílzingo ééhidichííd baa náhálzhishgo áádóó chadahaʼohgi hodílzingo áłah nídaʼadleeh nídeitʼaahgo
11 Ízrel dineʼé tʼáá ałtso Bóhólníihii nihiDiyin God binááł ninádahakahgo Bóhólníihii tʼáá bí náhodidooʼáłígi ninádahałaahgo, díí bee hazʼáanii éí Ízrel dineʼé tʼáá ałtso bichʼįʼ nídeínółtahgo dayíistsʼą́ąʼ doo.
12 Diné tʼáá ałtso áłah áńdaołʼįįh; éí hastóí áádóó sáanii áádóó áłchíní índa déʼéyóní nihikin hadaasʼáagi nihił kééhatʼínígíí díí bichʼįʼ nídeínółtah doo, áko éí dayíistsʼą́ąʼ doo áádóó yídahoołʼaah doo áádóó Bóhólníihii nihiDiyin God deidósin doo índa díí bee hazʼáanii bitsʼą́ą́dóó saadígíí tʼáá ałtso ádaa deisįįhgo yikʼeh ádaatʼée doo.
13 Áádóó badaʼáłchíní tʼah doo bił éédahoozįįh da yę́ę éí deididootsʼı̨́ı̨́ł áádóó yídahoołʼaahgo Bóhólníihii nihiDiyin God deidósin doo; haadashąʼ nízádígi kéyah bikáaʼgi kéédahonohtʼı̨́į dooígíí bichʼįʼ Jórdan tooh haʼnaa nidoohnéełgo, éí kéyah baa doohnéełgo ádííʼ ádadoohłííł.
Bóhólníihii tsʼídá akéeʼdi yee Mózes neineeztą́ʼígíí
14 Nítʼééʼ Bóhólníihii éí Mózes ííłní, Jó, dadíítsaałígíí beiníłką́; Jáshowa hágo bididííniiłgo níbaal biiʼ dahozdísinii góneʼ yah adoohʼash, áko hanaanish nilı̨́į dooleełii haa dadeesįįł. Áádóó Mózes índa Jáshowa bił ákǫ́ǫ́ dashdiiʼáazhgo níbaal biiʼ dahozdísin góneʼ Bóhólníihii bichʼįʼ nizhníʼáázh.
15 Áko Bóhólníihii éí níbaal biiʼ hodílzin góneʼ kʼos yiiʼ honíleʼ áádóó níbaal biiʼ hodílzin bichʼéʼétiin bidáahgi kʼos dah yildoh.
16 Áádóó Bóhólníihii éí Mózes ííłní, Jó, danizhéʼé yę́ę bił daʼíłhosh doo áádóó díí dineʼé nídahididookahgo déʼéyóní kéyahgi kéédahatʼíinii bidiyin dabidiʼníinii bee ahídaʼaldahii yikééʼ naa nánoojahgo ałtah nihidooldah áádóó yóóʼashididooʼááł índa shibee ahaʼdeetʼáanii bee bił ahadadiʼnishtʼáanii nideidiyootih.
17 Áko éí bijı̨́ bee hashké nísdzinii bee hachʼįʼ hashké dínéesdzįįł áádóó yóóʼahodideeshʼááł índa doo honíshʼı̨́į da doo; ádazhdoodįįł índa doo yáʼádaashóonii áádóó achʼįʼ nahwiiʼná tʼóó ahayóí hakʼi dahiildóoh doo, áko kódajiníigo yoołkáał doo, Díí doo yáʼádaashóonii nihikʼi nídahoodleeh. Daʼ nihiDiyin God doo nihitahgóó hólǫ́ǫ daígíísh bee átʼé?
18 Éí bijı̨́įdi tʼáádóo nídí doo honíshʼı̨́į da doo, háálá doo yáʼádaashóonii tʼáá átʼé ádajiilaago diyin dabidiʼníinii bikééʼ yóóʼadadziiskai.
19 Éí bąą kʼad díí sin bee akʼeʼíłchíigo, éí bee Ízrel dineʼé bínabiníłtin, áádóó bizadahidííleeł, áko díí sin bee hojitaałgo Ízrel dineʼé bizhdiilkaalgo shá bił hojilneʼ doo.
20 Jó, kéyah bikááʼ abeʼ índa tsésʼná bitłʼizh bee ádaʼazįįdii dahazhéʼé yę́ę baa dideeshʼáałgo bee ádee hadeesdzíiʼii biih hóóʼeezhgo daʼjiiyą́ą doo áádóó hwiih dajílı̨́į doo índa dazhdínóolkʼah, áko diyin dabidiʼníinii bichʼįʼ dah dahizhdidookah áádóó bá chodajooʼı̨́į doo índa dashijiʼı̨́įgo shibee ahaʼdeetʼáanii kʼídazhdootih.
21 Áádóó kótʼée doo: doo yáʼádaashóonii índa achʼįʼ nahwiiʼná tʼóó ahayóí hakʼéídiildohgo, díí sin yee dahataałgo hodadiilkaalgo ooʼíinii kʼehgo yádaałtiʼ doo, háálá haʼáłchíní bizálátahdóó doo baa hodiyooʼnah da; jó, baa nitsídadzikeesii bikʼehgo ádajitʼíinii shił bééhózin; azhą́ kʼad kéyah hachʼįʼ bee ádee hadeesdzíiʼii tʼah doo biih hashʼééshgóó nidi hwééhonisin.
22 Áko tʼáá éí bijı̨́ Mózes díí sin yee akʼeʼashchı̨́ áádóó éí yee Ízrel dineʼé dahataał dooleełgo yíneineestą́ą́ʼ.
23 Áádóó Nan biyeʼ Jáshowa wolyéii binaanish dooleełii yeidiníʼą́ągo ííłní, Nidziilgo íʼdíínílzin áádóó chánah íʼdííʼnílzin, háálá Ízrel dineʼé éí kéyah baa dideeshʼáałgo bee ádee hadeesdzíiʼii biih dííʼish, áko nił honishłǫ́ǫ doo.
24 Áádóó ákódzaago Mózes éí díí bee hazʼáanii bitsʼą́ą́dóó daasaadígíí naaltsoos biiʼ bee akʼeʼjishchı̨́įgo hazhóʼó hashtʼejiilaago
25 Mózes éí Líívai dineʼé bichʼįʼ díí bee hadzoodzííʼ; Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii yaa ádahalyą́ągo nideiʼáii ábijiní,
26 Díí naaltsoos biiʼ bee hazʼáanii bee akʼeʼashchínígíí nídoohʼaahgo Bóhólníihii nihiDiyin God bitsitsʼaaʼ dílzinii bíighahgi ninohʼaah; nihidiilkaalgo yáłtiʼ doo biniyé ákwii siʼą́ą doo.
27 Háálá shił bééhózingo ayóogo nidaałteeh áádóó nihízhą́ daʼílı̨́; jó, díí jı̨́ tʼah hinishnáago nihił honishłǫ́ǫgo Bóhólníihii bikʼijįʼ danohłı̨́įgo nidaałteeh. Shikééʼ áhásdįįdóó lá tʼah yówehgo ákónáádaahtʼı̨́į doo ni.
28 Nihidineʼé yá aląąjįʼ naazíinii índa nihinanitʼaʼí danilíinii shaa áłah ádaohłééh, áko díí saad bee hadeesdzihgo deididootsʼı̨́ı̨́ł áádóó yáʼąąsh índa nahasdzáán bíká ádíshníigo ooʼíinii kʼehgo nihikʼijįʼ yáłtiʼ doo.
29 Háálá kótʼéego shił bééhózin: shikééʼ áhásdįįdóó tʼáá nihí tʼáá íiyisí ádadidoołchxǫǫłgo bikʼehgo wołdah dooleełii nihichʼįʼ bee haasdzíiʼii tʼóó bitsʼáhóhkáahgo doo yáʼádaashóonii náás hoolzhishgóó nihikʼi hwiileeh doo, háálá Bóhólníihii binááł doo yáʼádaashóonii baa nidaohkaigo Bóhólníihii dasooʼįįdgo tʼáá nihí nihílaʼ bee nihinaanish ádeínóhsinii biniinaa bá dahodoołchįįł.
Mózes biyiin
30 Áádóó Mózes éí Ízrel dineʼé áłah nilínígíí tʼáá ałtso daʼíistsʼą́ąʼgo saad bee díí sin ályaii bee hadziidziihgo ałtso bee bichʼįʼ yájííłtiʼ.
