Deuteronomy 33:1-29
33 Díí bee akʼihojidlíii bee Mózes éí Diyin God bitsʼą́ą́dóó diné jílíinii tʼah doo dajitsaahgóó Ízrel dineʼé bikʼijiidzisdliʼ.
2 Áko ájíní,
Bóhólníihii éí Dził Sáínaidę́ę́ʼ honíleʼ, Dził Síyerdóó hachʼįʼ hahóóleʼ índa Dził Péírandóó bee adideezdláád; éí neeznáadi mííl bidiyı̨́ı̨́ʼ yił yíkai; nishʼnáájí bílákʼeedóó bee hazʼáanii diltłiʼii hachʼįʼ kóyiilaa.
3 Aooʼ, diné ayóóʼáyóʼní; éí tʼáá ałtso bidiyı̨́ı̨́ʼ danilı̨́. Éí nanijaahgo baa áhólyą́; niyaajįʼ dineezbingo tʼáá ałtso nizaad nídeididoolééł.
4 Mózes nihichʼįʼ yee haadzíiʼii éí bee hazʼáanii Jéíkab dineʼé áłah nádleehii bííʼ dooleełii átʼé.
5 Bóhólníihii éí Jéshurangi aláahgo naatʼáanii nilı̨́įgo Ízrel dineʼé aląąjįʼ naazíinii yił áłah silı̨́ı̨́ʼ.
6 Bíniʼdii Rúben dineʼé dahináa doo; doo noonééłgóó doo tʼáá díkwíhí dooleeł da.
7 Áádóó díí éí Júdah dineʼé bee bikʼihojidlíii átʼé: áádóó ání, Bóhólníihii nílíinii, Júdah biinééʼ yísíníłtsʼą́ąʼgo bidineʼé bichʼįʼ bił ninánítʼaash; bíniʼdii ákʼinaaldzil áádóó biʼanaʼí bitsʼąą baa áhólyą́ągo bíká anánílwoʼ.
8 Áádóó Líívai dineʼé yaa yáłtiʼgo ání, NiThámmim índa niYúrim bíniʼdii nidiné diyinii yił hólǫ́ǫ doo; éí Másahgi bínínítą́ą́ʼ áádóó Méribah tóogi saad bíníʼááh nítʼééʼ.
9 Líívai dineʼé bizhéʼé áádóó bimá yaa yáłtiʼgo ání, Tʼáadoo hoołtsą́ą da. Bikʼisóó nidi tʼáadoo yaa ákoniizı̨́įʼ da, índa baʼáłchíní nidi tʼáadoo yééhoosįįd da. Áko nizaad ádaa deisįįd índa nibee ahaʼdeetʼáanii yikʼeh dahółʼı̨́ı̨́ nítʼééʼ.
10 Éí bee nihoyíʼaahii Jéíkab dineʼé yee nideinitin doo, áádóó nibee hazʼáanii Ízrel dineʼé yee neinitin doo; tsin bijeeh dilidgo łikání halchinii honílǫ́ǫgi nideidookááł áádóó nibikááʼ nááʼiiniihí bikáaʼgi didlidgo nááhániihii náádeidiyoołnih.
11 Bóhólníihii nílíinii, bíiʼii bikʼijidlíi doo, áádóó bílaʼ yee binaanish ádayósinii nił yáʼátʼéeh doo; bikʼijįʼ náádadiibahígíí áádóó dabijoołáhígíí binííʼ gónaa diltłish bigháhíłgeedgo doo nídahiidooʼnaał da.
12 Áádóó Bénjamin dineʼé yaa yáłtiʼgo ání, Bóhólníihii ayóóʼábóʼníinii hasihgo bíighahgi kéédahatʼı̨́į doo índa shá bíighah Bóhólníihii hakʼiiníʼı̨́įʼ doo, áádóó háásitaʼgi hólǫ́ǫ doo.*
13 Jóseph dineʼé yaa yáłtiʼgo ání, Bóhólníihii éí hakéyah yikʼijidlíi doo; yádiłhił biyiʼdę́ę́ʼ daʼílíinii hadah dahwiileehii áádóó dahtooʼ índa nahasdzáán biyiʼdę́ę́ʼ tó hadaazlíinii yee yikʼijidlíi doo.
14 Jı̨́honaaʼéí bee aneestʼąʼ ílíinii náhoodleełii índa tłʼéhonaaʼéí bikʼehgo náhoodleełii yee yikʼijidlíi doo.
15 Tʼáá náshiinídą́ʼídi dził naaznilígíí bąąh agháago yáʼádaatʼéehii nídahoodleełgo índa deílkʼid danéełnéhígíí bąąh aneestʼąʼ daʼílíinii yee yikʼijidlíi doo.
16 Áádóó nahasdzáán bikáaʼgi daʼílíinii bee ídaʼazįįdgo índa dówózhii biyiʼ hojílǫ́ǫ́ nítʼéeʼii achʼohaʼní yee akʼijidlíi doo. Bíniʼdii bee akʼihojidlíii Jóseph hatsiitʼáajįʼ ahodooleeł, áádóó hatsiikáaʼjįʼ ahodooleeł; hakʼisóó bitsʼázdineesdlı̨́įʼii bitahgóó naatʼáanii jílı̨́.
17 Yee ayóó átʼéii éí bidóola alą́ąjįʼ yizhchíinii nahalin; bideeʼ éí béégashii ałchinii bideeʼ nahalin; éí yee nahasdzáán nidahoneesʼą́ą́góó ałʼąą dineʼé tʼáá łaʼ bizhiʼee iiniiłkaad doo. Íífreiyim dineʼé neeznáadi mííl ádanéelą́ąʼgo áádóó Manáseh dineʼé miil ádanéelą́ąʼgo ákódahodoolííł.
18 Áádóó Zébyulan dineʼé yaa yáłtiʼgo ání, Zébyulan dineʼé nohłíinii, deínóhkááhgóó baa nihił nidahoozhǫǫh; Ísakar dineʼé nohłíinii, nihiníbaal yílʼáhígíí baa nihił nidahoozhǫǫh.
19 Dadineʼé dziłghą́ąʼjįʼ hágo deiłníi doo; áadi nááhániihii tʼáá ákogi ádaatʼéii náádayiiłniih doo, háálá táłkááʼdóó tsʼídá łą́ągo daʼílíinii daboosání doo, índa séí biiʼ yódí néesʼı̨́įʼii yikʼídadookah.
20 Géed dineʼé yaa yáłtiʼgo ání, Géed dineʼé jílíinii kʼeeʼąą jinootʼı̨́įłgo áhoolaii baa haʼniih; náshdóítsoh bitsiijįʼ ditłʼoii aa héestínígi átʼéego agaan éí atsiizis tʼáá bił nijiiłdlaadgo dziztı̨́.
21 Áádóó tʼáá hó ádá átsé náhozhdiiʼą́, háálá ákwii bee hazʼáanii ííłʼíinii bá haa yiszįįd, áádóó diné aląąjįʼ naazíinii yił yíkaigo Bóhólníihii bitʼáá ákogi átʼéii tʼáadoo átʼéhígóó ájiilaa, índa yee nihodiyiiʼaahii Ízrel dineʼé bá hashtʼejósin.
22 Dan dineʼé yaa yáłtiʼgo ání, Náshdóítsoh bitsiijįʼ ditłʼoii biyázhí nilı̨́; éí Béíshandóó akʼi dah dinóoljı̨́ı̨́ł.
23 Áádóó Náftalai dineʼé yaa yáłtiʼgo ání, Náftalai dineʼé nohłíinii, achʼohaʼní bee hwiih nohłı̨́įgo áádóó Bóhólníihii bibee akʼihojidlí bee hwiih nohłı̨́įgo eʼeʼaahjigo índa shádiʼáahjigo kéyah ííʼ dooleełii bee nihóhólníih doo.
24 Ásher dineʼé yaa yáłtiʼgo ání, Ásher dineʼé éí áłchíní bee hakʼidahojidlíi doo; hakʼisóó bíniʼ bidaałtʼéii jílı̨́į doo; bíniʼdii akʼah biih jidilʼéés.
25 Béésh nitłʼizii índa béésh łitsoii bee dáńʼdílkał biniyé nidáádílkał bichʼą́ą́h dah nátı̨́hígíí ádaalyaa doo;* nihí deídíiskánígíigi átʼéego danihidziil doo.
26 Jéshuran dineʼé nohłíinii, nihiDiyin God átʼéhígi tʼáadoo ákójítʼéhí da; éí yá yikááʼ náhodididleehii nihíká análwoʼ, áádóó kʼos bikáaʼdi yee ayóó átʼéii yił náhodididleeh.
27 Hoolʼáágóó Diyin God nilíinii bineʼ nidaohdziʼii nilı̨́; éí hoolʼáágóó bigaan bitsʼáhoníyéeʼii yee nanihijaah; nihinááł nihiʼanaʼí chʼíiniiłkaad doo, áko ádidooniił, Ádaołdįįh.
28 Áko Ízrel dineʼé hazhóʼó kéédahatʼı̨́įgo tʼáá sáhí hasih dahodiilʼaah doo; Jéíkab bitsʼą́ą́dóó náás oochíłígíí éí kéyah bikááʼ tłʼoh naadą́ą́ʼ índa wáin hólǫ́ǫgi kééhatʼı̨́į doo; yádiłhił biyiʼdę́ę́ʼ ałdóʼ dahtooʼ bee nínáháltłoh doo.
29 Nihił dahózhǫ́, Ízrel dineʼé nohłíinii, háísh nihígi átʼéego diné danilı̨́įgo Bóhólníihii yisdábíínil? Éí naagé nihíká análwoʼii nilı̨́, índa bí nihidiltłish aláahdi átʼéego ánihósinii nilı̨́; nihiʼanaʼí łídanihidilchí ádahodilʼı̨́į doo, índa dah daaskʼid bighą́ąʼdi bitsʼą́ą́ʼ bikʼi naahkai doo.
