Deuteronomy 7:1-26
7 Bóhólníihii nihiDiyin God éí kéyah nihííʼ ádadoohłííł biniyé yiih nihííʼeezhgo, ałʼąą dineʼé tʼóó ahayóí nihinááł baa chʼéheezhjéeʼgo, jó, éí Het dineʼé, Gérgash dineʼé, Ámor dineʼé, Kéínan dineʼé, Píírez dineʼé, Háíva dineʼé índa Jííbas dineʼé danilı̨́įgo tsostsʼidgo ałʼąą dineʼé danilíinii nihiláahgo ayóó ádaatʼé índa ayóó ádabóodziil;
2 Bóhólníihii nihiDiyin God nihinááł nihílákʼee dahodiizʼą́ągo bikʼijįʼ nidaahbaah doo, áádóó ałtso ádadoołdįįł; doo bił ahadadiʼdoohtʼáał da, doo nidi baa aʼááh dadínóosįįł da.
3 Doo nidi bił ahádaʼdoohheh da: tʼááká nihitsiʼké éí biyeʼké bił ahaa dahohnííł lágo, doodaiiʼ tʼááká bitsiʼké éí nihiyeʼké yił ahaa dahakááh lágo.
4 Háálá nihiyeʼké shikééʼ deíkáhígíí shitsʼáhidookahgo diyin dabidiʼníinii yichʼįʼ nidahałáago ádeidoolííł, áko Bóhólníihii nihichʼįʼ hashké dínóodzįįłgo tʼáadoo hooyání ałtso ánihidoołdįįł.
5 Nidi nihí tʼéí bichʼįʼ kódaahtʼı̨́į doo: yikááʼdóó náádaʼiiłniihígíí nidahołchxǫǫh doo, áádóó edaʼalyaii nidahohtíih doo, áádóó bihodiyingo nahazʼánígi edaʼalyaii kʼídahołneʼ doo, índa nidaaskʼęęʼgo edaʼalyaii bitsʼą́ą́ʼ adahidołkʼą́ąh doo.
6 Háálá Bóhólníihii nihiDiyin God bidineʼé dadiyinii danohłı̨́. Bóhólníihii nihiDiyin God tʼáá bí ádá nánihidiinilgo nahasdzáán nidahoneesʼą́ą́góó ałʼąą dineʼé danilíinii tʼáá ałtso biláahdi átʼéego tʼáá sahdii dineʼé danohłı̨́į doo nízin.
7 Bóhólníihii ayóóʼánihóʼníigo nánihidiinil. Dineʼé náádaałaʼ biláahdi ánóohłą́ąʼgo éí doo biniinaa da. Jó, ałʼąą dineʼé tʼáá ałtso biʼoh ánóołtʼeʼ.
8 Nidi Bóhólníihii ayóóʼánihóʼnínígíí biniinaa áádóó danihizhéʼé yę́ę yichʼįʼ kéyah yee ádee hadoodzíiʼgo tʼáádóo nídí yee nihoníʼánígíí yiʼdoolíłígíí biniinaa Bóhólníihii bigaan ayóó ábóodziilii yee háánihííʼeezh índa naalteʼ danohłı̨́ı̨́ nítʼééʼ yę́ędę́ę́ʼ, tʼáá éí Féro bitsʼą́ąjįʼ nihikʼé nináʼídlá,
9 éí bąą díí baa ákodanoozı̨́ı̨́ʼ: Bóhólníihii nihiDiyin God, bí Diyin God nilı̨́; bí Diyin God baʼahódlíii nilı̨́; éí bibee ahaʼdeetʼáanii áádóó yee aʼááh nízinii ayóóʼádabóʼníinii índa bibikʼeh óʼooʼníiłii yikʼeh dahółʼíinii miildi ałkʼi náʼiyoochííłgóó yá yiʼósin.
10 Nidi dajijoołxáii tʼáá dahaniiʼjįʼ kʼééhodidoodlíiłgo áhodoołdįįł; doo naʼáhodilziidgóó éí jijoołxáhígíí tʼáá haniiʼjįʼ kʼééhodidoodlííł.
11 Éí bąą bikʼeh óʼooʼníiłii áádóó yee nihwiizʼáanii índa yee nihodiiʼaahii bikʼeh dahonółʼı̨́; éí díí jı̨́ bee nihichʼįʼ haasdzíʼígíí bikʼeh ádaahnééh.
Akʼeh hólʼı̨́ biniitʼaa akʼihojidlíii (Lev. 26:3-13; Deut. 28:1-14)
12 Kótʼée dooleeł, díí yee nihodiiʼaahii deísółtsʼą́ąʼgo bikʼeh dahonołʼı̨́įgo áádóó bidaʼíínóhsingo Bóhólníihii nihiDiyin God bibee ahaʼdeetʼáanii áádóó aa aʼááh nízinii danihizhéʼé yę́ę yichʼįʼ yee ádee hadoodzíiʼii yiʼdoolííł.
13 Áko ayóóʼánihóʼníi doo áádóó nihikʼijidlíigo kʼeeʼąą nihinoołtʼı̨́įł doo; nihadaʼáłchíní ałdóʼ yee nihikʼizhdoodliił, áádóó nihikéyah bikááʼgóó aneestʼąʼ dahodooleeł; éí tłʼoh naadą́ą́ʼ áádóó wáin índa áliv tsin naazkaadii bikʼah bee ídaʼdoozįįł. Béégashii índa dibé dah danéelkaadii kʼeeʼąą nídadilzhishgo yee nihikʼizhdoodliił; éí kéyah danihizhéʼé yę́ę yichʼįʼ yee ádee hadoodzíiʼii nihaididooʼáałgi kóhootʼée doo.
14 Dadineʼé tʼáá ałtso biláahgo nihikʼidahozhdoodliił; asdzání danohłíinii índa diné danohłíinii doo łaʼ nihadaʼáłchíní nihąąh yitʼı̨́į da doo áádóó nihilı̨́ı̨́ʼ ałʼąą ádaatʼéii doo łaʼ biyázhí bąąh yitʼı̨́į da doo.
15 Áádóó Bóhólníihii éí naałniih tʼáá ałtso nihitsʼą́ąjįʼ kwíidoolííł, índa Ííjip kéyahgi doo yáʼátʼéehii naasniiʼígíí nihił béédahózinígíí éí doo nihikʼijįʼ kwíidoolíił da, nidi danihijoołxáii tʼáá ałtso éí yikʼijįʼ kwíidoolííł.
16 Áádóó Bóhólníihii nihiDiyin God nilíinii diné nihichʼįʼ yiʼiiłníihii tʼáá ałtso ádadoołdįįł; doo łaʼ baa aʼáhí dadínóohsįįł da, áádóó tʼááká bidiyin dabidiʼníinii bichʼįʼ nidahohłáh yíilaʼ, jó, ákódaahtʼı̨́įgo łoh nihąąh niidooʼááł.
17 Tʼáá ádíyiʼídi kódííníniidgo, Díí ałʼąą dineʼé shilááh ánéelą́ąʼgo haash yitʼéego bikʼeh dideeshdleeł?
18 Tʼáadoo béédaałdzidí, nidi díí yéego béédaałniih: Bóhólníihii nihiDiyin God nilíinii éí Féro wolyéii índa Ííjip dineʼé yichʼįʼ áátʼįįdígíí;
19 éí ayóó átʼéego naʼíhoneestą́ąʼii danóołʼı̨́įʼii éí bee éédahózinii áádóó ayóó átʼéego áhooníiłii índa Bóhólníihii nihiDiyin God bílaʼ ayóó ábóodziilii áádóó bigaan bitsʼáhoníyéeʼii yee chʼínihiníʼeezhígíí béédaałniih. Tʼáá éigi átʼéego diné béédaołdzidígíí tʼáá ałtso ałdóʼ Bóhólníihii nihiDiyin God éí yichʼįʼ hodiyoołnááł.
20 Nááyówehgo, Bóhólníihii nihiDiyin God éí tsésʼnáłtsooí hatahjįʼ yiʼdoołnih; nidahaasdzíʼígíí tʼáá bí nihitsʼąą nidaʼádinilʼinígíí ałtso ábiʼdisdįįdjįʼ yiʼdoołnih.
21 Tʼáadoo béédaołdzidí, háálá Bóhólníihii nihiDiyin God nihitahgi hólǫ́; éí Diyin God ayóó ábóodziilii áádóó bikʼeʼíyéeʼii nilı̨́.
22 Áádóó Bóhólníihii nihiDiyin God éí ałʼąą daʼanaʼí tʼáá ahíłkééʼ bihidijáahgo ádaałchʼı̨́ı̨́dígo nihinááł hainiiłkaad doo; doo tʼáá łahjįʼ ałtso ádadoołdįįł da, áko naaldlooshii dahashkéii doo nihide dooląął da.
23 Nidi Bóhólníihii nihiDiyin God ałtso nihaa hodidooʼááł áádóó tídadołʼı̨́įgo ayóó átʼéego bił nídahadląąhgo doo bił chodahodooʼįįł da; ałtso ádasoołdįįdjįʼ ákótʼée doo.
24 Áádóó aláahgo binanitʼaʼí danilínígíí nihílákʼee yidiiʼaahgo yádiłhił biyaagi yízhí bee béédahoʼdílzinígíí dadoołchxǫǫł, índa nihinááł diné łaʼ naʼabaah doo yíneelʼą́ą́góó ałtso ádasoołdįįdjįʼ ákótʼée doo.
25 Bidaʼalyaii diyin dabidiʼníinii adahididoołkʼą́ą́ł; edaʼalyaii bąąh béésh łigaii, doodaiiʼ óola bee nidaashchʼąąʼígíí tʼáadoo bidádanoołníní, índa doo łaʼ ádá ą́ą́dadoohsįįł da, áko doo nihidaʼdoodloh da, háálá éí Bóhólníihii nihiDiyin God tʼóó bił baaʼihgo doo yił niʼíłdįįh da.
26 Áádóó doo yildinii doo nihighan góneʼ yah adoohłéeł da, áko éí doo bee hóyéeʼgo nihá haʼdoodzih da, nidi doo hashtʼéʼégóó dajiinołháa doo, áádóó doo hashtʼéʼégóó bikʼee dadinohniih doo, háálá hóyéeʼgo bá haʼoodzíiʼii átʼé.
