Deuteronomy 8:1-20
8 Bikʼeh óʼooʼníiłii tʼáá ałtso díí jı̨́ bee nihichʼįʼ haasdzíʼígíí ádaa daahsįįh, áko éí bee dahinohnáa doo áádóó kʼeeʼąą dínóohtʼı̨́įłgo kéyah biih doohnéełgo ádííʼ ádadoohłíiłgo Bóhólníihii éí danihizhéʼé yę́ę yichʼįʼ yee ádee hadoodzííʼ.
2 Áádóó díí béédaołniih: honoojíigi Bóhólníihii nihiDiyin God tánihidiʼéeshgo dízdiin nááhai, áko aʼohgo ádaʼdíínółzin ánihósin doo áádóó hanihisíidgo baa nitsídaohkeesii bił bééhózin doo; éí bibikʼeh óʼooʼníiłii daatsʼí bikʼeh dahonołʼı̨́į doo, dooda daatsʼí.
3 Áádóó aʼohgo ádaʼdíínółzin ánihósin áádóó tʼóó dichin béédaʼayoohnííh ánihósingo mána wolyéii doo nihił béédahózin da nítʼééʼ yę́ę, índa danihizhéʼé yę́ę ałdóʼ doo bił béédahózin da nítʼééʼ yę́ę nihiyiyíísą́ą́ʼ, áko díí nihił béédahózingo ánihidoolííł: diné doo bááh tʼéí yee hináa da doo, nidi saad tʼáá ałtso Diyin God yee hahadziihii yee hináa doo.
4 Nihiʼééʼ tʼáadoo nídadíítʼóódgóó, índa nihikeeʼ tʼáadoo daniichaadgóó dízdiin nááhai.
5 Díí ałdóʼ nihijéí biyiʼdi baa nitsídaahkees: diné biyeʼ tʼáá hashkée neinitinígi átʼéego Bóhólníihii nihiDiyin God tʼáá hashkée nanihinitin.
6 Éí bąą Bóhólníihii nihiDiyin God bibikʼeh óʼooʼníiłii bikʼeh dahonołʼı̨́, áko bikékʼeh hashchı̨́ı̨́góó hazhóʼó deínóhkááh, áádóó dadíínóhsin.
7 Jó, Bóhólníihii nihiDiyin God nihooʼishígíí éí kéyah yáʼáhootʼééhgóó, kéyahgi tó danílı̨́ı̨́góó áádóó deíldzis góyaa índa deílkʼid bitsı̨́įgi tó hadaazlı̨́ı̨́góó nihideezhʼeezh;
8 éí kéyahgi tłʼoh naadą́ą́ʼ áádóó tłʼoh naadą́ą́ʼ bideeʼí áádóó chʼil naʼatłʼoʼii áádóó fig tsin naazkaadii áádóó pámgrenit wolyéii áádóó áliv tsin bineestʼąʼ bikʼah índa tsésʼná bitłʼizh bee ádaʼazįįd;
9 éí kéyah biyiʼ chʼiyáán tʼáadoo bídin hóyéʼé daahsą́ą doo; haʼátʼíhída doo bídin danohłı̨́ı̨́góó kéyah bitsʼą́ą́dóó tsé bitsʼą́ą́dę́ę́ʼ béésh nitłʼizii índa dah daaskʼid biyiʼdę́ę́ʼ béésh łitsoii hadaahgéed doo.
10 Áko daʼohsą́ą doo áádóó hwiih danohłı̨́įgo Bóhólníihii nihiDiyin God nilíinii kéyah yáʼáhootʼéehii nihaidiníʼánígíí bee baa dahohniih doo.
Bóhólníihii baa dayoohnééh lágo hoʼdooʼniid
11 Bóhólníihii nihiDiyin God tʼááká baa dayoohnééh lágo bee ádaa ádahołyą́; bibikʼeh óʼooʼníiłii áádóó yee nihodiiʼaahii índa yee nihwiizʼáanii bikʼeh hólʼíinii díí jı̨́ bee nihichʼįʼ haasdziihígíí tʼáadoo bééʼádahodołyáhí.
12 Daʼooyą́ą́ʼdóó hwiih dasoolı̨́įʼgo nihighan yáʼátʼééh ádahoołaaígíí biiʼ kéédahohtʼı̨́įgo,
13 áádóó nihilı̨́ı̨́ʼ ałtah átʼéii áádóó nihidibé dah danéelkaadii kʼeeʼąą deílzhíishgo áádóó nihibéésh łigaii áádóó nihiʼóola nihá bilááh yileełgo índa ałtaasʼéí nihee dahólóonii kʼeeʼąą deílzhíishgo,
14 áko doo ayóó áníshtʼé dadínóohsįįł da áádóó Bóhólníihii nihiDiyin God nilíinii doo baa deidiyoohnah da; éí Ííjip kéyahdi naalteʼ danohłı̨́ı̨́ nítʼééʼ yę́ędóó chʼéénihiníʼeezh.
15 Bí éí honoojíígóó ayóó átʼéego áádóó tʼóó náhádzidgo hazʼą́ą́góó nihiníʼeezh; tłʼiish báhádzidii áádóó séígoʼ hólǫ́ǫ́ góneʼ índa tó bídin hóyééʼgóó nihooʼishgo tsé dildǫ́ʼii biyiʼdóó tó háálı̨́įgo nihá áyiilaa.
16 Bí éí honoojíidi mána wolyéii danihizhéʼé yę́ę doo bił béédahózin da nítʼééʼ yę́ę éí nihiyiyíísą́ą́ʼ, áko aʼohgo ádanohtʼé ánihidoolííł áádóó hanihisíidgo nihoolzhiizhdi éí nihá yáʼátʼééh íidoolííł.
17 Áko tʼáá nihiyiʼídi doo kódidoohniił da, Tʼáá shí shibee adziilii índa tʼáá shí shílaʼ bee shidziilii bee jitʼíinii shistʼįįd.
18 Nidi Bóhólníihii nihiDiyin God béédaołniih, háálá bí éí bidziilgo adootʼįįł nihaidiyiiʼaah, áko bibee ahaʼdeetʼáanii chánahgo íidoolííł; jó, éí danihizhéʼé yę́ę yichʼįʼ yee ádee hadoodzííʼ; díí jı̨́ı̨́góó ákótʼé.
19 Áádóó kótʼée doo: Bóhólníihii nihiDiyin God baa deisoonah ládą́ą́ʼ, áádóó diyin dabidiʼníinii bikʼehgo dah dahidoohkaigo áádóó bá nidaałʼaʼgo índa bichʼįʼ nidahohłáago, díí jı̨́ bee nihikʼijįʼ hadeesdzihgo, Tʼáá aaníí ádadoohdįįł.
20 Tʼáá nihinááł ałʼąą daʼanaʼí danilíinii Bóhólníihii áboołdįįłígi átʼéego nihí ałdóʼ ánihidoołdįįł, háálá Bóhólníihii nihiDiyin God nihichʼįʼ yáłtiʼgo bikʼeh dahonołʼı̨́į dooígíí tʼáadoo danoozı̨́įʼ da.
