Deuteronomy 9:1-29
9 Ízrel dineʼé danohłíinii, hazhóʼó daʼíísółtsʼą́ą́ʼ; díí jı̨́ Jórdan tooh haʼnaagóó anaʼí nihiláahdi ayóó ádaatʼéii áádóó ayóó ádabóodziilii dabikéyah ádííʼ ádadoohłííł biniyé bichʼįʼ haʼnaa ninohnééh, kin hadaasʼáago ayóó ádaatʼéii áádóó kʼasdą́ą́ʼ yá bídaneelʼą́ągo tsé ditą́ągo ahéédaastłʼinii tʼáá bił.
2 Dadineʼé ayóó ádaatʼéii áádóó ayóó ádaniłnéezii, éí Ánakim baʼáłchíní ádaatʼı̨́įgo béédahonohsin áádóó, Háishąʼ Éínak dineʼé yíneelʼą́ągo yidááhdóó yidoozįįł? haʼníigo baa dahosidootsʼą́ą́ʼ.
3 Éí bąą díí jı̨́ díí bikʼidaʼdoohtįįh: Bóhólníihii nihiDiyin God kǫʼ óʼoołdįįłígi átʼéego nihilą́ąjįʼ haʼnaa nihodooleełgo áhodoołdįįł. Nihidáahjįʼ yiʼiiłníihgo chʼídahidínóołkał, áádóó tʼáadoo hodinaʼí ałtso ádadoołdįįł; jó, Bóhólníihii ákónihidííniid.
4 Bóhólníihii nihiDiyin God nihinááł ałtso chʼíbiniiskaadóó bikʼijįʼ tʼááká tʼáá nihiyiʼídi kódadohní yíilaʼ, Tʼáá ákogi áníshtʼéhígíí bąą Bóhólníihii díí kéyah shííʼ dooleełgo shił yiih yíʼáázh. Ákondi díí dineʼé doo yáʼádaashónígi ádaaníłígíí bąą nihilą́ąjįʼ Bóhólníihii chʼíbininíłkaad.
5 Tʼáá ákogi ádanohtʼéhígíí áádóó nihijéí doo bindaʼadloʼígíí doo bee kéyah nihííʼ dadooleełii biih wohnéeh da, nidi díí dineʼé doo yáʼádaashónígi ádaaníłígíí bąą nihilą́ąjįʼ Bóhólníihii nihiDiyin God chʼíbiniiłkaad, áko bí éí saad yee ádee hadoodzíiʼii chánah íidoolíiłgo, danihizhéʼé yę́ę, éí Éíbraham, Áízak índa Jéíkab yichʼįʼ yee ádee hadoodzííʼ.
6 Éí bąą díidíígíí bikʼidaʼdoohtįįh: Bóhólníihii nihiDiyin God díí kéyah yáʼátʼéehii nihííʼ dadooleełgo nihaidiníʼánígíí éí tʼáá ákogi ádanohtʼéhígíí doo binahjįʼ nihaideeʼaah da, háálá diné doo nabídídzilii danohłı̨́.
Hórebgi Ízrel dineʼé éí Bóhólníihii yichʼįʼ nidaalteeh (Ex. 31:18-32:35)
7 Díí béédaołniih áádóó baa dayoohnééh lágo: Bóhólníihii nihiDiyin God bánídahołchįįhgo hashké nániidzįįhgo honoojíigi tádooná; tʼáá níléí Ííjip kéyahdę́ę́ʼ dah dooná bijı̨́ı̨́dóó kojįʼ oonáajįʼ nidaałteehgo Bóhólníihii bikʼijįʼ danohłı̨́ı̨́ nítʼééʼ.
8 Áádóó ałdóʼ Dził Hórebgi Bóhólníihii bádahoshoołchįįdgo nihichʼįʼ hashké niidzı̨́ı̨́ʼ, áko Bóhólníihii nihichʼįʼ báhóóchįįdgo ánihidoołdįįłgo ádaahłaa.
9 Tsé dilkǫǫhii hashtʼeelyaii bikáaʼgi bikʼeʼashchíinii nídideeshnił biniyé dziłghą́ą́ʼgóó hasíyáh yę́ędą́ą́ʼ, Bóhólníihii bibee ahaʼdeetʼáanii nihił áyiilaago, tsé dilkǫǫhii bikáaʼgi yee akʼeʼashchı̨́įgo áyiilaii nídiishníiłgo dziłghą́ąʼdi dízdiin jı̨́ índa dízdiin tłʼééʼ azlı̨́ı̨́ʼ; tʼáadoo bááh łaʼ yíyą́ąʼ da, doodaiiʼ tʼáadoo tó łaʼ yishdlą́ąʼ da.
10 Tsé naaki dilkǫǫhgo hashtʼeelyaaígíí bikáaʼgi Diyin God bílaʼ yee akʼeʼashchínígíí Bóhólníihii sheinínil; éí bikáaʼgi saad bee akʼeʼashchı̨́įgo dziłtsı̨́įdi áłah nohłı̨́ yę́ędą́ą́ʼ kǫʼ biiʼdóó Bóhólníihii nihichʼįʼ yee yááłtiʼígíí bikááʼ ályaa.
11 Kódzaago dízdiin jı̨́ áádóó dízdiin tłʼééʼ bíighah azlı̨́įʼgo tsé dilkǫǫhii naakigo hashtʼeelyaaígíí bikáaʼgi bikʼeʼashchı̨́įgo Bóhólníihii sheinínil; tʼáá éí bee ahaʼdeetʼáanii tsé dilkǫǫhii bikáaʼgi bee akʼeʼashchı̨́.
12 Áko Bóhólníihii áshidííniid, Nídiidááh, tsxı̨́įłgo hadáánídááh, háálá nidineʼé Ííjip kéyahdę́ę́ʼ chʼííníʼeezhígíí tʼáá bí ádadoolchxǫʼ; yikʼehgo deíkáah dooleeł biniyé bichʼįʼ bee hahásdzíiʼii tʼáadoo hodinaʼí yitsʼákaigo óola deidííłhı̨́įʼgo eʼelyaii ádayiilaa.
13 Nááʼáłdóʼ Bóhólníihii shichʼįʼ hanáánáádzíiʼgo áshidííniid, Díí dineʼé níshʼı̨́įgo, shoo, díí diné tʼáá íiyisí doo nibídaʼdidzilii danilı̨́.
14 Tʼáadoo shiníníłtłʼaaí; shíniʼdii áhodeeshdįįł, áádóó yádiłhił biyaagi yízhí bee hwéédahoʼdílzinígíí éí kʼééʼdeeshchxǫǫł, áádóó haláahgo nitsʼą́ą́dóó dineʼé ayóó ábóodziilii índa ayóó átʼéii ádeeshłííł.
15 Niséyizgo dziłghą́ą́ʼdę́ę́ʼ hadah nihéénísdzá; nítʼééʼ dził tʼahdii dookʼą́ą́ł, índa bee ahaʼdeetʼáanii tsé naakigo dilkǫǫhgo hashtʼeelyaii bikáaʼgi bikʼeʼashchínígíí shílákʼee sinilgo nááshjih.
16 Áko niséghal, nítʼééʼ shoo, Bóhólníihii nihiDiyin God bichʼįʼ ádił daʼsoołziih lá; óola doolyı̨́įʼii bee béégashii yáázh beʼelyaii ádaahłaago ákódaahdzaa lá. Bóhólníihii yee nihichʼįʼ haadzíiʼii tʼáadoo hodinaʼí bitsʼá noojééʼ lá.
17 Áko tsé naaki yishjih yę́ę nihídíłtsxisgo nihinááł ałtso diitaaʼ.
18 Áko tʼáá átséédą́ą́ʼ íisdzaa yę́ęgi átʼéego Bóhólníihii bichʼįʼ tséʼyaa shishjoolgo dízdiin jı̨́ áádóó dízdiin tłʼééʼ azlı̨́ı̨́ʼ; tʼáadoo bááh łaʼ yishání índa tʼáadoo tó łaʼ yishdlání, háálá nihibąąhági átʼéii tʼáá átʼé bee ádił daʼíínółzíihgo Bóhólníihii binááł tsʼídá doo yáʼáshónígi ádaahtʼínígíí bee Bóhólníihii bádahoshoołchįįdgo hashké niidzı̨́ı̨́ʼ.
19 Áko shí éí hashké niidzı̨́ʼígíí bééshísdzííd, háálá tʼáá íiyisí doo bił hóózhǫǫdgóó, Bóhólníihii nihichʼįʼ báhóóchįįdgo ánihiʼniiłdįįd nítʼééʼ, ákondi nááʼáłdóʼ shí Bóhólníihii shidiiztsʼą́ą́ʼ.
20 Áko Bóhólníihii éí Éran yichʼįʼ tʼáá íiyisí báhóóchįįdgo áhoʼniiłdįįd nítʼééʼ; tʼáá éí bijı̨́ Éran ałdóʼ bá sodeeszin.
21 Áádóó béégashii beʼelyaii ádaahłaago bee ádił daʼsoohdzíʼígíí dííłid áádóó chʼíníłkʼą́ągo łeezh dibahígi átʼéego íishłaa, índa dibahgo íishłaaígíí dziłdę́ę́ʼ tó chʼínílínígíí biih yíłkaad.
22 Áádóó ałdóʼ Táberah nahósʼaʼgi áádóó Másah nahósʼaʼgi índa Kíbrath-hatéíʼavah nahósʼaʼgi Bóhólníihii bádahoshoołchįįdgo hashké nídabinoołdzįįh nítʼééʼ.
23 Tʼáá ákótʼéego ałdóʼ Bóhólníihii kóníigo, Kéyah nihaa diníʼánígóó dohnéehgo nihííʼ ádaahłééh, nihiłníigo, Kéídesh-barníya hoolyéédóó adanihiisʼaʼ, áko nítʼééʼ Bóhólníihii nihiDiyin God bibikʼeh óʼooʼníiłii bichʼįʼ nídadoołteeʼ, áádóó tʼáadoo deisoohdląąd da, índa biinééʼ doo deínółtsʼą́ąʼ da nítʼééʼ.
24 Tʼáá nihéédahosésįįd yę́ędóó wóshdę́ę́ʼ Bóhólníihii bichʼįʼ nidaałteehgo bikʼijįʼ danohłı̨́įgo hodideeshzhiizh.
25 Kótʼéego tʼáá átséédą́ą́ʼ íisdzaa yę́ęgi átʼéego Bóhólníihii bichʼįʼ tséʼyaa shishjoolgo dízdiin jı̨́ índa dízdiin tłʼééʼ náʼiisíkan, háálá Bóhólníihii ánihiʼniiłdįįdgo haadzííʼ nítʼééʼ.
26 Éí bąą Bóhólníihii bichʼįʼ sodiszingo ádíshní, Dooládóʼ Bóhólníihii Diyin God nílíinii, nidineʼé índa nííʼ danilíinii doo adííłdįįł da; jó, tʼáá ni bee ayóó ánítʼéhígíí bee bikʼé nináʼíínídlá, áádóó nidziilii ayóó átʼéhígíí bee Ííjip kéyahdę́ę́ʼ chʼííníʼeezh.
27 Ná nidaalʼaʼí yę́ę Éíbraham áádóó Áízak índa Jéíkab béénílniih; díí dineʼé doo nibídaʼdidzilii áádóó doo yáʼádaashóonii índa ádił daʼílzíihii tʼáadoo bee baa nitsíníkeesí.
28 Áko kéyah biiʼdóó hanihííníʼeezhídóó doo kódadidooniił da; Bóhólníihii éí kéyah haidiníʼą́ągo hachʼįʼ yee ádee hadoodzíiʼii yiih hodooʼishígíí doo yíneelʼą́ą́góó biniinaa, áádóó hojoołáago biniinaa áhodoołdįįł biniyé honoojíijįʼ chʼíhoníʼeezh.
29 Jó nidi, nidineʼé ádaatʼé, áádóó nííʼ danilı̨́; éí nibee adziilii ayóó átʼéii bee índa nigaan bitsʼáhoníyéeʼii bee chʼííníʼeezh.
