Ecclesiastes 1:1-18
1 David yę́ę biyeʼ aláahgo naatʼáanii nilíinii Jerúsalemgi halneʼí nilı̨́įgo díí saad yee hahaasdzííʼ.
2 Tʼáadoo nánídlíníii tʼáadoo nídandlíní da, ní halneʼí, Tʼáadoo nánídlíníii tʼáadoo nídandlíní da; tʼáá ałtsoní tʼáadoo nídandlíní da.
3 Ooʼáłígíí biyaagi diné joolnishgo naanish tʼáá ałtso baa nijigháhígíí haʼátʼíí bee há bilááh nídoodleeł?
4 Tʼááłáʼí oochíłígíí ałtso eeldeeʼgo, áádóó náánáłaʼ hanááʼahidoolchííł, nidi nahasdzáán éí hoolʼáágóó hólǫ́.
5 Áádóó ałdóʼ haʼdooʼááł, áádóó iʼdooʼááł, índa haayáhígóó tsı̨́įłgo ańdoodáałgo áádę́ę́ʼ hanáádoodááł.
6 Shádiʼáahjigo níyol łeh, áádóó naa náyołgo náhookǫsjigo nááníyol łeh; tʼáá áłahjįʼ tʼáá ákǫ́ǫ́ hááhidiiyóół, índa tʼáá ákǫ́ǫ́ ahééh héyóół.
7 Tooh danílínígíí tʼáá ałtso tónteel biih daazlı̨́; azhą́ ákótʼée nidi, tónteel doo de adínílʼąąh da; tooh danílı̨́įjįʼ náádanídlı̨́įh łeh.
8 Tsʼídá tʼáá ałtsoní baa chʼééh adidááh; diné díí átʼéegi doo baa nahojólneʼ átʼée da; anááʼ bee nílʼı̨́į nidi, doo sih da, áádóó ajaaʼ bee wóltsʼą́ąʼ nidi, doo sih da.
9 Tʼáá íídą́ą́ʼ hólǫ́ǫ́ nítʼéʼígíí éí tʼáá hólǫ́ǫ doo; tʼáá íídą́ą́ʼ ádaadzaaígíí éí tʼáá ádaaníił doo, áko ooʼáłígíí biyaagi náánáłaʼ ániidíii ádin.
10 Łahgo hazʼą́ą́sh tʼáá bee haʼdoodzih kóháʼníigo, Shoo, díí ániidí? Éíyeeʼ tʼáá nihítséedi hoolzhiizh bilááhdę́ę́ʼ tʼáá shiidą́ąʼdii hólǫ́.
11 Tʼáá íídą́ą́ʼ ádahoodzaii doo béédahaniih da, índa ádahodooníłígíí dahazlı̨́ı̨́ʼdóó bikʼijįʼ nidi, doo béédahodoonih da.
Halneʼí átʼé niizı̨́įʼii
12 Halneʼí nishłı̨́įgo Jerúsalem kin haalʼáagi aláahgo naatʼáanii nishłı̨́įgo Ízrel dineʼé binanishtʼáá nítʼééʼ.
13 Yádiłhił biyaagi tʼáá ałtsoní ádahóótʼįįdígíí hódzą́ binahjįʼ shijéí bee háshtʼı̨́įgo ádaa dinishtʼą́. Diyin God éí diné biyeʼké ádił niʼíníísh yee naʼádídantaah doogo yeidiníʼą́.
14 Ooʼáłígíí biyaagi naanish tʼáá ałtso ádaadzaaígíí nééłʼı̨́įʼgo, jó, tʼáá ałtsoní tʼáadoo nánídlíní da áádóó níyol chʼééh bíjílyeed nahalin.
15 Naneeshtłʼiizhii doo kʼézdon óolneʼ átʼée da, áádóó bídin ídlíinii doo wóoltaʼ ánéelą́ąʼ da.
16 Tʼáá shí ádił náhweeshneʼgo ádíshní, Tʼáá shítséedi Jerúsalemgi nidantʼáá nítʼééʼ yę́ę bilááh átʼéego hódzą́ ayóó átʼéii shóisíłtʼeʼ; tʼáá aaníí, shijéí biyiʼ tsʼídá ayóó átʼéego hódzą́ áádóó ił ééhózin átʼé niizı̨́ı̨́ʼ.
17 Áko hódzą́ áádóó áhodiigis índa doo hóshkał shił bééhodoozįįł biniyé shijéí baa diníʼą́, áko díí ałdóʼ níyol chʼééh bíjílyeed nahalinígíí baa ákoniizı̨́ı̨́ʼ.
18 Háálá tʼáá íiyisí hojiyąąhgo yínííł ałdóʼ yiląąh áádóó ląʼígóó hoł ééhoozįįhgo yínííł nitsaii ałdóʼ kʼeeʼąą dilzhish.
