Ecclesiastes 10:1-20
10 Tséʼédǫ́ʼii daneeznánígíí éí akʼah łikání dahalchinígíí tʼóó baaʼih halchingo áyiiłʼįįh; tʼáá ákótʼéego doo hóshkał áłtsʼíísí nidi hódzą́ áádóó ił ídlı̨́ bilááh ábóodziil.
2 Diné hóyáanii bijéí yee tʼáá ákogi átʼéego áánííł, nidi diné doo áhályáanii bijéí yee doo ákǫ́ǫ́ ááníił da.
3 Tʼáá aaníí, diné doo áhályáanii ałdóʼ atiingóó yigáałgo yee akʼidiʼyiitįįhígíí ádįįh, áádóó tʼáá bidááh hakáhígíí tʼáá ałtso yichʼįʼ doo áháyą́ yee yitʼíní íʼdólzin.
4 Naatʼáanii nichʼįʼ báhóóchįįdgo doo dah didíínáał da, háálá ayóó átʼé bąąhági áhóótʼįįd nidi, doo íitsʼaʼígóó dzizdáhígíí bee kʼéédahodoodǫǫł.
5 Naatʼáanii niʼiisíiʼii bitsʼą́ą́dóó hooleełígíí nahalingo ooʼáłígíí biyaagi doo yáʼáshónígi áhooníiłgo yiiłtsą́.
6 Doo hóshkał yaa nidaakaígíí alą́ąjįʼ dah dabidiʼnildaah, nidi diné daʼatʼíinii éí akéédę́ę́ʼ dah dabidiʼnildaah.
7 Nidaalʼaʼí éí łı̨́ı̨́ʼ yikʼi dah naazdáago yiiłtsą́, áádóó naatʼáanii danilíinii naalʼaʼígi átʼéego tʼáá niʼ nidaakai.
8 Łeeh hojíígeedii tʼáá hóda biih nízhdootłish áádóó tsé ahénátłʼinii bighá jíłneʼígíí tłʼiishda hodoołhash.
9 Tsé hajiiníiłiida atínáhodoodlííł áádóó tsin nijiiłkaałiida há nahodítʼé.
10 Tsénił doo deeníígóó áádóó doo háájiikʼaashgóó yéego bichʼįʼ nidzildzilgo chojoołʼı̨́, nidi hódzą́ éí tʼáadoo leʼé yáʼádaatʼéehgo áyoolííł.
11 Tʼah doo tsin bee íʼdílzoołí bee tłʼiish hashtʼediltʼeehgóó ajííłhazhgo tʼáadoo biniyéhígóó tsin bee íʼdílzoołí bee ádizhdooniił.
12 Diné hóyáanii joobaʼgo yáłtiʼ, nidi diné doo áhályáanii bizaad yee ákʼijįʼ nídootsił.
13 Doo hódzą́ą́jí saad yee yáhidiłtééh áádóó beʼádíláahgo tsiʼniyáháłtééh.
14 Diné doo áhályáanii ałdóʼ saad tʼóó ahayóí áyoolííł. Áhootʼée dooleełígíí diné doo bił bééhózin da, áádóó bikééʼ áhootʼée dooleełígíí háísh bił hodoolnihgo yíneelʼą́?
15 Diné doo áhályáanii binaanish yąąh chʼééh dighááh, áko kin haalʼáágóó doogáłígíí doo hooʼı̨́į da.
16 Shoo, kéyahgi kéédahohtʼíinii, aláahgo nihinanitʼaʼí ashkii nilı̨́įgo áádóó naatʼáanii abínígo ídaʼasįįdgo nihichʼįʼ doo hojoobaʼ ájíníi da!
17 Kéyahgi kéédahohtʼíinii, aláahgo nihinanitʼaʼí éí diné baa yádahasinii biyeʼ nilı̨́įgo áádóó bidziil doo biniyé índa adlą́ doo yee tsiʼdoogáał da biniyé baa náhwiilzhíishgo naatʼáanii daʼayą́ągo éí bee nihikʼihojisdliʼ.
18 Hoł hóyéeʼgo kin bighą́ą́ʼdę́ę́ʼ iiłtsǫs, áádóó doo binjilnishgóó tó bighánílı̨́ yileeh.
19 Dloh hasin doo biniyé ádaʼazįįd áádóó wáin éí ił hóshǫ́ áádóó béeso éí tʼáá ałtsoní nayiiłná.
20 Aláahgo naatʼáanii tʼáadoo yínídziihí, tʼóó bee nitsíníkees nidi dooda. Nítéhí góneʼ nidi diné atʼíinii tʼáadoo yínídziihí, háálá tsídii wótʼáahdi nidaatʼaʼígíí niinééʼ yidiiztsʼą́ąʼgo éí haneʼ dah yididooʼááł, áko bitʼaʼ hólóonii naa hodoolnih.
