Ecclesiastes 12:1-14
12 Doo yáʼáshóonii tʼah doo beíłkaahdą́ą́ʼ nináháháahgo yítih dooleełígíí tʼah doo baa hoolzhííshdą́ą́ʼ, Doo bíneeshdlı̨́į da, tʼah doo diniihdą́ą́ʼ, tʼah ániid nanináhídą́ą́ʼ Ániilaii béénílniih;
2 jı̨́honaaʼéí áádóó adinídíín, áádóó ooljééʼ índa sǫʼ tʼah doo biʼoh chahałheeł haleehdą́ą́ʼ áádóó ahóółtą́ą́dóó bikʼijįʼ tʼah doo kʼos nááhádleehdą́ą́ʼ;
3 kin yaa ádahalyáanii bitah dahoditłid daazlı̨́įʼdi áádóó diné dabidziilii danilíinii yaa daazhahgo nidaakai daazlı̨́įʼdi áádóó bee akʼáhí tʼáá díkwíigo biniinaa doo bee daʼakʼáa da daazlı̨́įʼdi áádóó datsésǫʼdóó dadéezʼı̨́ʼígíí tʼóó bił chadahóółhéeldi;
4 kintah atiingóó dáádílkał dádaʼdeeskaaldi áádóó bee akʼáhí doo wózhǫ́ dadiitsʼaʼ da daazlı̨́įʼdi áádóó tsídii ádííniidgo łaʼ nízhdidooʼnah índa sin nizhónígo diitsʼaʼígíí éí doo hózhǫ́ diitsʼaʼ da silı̨́įʼdi Ániilaii béénílniih.
5 Áádóó ałdóʼ daniinahígíí yéédaaldzid doo, áádóó dayíkááhgóó yééʼ dahólǫ́ǫ doo, áádóó tsin sikaadii álman wolyéhígíí bílátah daʼiidoogah áádóó nahachagii tʼóó naaʼnaʼ doo, índa laanaa hwiindzinii nidínóołnah, háálá diné hoolʼáágóó bighan dooleełgóó ííyá índa yínííł danilı̨́įgo atínídadindleehii kintaa aztiingóó tádadikáah doo.
6 Béésh łigaii bee tłʼóół ályaii tʼah doo kʼídlaadą́ą́ʼ, éí doodaiiʼ óola łeetsʼaaʼ nímazí tʼah doo yiitsʼiłdą́ą́ʼ, éí doodaiiʼ tó bee naatʼáhí éí tó hahadleehgi tʼah doo yiitsʼiłdą́ą́ʼ, éí doodaiiʼ tó bee hahadleehí tʼah doo kʼéʼéltǫʼdą́ą́ʼ Ániilaii béénílniih.
7 Áko tʼáá átséédą́ą́ʼ átʼéhígi átʼéego nahasdzáán biyiʼjįʼ łeezh łibáhí nídoodleeł áádóó Diyin God éí níłchʼi iiʼ sizíinii ainíláii bichʼįʼ nídoodleeł.
8 Tʼáadoo nánídlíníii, tʼáadoo nídandlíní da, ní halneʼí; tʼáá ałtsoní tʼáadoo nídandlíní da.
Diné tʼáá ałtso bee bá hazʼáanii
9 Áádóó tʼah nááyówehígo halneʼí hóyánígíí bąą diné ił ééhózin tʼahdii yee yichʼįʼ yáłtiʼ; tʼáá aaníí, saad nawóltaʼ tsʼídá hazhóʼó baa nitsídzízkéézdóó haa lá yitʼéego dooleeł lá jinízingo nabikʼítsídzízkéezgo ląʼí ałkééʼ nizhnínil.
10 Saad daʼílı̨́įgo nidzinii yíká áátʼįįd áádóó saad tʼáá ákogi ádaatʼéii índa tʼáá aaníinii bee akʼeʼdoolchííł biniyé halneʼí nilíinii naa yikʼítséskééz.
11 Dahóyáanii dabizaad éí béésh bee adilzhishí nidahalin, áádóó saad nawóltaʼ áłah ályaaígíí éí ił adaalkaałí niłdzilgo eelkaalígíí nahalin; tʼááłáʼí dibé yaa áhályáanii bitsʼą́ą́dę́ę́ʼ ályaa.
12 Tʼah nááyówehgo, shiyeʼ, éí bee niʼnishnííh: ląʼí naaltsoos bikááʼ akʼidaʼdoolchíiłgo nidadooʼniłígíí doo bá nihonítʼiʼ da, áádóó łąʼígóó íhojiiłʼaahgo bąą nízhdínídááh.
13 Díí tʼáá ałtso dazdiiztsʼą́ʼígíí éí kótʼé: Diyin God díínísin, áádóó bibikʼeh óʼooʼníiłii bikʼeh honíłʼı̨́, háálá díí diné tʼáá ałtso bee bá hazʼą́.
14 Háálá Diyin God éí baa nidaʼaldeehii tʼáá ałtso, nidanilʼinii tʼáá ałtso tʼáá bił, yáʼádaatʼéehii, doodaiiʼ doo yáʼádaatʼéehii éí yee aa nídóotʼįįł.
