Ecclesiastes 2:1-26
2 Tʼáá shiyiʼídi ádíshní, Baa nił honeeninii bee nééhodeesįįł, áko tʼáá íiyisí baa honeenigo baa nił hózhǫ́ǫ doo. Jó, díí ałdóʼ tʼáadoo nánídlíní da.
2 Dloh hasin éí áhodiigis, áádóó honeeni éísh haʼátʼíí ííłʼı̨́? dishní.
3 Tʼahdii shijéí biyiʼdóó hódzą́ shoolóosgo, Haa lá yitʼéego shitsʼíís éí wáin bee bił honishǫ́ǫ dooleeł lá, nisingo shintsíkees nisíłkááʼ, áádóó, Haa lá yitʼéego doo hóshkał yideestsoł lá, niizı̨́ı̨́ʼ. Yádiłhił biyaagi diné baʼáłchíní nidaʼiisdįįd bijı̨́įjįʼ haʼátʼíí yáʼátʼééh shı̨́ı̨́ yaa nidaakai dooleeł lá éí shił bééhodoozįįł, niizı̨́ı̨́ʼ.
4 Naanish ayóó ádaatʼéii íishłaa; kin nidasínil; chʼil naʼatłʼoʼii ádá kʼidadílaʼ.
5 Dádaʼakʼehgo áádóó dahootsogo ádahooshłaa índa tsin bineestʼąʼ nídahoodleełii tʼáá ałʼąą ádaatʼéii ákwii ádá kʼidadílaʼ.
6 Tsin danilzéego tsin deílʼáhígíí bitahgóó beʼekʼid naazyı̨́įgo ádaashłaa.
7 Nidaalteʼ áádóó asdzání nidaalteʼ naháłniiʼ índa shikin góneʼ naalteʼ nidahaazhchı̨́. Tʼáá shítséedi Jerúsalemgi nidantʼáá nítʼééʼ yę́ę tʼáá ałtso biláahgo shá dah daʼnéelkaad, índa alı̨́ı̨́ʼ shá dah danéelkaad.
8 Béésh łigaii áádóó óola índa aláahgo naatʼáanii áádóó bił hadahwiisdzodę́ę́ʼ dabiyódí áłah íishłaa; diné dahataałii áádóó asdzání dahataałii nídiinil índa diné yaa bił dahózhóonii tʼáá ałtso shóiséłtʼeʼ.
9 Ákohgo ayóó áníshtʼé áádóó tʼáá shítséedi Jerúsalemgi nidantʼáá nítʼééʼ yę́ę tʼáá ałtso haláahgo asistʼįįd; shibee hódząʼ ałdóʼ tʼahdii shee hólǫ́.
10 Áko tʼáá haʼátʼíhída shinááʼ bił bidááháníinii nishóhooshtʼeeh nítʼééʼ; bee ił hózhóonii shijéí bichʼįʼ doo baa nishchįʼ da nítʼééʼ, háálá shinaanish tʼáá ałtso shijéí yaa bił nihoozhǫǫhígíí shinaanish bikʼé shichʼįʼ naalyáii átʼé.
11 Ákohgo tʼáá shí binshishnishii áádóó shinaanish tʼáá átʼé baa nisíyáhígíí nééłʼı̨́ı̨́ʼ, áko nítʼééʼ tʼáá átʼé tsʼídá tʼáadoo nánídlíní da, jóʼakon, áádóó níyol chʼééh bíjílyeed nahalin índa ooʼáłígíí biyaagi tʼáadoo bee bilááh náodleʼí da.
12 Áádóó łahgo átʼéego tsínáádíkéezgo bee hódzáanii áádóó áhodiigis índa doo hóshkał nabikʼítsísíłkééz, háálá diné éí aláahgo naatʼáanii bikéédę́ę́ʼ aláahgo naatʼáanii náádzísdlı̨́įʼii haʼátʼíí baa nizhdoogaał? Jó, tʼáá íídą́ą́ʼ łaʼ daadzaa.
13 Ákohgo adinídíín éí chahałheeł yiláahgo átʼéhígi átʼéego bee hódzáanii éí doo hóshkał yiláahgo átʼéhígíí shił bééhoozin.
14 Diné hóyáanii binááʼ yee ákonízin nidi, doo áhályáanii chahałheeł yiiʼ yigááł áádóó tʼáá aheełtʼéego bichʼįʼ áhoníiłgo baa ákoniizı̨́ı̨́ʼ.
15 Ákohgo tʼáá shiyiʼídi ádíshní, Doo áhályáanii bichʼįʼ áhodooníłígi átʼéego shí ałdóʼ shichʼįʼ ákóhodoonííł; ákoshąʼ haʼátʼíí biniyé shí tʼáá íiyisí honisą́ą́ nítʼééʼ? Áádóó tʼáá shiyiʼídi ádííniid, Díí ałdóʼ tʼáadoo nánídlíní da lá.
16 Háálá doo áhályáanii doo bééhodoonih daígi átʼéego diné hóyáanii ałdóʼ hoolʼáágóó doo bééhodoonih da; jó, yoołkááłgóó háadida tʼóó baa dahoyoosʼnahii ádaatʼée dooleeł. Dooládóʼ diné hóyáanii áádóó diné doo áhályáanii tʼáá aheełtʼéego ninée da lá!
17 Éí bąągo ooʼáłígíí biyaagi naanish baa nidaʼaldeehígíí doo shił yáʼáshǫ́ǫ́góó bąą iiná jooshłxáá nítʼééʼ, háálá éí tʼáá ałtso tʼáadoo nánídlíní da, áádóó níyol chʼééh bíjílyeed nahalin.
18 Tʼáá aaníí, ooʼáłígíí biyaagi shinaanish tʼáá átʼé binshishnishii bitsʼą́ą́dóó hazlı̨́įʼii jiisíłxááʼ, háálá shikééʼ áhásdįįdgo shóisíłtʼeʼ yę́ę shikéédę́ę́ʼ náánáádáałii bííʼ dooleeł.
19 Áko éí diné hóyą́ą dooleełgo, doodaiiʼ doo áhályą́ą da dooleełgo háísh bił bééhózin? Ákondi éí ooʼáłígíí biyaagi shibee hódząʼ bee shééhoʼdílzinii binahjįʼ shinaanish daazlı̨́įʼii tʼáá átʼé yinantʼáa doo. Díí ałdóʼ tʼáadoo nánídlíní da.
20 Éí bąągo ooʼáłígíí biyaagi naanish tʼáá átʼé baa nisíyáhígíí tʼáá íiyisí shijéí yąąh nahóółkaad.
21 Háálá hódzą́ bee áádóó ił ééhózin bee índa iichįįh bee diné naashnishgo shóyoostʼeʼii tʼáadoo yiniyé naashnishii yeididooʼááł. Díí ałdóʼ tʼáadoo nánídlíní da índa tʼáá íiyisí doo yáʼáshǫ́ǫ da.
22 Háálá ooʼáłígíí biyaagi diné łaʼ hanaanish silı̨́įʼii, áádóó tʼáá hazááká bíká ájíítʼįįdii haʼátʼíish bee haadoodił?
23 Háálá yínííł áádóó cha hasin bił hóyoołkááł; tʼáá aaníí, tłʼéeʼgo nidi, hániʼ doo hanályı̨́įh da; díí ałdóʼ tʼáadoo nánídlíní da.
24 Diné ayą́ áádóó adlą́ índa binaanish yaa bił hózhǫ́ǫgo yaa naagháhígíí biláahgo bá yáʼánáánátʼéeh dooleełii ádin; díí ałdóʼ Diyin God bitsʼą́ą́dóó hólǫ́ǫgo yiiłtsą́.
25 Éí tʼáá bídingo háísh bił honeełnigo ayą́ągo yíneelʼą́?
26 Háálá Diyin God éí tʼáá bí diné yaa bił hózhóonii éí hódzą́ áádóó ił ééhózin índa ił hózhǫ́ yeidiiʼaah. Nidi ádił niʼiilzíihii áłah ádaʼaleʼgo áádóó ałkʼi daʼdeeskʼidgo ídaʼalneʼgo naʼanishii yeidiiʼaah, áko bikʼé nijishnishígíí Diyin God yaa bił hózhóonii yeididooʼááł. Díí ałdóʼ tʼáadoo nánídlíní da, áádóó níyol chʼééh bíjílyeed nahalin.
