Ecclesiastes 5:1-20
5 Diyin God bikin biiʼ sohodizingóó ałnáánídáahgo nihidíltaałgóó bee ádaa áhólyą́. Doo ádahalyáanii náádayiiłniihii nááhizhdoołnihígíí biláahgo tʼáá áyídídóó sínízı̨́įgo íísíníłtsʼą́ą́ʼjí yáʼátʼééh, háálá doo yáʼáshǫ́ǫ́góó ádaaníłígíí doo bił béédahózin da.
2 Tʼáadoo tsíhodeeskézí yáníłtiʼí, áádóó Diyin God binááł tʼáadoo tsxı̨́ı̨́ł ádílʼı̨́įgo hahídziihí, háálá Diyin God éí yáʼąąshdi hólǫ́, índa ni éí nahasdzáán bikáaʼgi honílǫ́. Éí bąągo saad tʼáá díkwíí bee yáníłtiʼ leʼ.
3 Háálá tʼáadoo leʼé tʼóó ahayóí hoʼdiiłʼáii baa nitsídzíkeesgo naʼíjílyęęsh áhoołʼįįh, áádóó saad hwiiłhéego doo áhályáanii jílı̨́įgo hwééhoozįįh.
4 Diyin God bichʼįʼ ádee hahidídziihgo tʼáadoo átʼah índa nideeshłééł níníziní, háálá diné doo áhályáanii doo bił hóshǫ́ǫ da; bee ádee hadíínídzíiʼii bikʼehgo nidíílééł!
5 Ádee hadídzihgo doo nidííléłígíí biláahgo doo ádee hadíínídzííʼjí yáʼátʼééh.
6 Nizaad bee tʼáadoo ádił niʼiyílzíhí, áádóó Diyin God yá naalʼaʼí binááł, Tʼóóyeeʼ oodzííʼ átʼé, tʼáadoo diníní. Haʼátʼéegoshąʼ yáníłtiʼígíí biniinaa Diyin God nichʼįʼ báhodoochįįłgo binishínílnishii íidoołdįįł?
7 Háálá tʼóó ahayóí naʼiigeełgo índa saad tʼóó ahayóigo éí tʼáadoo nídandlíní da, nidi ni éí Diyin God díínísin.
Iiná éí tʼáadoo nánídlíní da
8 Łaʼ hahoodzo góneʼ badahojoobáʼíii bide áhólzinígíí, áádóó aa hwiinítʼı̨́, índa doo haada yitʼéii tʼáá naʼníleʼdii bitsʼą́ą́ʼ nahjįʼ kólyaaígíí yiniłtsą́ągo tʼáadoo bikʼee tʼóó nił ahayóí, háálá naatʼáanii danilíinii tʼah bitisgo naatʼáanii danilíinii hadabisííd, áádóó tʼáá nááná éí tʼah náábíláahgo naatʼáanii náádandlíinii hadabisííd.
9 Tʼah nááyówehgo aláahgo naatʼáanii dádaʼakʼeh binaʼanishgo áyósingo éí tʼáá ałtso bá yáʼátʼééh.
10 Béeso ayóóʼájóʼníinii éí béeso doo bee hwiish dooleeł da, áádóó naalyeʼé bilááh yileełii ayóóʼájóʼníinii doo bee hwiish dooleeł da; díí ałdóʼ tʼáadoo nánídlíní da.
11 Naalyeʼé kʼeeʼąą dilzhishgo, daʼayánígíí ałdóʼ kʼeeʼąą dilzhish. Haʼátʼéegoshąʼ bííʼ ílíinii yáʼátʼéehii bá bínéidoodił? Tʼáá hazhóʼó tʼóó yikééʼ ahighaał.
12 Diné naalnishii áłchʼı̨́ı̨́dígo ayą́ągo, doodaiiʼ ląʼí ayą́ągo łikango náʼiilwosh, nidi tʼáá ałtsoní bee hólóonii éí yąą doo hazhóʼó ałhosh da.
13 Ooʼáłígíí biyaagi tsʼídá tʼáá íiyisí doo yáʼáshónígi áhooníiłgo yiiłtsą́: éíyeeʼ jitʼíinii hashtʼeʼniidiiʼníiłii tʼáá éí tiʼnábiyoołníih doo.
14 Doo yáʼáshǫ́ǫ́góó áhooníłígíí biniinaa jitʼíinii hatsʼą́ą́ʼ ásdįįdgo hayeʼ hazlı̨́įʼgo tʼáadoo dah yooléłí da.
15 Tʼáá hamá hashchínígi átʼéego, tʼáá ákótʼéego hakééʼ áhásdįįdgo tʼáá łichíʼígo dah nízhdidoodááł; hanaanish bitsʼą́ą́dóó haahaazdéelii nidi, doo dashdidooléeł da.
16 Áádóó díí ałdóʼ tʼáá íiyisí baa yíní siʼánígíí átʼé: tʼáá ałtsojįʼ tʼáá jiníyáhígi átʼéego dah nízhdidoodááł áádóó níyol bá nijilnish nahalingo haʼátʼíí bee há bilááh nídoodleeł?
17 Nizhníłdįįd bijı̨́įjįʼ tʼáá chahałheełgóó ajiyą́, áádóó tʼáá íiyisí yínííł jílı̨́, índa atah honiigááh bikʼee ádił náhozhdilchiłgo há náháchįįh.
18 Shoo, díí yiiłtsą́: ooʼáłígíí biyaagi diné nizhníłdįįd bijı̨́įjįʼ Diyin God haidiníʼánígíí binjishnishii bitsʼą́ą́dóó yáʼátʼéehii bee hakʼihojidlí áádóó ajiyą́ índa ajidlą́. Díí yáʼátʼééh áádóó beełtʼé, háálá kóníłtsogo hóóʼ átʼé.
19 Diné tʼááłáʼí nítínígo yódí áádóó jitʼíinii bee ákidajidláa doogo ałdóʼ Diyin God haidiníʼą́, áádóó łahjįʼ hwííʼ nilíinii bikʼé ajiyą́ągo nijishnishii baa hoł nihoozhǫǫh doo. Díí lą́ą Diyin God einíláii átʼé ni.
20 Háálá hwíiníłką́ą́dę́ę́ʼ doo hózhǫ́ bééjílniih da dooleeł, háálá Diyin God hániʼ yiʼósingo hajéí yił hóshǫ́.
