Ecclesiastes 6:1-12
6 Ooʼáłígíí biyaagi diné tʼáá ałtso doo yáʼáshǫ́ǫ́góó bichʼįʼ áhooníiłgo yiiłtsą́:
2 diné jílíinii éí yódí áádóó jitʼíinii índa ił ídlı̨́ Diyin God haidiníʼą́, áko hwiiʼ sizíinii tʼáadoo yídin nilínígóó tʼáá ałtsoní hwee hólǫ́ǫgo áhoolaa, nidi bóhoneedlı̨́įgo azhdooyı̨́łígíí Diyin God tʼáadoo haidiníʼą́ą́góó doo hakʼéí nilíinii yidooyı̨́ı̨́ł. Díí tʼáadoo nánídlíní da, áádóó naałniih doo yáʼátʼéehii átʼé.
3 Diné éí neeznádiin áłchíní há neheezhchı̨́įgo áádóó tʼóó ahayóí honááhaigo azhą́ tʼóó ahayóí honááhai lá nidi, hwiiʼ sizíinii éí yáʼádaatʼéehii tʼáadoo yee hwiih silı̨́ı̨́ʼgóó áádóó tʼah nááyówehgo tʼáadoo yóóʼáhoʼdiilyaagóogo ádíshní, Tʼóó hajííʼééljí tʼah aláhígo há yáʼátʼééh nítʼééʼ.
4 Háálá tʼáadoo nánídlínígóó hoʼdizhchı̨́, áádóó chahałheeł góneʼ ahojileeh, índa házhiʼ tʼáadoo bééhoozįįh da.
5 Tʼah nááyówehgo jı̨́honaaʼéí tʼáadoo nidi jiiłtsą́ą da, áádóó tʼáadoo hoł bééhooziní da. Díí łaʼígíí yiláahgo hanályı̨́ı̨́h.
6 Azhą́ naakidi mííl nááhaigóó jiináa nidi, yáʼádaatʼéehii tʼáadoo bee ákʼidzisdlaʼgóogo haláahgo hanályı̨́ı̨́h. Daʼ doósh tʼáá ałtso tʼááłáhíjįʼ ahikáah da?
7 Nihokááʼ dineʼé adooyı̨́ı̨́ł biniyé tʼáá ałtso yindaalnish, nidi doo yee hwiih daaleeh da.
8 Haitʼéegoshąʼ diné hóyáanii éí diné doo áhályáanii yiláahgo átʼé? Diné bahojoobáʼíii éí diné yinááł bił bééhózinígíí yee hináago haitʼéegoshąʼ éí yee aláahgo átʼé?
9 Laanaa hwiindzinígíí biláahgo tʼáadoo leʼé dadziiłtseʼgo yáʼátʼééh. Díí ałdóʼ tʼáadoo nánídlíní da áádóó níyol chʼééh bíjílyeed nahalin.
10 Tʼáá íídą́ą́ʼ dahólóonii éí tʼáá íídą́ą́ʼ bízhiʼ ádaalyaa, áádóó diné ájítʼéii éí hwééhózin índa haláahgo ábóodziilii bił ałghazhditʼáah dooleełígíí doo bohónéedzą́ą da.
11 Saad tʼóó ahayóí tʼáadoo nánídlínígóó bee yájíłtiʼgo haash yitʼéego diné bá yáʼátʼééh?
12 Diné niʼníłdįįd bijı̨́įjįʼ chahaʼoh iildohígi átʼéego tʼáadoo nánídlínígóó hináanii bá yáʼátʼééh dooleełii háísh bił bééhózin? Háálá daaztsą́ą́dóó bikʼijįʼ ooʼáłígíí biyaagi, Kótʼée dooleeł, yididooniiłgo háí yíneelʼą́?
