Ephesians 1:1-23
1 Shí Paul, Diyin God íinízinii bikʼehgo Christ Jesus yá yilʼaadii nishłı̨́.
Diyin God bidiyı̨́ı̨́ʼ Éfesasgi* kéédahatʼíinii Christ Jesus bee badaʼódlíii bichʼįʼ naaltsoos áshłééh:
2 Diyin God nihiTaaʼ áádóó Bóhólníihii Jesus Christ bibee ajoobaʼ índa bibee achʼįʼ hózhǫ́ náhásdlı̨́įʼii yee nihikʼijidlíi doo.
Christ binahjįʼ diyin kʼehgo bee akʼihojidlíii
3 NihiBóhólníihii Jesus Christ biDiyin God tʼáá éí biTaaʼ baa haʼniih doo! Éí Christ biniitʼaa yáʼąąsh hazʼą́ądi diyin kʼehgo bee akʼihojidlíii tʼáá ałtso yee nihikʼijisdliʼ.
4 Áko binááł dadiniigin áádóó tʼáadoo bee nihikʼídahótʼahígóó dahiniiʼnáa doo biniyé, tʼah doo nahasdzáán niitʼaah bítséedi ayóóʼánihóʼníigo Christ yee nánihiizlááʼ.
5 Jesus Christ biniitʼaa tʼáá bí baʼáłchíní dadiidleełgo íinízinii bikʼehgo yaa bił hózhǫ́ǫgo tʼáá átséedi nánihiizlááʼ.
6 BiYeʼ ayóóʼáyóʼníinii biniitʼaa bibee ajoobaʼ ayóó átʼéii yee nihikʼijisdliʼgo nánihidiinilígíí bee baa dahwiiʼniih doo.
7 Éí lą́ą Diyin God bibee ajoobaʼ yee alááh neelʼáanii bikʼehgo Christ bidił bee náádanihiʼdiizniiʼ, áádóó ádił nidaʼayiilzíiʼii nihá yóóʼiidiiʼaahgo
8 tʼáá íiyisí nihikʼijisdliʼ. Hóyą́ągo áádóó yikékʼeh hooʼı̨́įgo,
9 tʼáá bí íinízinígíí bikʼehgo yaa bił hózhǫ́ǫgo yinahazʼáanii doo bééhózinii nihił bééhózingo áyiilaa.
10 Nihoolzhiizhgo yáʼąąshdi áádóó nahasdzáán bikáaʼgi dahólóonii tʼáá ałtso Christ yee ahiih nídooldahgo binahodzizʼą́.
11 Diyin God íinízingo binahatʼaʼ bikʼehgo tʼáá ałtsoní łaʼyoolííł. Binahatʼaʼ bikʼehgo tʼáá átséedi nánihidiinilgo Christ bee nihííʼ dadooleełii ałdóʼ nihaa deetʼą́.
12 Nihí, áłtsé Christ baa dadziisiidliʼígíí, Diyin God yee ayóó átʼéii baa dahwiiʼniih dooleełgo nihikʼi diilniiʼ.
13 Nihí ałdóʼ, saad tʼáá aaníinii, éí haneʼ yáʼátʼéehii bee yisdánihiʼdooʼnilígíí dasidootsʼą́ąʼgo dahwiisoohdląądgo Diyin God éí Níłchʼi Diyinii nihaidiníʼánígíí bee nihéédahózingo ádanihiʼdiilyaa.
14 Éí yee yikʼé naʼníláago bííʼ silı̨́įʼii doo bohodiitʼiʼgóó áyiilaajįʼ nihííʼ dooleełii tʼáádóo nídí nihííʼ dooleełgo bééhózin.
Paul bisodizin
15 Ákótʼé bąą, Bóhólníihii Jesus deinohdlánígíí índa Diyin God bidiyı̨́ı̨́ʼ tʼáá ałtso ayóóʼádeínóhʼnínígíí nihá baa hodisétsʼą́ąʼgo
16 tʼáadoo áhodiiszéhí nihaa ahééh nisingo shisodizin bee nihénáshniih.
17 NihiBóhólníihii Jesus Christ biDiyin God tʼáá éí aTaaʼ biʼoh hodidilyéehii, éí Níłchʼi Diyinii bibee hódzą́ índa ił ííshjání óʼoolíiłii nihaididooʼáałgo bee hwéédahodoohsįįłgo bíká sodiszin.
18 Áádóó Diyin God nihíká ádííniidgo bíká nihił chodahooʼínígíí, índa akʼihojidlí ayóó átʼéii hodiyı̨́ı̨́ʼ bííʼ dadooleełígíí nihił béédahodoozįįł biniyé nihijéí biiʼ nihił ííshją́ą́ ánihósin dooleełgo nihá sodiszin.
19 Dooládóʼ bibee adziilii ayóó átʼéii nihí daʼiiniidlánígíí nihiyiʼ naalnishgo nihił béédahózin doo biniyé sodiszin. Jó, éí bibee adziil yee ayóó ábóodziilii yikʼehgo áánííł.
20 Éí yee Christ daaztsą́ą́dę́ę́ʼ néidiisáago yáʼąąsh hazʼą́ądi binishʼnáájí dah yineesdá.*
21 Áadi nidantʼáii, bídahólníihii, adziil bee dahólóonii, índa hootʼááł tʼáá ałtso yídahółnííh, áádóó ayóó ádaatʼéii dabiʼdójíii tʼáá ałtso doo díí hoolzhishígíí biyiʼ tʼéiyá da, nidi kodóó náás hoolzhishgóó biyiʼ dabiʼdójíi dooleełígíí Christ bee bóhólnííh.
22 Áko tʼáá ałtsoní bikʼi jidéesʼeezgo áhoolaago* bee hóhólnííh, áádóó daʼoodlání tʼáá łaʼ bizhiʼee bá nahojiʼáago áhoolaa.
23 Daʼoodlání tʼáá łaʼ bizhiʼee hatsʼíís nilı̨́įgo bee hadaałtʼé dzizlı̨́ı̨́ʼ, áádóó tʼáá ałtsoní hólónígíí hwee hadaałtʼé daazlı̨́ı̨́ʼ.
Footnotes
^ Rome bibóhólníihgo bił hazʼánígíí biyaagi Éízha nahatʼá bá hazʼą́ągi Éfesas hoolyéé nítʼééʼ. Kʼad éí kéyah Térkii hoolyéii łahjįʼ Éízha hoolyéé nítʼééʼ. Acts 18:19-21; 19:1.
^ Éí aláahgo shił nílı̨́ áádóó aláahdi ánóodziil, jiníigo óolyé. Ps. 110:1.
^ Bikʼi jidéesʼeezgo áhoolaago, nínígíí éí, Há yikʼeh deesdlı̨́įʼgo, níigo ání. Ps. 8:6.
