Esther 1:1-22
1 Ákódzaago Ahazawííras bíyoołkááłdą́ą́ʼ (díí Ahazawííras nantʼáago éí Índiya kéyahdóó Iithiyópiya kéyahjįʼ tʼááłáhídi neeznádiindóó baʼaan naadiin tsostsʼidgo aláahgo bee ídahólníihgo bił nahazʼáanii bee bóhólnííh nítʼééʼ),
2 éí yoołkááłdą́ą́ʼ aláahgo naatʼáanii Ahazawííras bibikʼi dah asdáhí ayóó átʼéii yikááʼ dah sidáago, Shúshan kin haalʼáagi bił hazʼą́ą́ nítʼééʼ.
3 Nantʼáago tááʼ náhááh góneʼ hayaadóó aláahgo bídahólníihii áádóó hanaalʼaʼí danilíinii bá ídaʼjíísįįd; Pérzha dineʼé áádóó Míídiya dineʼé bisiláo yindanitʼaʼí áádóó aghá dahideezíinii índa bee ídahólníihii bił nahazʼáanii binaatʼáanii danilíinii tʼáá ałtso haa áłah silı̨́ı̨́ʼ.
4 Ayóo ajitʼı̨́įgo bee haa haʼniihii áádóó tsʼídá aláahgo bee hóhólníihii hólónígíí bá danílʼı̨́įgo tʼóó ahayóí yiską́; tʼáá éí neeznádiindóó baʼaan tseebídiin yiską́.
5 Áko díí bíighah niiníłką́ągo Shúshan kin haalʼáagi aláahgo naatʼáanii bighan binaagóó hootsogo hazʼánígi aláahgo naatʼáanii éí diné ayóó ádaatʼéii índa ayáhígo ádaatʼéii tʼáá ałtso tsostsʼid jı̨́ yá ídaʼasįįd.
6 Naakʼąʼ łigaii áádóó tátłʼid nahalingo dootłʼizhígíí índa yá nahalingo dootłʼizhígíí ahéédaníbaal índa áłtsʼóózígo yisdizígíí łigaii ditsʼidgo ályaii áádóó tsídídééh nahalingo łichíiʼgo bee tłʼóółtsʼósí ályaa; éí béésh łigaii nídaazbąsgo ádaalyaii bee dah dahidídloʼ, áádóó tsé nitłʼizii bídazdilidgo bee yadaʼiitłʼingo ádaalyaii, áádóó bikʼi dah antéhé óola índa béésh łigaii bee ádaalyaa índa niʼgóó sikaadii éí tsé dantłʼizii dadilkǫǫhígíí, daalchííʼ áádóó yá nahalingo dootłʼizhígíí áádóó daalgaii índa daalzhinii, áádóó diichiłí ílíinii bee ályaa.
7 Óola bee adlání bee daʼjoodlą́ą́ʼ (éí óola bee adlání tʼáá ałʼąą ádaatʼéé nítʼééʼ), índa aláahgo naatʼáanii bikʼehgo wáin bee ídaʼíízįįd.
8 Bee hazʼáanii bikʼehgo tʼéí daʼjidlą́ą́ nítʼééʼ; doo bóhodiʼnilchéehgo ázhdoodlı̨́įł da, háálá aláahgo naatʼáanii bee bóhólníihgo bił hazʼą́ągi diné tʼááłáʼí nítínígo deinízinígíí bikʼehgo ádaatʼı̨́į doogo yee haadzííʼ.
9 Asdzą́ą́ naatʼááh Váshtai éí asdzání danilíinii yá ídaʼíísįįd. Éí aláahgo naatʼáanii Ahazawííras bikin siʼą́ągi yaa naʼazhʼeezh.
10 Tsostsʼid jı̨́ aleeh góneʼ aláahgo naatʼáanii wáin bił honiiłdoigo bijéí bił nihoozhǫǫhgo díí yee haadzííʼ: Miihóman, Bíztha, Harbóna, Bígtha, Abágtha, Zííthar índa Kárkas éí aláahgo naatʼáanii Ahazawííras áhánígo tsostsʼid yiltʼéego bá nidaalʼaʼígíí
11 éí asdzą́ą́ naatʼááh nilíinii naatʼá chʼah bichʼahgo aláahgo naatʼáanii bidááhdóó bił nidazhdookah, áko bee yáʼájítʼéehii éí diné danilíinii áádóó aláahgo bídahólníihii bichʼįʼ ádééhozdoolzįįł, háálá asdzání baa dzólníinii jílı̨́.
12 Nidi asdzą́ą́ naatʼááh Váshtai éí aláahgo naatʼáanii bá nidaalʼaʼí yinahjįʼ yee haadzíiʼii bikʼehgo aláahgo naatʼáanii yichʼįʼ nidoogáłígíí doo yinízin da; éí bąą aláahgo naatʼáanii ayóo báhóóchįįd, áko báhóóchįįdígíí yee ádiniilchxiiʼ.
13 Ákohgo aláahgo naatʼáanii éí diné dahóyáanii dahwéelzhíísh bił béédahózinígíí yichʼįʼ haadzííʼ, (jó, aláahgo naatʼáanii éí bee hazʼáanii áádóó ánihodiitʼaah bił béédahózinii yił naʼakʼíyádaałtiʼ łeh,
14 áko diné hakééʼ góneʼ naazíinii éí Kárshiina, Shííthar, Ádmatha, Társhish, Míírez, Marsíína índa Miimúkan daolyé; éí Pérzha dineʼé áádóó Míídiya dineʼé yinanitʼaʼí danilíinii tsostsʼid yiltʼéego aláahgo naatʼáanii bił nídaʼahidziiltsééh áádóó aláahgo bee bóhólníihgo bił hazʼą́ągi bił aláahgo hódahólnííh nítʼééʼ),
15 áko áhodííniid, Asdzą́ą́ naatʼááh Váshtaishąʼ bee hazʼáanii bikʼehgo haa dadiilnííł? Jó, aláahgo naatʼáanii Ahazawííras bá nidaalʼaʼí binahjįʼ hachʼįʼ haadzíiʼii doo yikʼeh hóółʼįįd da.
16 Ákohgo Miimúkan éí aláahgo naatʼáanii áádóó aláahgo bídahólníihii binááł ázhdííniid, Asdzą́ą́ naatʼááh Váshtai éí doo aláahgo naatʼáanii tʼéiyá yichʼįʼ doo ákǫ́ǫ́ áátʼįįd da, nidi aláahgo bídahólníihii áádóó aláahgo naatʼáanii Ahazawííras tʼáá átʼé bił nahazʼą́ągi kéédahatʼíinii tʼáá ałtso ałdóʼ yichʼįʼ doo ákǫ́ǫ́ áátʼįįd da.
17 Háálá asdzą́ą́ naatʼááh kódzaaígíí éí aláahgo naatʼáanii Ahazawííras bidááhdóó nidahodoolóosgo yee haadzíiʼii tʼáadoo níyáa daígíí bee baa hodeezneʼgo bąą asdzání tʼáá ałtso bił béédahoozingo asdzání danilíinii badahastiin doo bił danilı̨́ı̨́góó íidoolííł.
18 Díí jı̨́ Pérsha kéyahgi índa Míídiya kéyahgi sáanii danilíinii éí asdzą́ą́ naatʼááh ádzaaígíí dayííniiʼgo éí aláahgo naatʼáanii biyaadóó naatʼáanii danilíinii tʼáá ałtso yichʼįʼ hadaasdzíiʼgo tʼóó yówehda saad hodooleełgo hahodidoodlałgo hashké hwiidínóodzįįł.
19 Áko aláahgo naatʼáanii bił yáʼátʼééh ládą́ą́ʼ, bíniʼdii bitsʼą́ą́dóó tʼah aláhígo bee hazʼáanii éí Pérzha dineʼé áádóó Míídiya dineʼé bibee hazʼáanii doo łahgo ánáolneʼ átʼéégóó bee akʼeʼashchı̨́įgo ádoolnííł, áko Váshtai wolyéii aláahgo naatʼáanii Ahazawííras bitsʼáhodiʼdooltʼeeł, nidi bíniʼ hatsáskʼehjįʼ tʼah haláhígo yáʼátʼéhígíí łaʼ anáádooltʼeeł.
20 Ákohgo aláahgo naatʼáanii bee hazʼáanii íidoolíłígíí éí aláahgo bee bóhólníihgo bił hazʼą́ą́góó, hótsaago bił hazʼą́ą nidi, tʼáá átʼé dadooʼnihgo asdzání danilíinii tʼáá ałtso badahastiin, tʼáá éí diné alááh ádaatʼéii índa aʼoh ádaatʼéii bił danilı̨́į doo.
21 Áko díigi áháʼníigo aláahgo naatʼáanii áádóó naatʼáanii danilíinii bił yáʼádaatʼééh, áádóó aláahgo naatʼáanii éí Miimúkan bizaad kʼeh ádzaa.
22 Áko aláahgo naatʼáanii bee bóhólníihgo bił nahazʼą́ą́góó tʼáá átʼé naaltsoos yiʼiisniiʼ; éí aláahgo bee óhólnííh bił nahazʼą́ą́góó tʼáá bí akʼedaʼałchíhígíí bikʼehgo índa tʼáá ałtso tʼáá bí bizaad yee yádaałtiʼii bikʼehgo yee akʼeʼashchı̨́, áko diné tʼááłáʼí nítínígo tʼáá bí dabighangóó yee bídahólníihgo tʼáá bí bizaadígíí bikʼehgo baʼáłchíní yił dahalneʼ doo.
