Esther 2:1-23
2 Díí kódahóótʼįįdóó bikʼijįʼ aláahgo naatʼáanii Ahazawííras báhóóchįįdígíí bił hashtʼehodíítʼeʼgo Váshtai áádóó áátʼįįdígíí índa bee hazʼáanii bee bihodiikaalgo ályaaígíí yénáálniiʼ.
2 Ákohgo aláahgo naatʼáanii bá nidaalʼaʼígíí ádabidííniid, Bíniʼ chʼikéí bizhą́ą́ nidaakaii naatʼáanii bá háʼdéestʼı̨́įʼ doo.
3 Áko bíniʼ aláahgo naatʼáanii bee bóhólníihgo bił nahazʼą́ągi bídahólníhígíí łaʼ yikʼi hidiilníihgo chʼikéí bizhą́ą́ nidaakaii Shúshan kin haalʼáagi asdzání danilíinii baa ádahayą́ądi áłah ádeidoolííł. Áadi aláahgo naatʼáanii bá naalʼaʼí Hégeiyai éí asdzání danilíinii yaa áhályáanii nilı̨́įgo chʼikéí áłah ályaii baa áhojilyą́ą doo, áádóó bíniʼdii tʼáadoo leʼé bee chin ádąąh deidooldahígíí baazhdidooʼááł.
4 Áko chʼikę́ę́h bizhą́ą́ naagháii éí aláahgo naatʼáanii yił hóshǫ́ǫ dooígíí éí Váshtai bitsáskʼehgi naatʼááh dooleeł. Díí aláahgo naatʼáanii bił hóshǫ́ǫgo yikʼeh ádzaa.
5 Íídą́ą́ʼ Jew dineʼé łaʼ Shúshan kin haalʼáagi bighan; éí Mórdiikai wolyé, Jéíyer biyeʼ nilı̨́ áádóó Shímiyai yę́ę hanálí nítʼééʼ índa naakidi náhánálí Kish éí Bénjamin dineʼé nilı̨́ı̨́ nítʼééʼ.
6 Éí Bábilan dineʼé aláahgo binanitʼaʼí Nébukadnézzar éí Jerúsalem kin haalʼáádóó hahonííłkaadgo Júdah dineʼé aláahgo binanitʼaʼí Jekonáíyah yił yisnááh áhoolaa nítʼééʼ.
7 Hadásah yineesą́ągo éí hazhéʼé yázhígo bitsiʼ Esther ałdóʼ wolyé, háálá bizhéʼé áádóó bimá neezná. Chʼikę́ę́h bizhą́ą́ naagháii tʼóó dinilgááhí yeeʼ áádóó nizhóní yeeʼ, áko bizhéʼé áádóó bimá neezná; éí bąą Mórdiikai honeesą́ągo tʼáá bí bitsiʼ jílı̨́įgo áhoolaa.
8 Ákódzaago aláahgo naatʼáanii bibikʼeh óʼooʼníiłii índa bibee hazʼáanii bee ádá nihodiitʼaahii áyiilaaígíí yaa dahodiiztsʼą́ąʼgo chʼikéí bizhą́ą́ nidaakaii tʼóó ahayóí Shúshan kin haalʼáagi, Hégeiyai aa áhályą́ nilíinii baʼałkʼee áłah ádaalyaago Esther ałdóʼ aláahgo naatʼáanii bighan góneʼ atah biʼdeeltʼeʼ índa asdzání yaa áhályáanii Hégeiyai haa áhályą́ą́ nítʼééʼ.
9 Áko chʼikę́ę́h bizhą́ą́ naagháii bił hóshǫ́ áádóó hatsʼą́ą́dóó achʼohaʼné bee hazlı̨́ı̨́ʼ, áádóó tʼáadoo leʼé bee chin ádąąh yildééh dooígíí áádóó bikiiní baazhdiníʼą́, áko aláahgo naatʼáanii bił hazʼánídę́ę́ʼ chʼikéí nidaalʼaʼí tsostsʼidgo, éí bee ájítʼée dooígíí áádóó chʼikéí bizhą́ą́ nidaakaii yee ádaatʼée dooígíí nídiiʼnil índa agháago yáʼáhootʼéehgo hazʼą́ągi bił nihoʼdeeʼnil.
10 Esther éí hadineʼé danilíinii áádóó hakʼéí danilíinii tʼah doo bee ádaa hojilneʼ da, háálá Mórdiikai éí doo ádééhozdoolzįįłgóó hachʼįʼ haadzííʼ.
11 Áko tʼáá ákwíí jı̨́ Mórdiikai aa ádahayą́ bá hazʼánígóó nídídáahgo Esther haa jitʼı̨́ índa haa jidoonííł nízingo ákǫ́ǫ́ nídídááh.
12 Áko chʼikéí bizhą́ą́ nidaakaii tʼááłáʼí nítínígo bitah hoolzhishgo aláahgo naatʼáanii Ahazawííras yił yah ahikááh. Asdzání baa ádahayą́ągo naakitsʼáadah bee nídahidizíídóó bikʼijįʼ tʼáá éí bikʼehgo ákódaalʼı̨́ı̨́ nítʼééʼ. (Ákótʼéego bidaʼdidéehgo yoołkáłígíí bíighah niʼiileeh: akʼah tsin bijeeh bee łikání halchinii mir wolyéii bee asdzání bidaʼdidéehgo hastą́ą́h nídíziʼ áádóó spáis wolyéii ałdóʼ bee asdzání bidaʼdidéehgo hastą́ą́h nínádíziʼ nítʼééʼ.)
13 Áko kótʼéego chʼikę́ę́h éí aláahgo naatʼáanii yił yah iigháahgo chʼikéí baa ádahayánídóó tʼáá yinízinígíí éí yooléełgo aláahgo naatʼáanii yił yah iighááh nítʼééʼ.
14 Eʼeʼáahgo dah diighááh áádóó biiłkáhí índa eʼasdzą́ą́ yílʼı̨́ baa ádahayą́ągo hazʼáníjí náánádááh; aláahgo naatʼáanii bá naalʼaʼí Sheiyáshgaz, éí eʼasdzą́ą́ daólʼíinii yaa áhályáanii nilíinii yaa yighááh; aláahgo naatʼáanii éí doo bił yah anáázhdoodáał da, tʼáá hazhóʼó aláahgo naatʼáanii bił hojíshǫ́ǫgo háká áhoʼdooʼniidgo tʼéiyá ákǫ́ǫ́ jidoogááł.
15 Áko Mórdiikai bizhéʼé yázhí Ábiheil wolyéii bitsiʼgo Esther hatsiʼ nilı̨́ nahalingo jineesą́ągo aláahgo naatʼáanii bił yah azhdoogááł baa hoolzhiizhgo doo haʼátʼíhígíida náájííkeed da, tʼáá hazhóʼó aláahgo naatʼáanii bá naalʼaʼí Hégeiyai éí asdzání yaa áhályáanii yee nahontįįhii bikʼehgo tʼéiyá. Áko tʼáá ałtso dabinááł Esther éí bee achʼohaʼnéenii hwee hazlı̨́ı̨́ʼ.
16 Áko Esther éí aláahgo naatʼáanii Ahazawííras bił hazʼą́ą́ góneʼ hoł daaskai; éí neeznáá nídízííd, tʼáá éí Tííbeth yiziłígíí binih nantʼáago tsostsʼid náhááh góneʼ áhóótʼįįd.
17 Áko aláahgo naatʼáanii éí asdzání tʼáá ałtso biláahgo Esther ayóóʼáyóʼní, índa chʼikéí bizhą́ą́ nidaakaii tʼáá ałtso biláahgo ajoobaʼii áádóó bee achʼohaʼníinii aláahgo naatʼáanii binááł hwee hazlı̨́ı̨́ʼ, ákohgo naatʼá chʼah hakʼiidííʼą́ índa Váshtai bitsáskʼehgi eʼasdzą́ą́ naatʼááh áhoolaa.
18 Áko aláahgo naatʼáanii éí biyaadóó naatʼáanii danilíinii tʼáá ałtso áádóó bá nidaalʼaʼígíí tʼáá ałtso yá ídaʼíísįįd. Tʼáá éí Esther bá ídaʼazįįd átʼé. Bił nahazʼą́ągi hááʼáyı̨́ı̨́h jı̨́ı̨́ góneʼ éí doo niʼdoonishgóó yee hoołʼaʼgo aláahgo naatʼáanii yitʼíinii bikʼehgo tʼáá jííkʼeh aa doolyéełii neizniiʼ.
Mórdiikai éí Ahazawííras beʼiinaʼ yisdáyííłtı̨́
19 Naakidi aleeh góneʼ chʼikéí bizhą́ą́ nidaakaii áłah ánáábiʼdiilyaago Mórdiikai éí aláahgo naatʼáanii bidáńʼdítı̨́hígi dzizdá.
20 Áko Esther éí hadineʼé áádóó hakʼéí danilíinii tʼah doo bee ádaa hojilneʼ da, háálá Esther éí Mórdiikai honeesánígíí bikʼehgo bikʼeh hojíłʼı̨́.
21 Áko éí yoołkááłdą́ą́ʼ aláahgo naatʼáanii bidáńʼdítı̨́hígi Mórdiikai dzizdáago aláahgo naatʼáanii bá naalʼaʼí nidiltʼéego Bígthan áádóó Tííresh éí chʼéʼétiingi nídídáhí nilı̨́įgo báhóóchįįdgo, tʼáá haʼátʼéegoda aláahgo naatʼáanii Ahazawííras yidiyoołhéłígíí hátʼı̨́.
22 Áko díí Mórdiikai bił bééhoozingo éí asdzą́ą́ naatʼááh Esther yił hoolneʼ, áko Esther éí Mórdiikai bízhiʼ binahjįʼ aláahgo naatʼáanii bił nááhojoolneʼ.
23 Áko naaskáaʼgo bééhoozingo diné tʼáá áłah tsin ííʼáii bąąh dahidiiʼnil. Áko díí aláahgo naatʼáanii binááł aláahgo nidanitʼaʼí baa dahaneʼ binaaltsoos biiʼ bee akʼeʼashchı̨́.
