Esther 3:1-15
3 Ákódahóótʼįįdóó bikʼijįʼ aláahgo naatʼáanii Ahazawííras éí Éígag* dineʼé Hamiidéítha biyeʼ Héíman náás yideestʼeʼgo índa náás joogáałgi yáʼátʼéehgo áhoolaa áádóó naatʼáanii danilíinii hoł naakai nítʼéʼígíí tʼáá ałtso biląąjįʼ jizı̨́įgo áhoolaa.
2 Áko aláahgo naatʼáanii bá naalʼaʼí tʼáá ałtso éí aláahgo naatʼáanii bidáńʼdítı̨́hígi nidaakaígíí hachʼįʼ yaa áńdaatʼįįhgo Héíman deidósin łeh, háálá aláahgo naatʼáanii hódéétʼiʼii yee haadzííʼ. Nidi Mórdiikai éí doo hachʼįʼ yaa ánátʼįįh da índa doo hodósin da.
3 Ákohgo aláahgo naatʼáanii bá naalʼaʼí danilíinii aláahgo naatʼáanii bidáńʼdítı̨́hígi nidaakai nítʼéʼígíí éí Mórdiikai ádeidííniid, Haʼátʼéegoshąʼ aláahgo naatʼáanii yee hasʼáanii hítííh?
4 Áko tʼáá ákwíí jı̨́ hachʼįʼ yaa yádaałtiʼ, ákondi doo jíistsʼą́ąʼ da, Mórdiikai yiniinaa átʼínígíí daatsʼí bá dínóodzįįł biniyé Héíman bee bił hóóneʼ, háálá Jew dineʼé nishłı̨́ jiníigo bee bił dahojoolneʼ.
5 Áko Héíman éí Mórdiikai doo hachʼįʼ yaa ánátʼįįhgóó, doodaiiʼ doo hodósingóó jiiłtsą́ągo tʼáá íiyisí bikʼee háhóóchįįd.
6 Nidi tʼáá bí tʼéiyá jidiyoołhéłígíí doo shił bíighah da doo, jiniizı̨́ı̨́ʼ. Jó, Mórdiikai bidineʼé danilíinii hoł bééhózingo ádahoolaa; éí bąą Héíman éí aláahgo naatʼáanii Ahazawííras bee bóhólníihgo bił nahazʼą́ą́góó tʼáá átʼé Mórdiikai bidineʼé kéédahatʼínígíí éí Jew dineʼé tʼáá ałtso ázhdoołdįįłgo bohozdeezʼą́.
7 Átsé nídízídígíí, éí Níísan yiziłígíí binih Ahazawííras aláahgo naatʼáanii nilı̨́įgo naakitsʼáadah náhááh góneʼ, Héíman binááł tʼáá ákwíí jı̨́ yáʼiiltʼeʼ Pur wolyéii yaa ninákah nítʼééʼ, índa tsʼídá tʼáá náhidizííd bikʼeh naakitsʼáadah nídízídígíí Éídar wolyéejįʼ tʼáá éí tʼéí yaa ninákah.
8 Ákohgo Héíman éí aláahgo naatʼáanii Ahazawííras áyidííniid, Diné danilíinii łaʼ ałtso tadaoskaigo aláahgo bee nóhólníihgo bił hazʼáanii tʼáá átʼé biyiʼgóó ałtso nihinééstʼeʼ. Ałʼąą dineʼé tʼáá ałtso bichʼįʼgo bibee nahazʼáanii tʼáá sahdii ádaatʼé, áko aláahgo naatʼáanii bibee hazʼáanii doo yikʼeh dahółʼı̨́į da; éí bąą tʼáá dahináago baa didootʼáłígíí aláahgo naatʼáanii doo bá yáʼátʼéeh da.
9 Aláahgo naatʼáanii bił yáʼíítʼééh ládą́ą́ʼ, bee hazʼáanii bee akʼeʼashchı̨́įgo ályaii bikʼehgo áhodiʼdooldįįł, áko diné nidootsiłgi yaa nidaʼdooʼishígíí bichʼįʼ neeznáadi mííl béésh łigaii tálent dah hidiidlohígíí nideeshłééł; éí aláahgo naatʼáanii bibéeso baa áháyáanii bitah dooʼnił.
10 Ákohgo aláahgo naatʼáanii biyoostsah bikʼeʼashchı̨́įgo akʼi nideiyilígíí ádeidiitʼą́ągo Éígag dineʼé Hamiidéítha biyeʼ Héíman éí Jew dineʼé biʼanaʼí jílı̨́įgo yoostsah haítʼą́.
11 Áko aláahgo naatʼáanii éí Héíman áyidííniid, Béésh łigaii neíʼnil áádóó diné danilíinii ałdóʼ neíʼnilgo nił yáʼátʼéehii baa nitsíníkeesii bikʼehgo diné bichʼįʼ ááníił doo.
12 Ákohgo átsé nídízííd binih tááʼtsʼáadahgóó yoołkáałgo aláahgo naatʼáanii yá akʼedaʼałchíhígíí bíká áhodooʼniid. Héíman yee haadzíʼígíí tʼáá ałtso bikʼehgo bee akʼeʼashchı̨́įgo éí aláahgo naatʼáanii bikééʼdóó bídahólníihii áádóó bee óhólnííh bił nahazʼą́ą́góó tʼáá átʼé yindanitʼáii áádóó bee óhólnííh bił nahazʼą́ą́góó tʼáá átʼé dineʼé tʼáá ałtso bee bídahólníihii éí dabichʼįʼ tʼáá bí bizaad yee akʼedaʼałchíhígíí áádóó diné tʼáá bí bizaad yee yádaałtiʼii bikʼehgo aláahgo naatʼáanii Ahazawííras bízhiʼ binahjįʼ bee akʼeʼashchı̨́įgo aláahgo naatʼáanii biyoostsah bee bikʼi niʼítʼą́.
13 Aláahgo naatʼáanii bee bóhólnííh bił nahazʼą́ą́góó naalʼaʼí danilíinii naaltsoos ádayiilaaígíí kóní, Jew dineʼé tʼáá ałtso nidahodiʼdootsiłgo ádahodiʼdooldįįł índa nabídoodįįł; ániid nidaakaii áádóó hadaastihii, asdzání áádóó áłchínída, tʼáá łaʼóo jı̨́ naakitsʼáadah nídízííd, éí Éídar yiziłígíí binih tááʼtsʼáadahgóó yoołkáałgo hwee dahólónígíí ałtso nídahidoodlah.
14 Bee hazʼáanii béédaʼalyaago bee hachʼįʼ hadaʼdoodzih biniyé bee óhólnííh bił nahazʼą́ą́góó diné danilíinii tʼáá ałtso hoł dahóóneʼ, áko éí jínígíí biniyé hashtʼeʼádazdólzin doo.
15 Aláahgo naatʼáanii yee hasʼáanii binahjįʼ naalʼaʼí danilíinii haneetehee dah diikaigo Shúshan kin haalʼáagi bee hazʼáanii hadiilyaaígíí hatahgóó ádaalyaa. Áko aláahgo naatʼáanii áádóó Héíman éí tʼóó adlą́ągo siké, nidi Shúshan kin haalʼáagi tʼáá íiyisí nisiʼíldeeʼ.
Footnotes
^ Éígag joolyéii éí Ízrel dineʼé bidaʼanaʼí yę́ę łaʼ Ámalek dineʼé jílı̨́. 1Sam. 15:7-9.
