Esther 4:1-17
4 Áko Mórdiikai éí ádahóótʼįįdígíí tʼáá átʼé baa ákozniizı̨́įʼgo haʼééʼ ákʼinijooldláadgo tłʼoh azis ééʼ biih jííyá áádóó łeeshchʼiih ádééjíishjaaʼ áádóó chahojiyoonihgo kʼadaʼajichéehgo kin haalʼá góneʼ ajííyá.
2 Áádóó aláahgo naatʼáanii bichʼéʼétiingi dáńʼdítı̨́híjįʼ nizhníyá; jó, tʼááłáʼí nidi aláahgo naatʼáanii bichʼéʼétiin dáńʼdítı̨́hígi tłʼoh azis ééʼ doo łaʼ yee yah iigháhí da nítʼééʼ.
3 Áko bee óhólnííh bił nahazʼą́ą́góó aláahgo naatʼáanii yee haadzíʼígíí bikʼehgo bee hazʼáanii baa dahaneʼgo biniinaa ayóó átʼéego Jew dineʼé bitahgóó diné yínííł daazlı̨́ı̨́ʼ; tʼáadoo daʼayání tʼóó ayóó íitsʼaʼgo daachago atínídadinidleeh, áko tʼóó ahayóí tłʼoh azis ééʼ yiih dahaaskai áádóó łeeshchʼiih ádéédayiizhjaaʼ.
4 Atʼééké áádóó diné nidaalʼaʼí éí Esther yił dahoolneʼ. Áko asdzą́ą́ naatʼááh nilíinii tsʼídá tʼáá íiyisí yínííł nilı̨́įgo biniinaa Mórdiikai ééʼ yiih doogáałii yichʼįʼ áyiilaa, éí tłʼoh azis ééʼ ádaa hizhdidooʼnił biniyé, nidi tʼáadoo néidiinil da.
5 Ákohgo Esther éí aláahgo naatʼáanii yá naalʼaʼí łaʼ bikʼi hodiiniiʼii éí Esther yá naalʼaʼí Héítak hágo bizhdííniid, áko haʼátʼíí biniyé áádóó haʼátʼíí biniinaa Mórdiikai hachʼįʼ áhóótʼįįdígíí hazhóʼó shił bééhodoozįįł, nízingo hachʼįʼ iʼííłʼaʼ.
6 Áko kin haalʼáagi aláahgo naatʼáanii bidáńʼdítı̨́hí bichʼéédą́ąʼgi atiinígóó Héítak éí Mórdiikai yichʼįʼ ííyá.
7 Áko Mórdiikai hachʼįʼ áhoodzaaígíí tʼáá átʼé áádóó Jew dineʼé ábidiʼdooldįįł biniyé Héíman niʼdooléełgo aláahgo naatʼáanii bibéeso bitah dooʼniłgo yee nihoníʼánígíí bee bił hojoolneʼ.
8 Áádóó ałdóʼ Shúshan kin haalʼáagi bee hazʼáanii hadiilyaaígíí bikʼehgo Jew dineʼé ábidiʼdooldįįłgo bee akʼeʼashchíinii haazhníłtsooz; éí Esther bichʼįʼ ázhdoolíiłgo áádóó bee bił hozhdoolnihgo náʼiizhdookąął áádóó hadineʼé baa náʼiizhdookąął ałdóʼ biniyé aláahgo naatʼáanii bichʼįʼ jidoogáałgo bee bichʼįʼ hazdoodzih.
9 Áko Héítak nádzáago Mórdiikai ádííniidígíí Esther yił hoolneʼ.
10 Nááʼáłdóʼ Esther éí Héítak bichʼįʼ bee hadziisdzíiʼgo Mórdiikai bił hozhdoolnihgo hazhóʼó bee áhozhdííniid,
11 Aláahgo naatʼáanii bá nidaalʼaʼí tʼáá ałtso áádóó aláahgo naatʼáanii bee bóhólníihgo bił nahazʼą́ą́góó kéédahatʼínígíí díí bił béédahózin: tʼáá háiida diné, doodaiiʼ asdzánída tʼáadoo hágo hodiʼniihí aláahgo naatʼáanii bił hazʼání góneʼ doo yah azhdoogáał da; bee hazʼáanii tʼááłáʼígo binahjįʼ diné bidiʼyoolyééł, tʼáá hazhóʼó aláahgo naatʼáanii biʼóola naatʼá gish hachʼįʼ dah yidiitsihgo tʼéiyá tʼáá jiináa doo. Áko aláahgo naatʼáanii tʼáadoo hágo shiłniihí tádiin jı̨́ azlı̨́ı̨́ʼ.
12 Áko Esther ázhdííniidígíí Mórdiikai yee yił dahoolneʼ.
13 Ákohgo Mórdiikai éí Esther yichʼįʼ anááʼííłʼaʼgo kóní, Jew dineʼé ábidiʼdooldįįłígíí tʼáá ałtso biláahgo aláahgo naatʼáanii bighangi tʼáá ná chʼíhóótʼiʼ dooígíí tʼáadoo baa nitsíníkeesí.
14 Jó, díí hoolzhishgi tʼóó dííníłhéelgo tʼáá aaníí náánáłahdę́ęʼgo Jew dineʼé bá yisdáhóótʼiʼ doo, nidi ni índa nizhéʼé bighandóó danilínígíí ábidiʼdooldįįł. Áko díidashąʼ biniinaa díí hoolzhishígíí binih aláahgo bee óhólníihgo bił hazʼáanii biih yíníyá?
15 Ákohgo Esther éí Mórdiikai yichʼįʼ anááʼííłʼaʼgo ání,
16 Nílááh, Shúshan kin haalʼáagi Jew dineʼé kéédahatʼínígíí áłah ánílééh, áko hodílzingo doo adą́ shá baa hoolzhiizhgo tłʼééʼ bíighah áádóó shá bíighah, tʼáadoo daʼohsání, tʼáadoo daʼohdlání tágí jı̨́ adooleeł. Áko nihí ádaahtʼínígi átʼéego shí áádóó chʼikéí shá nidaalʼaʼí ałdóʼ hodílzingo doo adą́ bił baa nideeshkah. Áko bee hazʼáanii doo bikʼehdii da, nidi aláahgo naatʼáanii bichʼįʼ deesháałgo éí biniinaa dadeestsaałgo dadeestsaał.
17 Ákohgo Mórdiikai dashdiiyáago Esther áhodííniidii tʼáá átʼé bikʼehgo íʼjiilaa.
