Esther 5:1-14
5 Ákódzaadóó hodílzingo doo adą́ tágí jı̨́ azlı̨́įʼgo Esther éí naatʼá ééʼ nizhóníii biih jííyáago aláahgo naatʼáanii bighan bichʼéédą́ąʼgi hazʼání góneʼ yah ajííyá, áko aláahgo naatʼáanii bibikʼi dah asdáhí bikááʼdóó nahatʼáii yikááʼ dah sidáago binaashiidę́ę́ʼ dziizįʼ.
2 Áko kóhóótʼįįd: éí hazʼání góneʼ asdzą́ą́ naatʼááh Esther dzizı̨́įgo aláahgo naatʼáanii hoołtsą́ągo bił jíílįįd, áko aláahgo naatʼáanii biʼóola naatʼá gish bílákʼee sitánígíí Esther yichʼįʼ yideeztsih. Ákohgo Esther éí aláahgo naatʼáanii bitʼáahjįʼ jideeyáago óola naatʼá gish bílátahdę́ę́ʼ bizhdeelchid.
3 Áko aláahgo naatʼáanii áhodííniid, Haʼátʼíishąʼ naatʼááh nílíinii, Esther? Haʼátʼíishąʼ yíníkeed? Aláahgo bee shóhólníihgo bił hazʼáanii ałnííʼdóo nidi naa didootʼááł.
4 Áko Esther ázhdííniid, Aláahgo naatʼáanii bił hóshǫ́ǫ́ ládą́ą́ʼ bíniʼ díí jı̨́ aláahgo naatʼáanii bá ídaʼíísįįdíjįʼ Héíman yił dooʼash.
5 Ákohgo aláahgo naatʼáanii ádííniid, Esther ánínígíí íidoolííł biniyé Héíman tsı̨́įłgo nídoohłóós. Ákohgo aláahgo naatʼáanii áádóó Héíman éí Esther ídaʼíísįįdjįʼ níʼáázh.
6 Áko ídaʼazįįdgi wáin yidlą́ągo aláahgo naatʼáanii éí Esther áyidííniid, Haʼátʼíishąʼ naa didootʼáałgo baa náʼiinikąąh? Áko haʼátʼíishąʼ yíníkeed? Aláahgo bee shóhólníihgo bił hazʼáanii ałnííʼdóó shííníkeed nidi ná bohodoolnííł.
7 Ákohgo Esther ádííniid, Baa náʼiinishkąąhii áádóó yíníshkeedii éí díí:
8 aláahgo naatʼáanii shichʼohaʼnéego shaa nitsíkeesgo baa náʼiinishkąąhgo yíníshkeedii éí aláahgo naatʼáanii shadiʼdooʼáałgi bił yáʼíítʼééh ládą́ą́ʼ, bíniʼ yiską́ągo aláahgo naatʼáanii bá ídaʼazįįd hodeeshłíiłjįʼ Héíman yił dooʼash, áko yiską́ągo tʼáá aláahgo naatʼáanii ádííniidígi ádeeshnííł.
Mórdiikai éí tsin bąąh dah bidiʼdooltʼeełii hashtʼeelyaa
9 Áko éí bijı̨́ Héíman bił hózhǫ́ǫgo índa bijéí bił nihoozhǫǫhgo dah diiyá. Nidi aláahgo naatʼáanii bichʼéʼétiingóó dáńʼdítı̨́hígi Mórdiikai doo tʼáá kʼad yiizįʼgóó índa doo tʼáá kʼad hideesnááʼgóó éí Héíman yiyiiłtsą́ągo tʼáá íiyisí Mórdiikai yichʼįʼ báhóóchįįd.
10 Nidi Héíman éí tʼáá bí tʼóó déesyéelgo hooghangóó anáádzáago áadi bikʼisóó danilíinii índa beʼasdzą́ą́ Zííresh bíká iʼjííłʼaʼ.
11 Áko Héíman ayóó átʼé jitʼíinii bee ádaa hojiʼniihii áádóó hayeʼké danilíinii ánéelą́ąʼgi bee bił hojoolneʼ; bee ayahoniidlįįh tʼáá átʼé aláahgo naatʼáanii bee bił jílíinii áádóó naatʼáanii danilíinii índa aláahgo naatʼáanii bá naalʼaʼí danilíinii biláahgo yáʼátʼéehgo náás hodeestʼeʼígíí bee bił hojoolneʼ.
12 Nááʼáłdóʼ Héíman hanáádzoodzíiʼgo ájíní, Asdzą́ą́ naatʼááh nilíinii Esther éí ídaʼazįįd hashtʼeyiilaaígíí aláahgo naatʼáanii doo łaʼ bił yah azhdoogááłgóó yee hoołʼaʼ, nidi tʼáá shí tʼéiyá, áko yiską́ągo aláahgo naatʼáanii bił hachʼįʼ yah anáádeeshtʼash.
13 Ákondi éí tʼáá átʼé doo bee shił hózhǫ́ǫ leʼ átʼée da, háálá Mórdiikai Jew dineʼé jílı̨́įgo aláahgo naatʼáanii bichʼéédą́ą́ʼgóó dáńʼdítı̨́hígi dah dzizdáago náhoostsééh.
14 Ákohgo hweʼasdzą́ą́ Zííresh áádóó hakʼis danilíinii tʼáá ałtso ádahodííniid, Hániʼ tsostsʼidiindóó baʼaan ashdlaʼ ké silá áníłnéezgo tsin łaʼ hashtʼedoolnííł, áko abínígo aláahgo naatʼáanii ábididííniiłgo éí tsin hashtʼeelyaaígíí bąąh Mórdiikai dah bidiʼdoodloh, áko bąą nił hózhǫ́ǫgo ídaʼazįįdgóó aláahgo naatʼáanii bił dííʼash. Díí Héíman tʼáá íiyisí bił yáʼíítʼééh áádóó tsin bąąh dahodiʼyiidleehígíí ádoolníiłgo yee hoołʼaʼ.
