Esther 6:1-14
6 Áko éí bitłʼééʼ aláahgo naatʼáanii bił bitsʼáníkı̨́įgo aláahgo nidanitʼaʼí baa dahaneʼ binaaltsoos yíídóoltahgo yee haadzííʼ áádóó naaltsoosígíí aláahgo naatʼáanii binááł dajííłtaʼ.
2 Áko Bígthan áádóó Tííresh, díí nidiltʼéhígíí aláahgo naatʼáanii yá naalʼaʼí chʼéʼétiingi nídídáhí nilı̨́įgo aláahgo naatʼáanii Ahazawííras yidiyoołhééł hátʼı̨́ nítʼééʼ yę́ę Mórdiikai haa nahasneʼgo bee akʼeʼashchı̨́įgo bééhoozin.
3 Áko aláahgo naatʼáanii ádííniid, Haʼátʼíí ił ílı̨́ı̨́ shı̨́ı̨́, doodaiiʼ haʼátʼíí ádił ídlı̨́ı̨́ shı̨́ı̨́ Mórdiikai bá baa naʼasdeeʼ? Ákohgo aláahgo naatʼáanii bá nidaalʼaʼí ádabidííniid, tʼáadoo há baa naʼasdeeʼí da.
4 Áko aláahgo naatʼáanii ánáádooʼniid, Háishąʼ níláhjí hazʼání góneʼ naaghá? Íídą́ą́ʼ Héíman éí Mórdiikai bá tsin hashtʼejiilaago bąąh dahididoodloh, jiníigo aláahgo naatʼáanii bichʼįʼ bee hazdoodzih biniyé aláahgo naatʼáanii bighandóó tłʼóóʼjí hazʼání góneʼ yah ajííyá.
5 Ákohgo aláahgo naatʼáanii bá nidaalʼaʼí ádahodííniid, Héíman éí níláhjí hazʼání góneʼ sizı̨́. Áko aláahgo naatʼáanii ádííniid, Bíniʼ yah iighááh.
6 Ákohgo Héíman yah ajííyáago aláahgo naatʼáanii áhodííniid, Aláahgo naatʼáanii diné yaa bił nihoozhǫǫhgo bił nilíiniishąʼ, haʼátʼíí yá íidoolííł? Áko Héíman tʼáá biyiʼídi nitsíkeesgo íinízin, Háishąʼ aláahgo naatʼáanii shiláahgo yaa bił nihoozhǫǫhgo bił nilı̨́į doo?
7 Áko Héíman éí aláahgo naatʼáanii áyidííniid, Aláahgo naatʼáanii diné yaa bił nihoozhǫǫhgo bił nilíinii,
8 éí hániʼdii naatʼá ééʼ nizhóníii aláahgo naatʼáanii yiih nádááh nítʼééʼ yę́ę dazhdoojih áádóó łı̨́ı̨́ʼ nabiyéé nítʼééʼ yę́ę dazhdoolóós índa binaatʼá chʼah bá nídazhdooʼááł,
9 áádóó naatʼá ééʼ nizhóníii índa łı̨́ı̨́ʼ éí aláahgo naatʼáanii bikééʼdóó naatʼáanii aláahgo ájítʼéhígíí bílákʼee didootʼááł, áko aláahgo naatʼáanii diné yaa bił nihoozhǫǫhgo bił nilíinii éí ééʼ bee hadazhdidoolííł índa kintah haʼdiitiingóó łı̨́ı̨́ʼ bił hadidoodlóosgo binááł baa haneʼgo ádidooniił, Aláahgo naatʼáanii diné yaa bił nihoozhǫǫhgo bił nilíinii ákótʼéego áhodoolííł.
10 Ákohgo aláahgo naatʼáanii éí Héíman áyidííniid, Nílááh tsı̨́įłgo, naatʼá ééʼ nizhóníii łaʼ nídiinííł áádóó łı̨́ı̨́ʼ ałdóʼ nídiilóosgo tʼáá ádínínígi átʼéego ákónínééh áádóó Mórdiikai éí Jew dineʼé nilı̨́įgo aláahgo naatʼáanii bichʼéʼétiingi dáńʼdítı̨́hígi dah sidáhígíí ákónílééh. Bee yáníłtiʼígíí doo łaʼ tʼáadoo biʼohí ánílééh.
11 Ákohgo Héíman éí naatʼá ééʼ nizhóníii łaʼ néidiinil áádóó łı̨́ı̨́ʼ ałdóʼ néidiilóozgo Mórdiikai ééh jííłtı̨́ áádóó łı̨́ı̨́ʼ bikááʼ dah bizneesdáago kintah haʼdiitiingóó łı̨́ı̨́ʼ bił jinílóozgo ájíní, Aláahgo naatʼáanii diné yaa bił nihoozhǫǫhgo bił nilíinii ákótʼéego áhodoolííł.
12 Ákohgo Mórdiikai éí aláahgo naatʼáanii bichʼéʼétiin dáńʼdítı̨́hígóó nídzídzá. Nidi Héíman hatsiiʼ bikʼéʼéstiʼgo yínííł jílı̨́įgo tsxı̨́įłgo haghangóó nídzídzá.
13 Áko Héíman hachʼįʼ áhoodzaaígíí tʼáá átʼé hweʼasdzą́ą́ áádóó hakʼis danilíinii bee bił dahojoolneʼ. Ákohgo hahastóí dahóyáanii áádóó hweʼasdzą́ą́ Zííresh yił ádahodííniid, Mórdiikai tʼáá íídą́ą́ʼ nikʼeh didleehgo hodideeshzhiizhígíí éí Jew dineʼé nilı̨́įgo tsʼídá doo bikʼeh didíídleeł da, nidi tʼáádóo nídí nikʼeh hodidoodleeł.
14 Áko tʼahdii baa yádajiłtiʼgo aláahgo naatʼáanii yá nidaalʼaʼí nidahaaskaigo Esther ídaʼíísįįdjįʼ haneetehee Héíman yił daaskai.
