Esther 7:1-10
7 Áko aláahgo naatʼáanii áádóó Héíman éí asdzą́ą́ naatʼááh Esther ídaʼíísįįdjįʼ yaa níʼáázh.
2 Áko naaki yiłkaah góneʼ ídaʼazįįdgi wáin yidlą́ągo aláahgo naatʼáanii éí Esther ánéidooʼniid, Asdzą́ą́ naatʼááh Esther haʼátʼíísh naa didootʼáałgo baa náʼiinikąąh? Áko haʼátʼíísh yíníkeed? Aláahgo bee shóhólníihgo bił hazʼáanii ałnííʼdóó shííníkeedgo ná bohodoolnííł.
3 Ákohgo asdzą́ą́ naatʼááh Esther ánááhodooʼniid, Aláahgo naatʼáanii nílíinii, bee achʼohaʼnéenii bee shaa nitsíníkees ládą́ą́ʼ áádóó aláahgo naatʼáanii bił yáʼíítʼééh ládą́ą́ʼ, bíniʼ sheʼiinaʼ baa náʼiinishkąąh, shidineʼé beʼiinaʼ bá ííníshkeed.
4 Jó, shí índa shidineʼé nanihidiʼdootsiłgo ánihidiʼdooldįįł, áádóó nanihídoodįįł biniyé nidanihiʼdiizniiʼ. Diné danilíinii áádóó asdzání danilíinii naalteʼ biniyé nanihiʼdiizniiʼgo shí tʼóó hashtʼedinishtʼée doo nítʼééʼ, háálá nihí atínihiʼdiilyaaígíí éí aláahgo naatʼáanii doo bídaʼiitı̨́įh da.
5 Ákohgo aláahgo naatʼáanii Ahazawííras éí asdzą́ą́ naatʼááh Esther áyidííniid, Háísh átʼı̨́ áádóó diné ákódooníiłgo tsídeezkézígíí háadishąʼ naaghá?
6 Áko Esther ájíní, Díí Héíman doo yáʼáshóonii nilı̨́įgo nihiʼanaʼí nilı̨́. Ákohgo aláahgo naatʼáanii índa asdzą́ą́ naatʼááh nilíinii binááł Héíman ayóó átʼéego násdzííd.
7 Áko aláahgo naatʼáanii éí báhóóchįįdgo wáin dajidlánídóó náhidiitahgo bighan binaagi hootso hazʼą́ą́ góneʼ ííyá, nidi Héíman éí Esther bichʼįʼ hweʼiinaʼ baa náʼiizhdookąął biniyé jiizįʼ, háálá aláahgo naatʼáanii binahjįʼ doo yáʼátʼéehii bá ninázhnítłizhgo baa ákozniizı̨́ı̨́ʼ.
8 Áádóó aláahgo naatʼáanii éí bighan binaagi hootso hazʼą́ą́dę́ę́ʼ dah nídiidzáago wáin yoodlą́ʼígi nádzá, áko Héíman éí Esther tsáskʼeh yikááʼ sitíníjįʼ naaʼajíítłizhgo aláahgo naatʼáanii ádííniid, Daʼ tʼáá shí shikin góneʼésh aláahgo naatʼáanii beʼasdzą́ą́ bił ninídeeł? Aláahgo naatʼáanii tʼahdii yáłtiʼgo Héíman biniiʼjįʼ yikʼídaʼastiʼ.
9 Ákohgo naalʼaʼí łaʼ Harbóna éí aláahgo naatʼáanii binááł ájíní, Shoo, Héíman bikingi tsin bąąh dah dahodiʼyiidleehígíí tsostsʼidiindóó baʼaan ashdlaʼ ké silá áníłnéezgo áyiilaago nihidiiʼá. Éí Mórdiikai yá áyiilaa; jó, éí yáʼátʼéehgo aláahgo naatʼáanii yá haadzííʼ nítʼééʼ. Ákohgo aláahgo naatʼáanii ádííniidgo ání, Éí bąąh dahodoohłeeh.
10 Áko tsin bąąhjįʼ dah dahodiʼyiidleehígíí Mórdiikai bá hashtʼejiilaaígíí bąąhjįʼ Héíman dahodiidloʼ. Ákohgo aláahgo naatʼáanii báhóóchįįdii bá náhoojǫǫd.
