Esther 8:1-17
8 Éí bijı̨́ aláahgo naatʼáanii Ahazawííras éí Jew dineʼé yiʼanaʼí yę́ę Héíman bikin éí asdzą́ą́ naatʼááh Esther yeidiníʼą́. Áko Mórdiikai éí aláahgo naatʼáanii bidááhdóó nizhníyá, háálá, Esther shikʼéí jílı̨́, hałníigo haa nahasneʼ.
2 Áko aláahgo naatʼáanii éí biyoostsah bikʼeʼashchı̨́įgo akʼi nideinilígíí Héíman yaa néidiiʼánígíí Mórdiikai yeiníʼą́. Áko Esther éí Mórdiikai joolyéii Héíman bikin áádóó bííʼ danilíinii baa áhojilyą́ągo áhoolaa.
3 Ákohgo Esther éí aláahgo naatʼáanii bichʼįʼ yánáájíłtiʼgo bikétsı̨́įjįʼ nitsizhdinígoʼ áádóó jichago níjookąąhgo ájíní, Éígag dineʼé Héíman binahagiz yee Jew dineʼé bíniiká yihodeezʼáanii nahjįʼ kónílééh.
4 Áko aláahgo naatʼáanii éí óola naatʼá gish yee Esther yichʼįʼ yideeztsih. Áko Esther nízhdiiʼnaʼgo aláahgo naatʼáanii bidááhdóó jiizįʼ.
5 Áko ájíní, Aláahgo naatʼáanii bił hóshǫ́ǫ́ ládą́ą́ʼ áádóó aláahgo naatʼáanii bee achʼohaʼnéenii yee shaa nitsíkees ládą́ą́ʼ áádóó aláahgo naatʼáanii binááł yáʼátʼéehii átʼéego índa binááł bił honishǫ́ǫgo bíniʼ Éígag dineʼé Hamiidéítha biyeʼ Héíman éí aláahgo naatʼáanii bił nahazʼą́ą́góó tʼáá átʼé Jew dineʼé danilíinii ádooldįįł nízingo yichʼįʼ akʼedaʼashchı̨́ı̨́ nítʼééʼ yę́ę naaltsoos bikáaʼgo bee akʼedaʼashchínígíí łahgo áńdadoolnííł.
6 Háálá shidineʼé danilíinii shinááł doo yáʼáshóonii bikʼi hooleʼgo haʼátʼíísh bee haʼííníshníi doo? Doodaiiʼ shikʼéí danilíinii shinááł ábidiʼniildįįdgo haʼátʼíísh bee haʼííníshníi doo?
7 Ákohgo aláahgo naatʼáanii Ahazawííras éí asdzą́ą́ naatʼááh Esther áádóó Mórdiikai Jew dineʼé jílíinii áyidííniid, Jó, Héíman bikin áádóó bííʼ danilíinii Esther baa diníʼą́ áádóó bí tʼéí tsin bąąhjįʼ dah dahozhdiiloʼ, háálá Jew dineʼé naaztseed doo jinízin nítʼééʼ.
8 Áko tʼáá nił yáʼátʼéhígi átʼéego aláahgo naatʼáanii bízhiʼ binahjįʼ Jew dineʼé bá akʼeʼdííłchííł áádóó aláahgo naatʼáanii biyoostsah bee bikʼi nidííʼááł, háálá aláahgo naatʼáanii bízhiʼ binahjįʼ akʼeʼashchı̨́įgo aláahgo naatʼáanii biyoostsah bee bikʼi niʼítʼáanii diné doo łahgo ánáyódleʼ átʼée da.
9 Ákwii hoolzhishdą́ą́ʼ aláahgo naatʼáanii yá akʼedaʼałchíhígíí bíká áhodooʼniid, éí tááʼ nídízídígíí Síívan wolyéii binih, naadiin tááʼgóó yoołkáałgo Mórdiikai yee haadzíʼígíí tʼáá átʼé bikʼehgo Jew dineʼé bichʼįʼ áádóó akééʼdóó bídahólníihii áádóó aląąjįʼ naazíinii índa naatʼáanii danilíinii éí Índiya kéyahdóó Iithiyópiya kéyahjįʼ kéyah nahazʼą́ą́góó neeznádiindóó baʼaan naadiin tsostsʼidgo hazʼą́ yee bídahólníihgo, tʼáá bił nahazʼą́ą́góó tʼáá bí bizaad yee akʼeʼdaʼałchíii áádóó tʼáá bí bizaad yee yádaałtiʼii índa Jew dineʼé tʼáá bí bizaad yee akʼeʼdaʼałchíii áádóó tʼáá bí bizaad yee yádaałtiʼii bichʼįʼ yee akʼedaʼashchı̨́.
10 Ahazawííras aláahgo naatʼáanii nilíinii bízhiʼ binahjįʼ akʼedaʼashchı̨́įgo áádóó aláahgo naatʼáanii biyoostsah bee bikʼi nidaʼiistʼą́ągo aláahgo naatʼáanii bilı̨́ı̨́chogi bá neheezhchíinii chodaoʼíinii yee naalʼaʼí danilíinii naaltsoos adayiizyı̨́.
11 Aláahgo naatʼáanii éí Jew dineʼé tʼáá kin hadaasʼáhígi kéédahojitʼínígíí hweʼiinaʼ bichʼą́ą́h yádajiłtiʼ dooleeł biniyé áłah jidooleełgo naaltsoos bee hodaʼiisniiʼ, áádóó dadineʼé índa bee óhólnííh bił nahazʼą́ą́góó bidziilgo dah deíkáahii tʼáá bí áádóó badaʼáłchíní índa asdzání danilíinii éí Jew dineʼé atídadiilnííł danízinii ádazhdoołdįįłgo nidazdoołtsił índa nabídazhdoołdįįł áádóó binaalyeʼé bitsʼą́ą́ʼ nídahizhdoolahgo bee hoʼílniiʼ.
12 Tʼáá łaʼóo jı̨́ aláahgo naatʼáanii Ahazawííras bee bóhólníihgo bił nahazʼą́ą́góó tʼáá átʼé naakitsʼáadah nídízídígíí Éídar wolyéii binih, tááʼtsʼáadahgóó yoołkáałgo,
13 bee óhólníihgo bił nahazʼą́ą́góó dadineʼé tʼáá ałtso bichʼįʼ bee hazʼáanii bee akʼeʼashchínígíí béédaʼalyaago, diné bichʼįʼ baa dahojilneʼ nítʼééʼ: éí bijı̨́ Jew dineʼé danilíinii biʼanaʼí danilínígíí yichʼįʼ ádá kʼéédadiʼdooʼnííł biniyé hashtʼeʼádaʼdiilyaa.
14 Ákohgo naalʼaʼí danilíinii aláahgo naatʼáanii bilı̨́ı̨́ʼ dadilwoʼii éí aláahgo naatʼáanii tʼáá yee haadzíiʼii bikʼehgo haneetehee bił adahaazhjééʼ índa Shúshan kin haalʼáagi bee hazʼáanii baa dahóóneʼ.
15 Ákohgo Mórdiikai éí aláahgo naatʼáanii sidáhídóó dashdiiyáago naatʼá ééʼ bee nidaʼaldeehii yá nahalingo dadootłʼizhígíí áádóó daalgaígíí bee hazhdítʼéego áádóó óola naatʼá chʼah ayóó átʼéii hachʼahgo áádóó áłtsʼóózígo yisdizígíí bee naʼatʼą́hí łigaii ditsʼidgo ályaii áádóó naʼatʼą́hí tsídídééh nahalingo łichíʼígíí bee bił hazhdítʼéego Shúshangi kéédahatʼíinii hahodííłdláadgo bił dahóózhǫǫd.
16 Áko Jew dineʼé éí adinídíín bee dahólǫ́ áádóó bił dahózhǫ́ áádóó bee ił hózhóonii índa bee ił ídlíinii bee dahólǫ́.
17 Áko tʼáá haaʼída bił nahazʼą́ą́góó índa tʼáá kin hadaasʼáhígi aláahgo naatʼáanii yee hahaasdzíiʼii éí bibee hazʼáanii haa dahwiizleʼgo, Jew dineʼé bił dahózhǫ́ áádóó yaa bił dahózhǫ́ǫgo ídaʼazįįd yaa naaskaigo nizhónígo bee idaʼazʼą́. Áko tʼóó ahayóí dadineʼé kéyahgi kéédahatʼínígíí éí Jew dineʼé daazlı̨́ı̨́ʼ, háálá Jew dineʼé danilíinii yikʼee bił daayééʼ.
