Esther 9:1-32
9 Íídą́ą́ʼ naakitsʼáadah nídízídígíí Éídar wolyéii binih, tááʼtsʼáadahgóó yoołkáałgo, aláahgo naatʼáanii yee haadzíiʼii áádóó bibee hazʼáanii biʼdoolnííł kʼadę́ę baa hoolzhíishgo tʼáá éí bijı̨́ Jew dineʼé biʼanaʼí danilíinii bee bidziilii yee akʼidiyaa dadooleełgo bił chodahooʼı̨́ (nidi tʼáá éí bijı̨́ łahgo ályaago Jew dineʼé bee bidziilii yee biʼanaʼí dabijoołáhígíí yikʼidiyaa daazlı̨́ı̨́ʼ).
2 Aláahgo naatʼáanii Ahazawííras bee bóhólnííh bił nahazʼą́ą́góó tʼáá átʼé Jew dineʼé hakin hadaasʼáagi hodadiilkaalii nidazdoołtsił biniyé áłah dzizlı̨́ı̨́ʼ. Áko doo łaʼda hodiilkaal da; jó, tʼóó hakʼeʼíyéʼígi átʼéego diné bikʼidiyaa dajílı̨́ı̨́ nítʼééʼ.
3 Áko bee óhólnííh bił nahazʼą́ą́góó naatʼáanii danilíinii áádóó akééʼdóó bídahólníihii áádóó aląąjįʼ naazíinii índa aláahgo naatʼáanii yikééʼ góneʼ naazíinii éí Jew dineʼé yíká anájah nítʼééʼ, háálá Mórdiikai éí ayóó átʼéego yikʼee bił daayééʼ nítʼééʼ.
4 Háálá Mórdiikai éí aláahgo naatʼáanii bikin góneʼ ayóó átʼéii jílı̨́ı̨́ nítʼééʼ, áádóó bee óhólnííh bił nahazʼą́ą́góó tʼáá átʼé hwééhoʼdílzin, háálá díí diné Mórdiikai nilíinii tʼóó wózhǫ́ bidziil yileeł.
5 Kótʼéego Jew dineʼé danilíinii biʼanaʼí ałtso diltłish yee yił nidadziił haał índa nideiłtseedgo dabijoołáhígíí tʼáá bí danízinígi ádayííłʼįįd.
6 Shúshan kin haalʼáagi Jew dineʼé biʼanaʼí nideistseed índa ashdladi neeznádiingo ádeisdįįd.
7 Héíman hayeʼké neeználtʼé éí Parshandéítha, Dálfan, Aspéítha,
8 Poréítha, Adalíya, Arídatha,
9 Parmáshta, Árisai, Arídai índa Vaizéítha, díí ałtso nidahoʼdiztseed.
10 Hamiidéítha biyeʼ Héíman, Jew dineʼé biʼanaʼí jílíinii éí hayeʼké neeználtʼé ałtso nidabiʼdiztseed, nidi binaalyeʼé tʼáadoo yaa nídaastʼįįd da.
11 Éí bijı̨́ Shúshan kin haalʼáagi nidabiʼdiztseedígíí ánéelą́ʼígíí aláahgo naatʼáanii bił hóóneʼ.
12 Áko aláahgo naatʼáanii éí asdzą́ą́ naatʼááh Esther áyidííniid, Jew dineʼé éí Shúshangi ashdladi neeznádiingo diné nideistseedgo ádeisdįįd índa Héíman biyeʼké neeználtʼéhígíí ałdóʼ dayííghą́ą́ʼ. Ákohgo aláahgo naatʼáanii bee bóhólnííh nahazʼą́ą́góó haashąʼ dáátʼįįd? Kʼadshąʼ haʼátʼíí baa nínááʼiinikąąhgo éí naa didootʼááł? Índa haʼátʼíísh yííníkeedgo éí ná bihoolnííł dooleeł?
13 Áko Esther ázhdííniid, Aláahgo naatʼáanii bił hóshǫ́ǫ́ ládą́ą́ʼ, hániʼ Jew dineʼé Shúshangi kéédahatʼínígíí díí jı̨́ bee hazʼánígíí bikʼehgo yiską́ągo ałdóʼ badiʼdííʼááł, áádóó Héíman biyeʼké neeználtʼéhígíí bitsʼíís tsin bąąhjįʼ dah dahididoodloh.
14 Ákohgo aláahgo naatʼáanii Shúshangi tʼáá ákódoolníiłgo yee haadzííʼ, áko Héíman biyeʼké neeználtʼéhígíí bitsʼíís tsin bąąh dah dahidiidloʼ.
15 Jó, Jew dineʼé éí Shúshangi kéédahatʼínígíí Éídar yiziłígíí binih dı̨́ı̨́ʼtsʼáadahgóó yoołkáałgo áłah nilı̨́ı̨́ nítʼééʼ, áádóó Shúshangi táadi neeznádiingo diné nideistseed, nidi binaalyeʼé éí tʼáadoo yaa nídaastʼįįd da.
Ídaʼazįįd Púrim wolyéii
16 Aláahgo naatʼáanii bee bóhólníihgo bił nahazʼą́ą́góó Jew dineʼé áłah nídaadleehgo ádíchʼą́ą́h nidaaldzil nítʼééʼ, índa Jew dineʼé biʼanaʼí dabijoołxáii éí tsostsʼidiindóó baʼaan ashdladi míilgo nideistseed, nidi binaalyeʼé éí tʼáadoo yaa nídaastʼįįd da.
17 Éídar yiziłígíí binih tááʼtsʼáadahgóó yoołkáałgo ádahóótʼįįd. Áko dı̨́ı̨́ʼtsʼáadah yoołkááł góneʼ tʼóó háádaasyı̨́ı̨́ʼ áádóó éí bijı̨́ ídaʼazįįdgo índa bił dahózhǫ́ǫgo yaa naaskai.
18 Nidi tááʼtsʼáadah índa dı̨́ı̨́ʼtsʼáadahgóó yoołkáałgo Jew dineʼé éí Shúshan kin haalʼáadi áłah daazlı̨́ı̨́ʼ, índa ashdlaʼáadah yoołkááł góneʼ éí tʼóó háádaasyı̨́ı̨́ʼ índa tʼáá éí bijı̨́ ídaʼazįįdgo áádóó bił dahózhǫ́ǫgo yaa naaskai.
19 Éí bąą kin dah naazhjaaʼdóó Jew dineʼé kintahgóó kéédahatʼíinii Éídar yiziłígíí binih dı̨́ı̨́ʼtsʼáadahgóó yoołkáałgo bił dahózhǫ́ǫgo áádóó ídaʼazįįdgo yaa naaskai áádóó nizhónígo bee idaʼazʼą́, índa chʼiyáán ahidiníłnáago ałchʼįʼ ádayiilaa.
20 Áko Mórdiikai díí yee akʼeʼashchı̨́ áádóó aláahgo naatʼáanii Ahazawííras bee bóhólníihgo bił nahazʼą́ą́góó tʼáá átʼé Jew dineʼé tʼáá ałtso tʼáá ákódígi áádóó danízaadiígíí bichʼįʼ naaltsoos ájiilaa.
21 Áko éí hatahgóó Éídar yiziłígíí binih dı̨́ı̨́ʼtsʼáadahgóó yoołkáałgo índa ashdlaʼáadahgóó yoołkáałgo tʼáá nináháhááh bikʼeh tsʼídá ákódaatʼı̨́į dooleeł.
22 Éí yoołkáłígíí índa yiziłígíí binih Jew dineʼé biʼanaʼí nayídeisdįįdgo háádaasyı̨́ı̨́ʼ áádóó yíní yę́ę ił hózhǫ́ násdlı̨́ı̨́ʼ áádóó ídaʼazįįdgi bąąh yíníinii yę́ę hodiyin jı̨́ násdlı̨́ı̨́ʼ, áko ídaʼazįįdgo áádóó bił dahózhǫ́ǫgo naakiiską́ áádóó éí bijı̨́ chʼiyáán ahidiníłnáago ałchʼįʼ ádeiłʼı̨́įgo badahojoobáʼíii tʼáá jííkʼeh baa daʼjiiznil.
23 Ákohgo Jew dineʼé tʼáá ádaatʼínígi átʼéego áádóó Mórdiikai hachʼįʼ yee akʼeʼashchínígi átʼéego ákódajitʼı̨́įgo hodeeshzhiizh.
24 Háálá Éígag dineʼé Hamiidéítha biyeʼ Héíman éí Jew dineʼé tʼáá ałtso biʼanaʼí jílı̨́įgo, Jew dineʼé atízhdoolííł áádóó ázhdoołdįįł biniyé binahodzizʼą́ągo yááʼiiltʼeʼ Pur wolyéii baa nijizhʼeezh.
25 Nidi Esther éí aláahgo naatʼáanii bidááhdóó nizhníyáago aláahgo naatʼáanii díí yee haadzíiʼgo naaltsoos ádayiilaa: diné doo yáʼáshǫ́ǫ́góó binahatʼaʼ hólóonii, éí Jew dineʼé atíidoolíiłgo yinahazʼáanii bikʼijįʼ nídoodleeł áádóó bída índa biyeʼké tsin bąąhjįʼ dah dabidiʼdoodloh.
26 Éí bąą díí yoołkáłígíí éí yááʼiiltʼeʼ Pur wolyéii Púrim náánáosyeʼ. Áko díí naaltsoos biyiʼ saad tʼáá átʼé bee akʼeʼashchínígíí áádóó díí ádahóótʼįįdígíí índa bichʼįʼ ádahoodzaaígíí ałdóʼ dayiiłtsánígíí bąą,
27 Jew dineʼé díí yee nidahazʼą́ągo tʼáá bí ádá áádóó badaʼáłchíní índa hodahidiikáhígíí tʼáá ałtso ałdóʼ bá átʼé: éí bee akʼeʼashchínígíí bikʼehgo tʼáadoo niitʼéhí tʼáá nináháhááh bikʼeh naaki jı̨́ nídaʼałeeh doo,
28 áádóó díí yoołkáłígíí náás oochííłgóó tʼáá ałtso áádóó dahooghangóó tʼáá átʼé áádóó bee óhólníihgo bił nahazʼą́ą́góó tʼáá átʼé áádóó kin hadaasʼáágóó tʼáá átʼé, díí naaki jínígíí bééhániihgo bidaʼjiłʼı̨́į doo, áádóó éí díí naaki jı̨́ Púrim wolyéii éí Jew dineʼé bitahgóó doo nidootʼih da índa daʼahílchííhgóó bee bééhániihii doo yaa deidiyoonah da.
29 Ákohgo asdzą́ą́ naatʼááh Esther, Ábiheil bitsiʼ jílíinii, índa Mórdiikai éí Jew dineʼé nilı̨́įgo tʼáá ájíłah tʼáá íiyisí bee hóhólníihgo, naakidi aleeh góneʼ naaltsoos bidziil doogo Púrim baa hojilneʼgo naaltsoos ánáájiidlaa.
30 Aláahgo naatʼáanii Ahazawííras éí neeznádiindóó baʼaan naadiin tsostsʼidgo bee bóhólnííh bił nahazʼą́ą́góó, saad bee hashtʼehodítʼéii áádóó tʼáá aaníinii binahjįʼ Jew dineʼé tʼáá ałtso bichʼįʼ naaltsoos ádajiilaa.
31 Éí díí yoołkáłígíí Púrim wolyéii biʼéʼélʼįʼ doo biniyé néitʼaah; éí Jew dineʼé Mórdiikai áádóó asdzą́ą́ naatʼááh Esther tʼáá yee hachʼįʼ haadzíiʼii bikʼehgo áádóó tʼáá hó índa haʼáłchíní ahoolchíiłii ałdóʼ bił ádá nidahozhdeetʼánígíí bikʼehgo tʼáadoo adání índa atínáhodindleeh yaa ninákah doo.
32 Áko díí yoołkáłígíí Púrim wolyéii néitʼaah dooleełgo asdzą́ą́ naatʼááh Esther éí bidziilgo yee haadzííʼ, áko naaltsoos biyiʼ tʼáá ákótʼéego bee akʼeʼashchı̨́.
