Exodus 1:1-22
1 Díí Ízrel hayeʼké Ííjip kéyahgi yíkaígíí tʼááłáʼí nítínígo dabighandóó danilíinii Jéíkab hoł nidahaaznánígíí kódaolyé:
2 Rúben, Símiyan, Líívai, Júdah,
3 Ísakar, Zébyulan, Bénjamin,
4 Dan, Náftalai, Géed índa Ásher daolyé.
5 Jéíkab bitsʼą́ą́dóó ahiiʼ hááʼahiyoolchíiłii tsostsʼidiin yiltʼéé lá; Jóseph éí tʼáá íídą́ą́ʼ Ííjip kéyahgi jiníyá.
6 Áko Jóseph daaztsą́, áádóó bikʼisóó índa íídą́ą́ʼ daʼahílchíihii ałdóʼ ałtso daneezná.
7 Nidi Ízrel baʼáłchíní náás daʼahideeshchı̨́įgo tʼóó ahayóí silı̨́ı̨́ʼ áádóó ayóó átʼéego kʼeeʼąą deeshzhiizh, áko kʼeeʼąą dínéestʼą́ągo tʼáá íiyisí bidziil silı̨́ı̨́ʼ; éí kéyahgi kʼeeʼąą náneestʼą́.
8 Áko Ííjip kéyahgi Jóseph yę́ę doo yééhósinii aláahgo naatʼáanii náánásdlı̨́ı̨́ʼ.
9 Áko éí bidineʼé áyidííniid, Shoo, Ízrel dineʼé tʼóó ahóóyóí áádóó nihiláahgo dabidziil daazlı̨́ı̨́ʼ.
10 Haaʼíshąʼ baa dahoniidzą́ągo átʼée dooleełgi baa nídadíitʼįįł, doodago tʼáá kʼeeʼąą náánootʼı̨́įłgo áádóó nihichʼįʼ anaaʼ hazlı̨́įʼgo nihidaʼanaʼí yił ałchʼodadooʼniiłgo nihikʼiidoojah, shaʼshin, áko kéyahdóó ałtso yóóʼanídahidooʼnééł.
11 Éí bąą tʼáá íiyisí naanish yídahoniłkadgo yee hade ádahósin doo biniyé naanish binanitʼaʼí hachʼįʼ nideiznil, áko Páítham índa Rámsiiz hoolyéego Féro* bá yódí biniyé kin hadaasʼáago ádajiilaa.
12 Azhą́ tʼáá íiyisí atídajiłʼı̨́į nidi tʼóó yówehda kʼeeʼąą dínéestʼą́ áádóó tʼah yówehígo kʼeeʼąą níʼdeeshzhiizh. Áko Ííjip dineʼé danilíinii Ízrel dineʼé tʼáá íiyisí yikʼee niseekai.
13 Áko Ízrel dineʼé naanish yídeiniłkadgo ádił nideílníísh.
14 Áko naalteʼ dajílı̨́įgo tsʼídá yéego naʼanish yee hodaʼniighą́ą́ʼ; hashtłʼish áádóó bis ádajileʼgo índa dádaʼakʼehgóó naanish tʼáá ałʼąą baa nidajikai; tsʼídá yéego hondaanish yídahoniłkad.
15 Áádóó Ííjip dineʼé binanitʼaʼí éí Hííbrew dineʼé asdzání haʼniyóodii léiʼ yichʼįʼ haadzííʼ; éí asdzání łaʼ Shífrah wolyé índa łaʼ éí Púwa wolyé.
16 Áko ání, Asdzání haʼniyóodii nohłíinii, Hííbrew asdzání nidaʼiiłchíihgo ííshją́ą́ hadaohsíidgo ashkiigo éí nidaałtseed doo; atʼééd nilı̨́įgo tʼáá dahináa doo.
17 Nidi asdzání haʼniyóodii Diyin God yidísin, áko Ííjip binanitʼaʼí hachʼįʼ yee haadzíiʼii tʼáadoo bikʼehgo ádziidzaa da, áko ashiiké nidahachíhígíí tʼáá dahináago ájiilaa.
18 Ákohgo Ííjip binanitʼaʼí éí asdzání haʼniyóodii yíká iʼííłʼaʼgo áyidííniid, Haʼátʼéegoshąʼ kóhdzaa; ashiiké yázhí tʼáá dahináago óohłaa lá?
19 Asdzání haʼniyóodii Féro áyidííniid, Díí Hííbrew asdzání doo Ííjip asdzánígi ádaatʼée da, háálá éí dabiinéigo haʼniyóodii éí tʼáadoo yílyeedí tʼahaaʼgo nidaʼiiłchííh.
20 Áko Diyin God éí asdzání haʼniyóodii yikʼijisdliʼ índa diné kʼeeʼąą nídínéestʼą́ągo yéego bidziil silı̨́ı̨́ʼ.
21 Áko asdzání haʼniyóodii éí Diyin God yidísinígíí biniinaa haʼáłchíní hólǫ́ǫgo áhoolaa.
22 Áko Féro éí bidineʼé tʼáá ałtso yichʼįʼ haadzíiʼgo áyidííniid, Hííbrew ashkii nidahachíhígíí tooh biih dahołtłʼiid doo, nidi atʼéékégo éí bíniʼ dahináa dooleeł.
Footnotes
^ Féro jiníigo éí Ííjip kʼehjígo aláahgo naatʼáanii jiníigo óolyé.
