Exodus 10:1-29
10 Áko Bóhólníihii éí Mózes áyidííniid, Féro bił yah anáánídááh, háálá bijéí yíłtłʼis, áádóó bá nidaalʼaʼí ałdóʼ dabijéí dááłtłʼis, áko shibee éédahózinii binááł ádeeshłííł.
2 Áádóó niyeʼ nilíinii índa biyeʼ náánídlíinii díí bee bił hólneʼ doo: Ííjip kéyahgi baa niséyáhígíí índa bee éédahózinii hatahgóó ádaashłaaígíí, áko éí bee shí Bóhólníihii nishłı̨́įgo nił bééhózin doo.
3 Áko Mózes áádóó Éran éí Féro bił yah anáájootʼáazhgo ábizhdííniid, Bóhólníihii Hííbrew dineʼé biDiyin God kóní, Haa nízáagishąʼ shichʼįʼ sínílteeʼgo doo shichʼįʼ ayáhígo íʼdílnéeh da doo? Shidineʼé bééʼníłnííh, áko shichʼįʼ nidahałáa doo.
4 Éí doodaiiʼ, shidineʼé doo bééʼníłnííhgóó, jó, yiską́ągo nihił hahoodzojįʼ nihikʼijįʼ nahachagiitsoh biʼdeeshʼnih.
5 Áko kéyahgi tʼáá átʼéé nítʼééʼ nídooséełgo niʼígíí doo yitʼı̨́į da doo, áádóó haʼátʼíhída tʼáá daadzíʼígíí deidooyı̨́ı̨́ł; éí nílótsoh yiʼoh niʼnítseedígíí áádóó dahootsogóó tsin naazkaadígíí deidooyı̨́ı̨́ł.
6 Áko danihighan áádóó ná nidaalʼaʼí tʼáá ałtso dabighan índa Ííjip dineʼé tʼáá ałtso dabighan góneʼ hadadidoobı̨́ı̨́ł; hádą́ąʼda ákótʼéii doo ánéeh da nítʼééʼ. Danihizhéʼé áádóó dabizhéʼé dahiná yę́ędóó díí jı̨́įjįʼ tʼáadoo dayiiłtsą́ą da. Áko Féro bitsʼą́ąjįʼ nídzízyizgo chʼéédzídzá.
7 Áko Féro bá nidaalʼaʼí ádabidííniid, Haa nízáagishąʼ díí diné łoh yee nihidoolohgo bizahiikaah doo? Diné bééʼníłnííh, áko biDiyin God Bóhólníihii yichʼįʼ nidahałáa doo. Daʼ Ííjip kéyahgi hóóchxǫʼígíísh tʼahdoo nił bééhoozįįh da?
8 Féro bidááhdę́ę́ʼ Mózes índa Éran nináádeizhʼeezhgo ábidííniid, Nihílááh, Bóhólníihii nihiDiyin God bichʼįʼ nidahohłá, nidi háidíígíishąʼ ákǫ́ǫ́ dah didoonééł?
9 Áko Mózes ádííniid, Ániid nidaakaígíí áádóó hadaastihii áádóó danihiyeʼké áádóó danihitsiʼké áádóó danihidibé dah danéelkaadii índa danihibéégashii tʼáá bił nihidiiʼnééł, háálá hodílzingo áłah nídeiidleehgo Bóhólníihii bichʼįʼ nidahwiidláa doo.
10 Áko ánááhodooʼniid, Bóhólníihii nihił hólǫ́ǫgo áádóó nihí índa nihaʼáłchíní ádaałtsʼíísígíí bił nihiʼnishníihgo doo bohonéedzą́ą́góó átʼé. Ádaa ádahołyą́, háálá doo yáʼátʼéehii nihíniʼ danilı̨́.
11 Dooda lą́ą! Nihílááh, diné danohłínígíí tʼéiyá Bóhólníihii bichʼįʼ nidahohłá, jó, éí tʼéí danohsingo ádadohní. Áko Féro sidáhídóó chʼídahoneeshchą́ą́ʼ.
12 Áko Bóhólníihii éí Mózes áyidííniid, Nahachagiitsoh bíká Ííjip kéyah bikááʼgóó dah didiilnííh, áko Ííjip kéyah bikááʼgóó hadooldahgo kéyah bikáaʼgi naniseʼ éí nílótsoh yiʼoh niʼnítseedígíí ałtso deidooyı̨́ı̨́ł.
13 Áko Mózes bigish Ííjip kéyah yikʼijįʼgo yił dah didiilniiʼ, áko Bóhólníihii éí haʼaʼaahdę́ęʼgo shá bíighah áádóó tłʼééʼ bíighah kéyah bikááʼgóó níyolgo áyiilaa, áko hoosʼįįdgo haʼaʼaahdę́ęʼgo nahachagiitsoh bił deeyol.
14 Áko Ííjip kéyahgi tʼáá átʼéé nítʼééʼ nahachagiitsoh níłniiʼ, áko Ííjip tʼáá nahazʼą́ą́ nítʼééʼ bikáaʼgi hazlı̨́ı̨́ʼ; hádą́ąʼda doo ákótʼéego nahachagiitsoh haleeh da nítʼééʼ, áádóó doo ákónáádooʼníił da.
15 Háálá kéyah bikááʼ tʼáá átʼéé bee yíłhéél, áko kéyah bikáaʼgi nílótsoh éí naniseʼ áádóó tsin naazkaadii bineestʼąʼ yiʼoh niinítseedígíí ałtso dayííyą́ą́ʼ, índa Ííjip kéyah bikááʼ tʼáá átʼéé nítʼééʼ chʼil áádóó tsin naazkaadii índa naniseʼ daditłéeʼii doo łaʼ yidzíiʼ da.
16 Ákohgo Féro éí Mózes áádóó Éran tsı̨́įłgo yíká iʼííłʼaʼgo ádííniidgo ání, Bóhólníihii nihiDiyin God bichʼįʼ índa nihí nihichʼįʼ ádił asésiih.
17 Éí bąą kʼad íítʼįįdii shá yóóʼanídidííʼáałgo baa nánooshkąąh; ádił lá asésiih ni, áádóó Bóhólníihii niDiyin God díí tʼéiyá shá baa néidííkąął: díí aninéhígíí shitsʼą́ąjįʼ nahgóó kwíidoolííł.
18 Áko Féro bitsʼą́ą́dóó chʼízhníyáago Bóhólníihii níjooskan.
19 Áko Bóhólníihii éí eʼeʼaahdę́ęʼgo níyol ayóó ábóodziilgo níyolgo áyiilaago Tónteel Łichíiʼii biyiʼ góneʼ nahachagiitsoh ałtso bił ííyol, áko Ííjip hazʼą́ągi nahachagiitsoh doo łaʼ yidzíiʼ da.
20 Nidi Bóhólníihii éí Féro bijéí yiyííłtłʼisgo tʼáadoo Ízrel dineʼé yééʼníłniiʼ da.
Chahałheeł bee atíʼályaaígíí
21 Áko Bóhólníihii éí Mózes ánéidooʼniid, Yá bichʼįʼgo yadidiilnííh, áko Ííjip kéyah bikáaʼgi chahałheeł diłhiłii hakʼiildoh nahalingo chahodoołhił.
22 Áko Mózes yá bichʼįʼgo yadidiilniiʼgo Ííjip kéyahgi tʼáá átʼéé nítʼééʼ tágí jı̨́ tʼáá íiyisí chahodinoolyéél.
23 Doo daʼahijootʼı̨́į da; tʼáadoo nidi nídazhdiiʼnéhí tááʼ yiską́, nidi Ízrel dineʼé dabighan góneʼ tʼéí dahoolʼin.
24 Áko Féro éí Mózes yíká anááʼííłʼaʼgo ádííniid, Nihílááh, Bóhólníihii bichʼįʼ nidahohłá, nidi nihidibé nidanilkaadii índa nihibéégashii bíniʼ tʼáá daʼakǫ́ǫgo nihadaʼáłchíní tʼéiyá bił wohnééł.
25 Áko Mózes ádííniid, Náádahidiilnihígíí índa didlidgo náádahidiilnihígíí tʼáá bił nihiʼníłnííh, háálá éí Bóhólníihii nihiDiyin God bichʼįʼ náádahidiilnih.
26 Danihilı̨́ı̨́ʼ tʼáá bił yiiʼnéeł doo; tʼááłáʼí nidi doo łaʼ bitsʼą́ą́ʼ dah didiiʼnéeł da, háálá éí bee Bóhólníihii nihiDiyin God bichʼįʼ nidahwiidlá. Bóhólníihii bichʼįʼ náádahidiilnihígíí doo nihił béédahózin da; áadi niikaigo índa nihił béédahodoozįįł.
27 Nidi Bóhólníihii éí Féro bijéí yiyííłtłʼisgo doo hwééʼółnííh átʼée da.
28 Áko Féro áhodííniid, Níwohjįʼ shitsʼánínááh; hazhóʼó ádaa áhólyą́; doo nááshiidííltséeł da, háálá nááshiiniltsą́ bijı̨́ dadíítsaał.
29 Áko Mózes ádííniid, Tʼáá ákóneʼ háínídzííʼ; shí doo náániideestséeł da.
