Exodus 12:1-51
12 Áko Bóhólníihii éí Mózes áádóó Éran kwííłníigo Ííjip kéyahgi yichʼįʼ haadzííʼ,
2 Díí yiziłígíí bee nihá hahodoolzhish; éí tʼáá nináháhááh bikʼeh alą́ąjįʼ nínádíziʼígíí nihá átʼée dooleeł.
3 Ízrel dineʼé dah yinéłígíí bichʼįʼ haohdziihgo kódidoohniił, Díí yiziłígíí neeznáá jı̨́ı̨́ góneʼ azhéʼé jílíinii haghandóó danilíinii bá dibé yázhí łaʼ nízhdidoołtééł.
4 Áko éí hooghanídóó dibé yázhí bitsįʼ halááh neelʼą́ągo niʼąąjí bighanígíí bił ázhnéeltʼeʼígíí índa haa néelą́ą́ʼ nídajidı̨́hígíí bikʼehgo dibé yázhí bitsįʼ ałtaa dazhdooltsoł.
5 Nidibé yázhí bikąʼii łaʼ binááhaí hadaałtʼéii; dibé éí doodaiiʼ tłʼízí bitahdę́ę́ʼ nídidoohdzı̨́ı̨́s.
6 Tʼáá éí yiziłígíí dı̨́ı̨́ʼtsʼáadah ayííłką́ąjįʼ baa ádahołyą́ą doo. Áko Ízrel dineʼé tʼáá ałtso iʼííʼą́ągo dibé yázhí nideidoołtsił.
7 Haghan biyiʼ dazhdooyı̨́łígíí bichʼéʼétiin siláii ałtsʼą́ą́hjí áádóó naadasitánígi dibé yázhí bidił bee dazhdoodlish.
8 Tʼáá éí bitłʼééʼ atsįʼígíí tsííkááʼ sitʼéego dazhdooyı̨́ı̨́ł, índa dííkʼǫsh tʼáágééd bááh ályaii áádóó chʼil dadíchʼíʼígíí bił dazhdooyı̨́ı̨́ł.
9 Tʼáá tʼéehgo éí doo dadoohsı̨́įł da; shibéezhgo ałdóʼ dooda; bitsiitsʼiin áádóó bijáád índa bitsą́siláii tʼáá átʼé kǫʼ bee daaztʼéego tʼéiyá dadoohsı̨́ı̨́ł.
10 Tʼááká abíníjįʼ łaʼ chʼínółnééh lágo; abíníjįʼ łaʼ chʼínííłnaʼgo tʼóó dadidoohłił.
11 Kótʼéego dadoohsı̨́ı̨́ł: tʼáá áká dasoołzaazgo, tʼáá kééh nisooʼeezgo áádóó danihigish nihílákʼee naaztą́ągo dadoohsı̨́ı̨́ł áádóó tsı̨́įłgo daʼdoohsı̨́ı̨́ł; éí Bóhólníihii biʼatisʼadeesdzá átʼé.
12 Háálá díí tłʼééʼ Ííjip kéyah biyiʼgóó chʼídeeshááł, áko diné alą́ąjįʼ bá nidahaazhchíinii áádóó naaldlooshii alą́ąjįʼ nidahaazhchíinii ałtso ádeeshdįįł, índa Ííjip kéyahgi diyin dabidiʼníinii ałtso tʼáá óoshłeʼ góneʼ bá nihodiyeeshʼááł. Shí Bóhólníihii nishłı̨́.
13 Kin biiʼ nahísóotáanii dił bee daashdlishii bee nihichʼįʼ ééhózin doo, áko shí éí dił deiłtsą́ągo tʼóó nihitis deeshááł, áko Ííjip kéyah bikááʼ naałniih bee atíʼéshʼíinii doo bee atínihideeshłíiłgo ánihideeshdįįł da.
14 Áko éí tʼáá łaʼa jínígo néitʼaahígíí nihá bééhániihii átʼée doo, áádóó Bóhólníihii bichʼįʼgo hodílzingo áłah náhdleehígíí náás daʼahíínółchííhgóó nídaołʼaah doo; díí hodílzingo áłah náhdleeh nídaołʼaahígíí bikʼeh hoogáałgo ahoolʼáa doo.
15 Tsostsʼid néílkáahjįʼ dííkʼǫsh tʼáágééd bááh ályaii nídaohdı̨́įh doo; baa haʼaldééh góneʼ éí danihighan biyiʼdóó dííkʼǫsh nahgóó kónídaałʼįįh doo, háálá łaʼ éí hahoolzhiizhdóó tsostsʼid jı̨́įjįʼ dííkʼǫsh bił bááh ályaii jííyą́ʼígíí éí Ízrel dineʼé bitsʼą́ąjįʼ hodiʼyoolyééł.
16 Átsé jínígíí áádóó tsostsʼid jínígíí éí hodiyingo áłah náʼádleeh baa nináʼáldah doo; éí bijı̨́ doo niʼdoonish da; tʼáá hazhóʼó tʼááłáʼí jinítínígo haʼátʼíhída dajiyą́ą dooleełígíí éí tʼéiyá hashtʼéédajiilʼįįh doo.
17 Áádóó hodílzingo áłah náhdleeh baa nináhkahgi dííkʼǫsh tʼáágééd bááh ályaii nídaohdı̨́įh doo, háálá tʼáá éí bijı̨́ı̨́dą́ą́ʼ Ííjip kéyahdę́ę́ʼ nidineʼé dah deínéehii chʼíníʼeezh niʼ. Éí bąą łaʼa jı̨́ hodílzingo áłah náhdleeh góneʼ náás daʼahíínółchííhgóó bikʼeh hoogáałgo ahoolʼáa doo.
18 Átsé nídízídígíí dı̨́ı̨́ʼtsʼáadahgóó yoołkáałgo iʼííʼą́ągo dííkʼǫsh tʼáágééd bááh ályaii nídaodı̨́įh doo; éí naadiin łaʼgóó yoołkáałjįʼ iʼííʼą́ąjįʼ ákótʼée doo.
19 Háálá tsostsʼid néílkáahjįʼ danihighan góneʼ dííkʼǫsh doo łaʼ siʼą́ą da doo, háálá tʼáá háiida dííkʼǫsh bił bááh ályaii jííyą́ʼígíí éí Ízrel dineʼé dah deínéehii bitsʼą́ąjįʼ hodiʼyoolyééł; déʼéyóní, doodaiiʼ kéyahgi Ízrel dineʼé nilı̨́įgo yizhchı̨́į nidi doo bił hoʼdóltaʼ da doo.
20 Haʼátʼíhída dííkʼǫsh bił ályaii doo nídaohdı̨́įh da doo; tʼáá ałtsogóó kéédahohtʼı̨́įgi dííkʼǫsh tʼáágééd bááh ályaii tʼéí nídaohdı̨́įh doo.
21 Mózes éí Ízrel dineʼé yá aląąjįʼ naazíinii bíká ázhdííniidgo ábijiní, Tʼáá nihí dibé yázhí ádá átsʼá dahohníiłgo atisʼadeesdzá ádoolníłígíí biniyé nihaʼáłchíní ánéeltʼeʼígíí bikʼehgo dibé yázhí nidadoołtsił.
22 Chʼil hísap wolyéhígíí nídadidoołjołgo łeetsʼaaʼ háámazí biyiʼjįʼ dił yadahooziidígíí chʼéʼétiin siláii ałtsʼą́ą́hjí áádóó naadasitánígi bee daashdlish doo. Hoosʼįįdjįʼ nihí tʼáadoo tłʼóóʼgóó nidaahkaí.
23 Háálá Bóhólníihii éí Ííjip dineʼé bitahgóó hadidoogáałgo atíidoolííł, áko chʼéʼétiin siláii ałtsʼą́ą́hjí áádóó naadasitánígi bąąh Bóhólníihii éí dił yiyiiłtsą́ągo tʼóó chʼéʼétiin yitis doogááł, áádóó danihighan góneʼ naʼałtseedii nihił yah adoogáałgo łaʼ atínihidoolíłígíí doo yadiʼdooʼáał da.
24 Díí hodílzingo áłah náhdleeh nídaołʼaahígíí bikʼeh hoogáałii nihá áádóó nihiyeʼké bá átʼéego ahoolʼáa doo.
25 Ákódzaago Bóhólníihii tʼáá bí kéyah baa noohkaidi nihaididooʼáałgo yee nihoníʼáanii áadi díí nahadlá nídaołʼaah doo.
26 Áko nihadaʼáłchíní yínídanihídíłkid doo, áko ádanihididoohniił, Haʼátʼíísh biniyé kótʼéego nidahohłá?
27 Áko ádabididoohniił, Díí nááʼiiniihii éí Bóhólníihii biʼatisʼadeesdzá bee bééhániihii átʼé, jó, bí éí Ííjip kéyahgi Ízrel dineʼé yitis deeyá; Ííjip dineʼé tʼéí íísdįįd yę́ędą́ą́ʼ nihí dah yiikahgi éí deidzííʼ. Áko diné yaa ádaadzaago nidahasá.
28 Ízrel dineʼé dah diikaigo ákódaadzaa. Bóhólníihii éí Mózes áádóó Éran yichʼįʼ yee haadzíʼígi ádaadzaa.
Akéeʼdi beʼatíʼályaaígíí alą́ąjįʼ daazhchíinii daneezná
29 Áko tłʼéʼííłníiʼgo Bóhólníihii éí Ííjip kéyahgi alą́ąjįʼ nidahaazhchíinii ałtso íísdįįd; Féro éí habikááʼdóó nahatʼáii bikááʼ dah dzizdáago há alą́ąjįʼ yizhchíinii bee hahoolʼáádóó yaago náʼáyaaí góyaa awáalyaa sidáhígíí bá alą́ąjįʼ yizhchíinii bee nihoolʼáajįʼ ałtso íísdįįd, índa alı̨́ı̨́ʼ ádaatʼéii alą́ąjįʼ nidahaazhchíinii ałtso íísdįįd.
30 Áko tʼáá éí bitłʼééʼ Féro áádóó bá nidaalʼaʼí índa Ííjip dineʼé tʼáá ałtso nídiijéeʼgo ayóó íitsʼaʼgo Ííjip kéyahgi cha hááyá, háálá tʼáá dahooghanígi łaʼ dazneezná.
31 Áko tʼáá éí bitłʼééʼ Féro éí Mózes áádóó Éran yíká áníigo ání, Nídoohjeehgo nihílááh; shidineʼé bitahdóó nihí áádóó Ízrel dineʼé bił dah doohnéehgo tʼáá ádóhnínígi átʼéego Bóhólníihii bichʼįʼ nidahohłá.
32 Nihidibé áádóó nihibéégashii nidanołkaadígíí danóołkaad; ádadooniidígi átʼéego ádaohnééh, áádóó shikʼijiidoohdliił.
33 Áádóó Ííjip dineʼé honeetehee éí kéyahdóó tʼóó hatsxı̨́įłgo diné yidaʼasʼniiʼ, háálá ádaaní, Nihí ałdóʼ tʼáá áníiltso dadíníiʼnééł, shaʼshin.
34 Diné éí hataosʼniiʼ tʼah doo dííkʼǫsh bił álnéhígíí hééł ádajiilaago dah dazhdiijaaʼ; biyiʼ táádaʼooʼnihí éí dahaʼééʼ bee ałchʼįʼ bedaʼastłʼǫ́ǫgo dah dazhdiiłjid.
35 Ízrel dineʼé éí Mózes bizaad yikʼeh dahóółʼįįdgo béésh łigaii áádóó óola yódí ádaatʼéii índa éeʼda éí Ííjip dineʼé bídajííkeed.
36 Áádóó Bóhólníihii éí Ízrel dineʼé bichʼohaʼnéego Ííjip dineʼé baa dajoobaʼgo ábiilaa, áko bídajííkeedígíí haa dayiiznil. Kódzaago Ííjip dineʼé tʼáá ákohígo ádajiilaa.
Ízrel dineʼé Ííjip kéyahdóó chʼíníná
37 Áádóó Ízrel dineʼé éí Rámsiiz hoolyéédóó Sákath hoolyéejįʼ jiníná; diné tʼéiyágo éí hastą́ądi neeznádiindi mííl ánéelą́ą́ʼ; áłchíní tʼáadoo bił ééltaʼgóogo.
38 Tʼóó ahojíyóí dineʼé ałʼąą ádajítʼéii ałdóʼ bił jiníná, áádóó dahalı̨́ı̨́ʼ tʼóó adahayóigo dibé índa béégashii dazhnéełkaad.
39 Ííjip kéyahdóó taosʼniiʼ dah dazhdiijaaʼígíí éí dííkʼǫsh tʼáágééd bááh ádajiilaa; taosʼniiʼígíí doo dííkʼǫsh bił ályaa da nítʼééʼ, háálá Ííjip kéyahdóó tʼáadoo tʼah ílíní chʼíhodiʼneelkaad; tʼáadoo yistʼéí ádá ádajilnéhí.
40 Éí Ízrel dineʼé Ííjip kéyahgi tʼóó átsééd kéédahatʼı̨́įgo dı̨́įdi neeznádiindóó baʼaan tádiin nááhai.
41 Dı̨́įdi neeznádiindóó baʼaan tádiin náháhígíí ałtso nááhaigo Ííjip kéyahdóó Bóhólníihii bidineʼé dah deínéehii chʼídahaazná.
42 Tʼáá éí bitłʼééʼ Bóhólníihii éí Ííjip kéyahdóó chʼíhoníʼeezh; tʼáá éí bitłʼééʼ áhóótʼįįdíjįʼ anáhwiilzhíishgo Ízrel dineʼé náás daʼahílchííhgóó Bóhólníihii chʼíbiníʼeezhígíí yéédaalniihgo hodílzingo áłah nádleeh nídayiilʼaah doo.
Atisʼadeesdzá bee bééhániihii náásgóó bikʼehgo baa nááʼáldah doo
43 Áko Bóhólníihii éí Mózes áádóó Éran áyidííniid, Díí atisʼadeesdzá bééhániihii néitʼaahígíí bikʼeh hoogáałii átʼé: déʼéyóní doo łaʼ atah adooyı̨́įł da.
44 Nidi diné tʼááłáʼí jinítínígo hanaalteʼ éí béeso bee nidziisniiʼii bąąh náhidínóolgishgo índa atah náʼádı̨́įh doo.
45 Náánáłahdę́ę́ʼ naagháhígíí índa ideenáago naalnishii doo atah adooyı̨́įł da.
46 Tʼááłáʼí hooghaní góneʼ tʼéí nídaahdı̨́įh doo; éí hooghandóó atsįʼ doo łaʼ chʼídadoohʼáał da; tsʼinígíí nidi doo łaʼ kʼídadoohtih da.
47 Ízrel dineʼé tʼáá ádzíłtso tʼáá ákónídaʼjiilʼįįh dooleeł.
48 Déʼéyóní łaʼ nihił yikah ládą́ą́ʼ Bóhólníihii bichʼįʼ atisʼadeesdzá bééhániihgo hodílzingo áłah náʼádleeh néitʼaahígíí yinízingo hániʼdii bighandóó diné danilínígíí tʼáá ałtso bąąh nídahidínóolgish áádóó bíniʼdii yee atah níyáago hodílzingo áłah náʼádleeh náyiiłʼaah doo, índa kéyahgi Ízrel dineʼé biʼdizhchíiniigi ájítʼée doo, nidi doo bąąh nídahineeshgizhii éí doo łaʼ atah dazhʼdooyı̨́įł da.
49 Kéyahgi Ízrel dineʼé nilı̨́įgo hoʼdizhchíinii índa nihitahgi déʼéyóní éí bee hazʼáanii tʼááłáʼíígíí bikʼehgo hodílzingo áłah náʼádleeh níjiilʼaah doo.
50 Áko Ízrel dineʼé tʼáá ałtso ákódaadzaa; Bóhólníihii éí Mózes áádóó Éran yichʼįʼ yee haadzíʼígíí yidaʼiilaa.
51 Áádóó tʼáá éí bijı̨́ Bóhólníihii éí Ízrel dineʼé dah deínéehii Ííjip kéyahdóó chʼíiníʼeezh.
